Ia Ura Iehova Ia Gwauraia Mauri Taravatuna Ia Badinaia
BIBLE lalonai ia hedinarai goevagoeva bema tau bona hahine idia noho hebou to dala maorona dekenai idia headava lasi, unai kara be sihari kava karana, bona unai bamona idia noho neganai Dirava ena Basileia lalonai do idia vareai diba lasi. (1 Korinto 6:9, 10) British West Indies amo hahinena ta ese unai ia lalopararalaia. Ena sivarai be inai:
St. Lucia dekenai Iehova ena Witness taudia rua ese hahine ta idia haroro henia. Unai hahine ia ura Bible ena hereva ia kamonai. Unai dainai Bible stadi idia hamatamaia ia dekenai. Ena diba Bible ena hereva dekenai ia bada sisina neganai, ia laloparara kara haida ena mauri lalonai ia haidaua be namo. Ena be ena natudia be 4, bona tau ta ida idia noho hebou, to dala maorona dekenai idia headava lasi. Ia bona unai tau idia hekwarahi bada edia ruma badana lasi idia haginia totona, bona idia 6 idia noholaia.
Stadi amo ia laloparara Dirava ia gwauraia mauri taravatu maorona ia utua, unai dainai ena lalona ia hadaia ena mauri dalana do ia hanamoa. Ena dala be rua: dala maorona dekenai unai tau do ia adavaia, eiava do ia rakatania. Unai tau ida unai hereva idia kikilaia hebou, to tau ia ura lasi dala maorona dekenai idia headava. Ia ura idia do noho hebou sibona. Vadaeni, unai hahine be mai ena abidadama dainai dahaka do ia karaia? Iehova ia hamoalea totona dala maorona ia abia hidi be gau badana. Ia gurigurilaia murinai, ia laloa unai tau ia rakatania be maoro. To ia bona natudia 4 be edeseniai do idia noho?
Ena tau ida idia herevahereva hebou murinai, noho gabuna ia abia—ia gwau idia noholaia rumana do idia utua kahana rua dekenai, kahana ta iena, kahana ta hahine ena! Hahine ena lalokau tadikakadia edia heduru amo bona unai tau ena heduru amo idia ese ruma idia utua kahana rua dekenai. Unai dinanai hahine ena ruma kahana be kilomita 8 idia abia lao ma gabu ta dekenai. Pura tamona lalonai idia ese unai mahuta daiutu rua rumana idia haginia lou bona idia hanamoa.
Ia ese ena mauri dalana ia hamaoromaoroa Iehova ena taravatu maorona ia badinaia totona, maoromaoro ia mai ena natudia danu idia ese haroro gaukara idia karaia matamaia. Iehova dekenai sibona ena mauri ia gwauhamatalaia, bena nega sisina murinai bapatiso ia abia. Unai neganai mai moale ida heduru pioneer gaukara ia karaia ena bapatiso dinana ena moale hahedinaraia totona. Hari ma hahenamo ta ia abia, iena ruma matamatana dekenai Kongregesen Buka Stadi idia karaia, bona taunimanima 17 bamona be unuseniai idia hebou. Momokani, Iehova ese ia ia hanamoa badina ia ura kara maoromaoro dalanai ia tomadiho henia.