‘Iena Aena Gabudiai Oi Raka’—Edena Bamona?

“Ena be lau guriguri momo eiava lau hekwarahi bada, to lau goevadae diba lasi, Iesu ia goevadae bamona.” Magasin ta, ladana U.S. Catholic dekenai ia gwau taunimanima 100 100 amo 89 89 be unai bamona idia laloa. Tomadiho oreadia ese Keriso ena kara idia herevalaia neganai, taunimanima momo idia laloa idia hegeregere lasi ena kara do idia tohotohoa. Katolik tauna ta ia gwau: “Nega momo lau laloa Iesu be lalo-namo tauna, mai ena lalokau, hebogahisi bona haheauka danu, bona ia diba lau be gau momo lau karaia diba lasi. To dubu dekenai lau lao neganai, lau laloa Iesu be atai momokani, Dirava bamona, unai dainai lau be anina lasi bona mai egu kara dika momo.”

To, Evanelia bukadia idia gwau lasi Keriso be tanobada dekenai ia noho neganai ia be “atai momokani, Dirava bamona.” Idia gwau Iesu ena tamana bona sinana be lohia taudia lasi, to hanua taudia sibodia. Ena heubu tamana, Josef be kapenta tauna. Ena be Bible ese Iesu ena me negana ia herevalaia momo lasi, to ia gwau ena mauri laganidia be 12 neganai, ena tamana bona sinana, lagani iboudiai vaia idia ia nanadaiakara hegeregerena, Iesu idia hakaua lao Ierusalem dekenai Paseka ariana totona. Unai neganai Iesu be dubu lalonai hahediba taudia ida Bible ena hereva idia herevalaia, bena ena ruma bese taudia be hanua dekenai idia giroa lou neganai, ia bamodia lasi. Ena tamana bona sinana idia diba ia bamodia lasi neganai, idia laloa momo bena Ierusalem dekenai idia lou lao idia tahua totona. Dina toi murinai “Dubu Helaga lalonai idai davaria, hadibaia taudia edia huanai ia helai, edia hereva ia kamonai bona ia henanadaia danu idia dekenai.” Danu, “ena hereva idia kamonai taudia ibounai be ena diba bona ena haere dekenai idia hoa bada.” Mani oi laloa, ena be ena mauri laganidia be 12 sibodia, to lauma gaudia ia lalodia momo, bona henanadai ia henia taunimanima edia lalona hamarerea totona, bona danu aonega dalana amo edia henanadai ia haere henidia. Momokani, ena tamana bona sinana ese idia hadibaia dainai unai bamona ia karaia diba!—Luka 2:41-50.

Bema oi be mero o kekeni ta, Keriso ena kara oi tohotohoa diba a? Oibe, oi tohotohoa diba! Badina Keriso ese “iena kara toana umui dekenai ia hedinaraia, iena murinai do umui raka totona. Iena aena gabudia do umui raka.”—1 Petro 2:21.

Oi matamata negana be nega namona, Dirava bona ena Hereva oi dibaia matamaia. Momokani, reana emu bamodia haida ese nega bada idia halusia, komik bukadia duahia bona vidio raraia karadia dekenai. To, Iesu ena kara oi tohotohoa be namo ani? Ia mero neganai ia ura bada Iehova ia dibaia. Lauma gaudia ia ura henidia bada dainai, “Iesu ia tubu daekau noho mai aonega ia nanadaiadanu.” (Luka 2:52) Oi danu be unai bamona oi karaia diba.

Haheitalai ta be inai: South Africa dekenai, sikuli ta dekenai, ta ese tisa tauna , ia nanadaia, ia ese Bible ia hamomokania diba eiava. Tisa ia gwau ia hamomokania diba lasi. Mero ta, Iehova ena Witness merona unai, be mai ena boga-auka danu ia gwau: “Lau ese Bible lau hamomokania diba!” Edena bamona ia hamomokania? Gima Kohorona lalonai vanegai ia stadilaia herevana ta ia laloatao. Gwaumaoro ia abia ia hereva totona, bena Daniel karoa 2 ena peroveta herevana ena anina ia gwauraia hedinarai. Bible ena peroveta herevadia amo gavamani idauidau be edia siahu idia abia bena idia moru sivaraina ia gwauraia, bona ia gwau kahirakahira Dirava ena Basileia ese iboudiai do ia haoredia. Ena kalasi taudia iboudiai be ena hereva dainai idia hoa maragi lasi. Iena hereva murinai momo be mai edia henanadai bena edia henanadai ia haerelaidia.

Ia Mai, Dirava ena Ura Karaia Totona

Iesu be ia matamata neganai Bible ia dibaia bona ia lalo-pararalaia dainai, gabeai kara badana ta ia karaia. “Iesu . . . ia lao Ioridane sinavai dekenai. Ioane dekenai ia lao, ia ura Ioane ese do ia bapatiso henia.” Nega ia ginidae vadaeni Dirava ena hesiai gaukarana do ia karaia. Bapatiso ia abia, unai amo ia hahedinaraia sibona ia henia Dirava ena ura karaia totona.—Mataio 3:13-15.

Keristen taudia edia kara korikorina ta be Keriso idia tohotohoa bona bapatiso idia abia. Bapatiso be kara helagana ta, ia hahedinaraia ta ese sibona ia gwauhamatalaia vadaeni Dirava dekenai. Bema kampani ta ita gwauhamata henia ita be ena gaukara do ita karaia, ita be unai kampani ena ura bona taravatu ita dibaia guna, bena unai murinai kontraka ta ita sainia. To bema unai kontraka ita sainia lasi, ia be anina lasi. Bapatiso be unai bamona—iseda gwauhamata ia hamomokania. Iesu ia gwau: “Dirava e, lau inai, oiemu ura gauna do lau karaia.” (Heberu 10:7) Ita danu be unai bamona ita laloa. Unai dainai ita gwauhamata bona bapatiso ita abia neganai, ita be Dirava ena hesiai taudia ai ita lao!—2 Korinto 3:5, 6.

Momokani, Iesu bamona, namona be Dirava oi dibaia guna. Iehova ena Witness taudia ese oi—bona emu natudia danu—idia durua diba Bible stadilaia karana amo inai oi karaia totona.

Haroro Gaukara Atoa Guna

Iesu ia bapatiso bena dina 40 lalodiai ia anivaga, ia sibona ia helai bona ia laloa namonamo, bona ia guriguri. Unai kara ese ia hegaegaelaia, do ia davaria hahetoho ia haheaukalaia totona. Satana Diabolo ese “tanobada edia basileia ibounai” Iesu ia henia gwauraia. Bema Iesu ese unai ia abidia dae, dagi badana ia abia diba! To, Keriso ia diba unai bamona dagi be do ia noho daudau lasi. Maoromaoro Diabolo ia dadaraia, bena “ia haroro hamatamaia, ia gwau, ‘Emui lalona umui giroa, badina be Guba Basileia kahirakahira ia mai vadaeni.’ “(Mataio 4:2, 8-10, 17) Unai negana amo ela bona ia mase, Keriso be Dirava ena Basileia ena haroro tauna ta.

Unai hegeregerena, hari inai negai Satana ena tanobada ese taunimanima edia lalona ia veria, dagi bada bona pei badana moni gaukarana tahua totona, to Keristen tauna ese unai gaudia ia tahudia lasi. Iesu ese ena hahediba taudia ginigunadia ia boiridia neganai, “nega tamona edia reke idia rakatania, ia murinai idia raka.” (Mareko 1:17-21) Bema ta ese tanobada karadia ia lalodia momo dainai unai kara ese idia guia, unai be aonega karana a? Iesu ese hari inai negai ia murinai idia raka taudia ia hamaorodia, ia gwau: ‘Basileia ena Sivarai Namona be tanobada ibounai dekenai umui harorolaia.’ (Mataio 24:14) Momokani, oi be mai emu ruma bese eiava mai emu maduna ma haida readia. To, Iehova ena Witness taudia momo be hanuaboi bona Saturday bona Sunday dekenai edia Keristen gaukara korikorina, haroro gaukara unai, idia karaia. Haida be mai edia dala, dina iboudiai haroro gaukara idia karaia!

South Africa dekenai, tauhau ta ena palani be haisikuli amo do ia doko neganai iunivesiti dekenai do ia lao. To, Dirava ia gwauhamata henia bona bapatiso ia abia murinai, ia laloa ena maduna korikorina be pioneer gaukara do ia karaia. Ena tamana, Witness lasi tauna, be ena palani ia kamonai neganai ia dadaraia. Idia ruaosi idia herevalaia momo, bena ena tamana ese gwaumaoro ia henia, Iehova ena Witness taudia edia branch opesi, South Africa dekenai, do ia gaukara totona.

Lagani 9 lalodiai, mai ena moale ida unai opesi dekenai ia gaukara, bena ia headava bena mai ena adavana ida pioneer gaukara idia karaia hebou. Gabeai natuna ta idia havaraia. To, Iehova idia noia, do ia durudia, pioneer gaukara do idia karaia noho totona. Idia ese Iesu ena gwauhamata idia laloatao; ia gwau, bema ta ese Dirava ena Basileia ia tahua guna, “vadaeni unai gau [tauanina durua gaudia] ibounai danu umui dohore ia henia.” (Mataio 6:33) Unai gwauhamata be ia momokani idia dekenai. Tau ia gwau: “Ai ese dava bada gaudia ai hoidia lasi, to aiemai natuna kekenina ena tauanina durua gaudia ai abidia iena, bona ia be mai ena noho gabuna namona.”

“Dagedage Lasi bona Manau”

Iesu ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”—Mataio 11:28-30.

Iesu ese hoa karadia ia karaia neganai, hegeregere lauma dikadia ia luludia neganai, ia gwau lasi sibona ena siahu amo ia luludia, to ia gwau: “Dirava ena Lauma dainai lauma dika lau luludia.” (Mataio 12:28) Bona, ena be ia hereva neganai taunimanima ese idia hakala henia namonamo bona “iena hadibaia hereva dekenai idia hoa,” to sibona ena ladana ia abia isi toho lasi. (Luka 4:32) Lasi, to ia gwau: “Lauegu hadibaia herevadia be lauegu lasi, to lau ia siaia Diravana ena.”—Ioane 7:16.

Hari inai negai idia noho Keristen taudia korikoridia ese Iesu ena lalo-manau karana idia tohotohoa. Hegeregere, ma haida idia hadibadia neganai, sibodia edia ladana idia abia isi toho lasi. Idia gwau Iehova bona iena orea edia heduru dainai idia be hegeregere Dirava ena Hereva idia gwauraia hedinarai taunimanima dekediai. Aposetolo Paulo ia gwau: “Oi davaria gaudia ibounai be Dirava ese oi ia henia vadaeni, ani?”—1 Korinto 4:7.

Iesu be manau tauna dainai, ena lalona hegeregere maila tausen momo do ia loaloa, kariota dekenai lasi, to aena dekenai, ia haroro totona. Nega ta Iesu bona ena hahediba taudia idia hesiku bada herea dainai idia “laga-ani sisina” be namo. To taunimanima hutuma be lauma dalanai idia hitolo noho dainai idia dekenai idia mai neganai, Iesu ese ena hesiku ia laloaboio bena “mauri sivarai momo ia hadibaia.”—Mareko 6:31-34.

Lesotho, Africa dekenai, Iehova ena Witness taudia edia sekit naria tauna ta mai ena bamodia rua be vanegai Iesu ena kara idia tohotohoa. Hora 22 lalodiai idia raka, ororo ta idia rakaia hanai, edia Keristen orea taudia haida vadivadi henidia totona. Edia gabu dekenai idia ginidae neganai idia hesiku, unai dainai sekit naria tauna ia laloa kerukeru do ia laga-ani. To taunimanima momo idia mai ia idia hedavari henia totona bona idia be mai edia henanadai momo danu, unai dainai ena be ia hesiku bada herea, to ia laga-ani lasi, Basileia ena sivarai namona ia hadibadia. Idia moalelaia bada dainai, ena be laolao taudia toiosi idia hesiku, to unai taudia edia kara ese ia hagoadadia.

Ia Oi Tohotohoa!

Aposetolo Paulo ese ita ia hagoadaia “iseda matana Iesu dekenai do ita negea lao. Ia ese iseda abidadama ia havaraia.” (Heberu 12:2) Unai bamona ita karaia totona, namona be Evanelia bukadia ita duahia loulou bona ita laloa edena daladia ai Keriso ita tohotohoa diba. Haheitalai ta be inai: Iesu ese boga-auka ia hahedinaraia tomadiho gunalaia taudia koikoidia ia gwau dika henidia neganai, badina ia diba unai bamona do ia karaia neganai do idia inai henia bona do idia hamasea. (Mataio 23:1-36; 26:3, 4) Iesu idia inai henia neganai, ena lalona ia biagua bona edia kara ena davana ia henidia lasi. (1 Petro 2:23) Taunimanima ia hadibadia neganai, ia hahedinaraia edia kara ia diba, bona hereva haragadia amo dobu herevadia edia anina ia gwauraia hedinarai.

Iesu ena kara hereadaena be lalokau. “Lalokau namo herea momokani be inai, tau ta ena mauri do ia atoa diho, ena urana totona.” (Ioane 15:13) To danu ia gwau namona be iseda lalokau ita habadaia bona iseda inai taudia ita lalokau henidia.—Mataio 5:43-48.

Iesu be haheitalai hereadaena ita dekenai! Ia ita tohotohoa be auka, bona reana nega haida do ita hekwakwanai. To namona be ita hesiku lasi. (Galatia 6:9) Taunimanima milion haida be mai edia haheauka ida Iesu idia gavaia toho. Inai magasin oi ia henia tauna be unai taudia ta, bona ia ura dikadika oi ia durua Iesu ena aena gabudia ai oi raka totona!

[Blurb on page 5]

Iesu ia mero neganai, lauma gaudia ia lalodia bada. Ena kara oi tohotohoa a?

[Blurb on page 6]

Keriso ese moni bada gaukarana ia dadaraia, bona haroro gaukara ia abia dae

[Blurb on page 7]

“Tau ta bema ia ura lauegu murina dekenai do ia mai, ia be sibona dekenai do ia laloa lasi, dina ibounai ena satauro do ia abia isi, lauegu murina dekenai do ia raka.”—Luka 9:23.