Revareva ta Hakaua Oreana Amo

Duahia Taudia E:

Iehova ita tomadiho henia taudia be iena Hereva, Baibel ita lalokau henia. Ita diba momokani Baibel be histori dalanai ia maoro, bona iseda mauri ai ena hakaua herevadia ita abidadama henia diba, bona Baibel ese ia hahedinaraia Iehova be taunimanima ia lalokau henia. (Salamo 119:105; Luka 1:3; 1 Ioane 4:19) Ita ura bada ma haida ita durua Baibel lalonai ia noho Hereva momokani idia dibaia. Unai dainai, mai moale bada ida inai buka ladana, “Baibel amo Do Oi Dibaia Gaudia” ai halasia. Mani inai buka ena kahana haida ai herevalaia.

Inai buka ena kahana momo be natudia totona ai hegaegaelaia. To danu, taunimanima badadia idia ura Baibel amo diba idia abia. Idia durua totona inai buka ita gaukaralaia diba. Bona Baibel be taunimanima ibounai totona dainai, inai buka ena leseni riviulaia karana amo heduru namona do ita abia bona ita dekenai moale korikorina do ia henia.

Inai buka ena sivarai ibounai be Baibel amo idia abia, Dirava ese gau ibounai ia havaraia negana amo taunimanima edia mauri sivaraina ia herevalaia. Ai ura Baibel ena sivarai be duahia taudia ese idia lalopararalaia, unai dainai auka lasi dalana ai bona idia vara nega hegeregerena ai torea.

Inai buka ese Baibel ena sivarai sibona ia gwauraia lasi. To buka ai idia noho hereva bona laulau idia hegaegae dalana ese sivarai ia hamauria bona unai sivarai lalonai idia noho taudia edia hemami korikori ia hahedinaraia danu.

Inai buka amo do ita diba, Baibel ese Iehova idia kamonai henia bona ia idia kamonai henia lasi taudia edia sivarai momo ia herevalaia. Bona ita ia hagoadaia edia sivarai amo diba ita abia totona. (Roma 15:4; 1 Korinto 10:6) Inai buka ena kahana ibounai be 14. Unai kahana ta ta ai ita dibaia leseni ena point badadia idia noho.

Bema oi be tama o sina ta, emu natuna ida leseni oi duahia bona laulau oi herevalaia. Bena emu natuna ida unai leseni totona idia abia sivarai ena Baibel siri umui duahia. Emu natuna oi durua Baibel ai ia duahia sivarai be inai buka ena leseni ida ia hahegeregerea. Taunimanima badadia durua neganai, unai dala tamona umui badinaia, unai amo idia ese Baibel ena hereva badadia do idia lalopararalaia.

Ai ura inai buka ese kudou maoro taudia—matamata bona buruka—do ia durua Dirava ena Hereva idia dibaia bona edia mauri ai idia badinaia totona. Unai amo idia danu be Iehova ena ruma bese ena memba ta ai do idia lao bona Iehova idia tomadiho henia diba.