LESENI 07

Baibel ese Iehova be Edena Bamona Ia Herevalaia?

Printaia Gauna

Iehova Dirava be edena bamona oi laloa? Oi laloa ia be ataiai momokani, bona oi amo ia daudau, hisiu edia daudau hegeregerena, a? Eiava oi laloa iena siahu be bada herea bona Ia oi tura henia diba lasi, a? Iehova be edena bamona Diravana? Iehova be iena Hereva, Baibel amo, ena kara haida bona oi ia laloa bada karana ia hahedinaraia.

1. Dahaka dainai Dirava ita itaia diba lasi?

“Dirava be Lauma.” (Ioane 4:24) Iehova be ita taunimanima bamona lasi. Ia be Lauma ta guba dekenai, bona ita itaia diba lasi gabuna ai ia noho.

2. Iehova ena kara haida be dahaka?

Iehova ita itaia diba lasi, to ia noho. Ia ita dibaia bona ena kara namodia dainai, ia ita lalokau henia. Baibel ia gwau: “Iehova be kara maoromaoro ia ura henia, bona ia idia badinaia taudia do ia rakatania lasi.” (Salamo 37:28) Danu, Dirava be hisihisi idia davaria taudia dekenai, “lalokau bona hebogahisi bada” karana ia hahedinaraia. (Iamesi 5:11) “Iehova be lalometau taudia kahirakahira ia noho. Ia ese lalomanoka taudia ia hamauria noho.” (Salamo 34:18, futnout) Bona namona be oi diba, iseda kara dainai Iehova do ia moale eiava ia lalohisihisi diba. Kara dika ia karaia tauna ese Iehova ena lalona ia hahisia. (Salamo 78:40, 41) To kara maoromaoro ia karaia tauna ese Iehova ia hamoalea.—Aonega Herevadia 27:11 duahia.

3. Edena dala ai Iehova ia hahedinaraia ita ia lalokau henia?

Iehova ena kara badana be lalokau. Oibe, “Dirava be lalokau.” (1 Ioane 4:8) Iehova ese Baibel bona ia havaraia gaudia amo iena lalokau ia hahedinaraia. (Kara 14:17 duahia.) Dirava ese ita ia havaraia dalana mani oi laloa. Hegeregere, kala idauidau ita itaia, miusiki namodia ita kamonai, bona aniani namodia ita mamia diba. Ia ura mauri ita moalelaia.

DIBA MA HAIDA ABIA

Iehova ese gau idauidau ia havaraia dalana oi dibaia. Bena do oi itaia Iehova ese edena dala ai ena kara namodia ia hahedinaraia.

4. Lauma helaga—Dirava ena gaukara siahuna

Laulau: Dirava ena lauma helaga ese ia hagugurua gaudia. 1. Planeti bona iunives. 2. Baibel torea tauna ta ese lokua toretore ai Dirava ena lalohadai ia torea.

Iseda imana amo gaukara idauidau ita karaia hegeregerena, Iehova ese iena lauma helaga ia gaukaralaia. Baibel ese ia hahedinaraia lauma helaga be Dirava ena gaukara siahuna bona unai ia gaukaralaia ena gaukara ia hagugurua totona, to ia be tau ta lasi. Luka 11:13 bona Kara 2:17 duahia, bena inai henanadai herevalaia:

Dirava ese ena lauma helaga be ia dekenai idia noinoi taudia latanai do ia “bubua.” Vadaeni dahaka oi laloa, lauma helaga be tau ta, eiava ia be Dirava ena gaukara siahuna? Dahaka dainai unai bamona oi hereva?

Iehova ese lauma helaga ia gaukaralaia gaukara idauidau ia hagugurua totona. Salamo 33:6 bona 2 Petero 1:20, 21 duahia, bena inai henanadai herevalaia:

Edena dala haida ai Iehova ese iena lauma helaga ia gaukaralaia?

5. Iehova be mai ena kara namodia

Mose be Dirava ia hesiai henia abidadama tauna ta, to ia ura iena Havaraia Tauna ia diba namonamo. Unai dainai Mose be Dirava dekenai ia gwau: “Mani emu dala be lau dekenai oi hadibaia, unai amo oi do lau diba.” (Esodo 33:13) Bena Iehova ese ena kara namodia be Mose dekenai ia gwauraia hedinarai. Esodo 34:4-6 duahia, bena inai henanadai herevalaia:

Iehova be Mose dekenai edena kara haida ia hahedinaraia?
Iehova ena kara namodia amo edena oi ura henia bada?

6. Iehova be taunimanima ia laloa bada

Aigupito ai, Dirava ena taunimanima, Israela taudia, be igui hesiai taudia. Hisihisi idia davaria neganai, Iehova ena hemami be edena bamona? AUDIO oi kamonai eiava Esodo 3:1-10 duahia. Bena inai henanadai herevalaia.

AUDIO: Iehova ese Ena Taunimanima Ia Hamauria (2:45)

Unai sivarai amo dahaka oi dibaia? Taunimanima be hisihisi idia davaria neganai, Iehova ena hemami be edena bamona?—Siri 7 bona 8 itaia.
Oi laloa Iehova ia ura bada taunimanima ia durua bona unai ia karaia diba, a? Dahaka dainai unai bamona oi hereva?