Iesu ena Mauri bona Gaukara

Idia Samania Taudia Ia Haere Henidia

SABATI dinana ai Iesu ese lagani 38 lalodiai ia gorere noho tauna ta ia hamauria. To Iuda tomadiho gunalaia taudia idia samania, idia gwau ia ese Sabati taravatuna ia utua unai. Iesu ia haere, ia gwau: “Egu Tamana be ia gaukara noho ia mai bona hari, lau danu lau gaukara noho.”

Farisea taudia idia kerere, badina be Iesu ese unai kara amo Sabati taravatuna ia utua lasi. Dirava ese haroro gaukarana bona gorere taudia hamauridia gaukarana ia henia, bona Dirava hegeregerena dina iboudiai unai gaukara ia karaia. To Iuda taudia ese Iesu ena haere idia badulaia momokania bona hamasea dalana idia tahua.

Badina be idia laloa Iesu ese Sabati taravatuna ia utua sibona lasi to Dirava ia hadikaia danu badina ia gwau ia be Dirava ena Natuna korikorina. Iesu ia gari lasi, to ia be ma ia gwau: “Tamana ese ena Natuna ia lalokau henia, bona ena kara ibounai ia hedinarai henia ia dekenai.”

Bena Iesu be ma ia gwau: “Tamana ese mase taudia ia hatorea isi bona ia hamauridia hegeregerena, Natuna danu ese ia lalokau henia taudia be ia hamauridia lou diba.” Momokani, lauma dalanai idia mase vadaeni taudia Iesu ese ia hatoredia isi noho! Iesu ia gwau: “Egu hereva ia kamonai, bona lau ia siaia Dirava dekenai ia abidadama henia, tauna . . . be mase ia rakatania vadaeni, mauri dekenai ia ginidae vadaeni.” Ma ia gwau: “Nega ta do ia mai, bona unai nega ia ginidae vadaeni, mase taudia ese Dirava ena Natuna ena gadona do idia kamonai, vadaeni kamonai taudia be do idia mauri.”

Ena be unai nega dekenai Iesu ese mase tauna ta ia do hatorea isi lou lasi, to idia samania taudia ia hamaorodia, mase taudia do idia toreisi lou. Ia gwau: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”

Ema bona unai nega, Iesu ese ena gaukara Dirava ena palani lalonai ia do gwauraia hedinarai goevagoeva lasi. To idia samania taudia be ena gaukara idia diba vadaeni, badina Iesu ia hamaorodia, ia gwau: “Umui be Ioane ena haroro anina do umui diba totona emui taudia haida umui siaia vadaeni, bona . . . Ioane ena hereva lauegu kara dekenai be ia maoro.”

Lagani rua gunanai, Ioane Bapatiso ese ia murinai do ia mai Tauna ia gwauraia idia dekediai. To hari, Ioane be dibura rumana ai ia noho bona Iesu ese ia hamaorodia, guna Ioane idia laloa bada; ia gwau: “Nega sisina iena diari dekenai umui moale noho.” Iesu ese unai ia gwauraia, ia durudia bona ia hamauridia totona. To Ioane ena hereva ia dekenai idia hanaia gaudia idia noho.

Iesu be ma ia gwau: “Inai gaukara [unai dina ai ia karaia hoa karana danu] ese idia hedinaraia momokani, lauegu Tamana ese lau ia siaia vadaeni.” Danu, Iesu be ma ia gwau: “Egu Tamana ese lau ia siaia vadaeni, bona ia ese lau ia gwauraia hedinarai vadaeni.” Iesu ia bapatiso neganai, Dirava ese Iesu ia gwauraia hedinarai; ia gwau: “Inai be lauegu Natuna, egu lalokau.”

Momokani, Iesu idia samania taudia ese idia dadaraia be badina lasi. Idia tahua Buka Helagana ese ia idia ia gwauraia hedinarai! Unai dainai, dokonai Iesu ese ia hamaorodia, ia gwau: “Bema Mose umui abidadama henia momokani be lau danu do umui abidadama henia. Badina be ia ese lauegu sivaraina ia torea. To ia torea herevana bema umui abia dae lasi be lauegu hereva edena bamona umui abia dae diba?” Ioane 5:​17-47; 1:​19-27; Mataio 3:17.

◆ Dahaka dainai Iesu ese ia karaia karana ese Sabati taravatuna ia utua lasi?

◆ Iesu ese ena gaukara badana Dirava ena palani lalonai edena bamona ia gwauraia?

◆ Iesu ese daika ena hereva ia gwauraia, unai amo ia hamomokania ia be Dirava ena Natuna?