Iesu ena Mauri bona Gaukara

Iesu Idia Hepapahuahulaia

IESU be Simona ena ruma lalonai ia aniani dinana murinai, Galilea lalonai ia loaloa haroro gaukara do ia karaia totona. Guna unuseniai ia loaloa neganai, ena hahediba taudia ginigunadia, Petro, Andrea, Iakobo, bona Ioane ese idia bamoa. To hari ena hahediba taudia 12 ese idia bamoa, bona hahine haida danu. Idia haida be Maria Magadala, Susana bona Joana, ena adavana be King Herod ena ofisa ta.

Iesu ese ena hesiai gaukara ia goadalaia neganai, taunimanima ese ena gaukara dainai idia hepapahuahu bada. Demoni ese idia hadikaia tauna ta be Iesu dekenai idia hakaua mai. Ia be mata kepulu bona mu tauna danu. Iesu ese ia hamauria murinai, demoni ese idia biagua lasi bona ia itaia diba bona ia herevahereva diba danu. Hutuma ese unai idia itaia neganai, idia hoa bada herea. Idia gwau: “Sedira, inai be Davida ena natuna, a?”

Iesu ese ia noholaia rumana dekenai taunimanima momo herea idia hebou dainai Iesu bona ena hahediba taudia be dala lasi do idia aniani totona. Haida idia laloa reana ia be David ena natuna, Dirava ese ia gwauhamatalaia tauna, to taravatu hadibaia taudia bona Farisea taudia be Ierusalem amo idia mai, Iesu do idia gwauraia dika totona. Iesu ena varavara idia kamonai Iesu dainai hepapahuahu bada ia vara neganai, idia mai Iesu do idia dogoatao totona. Badina be dahaka?

Iesu ena tadikaka idia do abia dae lasi, Iesu be Dirava ena Natuna. Danu, Iesu be Nasareta dekenai ia tubu daekau neganai, ia ese hepapahuahu bona heiriheiri ia havaraia lasi. Unai dainai idia laloa Iesu ia kavakava. Idia ura Iesu do idia dogoatao bona idia do abia oho.

To inai ia hedinarai goevagoeva: demoni ese idia hadikaia tauna be Iesu ese ia hamauria. Taravatu hadibaia taudia bona Farisea taudia idia diba unai hoa karana bona Iesu ese ia karaia hoa karadia ma haida idia hakoikoia diba lasi. Unai dainai, Iesu ena ladana do idia hadikaia totona hutuma idia hamaoroa, idia gwau: “Lauma dika edia lohia tauna, Belesebulo, ese siahu ia henia dainai inai tau ese lauma dika ia lulua diba.”

Iesu ese edia lalohadai ia diba dainai, unai taravatu hadibaia taudia bona Farisea taudia ia boiridia, bona ia gwau: “Basileia ta sibona bema ia hapararaia, orea ta ese orea ta idia heatu henia dainai unai basileia do ia dika. Unai bamona danu hanua ta o iduhu ta sibona bema ia hapararaia, ia be do ia gini diba lasi. Bona bema Satani ese Satani ia lulua murimuri dekenai, unai be ia parara, ma sibona ia heatu henia, vadaeni ena basileia be edena bamona do ia gini diba?”

Unai hereva be maoromaoro momokani! Farisea taudia idia gwau, idia haida ese demoni be taunimanima amo idia luludia lasi. Unai dainai Iesu ia henanadai, ia gwau: “Umui gwau lau be Belesebulo ena siahu dekenai lauma dika lau lulua. To emui orea taudia be daika ena siahu dekenai lauma dika idia lulua?” Anina be, Iesu dekenai idia gwauraia samani herevana be idia dekenai Iesu ese ia gwauraia diba. Bena, Iesu ese ia hadibadia, ia gwau: “To, bema lau be Dirava ena Lauma dainai lauma dika lau luludia, Dirava ena Basileia be umui dekenai ia ginidae vadaeni.”

Iesu ese demoni ia luludia neganai, ia hahedinaraia ena siahu ese Satana ena ia hanaia. Unai do ia haheitalaia totona, ia gwau: “Tau ta ese edena bamona goada tauna ena ruma dekenai do ia raka vareai, vadaeni ena kohu do ia henaoa? Ia be goada tauna do ia kwatua guna, vadaeni ena ruma kohu do ia henaoa diba. Lau dekenai ia laloa momo lasi tauna be lau dekenai ia heatu noho, bona lau ia durua lasi tauna mamoe haboua totona, be ia ese mamoe ia negedia kava, idia boio.” Ia hedinarai goevagoeva Farisea taudia ese Iesu idia inai henia, unai amo idia hahedinaraia idia be Satana ena hesiai taudia. Idia ese Israel taudia be Iesu ena amo idia luludia.

Unai dainai, Iesu ese unai taudia, ena gaukara idia koua toho taudia unai, ia hadibadia, ia gwau: “Lauma Helaga dekenai ia hereva dika tauna be ena dika do ia gwauatao lasi. Taunimanima ena Natuna dekenai do ia hereva dika tauna be ena dika do ia gwauatao. To Lauma Helaga dekenai ia hereva dika tauna be ena dika do ia gwauatao lasi, hari inai mauri lalonai bona mauri gabeai danu.” Unai taravatu hadibaia taudia bona Farisea taudia ese Dirava ia gwauatao diba lasi karana ta idia karaia, badina idia gwau Dirava ena lauma helaga ese ia havaraia hoa gauna be Satana ese ia havaraia. Mataio 12:​22-32; Mareko 12:​19-30; Ioane 7:⁠5.

◆ Haroro gaukara do ia karaia totona, Iesu be Galilea dekenai ia loaloa negana ginigunana bona iharuana be edena bamona idia idau?

◆ Badina be dahaka Iesu ena varavara ese idia dogoatao toho?

◆ Farisea taudia be edena dala amo Iesu ena hoa karadia idia gwauraia dika toho, bona Iesu be edena bamona edia hereva ia hakoikoia?

◆ Farisea taudia edia kerere be dahaka, bona badina be dahaka?