Hahemaoro Maoromaoro Iboudiai Totona Do Ia Mai A?

KOTA Rumana Badana, ladana Old Bailey, London ai, idia vadivadi henia taudia ese unai ruma dudunai hahine ta ena toana, nadi amo idia karaia gauna, idia itaia diba; hahemaoro maoromaoro ia laulaulaia. Ena imana ta ai sikeili ta ia dogoatao; anina be kota idia karaia taudia ese hereva iboudiai do idia tohoa namonamo. Ena imana ma ta ai tuari kaiana ta ia dogoatao, kara dika taudia edia davana ia henidia totona. Ma gabu haida dekenai inai bamona laulau haida nadi amo idia karaia gaudia oi itaia diba. Nega haida “hahemaoro maoromaoro” ena nadi laulauna ena matana idia koua, taunimanima edia toana laloa lasi karana ia laulaulaia totona.a

To reana do ita henanadai: Unai hahine ese ia laulaulaia gauna, taunimanima iboudiai kota henidia maoromaoro unai, be hari lalo-diari negana lalonai ia noho momokani, a? Momokani, tano iboudiai lalodiai taravatu idia atodia, bona hahemaoro taudia bona kota idia gaukaralaidia. Momokani danu, mai edia lalohadai namodia taudia momo ese taunimanima edia noho namo idia tahua, bona hahemaoro maoromaoro idia haginia toho. To, ita diba hahemaoro maoromaoro idia karaia hanaihanai lasi. Kahirakahira dina iboudiai ita itaia, ita kamonai eiava ita duahia, taunimanima ese hahemaoro maoromaoro idia hadikaia bona koikoi dalanai idia raka.

Idia samania hahine ta dekenai ia vara gauna be inai: Ia be kerere eiava lasi ia do tahua lasi neganai, diadi tauna ia gwau bema do ia mai ruma ta dekenai idia mahuta hebou totona, kota vairanai do ia gini neganai “hahemaoro hereva namona” do ia henia. Hahemaoro maoromaoro durua gaukarana ena maduna idia abia taudia momo idia kara koikoi eiava edia gaukara idia karaia namonamo lasi. Time magasin lalonai idia torea sivaraina ta be inai: United States dekenai, gabu ta lalonai kota badadia lalodiai idia gaukara hahemaoro taudia iboudiai 5 5 amo, 3 3 idia samanidia, badina idia gwau idia be dala kererena amo hahemaoro tauna ma ta idia durua dainai.

Kara dika taudia ese edia davana korikori idia abia lasi sivaraina idia duahia neganai, taunimanima momo idia hesiku bona idia laloa taravatu utua karana be gau dika badana lasi, bona taravatu ma idia utua momo. (Kohelete 8:11) Netherlands amo ia mai sivaraina be inai: “Dutch taudia momo ese politikol taudia idia samanidia, idia gwau kara dika ia bada daekau ena badina be, idia koua lasi dainai. Taunimanima ma haida ese kota oreadia bona hahemaoro henia taudia haida idia samanidia, . . . kara dika ena davana korikorina be kara dika taudia idia henidia lasi dainai.” Pulisi eiava hahemaoro karaia oreadia idia hamaoromaorodia be namo, to hahemaoro maoromaoro dekenai ita dabu dikadika ena badina ma haida idia noho.

Oi diba vadaeni, tano momo lalodiai taga taudia be momo lasi, to edia taga idia habadaia noho negana lalonai, unuseniai idia noho taudia hutuma idia ogogami noho. Unai bamona kerere idia vara badina be taunimanima edia kopina, edia noho, edia gado, idia be tau eiava hahine, bona edia tomadiho be idauidau dainai, bona heduru idia abia lasi edia mauri hanamoa totona. Taga tanodia lalodiai ena be muramura bona gorere hanamoa karadia mai edia davana bada herea be taunimanima momo idia henidia, to taunimanima milion momo idia do gorere noho bona idia mase noho, badina edia moni ia hegeregere lasi ranu goevana bona gorere hanamoa muramuradia do idia hoia totona. Idia vara negana amo ela bona idia mase negana ai hahemaoro maoromaoro idia davaria lasi.​—⁠Kohelete 8:⁠9.

Danu, hisihisi haida be taunimanima edia kara dainai idia vara lasi. Nega haida hahine ta ia mara neganai, ena beibi ia gorere o ena tauanina ia dika. Bema hahine ta ena beibi ia vara neganai, ena tauanina be dika o ia mase, to ia kahirakahira dekenai hahine ma haida ese edia gorere lasi beibi matamatadia idia rosia, unai hahine ia laloa ia dekenai ia vara gauna be maoro, a? Unai dainai ita henanadai: Kara maoromaoro o hahemaoro maoromaoro be ia vara momokani diba, a? Murina sivaraina ese do ia hahedinaraia hahemaoro kerere karadia do idia hamaoromaorodia.

Momokani, Bible ena hereva Kohelete 1:15 dekenai ita abia dae be mai ena badina. Unai siri lalonai, aonega pavapavana ta ese taunimanima edia kara ia gwauraia, ia gwau: “Ia gageva gauna hamaoromaoroa dalana be lasi, bona idia hegeregere lasi gaudia be idia duahia diba lasi.”

Aonega bona kara maoromaoro ura henia tauna ma ta be Iesu. Luka 18:​1-5 dekenai parabole ta lalonai, kota naria tauna ta be inai bamona ia herevalaia: “Dirava dekenai ia gari lasi, bona taunimanima danu ia matauraia lasi.” Iesu ese hari inai negai idia noho kota naria taudia momo be unai bamona ia herevalaidia diba, ani? Vadaeni, vabu ta ese unai kota naria tauna dekenai ia noinoi loulou, hahemaoro maoromaoro, taravatu ese ia henia gauna, do ia abia totona. To Iesu ia gwau, vabu ena noinoi ese kota naria tauna dikana ia habadua dainai, ia durua. Unai dainai Iesu ia diba hahemaoro kerere karadia be momo. Iesu danu idia samania koikoi, idia hahisia dikadika bena mai edia dagedage ida idia hamasea. Unai be hahemaoro kerere badana!

Taunimanima momo idia laloa kara maoromaoro Diravana be ia noho. Central America ena tano ta lalonai, Pope John Paulo 11 ese Mass ia karaia neganai, ia gwau: “Taunimanima ta oi hadikaia neganai, hahemaoro maoromaoro karana oi koua neganai, bona ta oi kara dika henia ena badina be lasi neganai, bema ta oi hahisihisia, ruma oi makohia bona taunimanima ta oi dogoatao bona oi abia lao, eiava ena mauri oi laloa bada lasi, unai be kara dikana bona unai bamona kara ese Dirava ia hadikaia.” Unai hereva be maoro. To, hahemaoro kerere karadia idia do noho. Unai tano lalonai lagani 5 idia do abia lasi natudia 10 10 amo 8 8 edia aniani be ia hegeregere lasi. Taunimanima 100 100 amo 20 20 be sibodia edia tano namona idia hoia diba.

Vadaeni, ita ura diba gauna be inai: Dirava ta be momokani ia noho bona inai hahemaoro kerere karadia ia ura lasi, bona oi do ia durua unai kara dikana ta ese oi ia hahisia neganai, a? Hahemaoro kerere karadia iboudiai do ia haoredia, a?

[Footnotes]