LESENI 55
Emu Kongrigeisen Oi Durua
Tanobada ibounai dekenai, taunimanima milioni momo be mai moale ida kongrigeisen tausen momo lalodiai Iehova idia tomadiho henia. Idia abia hahediba bona hakaua herevadia dainai idia moale, bona mai ura bada ida dala idauidau ai kongrigeisen idia durua. Emu kongrigeisen dekenai emu hemami be unai bamona, a?
1. Edena dala haida ai emu nega bona goada oi gaukaralaia diba kongrigeisen oi durua totona?
Ita ibounai be kongrigeisen ita durua diba. Hegeregere, emu kongrigeisen ai haida be idia buruka o gorere, a? Hebou dekenai oi abidia lao diba, a? Eiava sitoa amo edia ura gaudia oi hoia, o edia ruma gaukara haida oi karaia diba, a? (Iamesi 1:27 duahia.) Danu, iseda Kingdom Hall ita hagoevaia bona hanamoa totona ita volantia diba. Ta ese ita ia doria lasi unai ita karaia totona. To, Dirava bona tadikaka taihu ita lalokau henidia dainai, “mai moale ida” sibona ita henia.—Salamo 110:3.
Idia bapatiso Witnes taudia be dala ma haida ai kongrigeisen idia durua diba. Bema tadikaka be idia hegeregere, hesiai taudia eiava elda taudia edia maduna idia abia diba. Tadikaka bona taihu be painia taudia ai idia lao bona haroro gaukara idia durua diba. Witnes taudia haida be Kingdom Hall haginia gaukara idia durua, eiava gabu ma ta idia lao unuseniai kongrigeisen ta idia durua totona.
2. Edena dala ai iseda moni bona kohu ita gaukaralaia diba kongrigeisen ita durua totona?
Iseda “dava bada kohudia amo Iehova [ita] hanamoa” diba. (Aonega Herevadia 3:9) Iseda moni bona kohu ita gaukaralaia, iseda kongrigeisen bona tanobada ibounai ai haroro gaukara ita durua totona be hahenamo ta. (2 Korinto 9:7 duahia.) Ita henia kontribusen monina be disasta negadiai tadikaka taihu durua totona idia gaukaralaia danu. Momo be hanaihanai ‘moni sisina idia haboua,’ unai amo kontribusen idia henia diba. (1 Korinto 16:2 duahia.) Iseda kontribusen be Kingdom Hall ena maua lalonai ita udaia, eiava donate.jw.org amo ita siaia diba. Iseda moni bona kohu ita gaukaralaia neganai, ita hahedinaraia Iehova ita lalokau henia.
DIBA MA HAIDA ABIA
Kongrigeisen oi durua diba daladia ma haida laloa.
3. Iseda moni bona kohu ita gaukaralaia diba
Mai moale ida ia henia tauna be Iehova bona Iesu ese idia lalokau henia. Hegeregere, vabu ta ena moni be bada lasi, to Iehova dekenai unai ia henia dainai Iesu ese ia hanamoa. Luka 21:1-4 duahia, bena inai henanadai herevalaia:
Iehova ita hamoalea totona kontribusen badana do ita henia, a?
Mai ura bada ida kontribusen ita henia neganai, Iehova bona Iesu edia hemami be edena bamona?
Iseda kontribusen idia gaukaralaia dalana ita diba totona, VIDIO itaia. Bona henanadai herevalaia.
Kontribusen be edena bamona idia gaukaralaia tanobada ibounai dekenai kongrigeisen idia durua totona?
4. Heduru totona ita volantia diba
Baibel negadiai, Iehova idia tomadiho henia taudia be dubu helaga idia hanamoa totona, idia be moni sibona idia henia lasi. Sivarai Iharuana 34:9-11 duahia, bena inai henanadai herevalaia:
Edena dala ai Israela taudia ta ta be heduru idia henia Iehova ena ruma o dubu helaga idia naria totona?
Iehova ena Witnes taudia ese Israela taudia edia haheitalai idia tohotohoa dalana oi diba totona, inai VIDIO itaia. Bona henanadai herevalaidia.
Dahaka dainai iseda Kingdom Hall ita hagoevaia bona hanamoa be mai anina bada?
Edena dala haida ai oi heduru diba?
5. Tadikaka idia gaukara goada diba maduna ma haida abia totona
Baibel ese Keristani tatau ia hagoadaia do idia gaukara goada kongrigeisen idia durua totona. Haheitalai ta oi itaia totona, inai VIDIO itaia. Bona henanadai herevalaia.
Vidio lalonai Ryan be kongrigeisen ia durua totona dahaka gaukara haida ia karaia?
Tadikaka be elda o hesiai tauna ena maduna abia totona do idia hahedinaraia karadia be Baibel ese ia herevalaia. Timoteo Ginigunana 3:1-13 duahia, bena inai henanadai herevalai:
Tadikaka be elda o hesiai tauna ena maduna idia abia totona dahaka kara idia hahedinaraia be namo?
Edia ruma bese taudia be dahaka kara do idia hahedinaraia?—Siri 4 bona 11 itaia.
Bema tadikaka idia gaukara goada unai kara idia hahedinaraia totona, kongrigeisen taudia ibounai be dahaka hahenamo idia davaria diba?
HAIDA IDIA GWAU: “Iehova ena Witnes taudia be edena dala ai moni idia abia edia gaukara karaia totona?”
Edena bamona do oi haere?
POINT BADANA
Iseda nega, goada, moni bona kohu ita gaukaralaia kongrigeisen ita durua neganai, Iehova be unai ia laloa bada.
Riviu
Edena dala ai iseda nega bona goada ita gaukaralaia diba kongrigeisen ita durua totona?
Edena dala ai iseda moni bona kohu ita gaukaralaia diba kongrigeisen ita durua totona?
Edena dala idauidau ai oi ura emu kongrigeisen oi durua?
REFERENS ITAIA
Hari Dirava be ia idia tomadiho henia taudia ia oda henia lasi karoa 10 ena kahana ta do idia henia ena badina do oi dibaia.
“Karoa 10 Ena Kahana ta Henia Karana—Baibel Ena Hereva be Dahaka?” (Websait atikol)
Baibel ese bapatiso tatau dekenai maduna haida ia henia. To bema bapatiso hahine ese unai maduna ia huaia be edena bamona?
“Kongrigeisen Lalonai Kwara Dagina Ena Gaukara Dalana” (Gima Kohorona, February 2021)
Edia tadikaka taihu dekenai pablikeisen idia abia lao totona idia hekwarahi bada tadikaka haida oi hedavari henidia.
Congo Ena Gabu ma Haida ai Buka bona Magasin Idia Abia Lao (4:25)
Iseda gaukara durua totona moni ita abia dalana do oi dibaia. Ia be tomadiho ma haida edia dala amo ia idau momokani.