Iesu be Gologota ai Ia Mase

Dubu gunalaia taudia ese Iesu be gavana ena ruma dekenai idia abia lao. Pilato ese idia ia nanadaia: ‘Inai tauna be dahaka kerere ia karaia?’ Idia haere: ‘Ia gwau ia be king!’ Pilato ese Iesu ia nanadaia: “Oi be Iuda taudia edia King, a?” Iesu ia haere: “Lauegu Basileia be inai tanobada ena lasi.”

Bena Pilato ese Galilea ena lohia tauna Heroda dekenai Iesu ia siaia lao, bema ia ese Iesu dekenai kerere ta ia davaria diba. Heroda ese Iesu dekenai kerere ta ia davaria lasi dainai Pilato dekenai ia siaia giroa. Bena Pilato ese taunimanima ia hamaoroa: ‘Lau bona Heroda ese unai tauna dekenai kerere ta ai davaria lasi. Ia do lau ruhaia.’ Hutuma idia boiboi: ‘Hamasea! Hamasea!’ Tuari taudia ese Iesu idia kwadia bona kanudia, bona idia botaia. Ginigini amo kwara gauna ta idia karaia bona ena kwarana ai idia atoa, bona idia hevaseha, idia gwau: ‘Dina namona, Iuda taudia edia King.’ Pilato ese hutuma ia hamaoroa lou: ‘Inai tauna dekenai kerere ta lau davaria lasi.’ To idia boiboi: “Au dekenai kokoa kau!” Unai dainai Pilato ese Iesu ia henia idia hamasea totona.

Gabu ta ladana Gologota dekenai Iesu idia abia lao, au ai ia idia kokoa kau, bona idia abia isi. Iesu ia guriguri: ‘Tamana e, edia dika oi gwauatao, badina idia diba lasi dahaka idia karaia noho.’ Taunimanima ese Iesu idia kirikirilaia, idia gwau: ‘Bema oi be Dirava ena Natuna, au amo oi diho mai! Sibona oi hamauria.’

Ia badinai idia tauadae kara dika tauna ta be Iesu dekenai ia gwau: “Emu Basileia ai oi vareai neganai, mani lau oi laloa.” Iesu be ia dekenai ia gwauhamata: “Oi be lau ida Paradaiso ai do ita noho.” Adorahi ai, hora toi lalonai dibura ese gabu ibounai ia koua. Hahediba taudia haida, Iesu ena sinana Maria danu, be hisihisi auna badinai idia gini. Iesu ese Ioane ia hamaoroa Maria be ena sinana bamona do ia naria.

Bena Iesu ia gwau: “Lau hagugurua vadaeni!” Iena kwarana ia atoa diho bona hahodi ginigabena ia abia. Unai nega ai, tano mareremarere goadana ia vara. Dubu helaga ai, Helaga bona Helaga Herea Gabuna huanai ia noho keten be kahana rua dekenai ia darea. Ami ofesa ia gwau: ‘Inai be Dirava ena Natuna.’