Iesu ena Mauri bona Gaukara

Galilea Dekenai Ma Ia Lao Haroro Totona

LAGANI rua lalonai Iesu be ia haroro goadagoada gaukarana ia karaia murinai do ia laga-ani sisina, a? Lasi, to ia ese ena hesiai gaukara ia habadaia bona ma nega ihatoina ia lao Galilea hanuana dekenai. Hanua maragidia bona badadia ia vadivadi henia bona Iuda edia dubu lalonai Basileia sivaraina namona ia harorolaia. Matana dekenai ia itaia gaudia dainai ena lalona ia hadaia ena haroro gaukara ia habadaia be gau badana.

Iesu ia loaloa gabudia dekenai, ia itaia taunimanima hutuma be lauma dalanai idia hitolo bona idia manoka. Idia dekenai ia hebogahisi badina idia lao idau gabu idau gabu dekenai, bero idia davaria bona idia naria lasi mamoedia bamona. Vadaeni, ia ese ena diba tahua taudia dekenai ia hamaorodia, ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.”

Iesu ese ena gaukara karaia dalana ta ia hegaegaelaia. Ena diba tahua taudia, lagani gunana ai ia abia hidi taudia 12 unai, ia boiridia. Rua rua amo idia ia siaia, unai dainai haroro oreadia be 6 bona idia ia hadibaia, ia gwau: “Bese idauidau taudia dekenai do umui lao lasi, bona Samaria taudia edia hanua ta dekenai do umui raka vareai lasi. To Israela besena dekenai umui lao, idia be idia boio vadaeni mamoe bamona. Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ”

Unai do idia harorolaia Basileiana be Iesu ese guna idia ia hadibalaia gurigurina lalonai ia herevalaia gauna. Basileia be ia kahirakahira ena anina be Dirava ena abia hidi Pavapavana, Iesu Keriso, be edia huanai ia noho. Iesu ia ura ia hahedinaraia ena diba tahua taudia be unai siahu bada guba gavamani amo gwaumaoro idia abia, unai dainai ia ese siahu ia henidia gorere idauidau ibounai do idia hanamoa bona mase taudia danu idia hatorea isi lou. Ia hamaorodia unai hoa karadia do idia karaia davana lasi.

Gabeai ia ese ena diba tahua taudia ia hamaorodia idia haroro neganai, tauanina durua kohu idia hegaegaelaia lasi. Ia gwau: “Umui emui pusepuse lalonai moni badadia o maragidia do umui udaia lasi. Dala dekenai laolao pusena, dabua rua, tamaka, raka au, do umui abia lao lasi. Badina be gaukara tauna ena aniani idia henia be maoro.” Ia diba hereva momokani idia moalelaia taudia ese idia do idia abia dae bona aniani bona edia ruma do idia henia idia dekenai. Iesu ia hereva hegeregerena: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua. Vadaeni ia dekenai do umui noho ela bona unai gabu umui rakatania.”

Vadaeni, Iesu ese idia ia hadibaia edena dala amo Basileia sivaraina be ruma tauna dekenai do idia halasia. Ia gwau: “Ruma dekenai umui raka vareai neganai be do umui hanamoa. Bona bema ruma taudia idia namo, umui emui hanamoa be idia latanai do umui atoa. To bema idia dika, umui emui hanamoa do umui abia lou. To bema ruma taudia o hanua taudia idia abia dae lasi umui, emui hereva idia kamonai lasi, unai gabu umui rakatania, bona emui aena dekenai ia noho momoru umui negea oho unuseni.”

Bema hanua badana ta ese edia sivarai ia dadaraia, Iesu ia gwau: “Kota henia dinana neganai Sodoma bona Gomora edia dika davana be maragi, to unai hanua ena dika davana be do ia bada.” Vadaeni, Kota Badana dinana ai, Sodom ida ia hahegeregerea, to ita be unai dainai ita gwau lasi unai kara dika taudia, Dirava ese salifa bona lahi amo ia hamasedia ore taudia, do idia toreisi lou. Anina be, Sodom bona Gomora noholaia taudia dikadia ia kota henidia bena ia hamasedia ore ela bona hanaihanai. Mataio 9:​35–10:15; Mareko 6:​6-12; Luka 9:​1-5.

◆ Edena negai Iesu be nega ihatoina Galilea dekenai ia vadivadi bona unai neganai dahaka lalohadai ia abia?

◆ Ena diba tahua taudia 12, haroro totona ia siaia neganai, dahaka hadibaia hereva idia ia henia?

◆ Dahaka dainai diba tahua taudia idia haroro, idia gwau ‘Basileia be ia kahirakahira’ be maoro?