HAHEDIBA TAUDIA AI HALAOA
LESENI 11
Auka Lasi Herevadia Gaukaralaia
Hakaua Hereva: “Bema taunimanima ese idia lalopararalaia lasi gado ai umui hereva, edena bamona ta ese emui hereva ena anina ia lalopararalaia diba?”—1 Kor. 14:9.
Iesu ese Ia Karaia Gauna
1. VIDIO itaia, eiava Mataio 6:25-27 duahia. Bena inai henanadai oi laloa:
Edena dala ai Iehova ese ita ia naria karana be Iesu ese ia haheitalaia?
Iesu be manu ia diba namonamo, to dahaka dainai gau tamona sibona ia herevalaia? Dahaka dainai unai be hadibaia dala namona?
Iesu amo Dahaka Ita Dibaia?
2. Auka lasi dalanai ita hadibaia neganai, taunimanima be ita hadibaia gaudia do idia laloatao, bona edia kudouna do ita hamarerea.
Iesu Tohotohoa
3. Hereva momo gwauraia lasi. Umui stadilaia pablikeisen ena topik ta umui herevalaia neganai, namo lasi oi dibaia gaudia ibounai oi herevalaia. Henanadai oi henia murinai, mai haheauka ida emu stiuden ena haere oi naria. Bema haere ia diba lasi, o ia gwauraia lalohadai be Baibel ena hahediba herevadia amo ia idau, henanadai ma haida amo ia oi durua ia laloparara totona. Emu stiuden be point badana ia lalopararalaia neganai, leseni ma ta dekenai umui hanaia diba.
4. Emu stiuden ia diba vadaeni hahediba herevadia be leseni matamata ida oi gaukaralaia. Hegeregere, do umui stadilaia leseni matamata be toreisi lou do ia herevalaia, vadaeni nega sisina lalonai, stiuden ia dibaia gauna—mase taudia dekenai dahaka ia vara—ena hahediba hereva umui riviulaia guna.
5. Haheitalai maorodia gaukaralaia. Haheitalai ta oi do gaukaralaia lasi neganai, sibona oi nanadaia:
‘Inai haheitalai be auka lasi, a?’
‘Egu stiuden ese do ia lalopararalaia haraga, a?’
‘Egu stiuden be haheitalai sibona do ia laloa lasi, to ia do ia durua point badana ia laloatao totona, a?’