Tura Korikoridia Tahudia Dalana

TAUHAU ta be ena motabaik amo ia moru neganai, bero dikadia ia davaria. Ia maserea bona unai bamona ia noho ela bona pura haida idia ore. Ia namo ia lao neganai ia gwau: “Bema lauegu turadia be momo, do lau namo haraga diba. Unai kerere ia vara murinai, lauegu turadia momo ese lau idia rakatania. To egu tura namodia dainai goada lau davaria lou.”

Hari inai negai tura korikoridia davaridia be auka dainai, unai bamona sivarai be momo. Gau ibounai idia namo neganai, reana oiemu turadia be momo. To kerere o dika ia vara neganai idia boio. Tura korikoridia davaria be auka.

To, bema tura korikorina ta o rua ita davaria, iseda noho do ia namo. Diba taudia idia gwau: “Hari inai negai, taunimanima momo idia gwau idia ura ma ta do idia tura henia momokani.” Bona hereva gunana ta be inai: ‘Ta ia dabu neganai idia tura henia taudia be iena tura korikoridia.’

Gunaguna, taunimanima ese ma haida edia namo idia tahua momo bona idia ura edia turadia bona edia dekena taudia idia durudia. To Tanobada Ibounai Tuarina Ginigunana murinai, taunimanima idia hetura heheni lasi guna idia karaia bamona. Hari inai negai taunimanima momo be sibodia edia namo idia tahua, idia tanikiu henia diba lasi, bona idia hebogahisi lasi.

Lagani 1,900 bamona gunanai, aposetolo Paulo ese unai kara ia perovetalaia, ia gwau: “Nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia.”​—2 Timoteo 3:​1-4.

Hari inai negai taunimanima edia kara be unai bamona, ani? Unai dainai tura korikoridia davaridia be auka. To davaridia dalana ia noho. Bona tura korikoridia be gau namo hereadia, ani? Idia ese ita idia durua diba, ita idia sisiba henia diba, iseda lalona idia hagoadaia diba, bona ita idia bamoa diba mai edia lalokau ida. Gau badana be ita diba daidia be tura korikoridia bona daidia be tura koikoidia.

“Tura” Haida Sibodia be Tura Korikoridia

Ena motabaik amo ia moru neganai bero ia abia tauhauna, ai gwauraia vadaeni tauna, be futbol tim ta ena memba ta, mai ena “turana” momo. Klab ena memba taudia bona steisini maragina dekenai idia noho taudia be idia hetura heheni bona edia hetura karana idia moalelaia. To unai bamona “hetura karana” be ia goada momokani lasi. Hari tauhau ese ia davaria hegeregerena, bema oiemu “turadia” ese oi idia rakatania, oi lalohisihisi bada. Taunimanima ita bamodia be haraga; to tura korikoridia ita davaridia be auka.

Kohu momo taudia eiava ladana badana taudia ese “turadia” momo idia davaridia diba. Bible ia gwau: “Kohu momo tauna ena turana be hutuma.” “Taunimanima iboudiai ese ladana badana taudia amo hahenamo idia abia toho; taunimanima iboudiai be harihari gaudia ia henidia tauna ena turana.” (Hereva Lada-isidia 14:20; 19:​6) To taunimanima hida edia lalohadai be kerere, ma haida idia tura henidia neganai? Bona taunimanima momo ese idia tura henidia taudia edia moni eiava edia dagi bema ia boio, nega sisina murinai idia be turana ta lasi.

Raho namo taudia be mai edia “turadia” momo danu​—edia toana namona ese taunimanima ia veridia. To unai bamona “turadia” ese taunimanima idia hakereredia diba, bona dika ia vara neganai idia boio diba. Unai dainai namona be ita . . .

Abidia Hidi Namonamo

Oibe, iseda turadia ita abidia hidi namonamo be aonega karana. Tura koikoidia momo ese sibodia edia namo idia tahua dainai idia tura henidia taudia idia hanamodia koikoi. “Iena dekena tauna ia hanamoa koikoi tauna ese reke ia atoa sibona ena aena totona.”​—Hereva Lada-isidia 29:5.

Unai dainai, hari oi tura henidia taudia oi lalodia namonamo. Oiemu lalona idia veria, oi kara namo totona, eiava oi kara dika totona, a? Sibodia edia namo idia tahua o idia heagi o idia hekokoroku a? Idia kara kava bona edia mauri idia laloa bada lasi a? Idia be lebulebu taudia eiava idia kara mai edia hemataurai ida, a? Oiemu bamodia idia hereva koikoi eiava idia kara koikoi a? Drag muramurana idia inua a? Kekero muramurana momo idia inua a? Bema oibe, dika oi davaria diba. Ena be oi kara maoromaoro, oi goeva, bona oi lalo-manau, to inai mani oi laloa: “Bema kara dika taudia danu umui turana karaia neganai idia ese emui kara namona do idia hadikaia.”​—1 Korinto 15:33.

Kara dika taudia oi bamodia lasi, edia kara do oi tohotohoa garina. Reana do oi lalo-pararalaia lasi, to metairametaira edia kara bona edia lalohadai be oi dekenai do idia hanai. Bible ia gwau: “Aonega tauna ida idia raka tauna be sibona do ia aonega, to kavakava taudia ia bamodia tauna ese dika do ia davaria.”​—Hereva Lada-isidia 13:20.

Tura oi tahudia neganai, oi kara kerere haraga diba. To oi lalo-metau lasi. Taunimanima namodia momo idia do noho. Unai dainai, tura korikoridia be edena bamona do oi davaridia diba?

[Picture on page 4]

Oiemu bamodia ese oiemu lalona idia ania diba