Paradaiso Havaraia Lou Karana ese Dirava Do Ia Hahairaia
“Lauegu aena gabuna do lau hahairaia.”—ISAIA 60:13.
1, 2. (a) Iena peroveta tauna Isaia amo, tanobada dekenai do ia vara gauna be edena bamona ia perovetalaia? (b) Lagani tausen dina vairanai bema ita itaia diba, dahaka do ita itaia?
IEHOVA be guba padanai tanobada ia havaraia, ia be iena aena henunai ia noho bamona, bona ia be aena atoa gabuna ta bamona. Iena peroveta tauna Isaia dekena amo, Dirava ese ‘ena aena gabuna do ia hahairaia’ karana ia perovetalaia. (Isaia 60:13) Dirava ena siahu amo idia torea Bible sivaraina ena heduru dainai, ita be lagani tausen dina vairana dekenai ita itaia diba bona dahaka do ia vara taunimanima dekenai ita itaia diba danu, unai be mai ena siahu bada telescope amo gau ta ita raraia bamona. Ita ese hairai gabuna momokani ita itaia! Tanobada ibounai ena toana be hairai herea badina Uma Karaia Tauna badana momokanina ese ia havaraia dainai. Tanobada ibounai dekenai Paradaiso ia havaraia lou taunimanima idia noholaia totona!
2 Oibe, Atai Herea Diravana, taunimanima ia havaraia bona paradaiso ena uma dekenai ia atoa Diravana be ia ura taunimanima do idia moale bada. Taunimanima be unai bamona lalokau bada Diravana idia abidadama henia be namo, ia dainai do idia gwau diba, “Dirava be lalokau”! (1 Ioane 4:8, 16) Paradaiso do ia vara lou neganai, ia lalonai idia tubu bada vadaeni taudia edia tauanina do idia goevadae bona lalokau dekenai do idia noho tadikaka bona taihu bamona. (Isaia 9:6) Lalokau ese idia ia durua dainai lalo-tamona dekenai idia ese guba bona tanobada ia Havaraia Diravana, Iehova, ena hereva do idia badinaia goevagoeva diba.
3, 4. (a) Guba bona tanobada be edena dala dekenai do idia tamona? (b) Tanobada dekenai Paradaiso do ia vara lou neganai, aneru be dahaka do idia karaia?
3 Lagani tausen momo idau negai, Dirava ena siahu amo ia toretore tauna ta ese Dirava ena hereva ia abia hidi besena taudia dekenai ia torea, ia gwau: “Guba be lauegu terona, bona tanobada be lauegu aena atoa gauna.” (Isaia 66:1) Iena aena atoa gabuna, Paradaiso tanobadana unai, be ia hairai herea be gau badana, badina guba dekenai iena terona itaia lasi noho gabuna be ia hairai herea dainai.
4 Tanobada ia karaia neganai, guba dekenai Dirava ena terona badinai idia gaukara anerudia ese tanobada idia raraia diho neganai reana idia hoa. Reana idia moale bada herea iena hairai gaudia idia raraia neganai! Reana idia moale bada herea dainai ane idia abia, ani? (Sefania 3:17; Salamo 100:2 oi itaia.) Havaraia Diravana be ena gaukara dainai ia moale bada, unai dainai toretore tauna ta ia abia hidi guba dekenai ia vara gauna ena sivarai ia torea totona, ia gwau: “Daba hisiudia idia boiboi hebou mai edia moale danu, bona Dirava ena natudia iboudiai idia boiboi, ia idia hanamoa bada.” (Iobu 38:7) Vadaeni, Paradaiso do ia vara lou neganai, Dirava ena aneru do idia boiboi lou Dirava hanamoa bada totona!
5. Dirava be mai ena ura inai tanobada dekenai, bona iena ura do ia guguru neganai edena bamona do ita laloa?
5 Matamana negana amo Iehova Dirava ena ura be inai tanobada be paradaiso gabunai do ia halaoa, Buka Helaga amo unai sivarai ita diba neganai iseda kudouna ia hamoalea bada. Unai moale bona hanamoa herevadia be Dirava dekenai idia henia be maoro, badina ena ura inai tanobada dekenai do ia guguru bona ena gaukara ibounai do idia hereadae, ia kerere diba lasi. Hanamoa hereva ibounai be ia dekenai ita henia be namo!—Salamo 150:1, 2; Isaia 45:18; Apokalupo 21:3-5.
Toreisi Lou Taudia Do Idia Heduru Paradaiso Havaraia Lou Totona
6 Ena be Aramagedono amo do idia roho mauri taudia be hutuma bada herea momokani lasi, to idia ese natudia do idia havaraia karana mo sibona amo tanobada do idia hahonua lasi. Iehova ese iena ‘aena atoa gabuna do ia hahairaia’ dalana ta be, Keriso ia henia boubou karana amo ia hoidia taudia be mase amo idia do ia hatoreaisi lou. Idia danu be maduna do idia abia, tanobada be paradaiso gabuna ai do idia halaoa gaukara namona do idia durua.—Kara 24:15.
7. Aramagedono amo do idia roho mauri taudia be guna Iesu ia gwauraia herevana ta do idia laloa noho, unai hereva be dahaka?
7 Aramagedono amo do idia roho mauri taudia be Lohiabada Iesu Keriso guna ia gwauraia herevana do idia laloatao noho, ia gwauraia kudouna hamarerea herevana be inai: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.” (Ioane 5:28, 29) Dirava ena Natuna ena gadona do idia kamonai neganai mase guria gabu dekena amo taunimanima do idia toreisi lou, hegeregere guna Lasaro dekenai ia hereva bamona ma do ia hereva, guna ia gwau bamona: “Lasaro e, oi mai murimuri dekenai.”—Ioane 11:43.
8, 9. Reana daika daika do idia toreisi lou guna tanobada matamatana dekenai mauri do idia abia lou totona, bona dahaka ese Aramagedono amo do idia roho mauri taudia do ia hamoalea?
8 Iesu Keriso ena Lagani 1,000 Lohia Negana lalonai mase taudia ese ena gadona do idia kamonai neganai, reana daika daika do idia toreisi lou guna tanobada matamatana dekenai mauri do idia abia lou totona? Reana hari inai nega dokona lalonai idia mase taudia, “mamoe idaudia haida” unai, be do idia toreisi lou guna. (Ioane 10:16) Unai taudia be do idia toreisi lou neganai tanobada matamatana ena mauri taravatu idia badinaia haraga diba.—Mataio 25:34; bona Ioane 6:53, 54 oi itaia.
9 Aramagedono amo do idia roho mauri taudia be “hisihisi bada herea” ena nega vairanai idia mase “mamoe idaudia haida” edia toreisi lou do idia itaia neganai, do idia moale bada herea! (Mataio 24:21) Unai taudia idia toreisi lou neganai, Aramagedono amo idia roho mauri taudia ese idia do idia diba, do idia davaria heheni lou, bona idia danu Atai Herea Diravana ena hesiai gaukarana ma idia karaia hamatamaia lou!
10. Bema Aramagedono amo do oi roho mauri, reana dahaka do oi itaia diba?
10 Bema oi be Aramagedono amo do oi roho mauri tauna ta, reana oiemu mase varavara ginigunana ta do ia toreisi lou neganai oi itaia diba. Unai do oi itaia neganai emu lalona do ia moale momokani, hegeregere idau negai Lohiabada Iesu ese lagani 12 kekenina ta ia hatoreaisi lou bona ena tamana bona sinana idia rosia lou ena moale bada bamona, ani? Mai moale bada danu “idia hoa dikadika.” (Mareko 5:42) Momokani, Hade bona davara amo mase taudia do idia toreisi lou oi itaia neganai do oi moale bada herea. (Apokalupo 20:13) Gabeai, unai bamona moale gauna do ia vara, kahirakahira do ia vara!
‘Tanobada Ibounai Dekenai Lohia Taudia Ai Do Idia Lao’
11 Iesu ese ena mauri goevadaena ia bouboulaia taunimanima ia hamauridia totona, bona ia ese mase taudia ia hatoredia isi lou siahuna ia abia dainai, ia ese Salamo 45:16 ena hereva do ia hagugurua diba. Unai ane ena hereva ese Iesu Keriso ia perovetalaia Pavapava dagina ia abia neganai, ia gwau: “Oiemu [tanobada] tubuna taudia edia gabu ai, emu natudia do idia gini, tanobada ibounai lalonai lohia taudia ai do oi halaodia.” Unai ane ese ia hahedinaraia Iesu Keriso be tanobada taudia do ia gwauraia ena natudia bona ia be edia guba tamana ai do ia lao, bona ena natuna haida do ia abia hidi, “tanobada ibounai lalonai lohia taudia ai do [ia] halaodia” totona. Ia be ‘David natuna’ ta, danu ia be rami hebou Iuda kekeni Maria ena natuna ginigunana, unai dainai tanobada dekenai Iesu ena tubuna tamana taudia be idau negai idia noho ia lao ela bona tamana ginigunana, Adam dekenai.—Luka 3:23-38.
11, 12. (a) Salamo 45:16 ena hereva badana be dahaka? (b) Pavapava Iesu Keriso be daidia do ia abia hidi diba ‘tanobada dekenai lohia taudia ai do idia lao’ totona?
12 Salamo 45:16 ena anina be tanobada dekenai Iesu ena tubuna tamana taudia be iena natuna taudia ai do idia lao mase amo idia ia hatoreaisi lou neganai, a? Oibe. Danu, Salamo 45:16 ena anina be Paradaiso ia vara lou neganai, Iesu be ena tubuna tamana taudia dekena amo ia vara dainai, bona idia ia laloa bada dainai, idia mo sibona do ia abia hidi “tanobada ibounai lalonai lohia taudia ai do [ia] halaodia” totona, a? Lasi. Badina unai neganai taunimanima haida sibona be tanobada ibounai ena “lohia taudia” ai do idia lao diba. To unai sibona lasi, iena tubuna tamana taudia haida edia kara be namo bada herea lasi, unai dainai idia be hegeregere lasi unai Lagani 1,000 Lohia Negana lalonai tanobada dekenai dagi badana idia abia totona. Pavapava, Iesu Keriso, be ena tubuna tamana taudia haida sibona lasi, to ma tanobada taudia momo herea do ia abia hidi diba “lohia taudia” ena dagi ia henidia totona—hegeregere Aramagedono amo do idia roho mauri taudia haida, do idia toreisi lou “mamoe idaudia haida,” bona Keriso ia do mai lasi neganai idia noho abidadama taudia. Unai taudia ibounai amo, taunimanima namodia ia abia hidi diba lohia dagina idia abia totona, bona iena gaukara tanobada dekenai idia naria totona.
13, 14. Aramagedono amo do idia roho mauri taudia be daika daika do idia itaia, idia toreisi lou neganai?
13 Namona be Mesia ena Basileia ena siahu amo do idia toreisi lou taudia edia kara ita laloa. Itaia! Iseda matana be idia kerere, a? Reana unai be Abel, ena tomadiho dainai ia mase tauna ginigunana unai, bona Enok, ia be Dirava momokanina danu ia raka hebou. Danu, Noa, lagatoi badana karaia tauna. Abraham, Isako, bona Iakobo, Israel bese ena tubuna tamana taudia. Mose (Levi ena hahelaga iduhu amo), bona David, noho hanaihanai gwauhamata Basileia totona ia abia tauna unai. Bona danu, Isaia, Ieremia, Esekiel, Daniel, bona Bible idia torea Heberu peroveta taudia iboudiai ela bona dokona tauna Malaki, bona Ioane Bapatiso bona danu Iosef, Iesu ena heubu tamana.
14 Nega ta ai, Iesu ese Iuda taudia dekenai ia gwau: “Aberahamo bona Isako bona Iakobo bona peroveta taudia ibounai do umui itaia, Dirava ena Basileia lalonai. To umui be do idia doria murimuri dekenai.” (Luka 13:28) “Siahu Ibounai Diravana ena Dina Badana” amo do idia roho mauri “hutuma bada herea” taudia, be moale gauna badana ta do idia itaia diba, “Aberahamo bona Isako bona Iakobo bona peroveta taudia ibounai” do idia itaia, tanobada Paradaisona dekenai idia toreisi lou neganai, bona Dirava ena Basileia, “Noho Hanaihanai Tamana” Iesu Keriso henunai, lohia ena gaukara do idia karaia neganai.—Apokalupo 7:9, 14; 16:14; Isaia 9:6.
15. Aramagedono amo do idia roho mauri taudia ese dahaka do idia karaia diba?
15 Bema inai tanobada dikana amo do ita roho mauri iseda kudouna do idia marere bada Noa bona ena ruma bese, “ibounai 8 sibona” danu iseda sivarai ita kikilaia hebou neganai. Idia be lagani 2370 B.C.E. ai, Utu-utu badana amo idia roho mauri! Oi dekenai do ia vara gauna be idau negai ia mai hari ma taunimanima haida dekenai unai bamona ia vara lasi, bona gabeai do ia vara lou lasi, bona unai dainai oi sibona, unai kara badana lalonai, Dirava Iehova ena Witness tauna ena gaukara hereadaena do oi karaia diba.—1 Petero 3:20; Mareko 13:19; 2 Petero 3:5-7.
Mai ena Hebogahisi Kara Dika Tauna Ia Laloatao
16 Reana, unai nega lalonai Paradaiso havaraia lou gaukarana be idia karaia bada vadaeni. Bona Kwara Koukouna Gabuna (Calvary) dekenai Iesu badinai idia hasatauroa kara dika tauna be Iesu ena kwarana ataiai idia kokoa kau revarevana ia duahia dainai, ia gwau, “Iesu e, oiemu Basileia do oi abia neganai, do oi laloa lau” tauna unai, be do idia havaraia lou Paradaisona dekenai do ia toreisi lou. (Luka 23:42) Aramagedono amo do idia roho mauri taudia, bona ma haida edia maduna be mai moale danu ia do idia davaria, bona do idia durua, ia toreisi lou neganai. Bena Nisan 14, lagani 33 C.E. ai, Iesu dekenai ia hebogahisi henia henao tauna be do ia toreisi lou neganai, Pavapava, Iesu Keriso ena lohia dalana do idia hadibaia namonamo.
16, 17. (a) Iesu ese mai ena hebogahisi kara dika tauna do ia laloatao neganai, Aramagedono amo do idia roho mauri taudia bona ma haida edia maduna unai kara dika tauna dekenai be dahaka? (b) Kara dika tauna do ia toreisi lou neganai, reana dahaka do ia karaia?
17 Lohiabada Iesu Keriso ena lagani 1,000 lohia negana lalonai unai tau do ia laloatao. Reana unai hebogahisi kara dika tauna be do ia toreisi lou neganai, Pavapava Iesu Keriso dekenai do ia moale badina mase amo ia hatoreaisi lou dainai, bena Guba bona Tanobada edia Lohia Badana, Iehova Dirava badinaia karana amo ena abidadama do ia hahedinaraia. Unai neganai idia toreisi lou bona mai edia abidadama taudia danu, ia be mai ena maoro tanobada matamata ena Paradaiso gabuna dekenai do ia mauri hanaihanai totona.
Mauri Dalana, Ia Vara Lou Eden Umana Dekenai
18 Paradaiso do ia vara lou neganai, taunimanima ibounai do idia turana heheni. Tanobada ibounai dekenai taunimanima ta ta ibounai be bese tamona ena mamina edia kudou dekenai do idia abia momokani. Tanobada ibounai dekenai gado tamona do idia gaukaralaia. Reana taunimanima edia gado ginigunana unai. Tau ginigunana ia vara murinai lagani 1,800 lalonai unai gado idia gaukaralaia—Adam ia vara lagani 4026 B.C.E. ai, ia mai Peleg ena nega lalonai (2269 ia lao 2030 B.C.E. ai) unai gado idia gaukaralaia. Bena murinai “iena nega dekenai tanobada ena bese idia makohia.” (Genese 10:25; 11:1) Taunimanima ibounai be mauri do idia moalelaia, bona dina ta ta ibounai idia mauri noho dainai edia tanikiu do idia gwauraia. Edia mauri do ia daudau, to edia tauanina dekenai gorere ta do idia davaria lasi. Edia tauanina do ia goada ia lao, bona edia tauanina regena ta ia dika lasi.—Iobu 33:25 oi itaia.
19. Guna, edia tauanina idia dika taudia dekenai dahaka do ita itaia?
19 Bona itaia! Aena dika taudia idia raka lou, oibe, mai moale danu idia roho. Imana bona aena lasi taudia be hoa dalana amo edia imana bona aena idia abia lou. Guna idia matakepulu taudia be idia itaia diba, taia kudima taudia idia kamonai, mu taudia idia hereva bona ane idia abia idia moale dikadika dainai. (Isaia 35:5, 6 oi itaia.) Taunimanima edia tauanina dekenai toana dikana gaudia do idia ore. Tatau be mai edia goada dainai bona hahine be mai edia lalo-namo dainai do idia heduru heheni dala maorona dekenai. (Genese 2:18) Taunimanima do idia goevadae neganai unai ese Iehova Dirava ia hanamoa, badina ia be taunimanima edia tauanina goevadaena ia Havaraia Diravana.
20. Dirava ia havaraia gaudia ibounai, aniani, animal, bona tanobada gaukaralaia dalana dekenai dahaka do ita itaia?
20 Sisina sisina tanobada ibounai be do idia hahairaia noho. Tanobada ena kahana ta dekenai doe, abata, bona lai dikadia bona badadia do idia vara lasi. (Mareko 4:37-41 oi itaia.) Dirava ese ia havaraia gaudia ibounai do idia gaukara hebou tanobada ibounai be moale bona noho gabuna namona ai do ia lao totona. Aniani be do idia momo, badina tanobada ena anina do ia vara bada. (Salamo 72:16) Tanobada ibounai dekenai taunimanima bona animal be maino bona noho namo dekenai do idia noho, Iehova ia gwauraia hegeregerena, ia gwau: “Idia ese tau ta do idia hahisia lasi eiava gau ta do idia hadikaia lasi egu ororo helagana lalonai.” (Isaia 11:9; siri Isa 11:6-8 oi itaia danu.) Dika ta do ia vara lasi dainai tanobada ia Havaraia Diravana, ena Biaguna unai, ese gabu namona ta ai do ia halaoa ita noholaia totona, bona unai neganai mai moale danu Iehova Dirava do ita tomadiho henia bona ena hesiai gaukara do ita karaia diba. Tanobada be iena kohu badina ia ese ia karaia, unai dainai Dirava hamoalea bona hanamoa dalana amo do idia gaukaralaia be gau badana—Isaia 35:1, 2, 6, 7 oi itaia.
21. Hahemauri idia abia dainai tanobada dekenai do idia noho taudia ibounai do idia itaia gaudia be edena bamona do idia laloa. bona edena bamona miusik do idia kamonai henia?
21 Gau ibounai do idia matamata lou—Iesu ia henia boubou karana dainai tanobada dekenai do idia mauri taudia ibounai dekenai gau ibounai do idia matamata, hegeregere guna Eden ena Paradaiso umana dekenai taunimanima goevadaena ta ia vara neganai. Do idia hoa badina guna idia ta ese Eden ena uma idia itaia lasi! (Apokalupo 21:5) Miusik namona, gadaralaia gaudia bona ane amo do idia kamonai—unai miusik ibounai ese Iehova do ia hanamoa!—1 Sisiga 23:4, 5; Salamo 150:3-6.
22. Tanobada matamatana ena Paradaiso dekenai do ita noholaia ena mamina be edena bamona?
22 Taunimanima be tanobada do idia hahonua bona idia ta do idia mase lasi badina Adam dekena amo ia vara kara dikana be do ia ore, unai neganai tanobada maurina do ita moalelaia diba! (Ioane 10:10 oi itaia.) Oibe, unai nega lalonai tanobada dekenai ia gwauraia maoro taudia ibounai be Iehova Dirava ena kara toana do idia hahedinaraia, hegeregere guna tau ginigunana Adam ia havaraia neganai ia hahedinaraia bamona! (Genese 1:26, 27) Unai neganai serapi, kerubi, bona mai edia hairai guba aneru ibounai edia matana dekenai tanobada ena toana do ia namo. Mai edia lalokau danu tanobada idia raraia diho neganai, ena hairai paradaiso toana idia itaia neganai, ena vairana idia itaia diba Diravana, Iehova, guba bona tanobada edia Lohia unai, do idia hanamoa bona do idia tanikiu henia.—Mataio 18:10.
Moale ela bona Hanaihanai
23 Gabeai, dina vairana ta dekenai, reana idia horoa Keristen taudia, “ia boiria . . . bona ia abia hidi vadaeni” taudia unai, be guba Basileia dekenai do idia vareai, bona hoa dalana dekenai mase amo idia toreisi lou taudia, edia ladana do idia halasia, tanobada ena Paradaiso dekenai idia noho taudia ese edia ladana do idia diba totona. (2 Petero 1:10; Salamo 87:5, 6) Vadaeni, Iesu Keriso ena hahediba taudia, idia horoa bona lauma tauanina idia abia 144,000 taudia unai, be tanobada ena Paradaiso dekenai idia noho lasi ena badina taunimanima ibounai do idia diba, bona idia danu do idia moale unai dagi namona idia abia dainai.
24. (a) Iehova be ena “aena atoa gauna” dekenai dahaka do ia karaia? (b) Edena bamona ita diba tanobada matamatana be do ia noho ela bona hanaihanai, bona edena peroveta anena do ia guguru?
24 Guba bona tanobada ena Lohia Dirava namona, Iehova, dekenai idia abidadama noho taudia be moale ela bona hanaihanai do idia abia. Idia hahonua vadaeni tanobada Paradaisona be gabu namona, ia be gabu maorona, Dirava ena “aena” do ia atoa totona. Oibe, Iehova ese ena “aena atoa gauna” do ia hanamoa ela bona hanaihanai, bona taunimanima ibounai be mai edia abidadama danu iena lohia siahuna henunai do idia noho! (Mataio 5:34, 35; Kara 7:49) Unai tanobada matamatana be do ia noho ela bona hanaihanai, badina “iena Lohia siahuna habadaia karana bona maino do idia doko lasi.” (Isaia 9:7) Bena unai neganai, guna Betelehem, Iudea dekenai lagani 2 B.C.E. ai, Iesu ia vara neganai guba aneru ese ane dekenai idia perovetalaia herevana do ia guguru, idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia taudia ese inai maino do idia abia.”—Luka 2:13, 14.
25. (a) Hari, “hutuma bada” orea ena “mamoe idaudia haida” be dahaka idia diba? (b) Namona be mai iseda kudouna ibounai danu dahaka ita ura karaia noho?
25 Mamoe Naria Tauna Namona ena “hutuma bada” orea dekenai idia vareai “mamoe idaudia haida” idia moale, edia kudouna ia hamarerea bada herevana, Paradaiso do ia vara lou ena gwauhamata herevana dainai. Hari, idia moale badina Dirava ena orea dekenai idia vareai bona mai goada danu Lohiabada Iesu Keriso ia perovetalaia gaukarana idia karaia, tanobada ibounai dekenai Basileia ena sivarai namona idia harorolaia, bena murinai dokona do ia vara. (Mataio 24:14; Mareko 13:10) Emai kudouna ibounai ida, ai Iehova ena Witness taudia be ai ura emai abidadama karana ai dogoatao noho ela bona hanaihanai, bona Dirava ena vara guna Natuna, Iesu Keriso ena lohia siahuna henunai, ai ura Guba bona Tanobada ia Lohiaia Diravana, Iehova, do ai hahairaia bona ena ladana do ai hanamoa ela bona hanaihanai. “Aleluia!”—Apokalupo 19:1, 3, 4, 6; Hereva Lada-isidia 10:9.
Oiemu Haere be Dahaka?
◻ Iehova ena gwauhamata iena aena atoa gabuna, tanobada dekenai, be dahaka?
◻ Daika daika do idia heduru Paradaiso havaraia lou totona?
◻ Pavapava, Iesu Keriso be daika daika do ia abia hidi “tanobada ibounai lalonai lohia taudia ai do [ia] halaodia” totona?
◻ Toreisi lou do ia vara neganai reana emu kudouna do ia hamarerea bada gauna ta be dahaka?
◻ Edia abidadama Iehova dekenai idia dogoatao noho taudia be dina vairanai dahaka do idia abia?
6. Aramagedono murinai, tanobada be edena bamona do idia hahonua?
18. Paradaiso do ia vara lou neganai, mauri dala ena toana be edena bamona?
23. Dina vairanai reana horoa Keristen taudia totona dahaka do idia karaia, bona unai amo tanobada ena Paradaiso dekenai do idia noho taudia be dahaka do idia diba?