Iesu ena Mauri bona Gaukara

Iesu ese Farisea Taudia Ia Gwau Henidia

IESU ia gwau bema Satana ena siahu amo demoni ia luludia, unai anina be Satana ia parara, badina “bema au be ia namo, ena huahua danu be do ia namo. Bema au be ia dika, ena huahua danu be do ia dika. Badina be ena huahua dekena amo au do umui diba.”

Iesu ese demoni ia luludia ia be Satana ena hesiai tauna dainai, be kavakava herevana. Bema huahua ia namo unai anina be au ia dika lasi. To, Farisea taudia ese Iesu idia samania koikoi bona idia dagedage henia kava karana be ia hahedinaraia idia be dika taudia. Iesu ia gwau: “Gaigai edia natudia e! Umui be mai emui dika dainai, edena bamona hereva namodia do umui gwauraia diba? Tau ena lalona ia honu momokani gaudia dekena amo ena uduna ia hereva.”

Iseda hereva ese iseda kudouna lalonai idia noho gaudia idia hahedinaraia dainai, iseda hereva dainai hahemaoro do ita abia. Iesu ia gwau: “Umui lau hamaoroa, hereva kava ibounai taunimanima ese do idia gwauraia be Kota karaia dinanai edia davana do idia abia. Badina be emu hereva ese do idia hanamoa oi, bona emu hereva ese do idia hadikaia oi.”

Iesu be hoa karadia momo ia karaia, to taravatu hadibaia taudia bona Farisea taudia ia dekenai idia gwau: “Hadibaia tauna e, ai ura be oi dekena amo toa ta do ai itaia.” Reana unai taudia ese Iesu ia karaia hoa karadia be edia matadia amo idia itaia lasi, to ia karaia sivaraidia idia diba vadaeni. Unai dainai Iesu ese unai Iuda gunalaia taudia dekenai ia gwau: “Inai nega noho Dirava laloa lasi taudia be dika momokani! Umui ese toa ta umui tahua, a? Lasi, toa ta do lau hedinaraia lasi umui dekenai. Toa be tamona sibona, Iona, peroveta tauna ena toa.”

Iesu ese unai hereva ena anina ia hahedinaraia, ia gwau: “Iona bamona, dina toi hanuaboi toi gwarume badana ena bogana lalonai ia noho, unai bamona Taunimanima ena Natuna danu dina toi hanuaboi toi tano lalonai do ia noho.” Gwarume ese Iona ia hadonoa, bona gabeai ia lalona amo ia lasi, ia toreisi lou bamona, inai sivarai hegeregerena Iesu ia peroveta ia gwau, do ia mase bona dina toi murinai do ia toreisi lou. To Iesu ia toresi lou neganai Iuda ena biagudia be “Iona, . . . ena toa” idia dadaraia.

Unai dainai Iesu ia gwau kota badana ena dina dekenai, Iona ena haroro dainai idia helalo-kerehai Nineve taudia ese Iesu idia dadaraia Iuda taudia do idia hahemaoro henidia. Iesu ese ma sivarai ta ia gwauraia, ia gwau, Sieba ena pavapava hahinena be gabu daudau amo ia mai Solomon ena aonega herevadia ia kamonaia totona, bona ia hoa ia itaia bona ia kamonai henia gaudia daidiai. To Iesu ma ia gwau: “To iniseniai tau ta ese Solomona ia hanaia.”

Bena murinai Iesu ese ma haheitalai ta ia gwauraia, ia gwau lauma dikana ta ese tau ta amo ia raka lasi. To unai neganai hari tau be gau namodia be ena lalona dekenai ia atoa vareai lasi, unai dainai lauma dikadia ma 7 be ia dekenai idia vareai. Iesu ia gwau: ‘Inai kara dika uruna danu be unai bamona.’ Israel bese taudia idia goeva lou bona edia kara momo idia hamaoromaorodia​—⁠hegeregere lauma dikana ese unai ta ia rakatania bamona. To Israel besena ese Dirava ena peroveta taudia idia dadaraidia, bona gabeai Keriso danu idia dadaraia, bena unai ese ia hahedinaraia guna edia kara dika be sisina maragi, to gabeai edia dika be ia bada herea.

Iesu be taunimanima dekenai ia hereva noho lalonai ena sinana bona tadina idia ginidae bona murimuri dekenai idia gini. Vadaeni ta ese ia hamaoroa, ia gwau: “Oiemu sinana bona oiemu tadina be unai, murimuri dekenai idia gini noho oi dekenai idia hereva gwauraia.”

To Iesu ia haere, ia gwau: “Lauegu sinana bona lauegu tadina be daika?” Ena imana ia duduia ena hahediba taudia dekenai, bena ia gwau: “Lauegu sinana bona lauegu tadina be inai. Badina be lauegu Tamana, guba dekenai ia noho, ena ura idia karaia taudia, idia sibona be lauegu tadina, bona lauegu taihuna, bona lauegu sinana.” Inai hereva amo Iesu ese ia hahedinaraia ena varavara ia lalokau henidia maragi, to ena hahediba taudia ia lalokau henidia bada. Mataio 12⁠:​33-50; Mareko 3⁠:​31-35; Luka 8⁠:​19-21.

◆ Dahaka dainai Farisea taudia ese au dikana bona huahua dikana idia hanamodia lasi?

◆ “Iona, peroveta tauna ena toa” be dahaka, bona edena dala amo idia dadaraia?

◆ Israel besena ena kara bona lauma dikana ta be tau ta ia rakatania ena kara, be edena bamona idia hegeregere?

◆ Iesu ese dahaka ia karaia ena lalokau ena hahediba taudia dekenai ia hahedinaraia totona?