Dirava Vairanai Do Ita Noho mai Goeva Bona mai Gari Danu
“Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava vairanai do ita noho namonamo, mai goeva bona mai gari danu.”—2 Korinto 7:1.
IEHOVA be helaga Diravana. Guba dekenai mai edia dagi bada anerudia ese iena helaga karana idia gwauraia. Idia gwau: “Tuari oreadia edia Iehova be “Helaga, Helaga, Helaga. Iena hairai ese tanobada ibounai ia hahonua.” Lagani 800 B.C.E. murinai peroveta Isaia ese matahanai ta ia abia, bona Serapi taudia be unai hereva idia boiboilaia ia itaia. Lagani 100 C.E. vairanai, aposetolo Ioane ese matahanai amo “Lohiabada ena dina” dekenai do ia vara gauna ia itaia, bona hari ita be unai dina dekenai ita noho inai. Ia ese mauri gaudia hani ia itadia bona idia ese Iehova ena terona idia gini hegege, bona idia hereva loulou, idia gwau: “Helaga, Helaga, Helaga. Lohiabada Dirava be mai Siahu Ibounai. Gunaguna ia noho, harihari ia noho, bona gabeai danu do ia mai.” Guba dekenai Iehova ena aneru be inai hereva toi idia boiboilaia noho be Havaraia Diravana ena helaga hereadaena idia gwauraia hedinarai goevagoeva.—Isaia 6:2, 3; Apokalupo 1:10; 4:6-8.
Helaga bona Gini Siri Karadia
2 Helaga ena anina be tomadiho dalanai ita goeva sibona lasi, to ena anina be gini siri, eiava hahelagaia karana. Iehova be ia goevadae momokani; ia be tanobada ena miro diravadia amo ia gini siri momokani. Mose ese iena goeva eiava helaga karana ia gwauraia inai bamona: “Iehova e, dirava momo herea edia huanai oi bamona be daika? Oi hegeregerena be daika? Helaga dekenai oi herea momokani, daika be oi bamona?”—Esodo 15:11.
3 Helaga Diravana, Iehova, ena ura be tanobada dekenai idau negai Israel bese taudia idia helaga danu. Ia ese kohena taudia bona Levi taudia sibodia lasi, to ena bese taudia iboudiai ia haganidia idia helaga totona. Iehova be Mose dekenai ia gwau: “Israel taudia hamaorodia, oi gwau: ‘Umui helaga be namo, badina be lau Iehova, emui Dirava lau helaga.’ ” (Levitiko 19:2) Idia helaga totona, Iehova ese taravatu ia henidia bona unai taravatu ia durudia lauma dalanai idia goeva, idia kara goeva, idia lalohadai goeva, edia tauanina ia goeva, bona edia tomadiho karana kalaga dekenai, bona gabeai dubu dekenai ia goeva noho totona.
Idia Gini Siri Besena
4 Israel taudia ese Dirava ena taravatu idia badinaia momo dainai, idia edia kara be idau, bese idaudia edia kara bodagadia idia karaia lasi. Unai kara amo idia gini siri, helaga Diravana, Iehova ena hesiai gaukara idia karaia totona idia helaga. Mose ia hamaorodia, ia gwau: “Umui be bese helagana, Iehova, emui Dirava ena. Iehova emui Dirava, ese tanobada besedia iboudiai bogaragidia amo umui ia abia hidi, iena bese korikori ai umui do ia halaoa totona.”—Deuteronomi 7:6.
5 Lauma Israel taudia be idia goeva bona dika amo idia gini siri be mai taravatuna danu. Aposetolo Petro ese abia hidi lauma Israel taudia ia tore henidia, ia gwau: “Dirava do umui kamonai henia. Guna, umui be do diari umui diba lasi neganai emui tauanina ena ura dikadia ese umui idia biagua. Unai bamona do umui karaia lou lasi. To emui kara ibounai lalonai do umui helaga, umui ia boiria Diravana ese ia helaga hegeregerena. Badina be Buka Helaga lalonai Dirava sibona ia gwau, ‘Do umui helaga, badina lau be helaga noho.’ ”—1 Petero 1:1, 14-16.
6 Apokalupo karoa 7 lalonai, ia gwau “hutuma bada herea” be Iehova ena “helai gabuna badana vairanai bona Mamoe ena Natuna vairanai idia gini. Edia dabua be kurokuro,” bona “idia ese edia dabua idia huria vadaeni Mamoe ena Natuna ena rarana lalonai.” (Apokalupo 7:9, 14) Edia dabua kurokuro ese edia goeva karana bona edia kara maoromaoro karana Iehova vairanai ia laulaulaia, idia abidadama Keriso be idia totona ia mase, unai dainai Iehova ese kara maoromaoro taudia ia gwauraidia. Vadaeni, ia hedinarai goevagoeva gauna be inai, Iehova ese tomadiho karana ia abia dae totona, gau badana be horoa Keristen taudia bona “mamoe idaudia” danu ese lauma dalanai bona tauanina dalanai idia goeva noho.—Ioane 10:16.
7 Vadaeni, harihari ita ese Iehova ena hahegani haida do ita herevalaia, gunaguna Iehova ese inai hahegani be ena bese taudia ia henidia, edia lalona ai bona edia tauanina ai do idia goeva totona. Inai hahegani edia anina Dirava ena orea taudia dekenai hari inai nega lalonai be do ita herevalaia danu.
Lauma Dalanai Idia Goeva
8 Unai idau negai Israel taudia ese bese idaudia edia tomadiho miro karadia amo idia gini siri be gau badana. Iehova ese Mose dekena amo ia gwau: “Naria namonamo, umui lao henia tanona ena taunimanima ida do umui gwauhamata heheni lasi, umui hekwakwanai garina. To edia boubou patadia do umui hamorudia; edia kaivakuku [kara bodaga tomadiho lalonai idia gaukaralaidia gaudia] do umui hamakohidia; edia dubu do umui haorea momokani; badina be umui ese idau dirava ta do umui tomadiho henia lasi, badina be Iehova ladana ta be Vagege, ia be vagege Diravana [eiava, “ia ura ia sibona ita tomadiho henia,” New World Translation Reference Bible, footnote]; unai dainai umui naria namonamo unai tano ena taunimanima ida gwauhamata umui karaia garina, badina edia dirava ida heudahanai karadia do idia karaia bona edia dirava dekenai boubou gaudia do idia henia.”—Esodo 34:12-15.
9 Lagani hundred momo murinai, Iehova ese Isaia ia hasiahua bena mai edia abidadama orena taudia ia peroveta henidia. Idia ese Babulono do idia rakatania bona do idia giroa lao Iuda dekenai. Idia dekenai ia gwau: “Umui raka oho, umui raka oho, unuseni amo umui raka siri; gau mirona ta umui daua toho lasi. Iehova ena disi bona kapusi [tomadiho goevana be Ierusalem ena dubu helaga dekenai haginia lou totona do idia gaukaralaia gaudia] umui huaia taudia, ia bogaragina amo umui raka siri, umui goeva.”—Isaia 52:11.
10 Unai hegeregerena, namona be lauma Israel taudia bona edia bamodia idia naria namonamo, inai tanobada ena tomadiho idauidau mai edia kaivakuku ese do idia hamirodia garina. Horoa Keristen taudia Korinto kongregesen lalonai be aposetolo Paulo ese ia tore henidia, ia gwau: “Dirava ena dubu helaga bona kaivakuku be edena bamona idia hakapua tamona diba? Badina ita be Mauri Dirava ena dubu helaga! Dirava ese inai bamona ia hereva, ia gwau, ‘Lau be lauegu bese taudia danu do lau noho, bona idia danu do lau raka hebou. Bona lau be edia Dirava do lau lao, bona idia be lauegu bese taudia do lau halaoa.’ Unai dainai Lohiabada ma ia hereva, ia gwau, ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri. Vadaeni umui do lau abia dae.’ ”—2 Korinto 6:16, 17.
11 Lagani 1919 lalonai Dirava ese horoa taudia oredia be Babulono Badana ena tomadiho mirodia amo ia ruhadia nege bona ia hagoevadia. (Malaki 3:1-3) Guba amo ia boiboilaia herevana idia kamonai henia; unai hereva be inai: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!” (Apokalupo 18:4) Lagani 1935 amo ema bona hari, “mamoe idaudia” edia “hutuma bada herea” taudia danu be inai boiboi idia kamonai henia bona Babulono ena tomadiho mirona idia rakatania. Horoa taudia bona edia bamodia be lauma dalanai idia goeva noho totona, idia ese danu tomadiho momokanina idia dadaraia taudia edia lalohadai dikadia idia dadaraia vaitani.—Ioane 10:16; 2 Ioane 9-11.
Kara Goeva
12 Ena Taravatu amo, Iehova ese Iarael taudia edia kara ia hamaoromaoroa, bena idia ese idia kahirakahira idia noho kara bodaga besedia be kara maoromaoro ai idia hereadia momokani. Israel lalonai headava bona ruma bese maurina idia naria namonamo. Taravatu Ten edia taravatu namba 7 ese heudahanai ia taravatulaia. Heudahanai taudia bona sihari kava taudia idia panisidia auka herea. (Deuteronomi 22:22-24) Taravatu henunai rami-hebou ulatodia idia naridia. (Deuteronomi 22:28, 29) Hahelaga taudia ese lebulebu hahinedia idia adavadia diba lasi. Bona hahelaga tauna badana ese haneulato, rami-hebou goevana ta mo sibona, ia adavaia diba.—Levitiko 21:6, 7, 10, 13.
13 Unai hegeregerena, Hahelaga Tauna Badana, Iesu Keriso, be mai ena “adavana,” “headava matamata hahinena,” anina be horoa Keristen taudia 144,000; Bible ia gwau idia be “hahine danu idia sihari lasi momokani” taudia hegeregeredia. (Apokalupo 14:1-5; 21:9) Idia be sibodia idia naria namonamo dainai Satana ena tanobada ese ia hamiroa lasi. Hahediba herevadia goevadia idia badinaia bona kara goevadia idia karaia nega ibounai. Aposetolo Paulo ese horoa Keristen taudia Korinto dekenai ia tore henidia, ia gwau: “Badina be Dirava ena mama namona hegeregerena, lau ese umui totona lau mama henia. Umui be kekeni namona, tau ia diba lasi kekenina bamona. Lau ese emui maoheni lau karaia vadaeni tau tamona dekenai, Keriso sibona.” (2 Korinto 11:2) Danu Paulo ia gwau: “Keriso ese danu iena mauri ia atoa diho ekalesia dainai. Inai bamona ia karaia be iena hereva dekena amo Dirava vairanai ekalesia do ia hahelagaia totona, ranu dekena amo ia huria murinai. Bona ekalesia be Keriso ese do ia abia, iena. Ia ura iena ekalesia be ia vairanai nega ibounai, mai ena hairaina, miro lasi, makuku lasi bona bero ta lasi. Ia ura ia be helaga bona goevagoeva momokani.” —Efeso 5:25-27.
14 Keriso ena “adavana” be lauma dalanai ia goeva. Unai ese ia hahedinaraia goevagoeva namona be ena ekalesia taudia iboudiai edia kara do ia goeva be namo. Aposetolo Paulo ia gwau: “Umui sibona umui koia lasi, Lebulebu taudia, kaivakuku idia tomadiho henia taudia, heudahanai taudia, . . . Inai bamona taudia ta lasi be Dirava ena Basileia do ia davaria diba. Umui haida be guna unai bamona umui karaia. To Dirava ese umui emui kara dika ia huria vadaeni, ia ese helaga taudia umui ia halaoa vadaeni.”—1 Korinto 6:9-11.
15 Ia hedinarai goevagoeva mamoe idaudia edia kara idia goeva be mai anina bada, badina Iehova ia gwau kara bodaga taudia edia dala do ia koua bena iena “guba matamatana” bona “tanobada matamatana” lalodiai do idia vareai lasi taudia, ia gwau: “Kara bodaga taudia, taunimanima idia alaia taudia, lebulebu taudia, . . . Idia be unai gohu, lahi bona salifa idia araia noho gabunai do idia lao. Inai be mase iharuana.”—Apokalupo 21:1, 8.
Hemataurai Headava Lalonai
16 Horoa taudia bona mamoe idaudia idia goeva noho totona, idia headava lasi be maoro lasi. Bible lalonai ia gwau taunimanima ese taravatu idia karaia idia headava lasi totona be maoro lasi. (1 Timoteo 4:1-3) Headava lalonai mahuta hebou karana be miro karana lasi. Dirava ena Hereva lalonai ia gwau: “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia karaia momokani.”—Heberu 13:4.
17 To, bema Keristen tauhau bona ulato idia ura ‘Dirava vairanai do idia noho mai goeva bona mai gari danu,’ ekalesia taudia sibodia do idia ura adavaia. Paulo ese ena Keristen bamodia ia sisiba henidia, ia gwau: ‘Tauanina bona lauma hamiroa karadia ibounai do ita hadokoa, bona Dirava vairanai do ita noho namonamo, mai goeva bona mai gari danu.’ To unai hereva ia do gwauraia lasi neganai, aposetolo Paulo ia gwau: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? . . . Abidadama tauna bona abidadama lasi tauna ruaosi be idia hegeregere diba, a?” (2 Korinto 6:14, 15; 7:1) Keristen taudia be Iehova ena taunimanima goevadia, unai dainai, tatau eiava hahine idia ura idia headava neganai, aposetolo ena sisiba do idia badinaia, bona “ekalesia tauna sibona do [idia] adavaia.” Unai anina be ia gwauhamata, ia bapatiso bona Iehova ena hesiai ia karaia tauna eiava hahinena sibona do ia adavaia. (1 Korinto 7:39) Idau negai, bona hari inai nega lalonai danu, Dirava ena gwauhamata taudia be inai sisiba hereva idia badinaia be mai anina bada dika idia davaria garina. (Deuteronomi 7:3, 4 bona Nehemia 13:23-27 oi hahegeregeredia.) Bema inai sisiba ita badinaia lasi, unai anina be iseda Biaguna Badana, Iehova, ita gari henia lasi.—Malaki 1:6.
18 Danu, Israel lalonai, headava karadia, tatau be edia adavadia ida idia karaia karadia latanai taravatu haida idia atoa. Hahine be hua gorerena ia abia neganai, ena adavana be ia ida idia hekure hebou diba lasi. (Levitiko 15:24; 18:19; 20:18) Unai ena anina be Israel tataudia ese edia adavadia do idia hebogahisi henidia mai edia lalokau ida, bona sibodia edia tauanina edia ura do idia biagua namonamo. Keristen tataudia danu ese edia adavadia unai bamona idia bogadia hisi be namo, ani? Aposetolo Petro ia gwau, namona be Keristen tataudia be ‘edia adavadia danu idia noho hebou ena dala do idia laloa namonamo,’ anina be, do idia lalo-parara ‘edia adavadia edia tauanina be goada herea lasi.’—1 Petero 3:7.
“Dala Helagana” Rakalaia
19 Atai herevadia amo ia hedinarai goevagoeva Iehova ena taunimanima edia kara bona Satana ena taunimanima edia kara idia idau momokani. Inai tanobada ena kara ia dika ia lao, taunimanima be sibodia edia ura idia karaia. Iesu ia gwau: “Iduara maragina dekenai do umui raka vareai. Badina be lahi gabuna [mase] ia lao dalana ena iduara ia bada bona ena dala danu bada herea. Bona taunimanima momo herea be unai dala dekenai idia raka vareai.” (Mataio 7:13) Taunimanima hutuma ese unai dala badana idia rakalaia. Aposetolo Petro ia gwau unai taudia edia kara be, “matabodaga, sihari kava, kekero, lebulebu, uaina [idia] inua momo, bona kaivakuku dikadia [idia] tomadiho henia,” unai bamona kara ese “lebulebu karadia” dikadia idia havaraia. (1 Petero 4:3, 4) Bona ena dokona be mase.
20 To, Dirava ena taunimanima ese ma dala idauna ta idia rakalaia, mai edia kara goeva taudia ese inai dala goevana idia rakalaia. Peroveta tauna Isaia ese tanobada dokona ena nega lalonai inai dala do ia kehoa ia perovetalaia, ia gwau: “Unuseni ai laolao dalana do ia noho, bona ena ladana do idia hatoa ‘Dala Helagana,’ bona goeva lasi taudia do idia rakalaia diba lasi.” (Isaia 35:8) Buka ta ladana Worldwide Security Under the “Prince of Peace” ese unai peroveta hereva ena anina ia kikilaia, ia gwau: “Lagani 1919 ai, lauma dalanai Dirava ena moale hesiai taudia vairanai unai dala ia kehoa idia rakalaia totona. Iehova vairanai idia ura helaga karana idia karaia taudia ese unai ‘dala’ idia rakalaia, ‘Dala Helagana’ unai. . . . Hari inai nega lalonai, ena be ita be ‘nega dokona lalonai ita noho,’ to Dirava ia kehoa dalana ia do kehoa noho. Ura taudia momo herea ese . . . lauma paradaiso ia lao henia ‘Dala Helagana’ idia rakalaia.”a
21 Oibe, horoa lauma Israel orena taudia bona edia bamodia, mamoe idaudia, edia kara bona Satana ena tanobada taudia edia kara be idau momokani, idia be helaga karadia idia diba lasi momokani. Diabolo ena taunimanima ese helaga karadia idia matauraia lasi, unai ‘dala badana . . . mase ia lao henia dalana idia rakalaia’ neganai. Idia be lauma dalanai bona kara dekenai idia goeva lasi, to unai sibona lasi, nega momo tauanina dekenai idia miro bona edia toana be ia dika. To, aposetolo Paulo ia gwau: “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava vairanai do ita noho namonamo, mai goeva bona mai gari danu.” (2 Korinto 7:1) Murina sivarai dekenai Dirava ena taunimanima be edena dala amo edia lalona bona edia tauanina dekenai do idia goeva do ita kikilaia.
[Footnote]
a Karoa 16, rau 134-5.
Inai Oi Laloa Lou
◻ Helaga karadia rua be dahaka, bona dahaka dainai ita gwau diba Iehova be helaga herea momokani?
◻ Edena dala rua amo Israel taudia idia hahedinaraia idia be helaga besena ta?
◻ Lauma Israel taudia bona edia bamodia mamoe idaudia ese dahaka hahegani idia abia idia badinaia totona?
◻ Headava totona ta ita abia hidi neganai, edena bamona ita hahedinaraia ita be Dirava garina ita gari?
◻ Hari inai negai edena dala rua idia noho ita rakalaia totona, bona dahaka dainai dala maorona ita abia hidi be mai anina bada?
[Study Questions]
1. Edena bamona ita diba dagi bada anerudia idia abia dae Iehova be helaga?
2. (a) Helaga ena anina badadia rua be dahaka, bona inai dala rua amo Iehova be edena bamona ia helaga? (b) Mose ese Iehova ena helaga karana edena bamona ia gwauraia?
3. Israel taudia idia helaga totona hahegani idia abia dahaka idia karaia totona, bona Iehova be edena bamona ia durudia?
4, 5. (a) Dahaka dainai Israel be bese helagana idia gwauraia? (b) Lauma Israel taudia ese hahegani idia abia dahaka idia karaia totona? Petro be edena bamona unai ia hamomokania?
6, 7. (a) Apokalupo karoa 7 lalonai “hutuma bada herea” edia toana be edena bamona ia gwauraidia, bona dahaka do idia karaia be namo? (b) Murina paragraf haida dekenai dahaka do ita kikilaia?
8. Israel taudia ese Kanana ena tomadiho karadia amo idia gini siri ena badina haida be dahaka?
9. Lagani 537 B.C.E. ai, mai edia abidadama orena taudia ese Babulono idia rakatania neganai, dahaka hahegani idia abia?
10, 11. (a) Aposetolo edia negai, lauma Israel taudia ese dahaka hahegani idia abia? (b) Lagani 1919 amo bona lagani 1935 amo, lauma dalanai idia goeva noho totona, horoa taudia bona edia bamodia ese edena dala amo unai hahegani herevadia idia badinaia?
12. (a) Iehova ese edena taravatu amo ia ese Israel taudia edia kara ia hamaoromaoroa bena bese idaudia edia kara idia hereaia? (b) Hahelaga taudia edia taravatu badana be dahaka?
13. Keriso “adavana” oreana be dahaka bamona ia hahegeregerea, bona dahaka dainai?
14, 15. (a) Keriso ena adavana be lauma dalanai idia goeva, to ma dahaka idia karaia be gau badana, bona edena Bible siri ese unai ia hamomokania? (b) Edena bamona ita diba mamoe idaudia edia kara idia goeva be gau badana danu?
16, 17. (a) Edena Bible siridia idia hahedinaraia headava ese goeva karana ia hadikaia lasi? (b) Keristen taudia idia ura headava neganai, edena bamona idia hahedinaraia Dirava garina idia gari, bona dahaka dainai aposetolo tauna ena hahegani idia dadaraia be namo lasi?
18. Keristen taudia be edena dala ma ta amo edia headava lalonai hemataurai karana idia hahedinaraia diba?
19, 20. (a) Taunimanima hutuma idia rakalaia dala badana ena toana oi gwauraia. (b) Edena bamona Iehova ena taunimanima edia kara be Satana ena tanobada ena kara amo idia idau? (c) Dirava ena taunimanima be edena dala idia rakalaia, edena negai unai dala ia kehoa, bona daidia sibodia idia rakalaia diba?
21. Edena dala amo bona badina be dahaka Iehova ena hesiai taudia edia kara bona Diabolo ena taunimanima edia kara idia idau? Bona murina sivarai dekenai dahaka do ita kikilaia?
[Picture on page 14]
Dirava ena Hereva ia gwau: ‘Headava idia matauraia be namo’