Manau

Hakaua Hereva: “Mai manau ida do umui laloa ma haida ese umui idia hereaia.”—Fili. 2:3.

Paulo ese Ia Karaia Gauna

Aposetolo Paulo, gadi tauna ta ida idia seinia, mai hemataurai ida King Agripa, Gavana Festo, bona Berenike ia hereva henidia.

VIDIO: Paulo ese King Agripa ia Haroro Henia

1. VIDIO itaia, eiava Kara 26:2, 3 duahia. Bena inai henanadai oi laloa:

Edena dala ai Paulo ese King Agripa ia hereva henia amo manau karana ia hahedinaraia?
Edena dala ai Paulo ese Iehova bona Baibel ia herevalaia, to sibona ena lalohadai lasi?—Kara 26:22 itaia.

Paulo amo Dahaka Ita Dibaia?

2. Mai manau bona hemataurai ida ita hereva neganai momo ese sivarai namona do idia abia dae.

Paulo Tohotohoa

3. Hekokoroku lasi. Namo lasi emu hereva o kara amo oi hahedinaraia oi be gau ibounai oi diba bona oi hereva henia tauna be gau ta ia diba lasi. Hemataurai dalanai oi hereva.

4. Oi hahedinaraia oi gwauraia gaudia be Baibel amo. Baibel ena hereva ese taunimanima edia kudouna ia hamarerea diba. Baibel ita gaukaralaia neganai taunimanima edia abidadama ita hagoadaia.

5. Oi lalomanau. Namo lasi oi hahedinaraia hanaihanai oi be maoro. Ita ura lasi hepapahuahu. Manau karana hahedinaraia totona hepapahuahu negadia ai oi lalomanau bona oi raka siri. (Aon. 17:14; Tito 3:2) Mai manau ida haere karana ese dala ia kehoa vaira negai herevahereva namona oi moalelaia totona.

INAI OI ITAIA DANU

Roma 12:16-18; 1 Kor. 8:1; 2 Kor. 3:5