Iesu ena Mauri bona Gaukara

Guriguri Bona Abidadama

IESU ia haroro noho neganai, edia kara maoromaoro idia heagilaia taudia edia koikoi ia gwauraia dika. Ia gwau: “Harihari gauna . . . umui henia neganai umui emui toana umui hedinaraia lasi mai hekokoroku danu, guriguri koikoi taudia ese . . . idia karaia bamona.”

Iesu be ma ia gwau: “Umui guriguri neganai, koikoi taudia bamona umui karaia lasi, badina be idia ura dubu dekenai bona dala edia huanai idia gini, vadaeni idia guriguri, taunimanima ese idia itaia totona. . . . To oi guriguri neganai oiemu ruma dekenai oi vareai, iduara oi koua, oiemu Tamana, hunia gabuna ia noho dekenai do oi guriguri henia.” Iesu be taunimanima vairadiai ia guriguri, to ia gwauraidia dika guriguridia be inai: kamonai taudia idia hoalaia totona bona guriguri taudia edia ladana abia isi totona idia gwauraia guriguridia.

Iesu ena sisiba ma haida be inai: “Umui guriguri neganai, hereva kava momo umui gwauraia loulou lasi, Dirava diba lasi taudia bamona.” Iesu ia gwau lasi hereva haida ita gwauraia lou be kerere. Nega ta ia guriguri neganai, “guna ia gwauraia gaudia ma ia gwauraia lou.” To ia ura lasi karana be inai: Hereva haida ita dibaia bena ita “gwauraia loulou” haida idia karaia bamona, ageva ena nadinadi ta ta idia dogoatao bena idia dibaia gurigurina idia gwauraia lou gwauraia lou.

Ena kamonai taudia be guriguri dalana ia hadibalaidia totona, Iesu ese guriguri ta ia gwauraia. Unai guriguri lalonai noinoi 7 ia gwauraidia. Unai noinoi ginigunadia toiosi be inai: Dirava ena ladana do idia hahelagaia, ena Basileia do ia mai, bona iena ura do idia karaia. Noinoi oredia haniosi be sibona eda ura gaudia: aniani be ita do ia henia, iseda kara dika ia gwauatao, iseda goada ia hanaia hedibaganina ta be ita dekenai do ia vara lasi, bona dika tauna amo ita do ia hamauria.

Unai murinai Iesu ese kohu ura henia bada karana ena dika ia gwauraia. Ia gwau: “Inai tanobada dekenai kohu do umui haboua lasi, iniseniai manumanu ese dabua idia ania ore, bona raraka ese auri ia hadikaia, iniseniai danu henaoa taudia ese ruma idia makohia bona gau idia henaoa.” Unai kohu do idia dika bona idia amo ladana namona Dirava vairanai ita abia diba lasi.

Unai dainai Iesu ia gwau: “Emui kohu be guba dekenai do umui haboua.” Unai ita karaia totona, namona be Dirava ena hesiai gaukara ita tahua guna iseda mauri lalonai. Unai amo Dirava vairanai ladana namona do ita abia bona davana namona do ita abia, bena ta ese do ia kokia diba lasi. Bena Iesu ia gwau: “Emui kohu idia noho gabuna dekenai, umui emui lalona danu unuseni ia noho.”

Iesu ese kohu ura henia karana ia do herevalaia neganai, parabole ta ia gwauraia; ia gwau: “Tauanina ena lamepa be matana, unai dainai bema oiemu matana ia namo, oiemu tauanina ibounai do ia mai diari danu. To bema oiemu matana ia dika, oiemu tauanina ibounai do ia dibura.” Ia diari lamepana ese dibura gabuna ia hadiaria, unai hegeregerena mata namona ese tauanina ia hadiaria. To ta ia itaia namonamo totona, namona be ena matana ia namo, anina be gau tamona ia itaia tao. Bema ta ena matana ia valahuvalahu, do ia itaia namonamo diba lasi, bena lalohadai kereredia do ia abia; kohu do ia tahua bada, Dirava ena hesiai gaukara do ia tahua maragi, bena ena “tauanina ibounai” do ia dibura.

Iesu ese ma parabole ta ia gwauraia, ia gwau: “Tau ta lasi biaguna rua edia hesiai gaukara ia karaia diba. Badina be ta do ia badu henia, to ta be do ia lalokau henia, o ta be do ia abia dae, ma ta be do ia abia dae lasi. Dirava bona kohu momo danu edia hesiai gaukara do oi karaia diba lasi.”

Unai sisiba ia henia murinai, Iesu ese ena hereva idia kamonai taudia ia hamaorodia, bema Dirava ena hesiai gaukara idia tahua guna, edia tauanina gaudia do idia lalo-hekwarahilaidia be anina lasi. Ia gwau: “Ataiai manu mani umui itaia. Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo. Umui be manu umui hanaia, ani?”

Unai murinai palaoapalaoa ia gwauraidia; ia gwau: “Solomona be mai ena kohu momo to iena dabua be herahera ta ena hairai bamona lasi. Oibe, tano ena avadia, . . . Dirava ese unai gaudia edia hairai ia henia. Be, ia ese umui dekenai danu dabua do ia henia namonamo lasi, a? Umui abidadama maragimaragi taudia e!”

Ena hereva dokonai Iesu ia gwau: “Unai dainai, emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ . . . To emui Tamana guba dekenai ia noho be ia diba, umui ura gaudia ibounai be unai. To umui be iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.” Mataio 6:1-34; 26:36-45.

◆ Iesu ese guriguri dalana edena bamona ia gwauraia hedinarai?

◆ Dahaka dainai guba dekenai ita haboua kohudia ese tanobada dekenai ita haboua kohudia idia hereaia, bona edena bamona ita abidia diba?

◆ Iesu ese edena parabole ia gwauraidia, ita ia durua kohu ura henia karana dadaraia totona?

◆ Dahaka dainai Iesu ia gwau ita lalo-hekwarahi be anina lasi?