‘Oi Haheauka Neganai Do Oi Moale’

ROBERT Nisbet ena buka ta ladana The Present Age, dekenai sivarai ta ia gwauraia, ia gwau: “Lagani 1914 amo ema bona hari, Lagani 75 Tuarina be ia doko lasi, to ia vara noho.” Momokani, “tuari ena regena bona tuari ena sivarai” bona tanobada ibounai tuarina danu​—inai nega ena dokona lalonai do idia vara Iesu ese ia perovetalaia. (Mataio 24:​3-8) Lagani 1920 lalonai League of Nations oreana idia haginia, “tuari do ia haorea ela bona hanaihanai totona.” To madi ia kwalimu lasi! Lagani 1945 lalonai United Nations oreana idia haginia “badina idia ura, gabeai do idia vara uru taudia be unai tuari dikadia bamona do idia abia lasi.” To Max Harrelson ena buka ladana, Fires All Around the Horizon lalonai, ia gwau: “Tanobada Ibounai Tuarina Iharuana murinai, kahirakahira dina ta ta iboudiai tanobada ena kahana ta dekenai tuari ia vara.”

2. Taunimanima ese inai tanobada ena kara idia itaia neganai dahaka henanadai idia gwauraia, to ita be dahaka henanadai ita gwauraia be namo?

² Taunimanima hagaria bona dagedage karadia, taravatu utua bona ogogami karadia, drag dikana ania karadia bona daihanai goreredia ese lalohisihisi karana idia habadaia. Taunimanima haida be reana inai bamona idia henanadai, idia gwau: ‘Taunimanima be edena bamona inai kara dika ibounai do idia haheaukalaia noho diba?’ To gau badana be inai, ita ta ta danu sibona ita nanadaia: ‘Iehova be edena bamona ia haheauka noho ia havaraia tanobadana idia hadikaia neganai? Iehova ese nega hida do ia henia taunimanima dikadia dekenai tanobada do idia hadikaia bona ena ladana hereadaena idia hadikaia noho totona?’

3. (a) Peroveta tauna Isaia ese dahaka henanadai ia gwauraia, bona dahaka dainai? (b) Iehova ese dahaka haere ia henia bona iseda nega lalonai unai ena anina be dahaka?

³ Peroveta tauna Isaia danu unai bamona henanadai ia gwauraia. Iehova ese Isaia ia abia hidi ena hanua taudia be Iehova ena hereva idia do ia hadibaia totona. To ia hadibaia guna ia bona ia siaia Diravana ena hereva do idia kamonai henia lasi. Unai dainai Isaia be ia henanadai, ia gwau: “Iehova e, ela bona edena nega ai?” Io, Isaia be edena negai ena haroro do ia hadokoa unai kara havara taudia dekenai, bona Iehova be edena negai ena haheauka do ia ore unai ena sivarai idia kamonai lasi taudia dekenai? Iehova be inai bamona ia haere, ia gwau: “Ela bona hanua do idia dika momokani, bona taunimanima ese do idia noholaia lasi, bona ruma lalodiai taunimanima do idia noho lasi, bona tano do ia dika momokani.” (Isaia 6:​8-11) Hari inai nega lalonai danu, Iehova Dirava ena ladana idia hadikaia taudia ia haheauka henidia noho ela bona ena nega korikori ai, bena ena taravatu idia hamakohia taudia iboudiai, Kerisendom danu, do ia hahemaoro henidia.

4. Iobu ena haheauka dainai dahaka ia davaria, bona unai ese ita edena bamona ia hagoadaia hari inai nega lalonai?

⁴ Iehova be nega daudau herea lalonai Satana ese iena ladana ia hadikaia herevadia ia haheaukalaia vadaeni. Lagani 3,600 bamona gunanai, abidadama tauna Iobu danu ia haheauka. Satana ia gwau, Iobu be hahetoho lalonai kara maoromaoro do ia karaia lasi, to unai hereva be Iobu ese ia hakoikoia. Unai ese Iehova ena kudou ia hamoalea momokani! (Iobu 2:​6-10; 27:5; Hereva Lada-isidia 27:11) Iesu ena tadina Iakobo be gabeai inai bamona ia gwau: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” Unai hegeregerena, hari inai negai Iehova danu idia haheauka taudia be momokani gabeai moale do idia davaria.​—Iakobo 5:11.

5. Iesu be edena bamona ia hahedinaraia haheauka karana be Dirava ena taunimanima korikori dekenai ia noho hari inai nega lalonai be gau badana, bona dahaka gaukara idia karaia neganai do idia haheauka be namo?

⁵ Iesu ese ia hahedinaraia goevagoeva gau badana be Dirava ena taunimanima korikori ese haheauka karana do idia karaia hari iseda nega lalonai. Iesu ese “tanobada dokona” ena toa ia perovetalaia neganai, ia gwau: ‘To ia haheauka noho ela bona dokona, unai tauna be do ia mauri.’ Idia haheauka noho lalonai dahaka do idia karaia? Iesu ma inai bamona ia haere, ia gwau: “Basileia ena Sivarai Namona be tanobada ibounai dekenai do idia harorolaia.” (Mataio 24:​3, 13, 14) Bena murinai “dokona be do ia ginidae.”​—Mareko 13:​10, 13; Luka 21:​17-19 itaia danu.

Iehova Ia Haheauka Noho ena Badina

⁶ Aposetolo Paulo be inai bamona ia gwau: “Dirava be inai bamona ia karaia vadaeni. Ia ura be iena badu bona iena siahu do ia hedinaraia. Unai dainai ia ese ia badu henia gaudia dekenai ia haheauka henia ela bona do idia mase ore.” (Roma 9:22) Iehova be dahaka dainai ia haheauka noho inai kara dika taudia dekenai, hegeregere ia badu henia gaudia dekenai? Ena badina ta be inai: Iehova ia ura hahedinaraia taunimanima sibodia idia lohiaia karana, taunimanima ena Havaraia Diravana ia laloa lasi karana unai, be ia hegeregere lasi. (Ieremia 10:23) Kahirakahira, Dirava ese ena lohia siahuna do ia hamomokania ia ese namo do ia havaraia neganai, ia sibona ese maino, lalo-tamona bona moale do ia mailaia tanobada besedia ibounai dekenai, Iesu ena Basileia pavapava siahuna henunai.​—Salamo 37:​9-11; 45:​1, 6, 7.

7. Iehova ia haheauka ena badina ma ta be dahaka, bona taunimanima milion milion dekenai, unai ese dahaka hahenamo ia mailaia lagani 1930 dekena amo?

⁷ Unai sibona lasi, Iehova ia haheauka “badina ia ura hebogahisi taudia dekenai iena hairai badana do ia hahedinaraia.” (Roma 9:​23, NW) Unai hebogahisi idia abia taudia be mai edia kamonai bona mai edia abidadama danu Dirava ena gaukara idia karaia, idia be Iehova ese ia horodia bona “Dirava ese idia ia hoia vadaeni” bese idauidau amo, bona Iesu Keriso danu pavapava gaukara do idia karaia ena guba Basileia dekenai. Inai 144,000 taudia haboua karana be aposetolo edia negai ia hamatamaia. Hari be kahirakahira unai haboua karana be do ia ore. (Apokalupo 7:3; 14:​1, 4) Bona itaia! Iehova be ia haheauka noho dainai lagani 1930 dekena amo ia ese taunimanima milion momo ia haboudia noho, idia be “hutuma bada herea . . . bese idauidau” amo, bona idia edia helaro be hisihisi badana amo do idia roho mauri bona tanobada matamata paradaiso dekenai do idia noho ela bona hanaihanai. (Apokalupo 7:​4, 9, 10, 13-17) Oi be hutuma bada tauna ta, a? Bema oibe, oi be oi moale badina ema bona hari Iehova be ia badu henia gaudia dekenai ia haheauka, ani? To, namona be oi haheauka noho, Iehova ia haheauka bamona.

Haheauka be Mai ena Davana Namona

⁸ Bema ita ura Iehova ena gwauhamata ita abia, namona be ita haheauka noho. Aposetolo Paulo ese unai hereva momokani Heberu 10:36 ai ia gwauraia murinai, ia ese idau negai mai edia abidadama bona haheauka witness “hutuma bada” taudia, ori momo bamona, ia herevalaidia. Bena ita ia hagoadaia “iseda vairana dekenai ia noho heau helulu mai haheauka danu do ita heau. Iseda matana Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua ela bona dokona.” Iesu be mai kudouna ibounai ida ena gaukara ia haheaukalaia, bona ia ese ena davana namona ia laloatao noho. Iesu ena haheitalai namona ese ita ia hagoadaia ita haheauka totona!​—Heberu 12:​1, 2.

9. Hari inai nega lalonai haheauka idia haheitalaia taudia ese dahaka idia hahedinaraia?

⁹ Hari inai nega lalonai danu haheauka idia haheitalaia taudia momo idia noho. Mai edia haheauka bada tadikaka bona taihu reana oi diba, eiava edia sivarai oi kamonai vadaeni. Edia abidadama karana ese ita idia hagoadaia momokani danu! Bona lagani ta ta ibounai lalonai, Iehova ena Witness taudia edia gaukara tanobada ibounai dekenai idia ripotilaia Watch Tower Society dekenai, bona unai ripoti ese edia abidadama bona haheauka karadia ia hahedinaraia. Murina rau 4 dekenai Lagani 1989 ena Haroro Gaukara Ripoti idia torea, bona unai ripoti amo ia hedinarai lagani 1989 lalonai Witness taudia edia ‘abidadama sibona lasi to edia haheauka’ karana danu be ia bada.​—2 Petero 1:​5, 6.

Gaukara Ia Bada Unai Lagani Ai

¹⁰ Unai rau 4 ena ripoti ese ia hahedinaraia hegeregerena, ita be tano bona motumotu idauidau 212 lalonai Iehova ena Basileia sivaraina ita harorolaia. Inai Gima Kohorona oi duahia tauna e, taunimanima 3,787,188 be inai gaukara namona idia karaia, oi danu be idia ta, a? Unai lagani lalonai hua tamona dekenai taunimanima 808,184 be pioneer gaukara idia karaia, oi danu be idia ta, a? Lagani 1989 lalonai tanobada ibounai lalonai hora 835,426,538 idia negea haroro gaukara dekenai, bona herevana hora hida oi negea, namona be oi moale emu gaukara dainai.​—Salamo 104:​33, 34; Filipi 4:4.

¹¹ Danu, ita moale badina March 22, 1989 ai, tanobada ibounai dekenai Iesu ena mase laloatao totona Memorial hebouna dekenai idia mai taudia iboudiai be 9,479,064! Unai anina be gabeai ma taunimanima 5,691,876 ese Basileia harorolaia gaukarana do idia karaia diba. Namona be mai lalokau danu unai mamoe bamona kamonai taudia do ita durudia idia danu be magu lalonai do idia vareai totona, bona Iehova ena hesiai gaukara idia karaia hanaihanai totona. Unai idia karaia totona ita durudia diba, a? (Ioane 10:16; Apokalupo 7:​9, 15) Kamonai taudia momo be unai gaukara idia karaia badina lagani 1989 ena hesiai laganina lalonai Witness matamata taudia 263,855 be bapatiso idia abia.

¹² To inai ripoti lalonai gau haida idia hedinarai lasi. Hegeregere, taunimanima idia ranu mase bamona​—Bible, buka, buklet, bona magasin—​momo idia ura henidia. Unai dainai, Watchtower faktori, New York dekenai be pepa 28,659 ton idia haorea 35,811,000 Bible, buka, bona buklet idia printadia totona. Lagani 1988 amo unai be 101-​pesen amo idia habadaia unai. Watch Tower Society ena faktori badadia ma haida Germany, Italy, bona Japan dekenai, be dina bona hanuaboi ai idia gaukara, bona “hesiai tauna mai ena kamonai bona mai ena kara maoromaoro” oreana idia durua lauma aniani be ‘nega korikori ai’ idia henia totona. (Mataio 24:45) April bona May lalodiai, gabu momo lalonai, magasin bona sabskripsen momo idia henia, bona “Babulono badana” ena sivarai idia gwauraia Gima Kohorona magasin momo herea idia hariharilaia. (Apokalupo 17:5) Reana, April 1990 lalonai, tanobada ibounai dekenai heduru pioneer taudia bona Witness taudia ma haida be haroro gaukara do idia goadalaia. Lagani 1990 ena hesiai lagani lalonai April lalonai haroro gaukara badana do idia karaia.​—Isaia 40:31; Roma 12:​11, 12 oi hahegeregeredia.

13. Unai ripoti lalonai edena tano idia torea, lagani gunanai idia torea lasi tanodia unai? Ena badina oi gwauraia.

¹³ Mani inai ripoti ma oi itaia lou. Lagani gunanai idia torea lasi tanodia haida edia ladadia oi itaia, a? Oibe! Guna Hungary bona Poland edia ladana idia torea lasi, to vanegai taravatu idia kokia iseda gaukara ita karaia diba totona. Ita moale badina unai tano edia gavamani ese Iehova ena Witness taudia idia matauraia. Tadikaka ibounai tanobada ibounai dekenai be idia guriguri unai ia vara totona, unai dekena amo ‘Dirava ita kamonai henia bona matauraia dainai, mai maino danu do ita noho namonamo.’​—1 Timoteo 2:​1, 2.

14. “Dirava Kamonai Henia” Distrik Hebouheboudia Poland dekenai edia sivarai haida mani oi gwauraia.

¹⁴ ‘Dirava ita kamonai henia’! Hari “Dirava Kamonai Henia” Distrik Hebouheboudia be Poland dekenai idia karaia diba, bona August lalonai gabu toi dekenai hebouhebou idia karaia! Iseda tadikaka Poland dekenai be 91,024, bona hebouhebou dekenai idia lao taudia idia naria namo herea! (Heberu 13:​1, 2, 16) Hoa gauna ta bamona, tadikaka tausen momo​—Czech, German, Russian, bona tano idauidau amo idia mai taudia—​idia ese visa ena pepa idia abia bona basi, tereini, bona aena amo idia mai hebouhebou dekenai. Ma taunimanima tausen momo be America kahana tanodia, Western Europe, Pacific motumotudia bona Japan amo idia mai. Tadikaka ese steidium badadia idia hagoevaia namonamo, bona Chorzow hebouhebou dekenai taunimanima 65,710 idia mai, Poznan dekenai 40,442 idia mai, bona Warsaw dekenai 60,366 idia mai​—unai gabu toi dekenai idia hebou taudia ibounai edia namba be 166,518! Hebouhebou ta ta dekenai, bapatiso idia karaia neganai, raraia taudia idia tai idia moale bada herea dainai. Poznan dekenai idia bapatiso taudia amo ta ena lagani be 9 bona ma ta ena lagani be 90, hebouhebou toi dekenai idia bapatiso taudia edia namba be 6,093, idia momo be memero bona kekeni badadia. Guna taunimanima idia gwau tau bona hahine burukadia do idia mase neganai tomadiho danu do idia ore vaitani. To Dirava ena Hereva ia gwauraia tomadiho korikorina be ia ore diba lasi! (Salamo 148:​12, 13; bona Kara 2:41; 4:4 oi hahegeregeredia.) Eastern Europe dekenai iseda tadikaka edia haheauka karana dainai hahenamo bada idia abia!

Hetoho Lalonai Idia Gini Goada Noho

¹⁵ Aposetolo Paulo bamona, nega momo kara idauidau idia vara dainai, namona be Iehova ena Witness taudia idia haheauka noho. (2 Korinto 11:​24-27) Lebanon dekenai tuari idia karaia. Unuseniai iseda tadikaka be dahaka idia karaia? Mai edia goada bona mai edia haheauka idia gaukara noho. Lagani 1989 lalonai unai hanua dekenai ipidi badadia edia anina bona bomu momo be idia hamorudia, to bomu momo idia hamorua gabudia dekenai danu tadikaka idia lao, idia ura lasi edia gaukara idia hamaragia. Kongregesen ta Beirut lalona amo ese inai sivarai ia siaia: “Pura ena hanuaboi ta ta iboudiai dekenai ai hebou haroro totona. Ena be dika ai davaria diba, to tadikaka be haroro gaukara idia goadalaia noho. Ai be gabu momo dekenai ai haroro, guna unai bamona ai karaia lasi. April lalonai pioneer taudia edia namba ia bada daekau. Bible stadi matamatadia ai hamatamaia, bona magasin bona buka momo ai hariharilaia.”

16. Colombia dekenai iseda tadikaka be haheauka edena bamona idia hahedinaraia Witness lasi gabudia dekenai idia lao, sivarai namona idia harorolaia totona?

¹⁶ Colombia dekenai drag hoia karana bona dagedage be ia bada dainai niuspepa dekenai unai sivarai momo idia torea. To unuseniai danu mai edia abidadama Keristen taudia edia sivarai be mai anina bada. Vanegai, special pioneer gaukara nega sisina idia karaia taudia idia siaidia taoni idauidau 31 dekenai, unai taoni ta ta dekenai idia noho taudia be 10,000 bona mai haida, bona unuseniai Witness tauna ta be lasi. Unai taoni ta dekenai, idia ura kamonai taudia idia diba unai pioneer taudia be hua haida sibona idia dekenai do idia noho neganai, idia noinoi henidia ma idia noho totona. Ma taoni ta dekenai, pioneer taudia be hua toi lalodiai lauma dalanai idia durudia dainai, kamonai taudia 18 be tanikiu leta ta idia torea bona idia sainia, bona idia noinoi heduru ma haida do idia abia totona. Idia gwau: “Inai be mai anina bada gauna.” Vadaeni, dala idia hegaegaelaia unai taoni rua lalonai kamonai taudia idia durudia noho totona. Unai bamona gabu daudau teritori dekenai idia noho kamonai taudia durudia noho totona, haheauka be gau badana, to pioneer taudia edia gaukara goadagoada amo anina idia davaria.

17, 18. (a) Italy dekenai Iehova ena Witness taudia be dahaka hetoho idia haheaukalaia? (b) Ena be idia be Witness taudia idia gwauraia koikoi, to unai ese edia gaukara ia koua, a?

¹⁷ Italy dekenai, tomadiho haroro taudia ese Iehova ena Witness taudia idia inai henidia bada, to Iehova dekena amo goada idia abia dainai idia haheauka noho diba. Hanua ta ta dekenai, haroro taudia ese pepapepa idia hariharilaidia edia dubu taudia dekenai, edia ruma ena iduara dekenai idia atoa totona. Unai pepa ena hereva ia gwau, Iehova ena Witness taudia be iduara dekenai do idia pidipidi lasi. Pris taudia momo be memero idia siaia hanua ena kahana ta ta unai pepa be iduara dekenai idia atoa totona​—Witness taudia edia ruma dekenai danu! To Witness taudia idia hagaridia haraga diba lasi, bona nega momo tadikaka ese unai pepa idia gaukaralaia diba ruma taudia danu hereva idia hamatamaia totona. Ma danu, niuspepa bona televisen dekenai edia kara idia gwauraia momo, idia gwau unai haroro taudia be tomadiho orea idauna ta dainai idia dadaraia be namo lasi, bona idia gwau unai bamona kara ese edia dubu ena manoka karana ia hahedinaraia. Iunivesiti profesa ta ia badu unai Witness hadikaia pepadia ia itaia neganai, unai dainai Gima Kohorona bona Noga! sabskripsen, English gado dekenai ia abia.

¹⁸ Italy dekenai, Katolik Dubu ese Iehova ena tomadiho idia dadaraia taudia idia gaukaralaidia koikoi herevadia idia gwauraidia totona, bona unai amo Iehova ena taunimanima idia hadikaia toho, to idia kwalimu lasi badina pablisa taudia be 172,382 bona taunimanima be edia kara idia diba bona idia matauraidia. Witness tauna ta ia vadivadi neganai, tau ta ia gwau magasin ta dekenai Witness taudia idia karaia kara dikadia ia duahia, ia gwau, Witness tomadiho idia rakatania taudia haida ese unai sivarai idia torea. Unai dainai, iena tadina be Iehova ena Witness tauna ta ai ia lao neganai, ia badu henia bada. To nega sisina murinai, ia itaia unai tomadiho idauna ena siahu dainai iena tadina ena kara ia namo. Ia laloa inai bamona: ‘Edena bamona gau dikana be gau namona ia havaraia diba?’ Vadaeni, Witness taudia idia vadivadi henia neganai, ia noinoi Bible stadi ia dekenai do idia karaia totona.​—Kolose 3:​8-10 oi itaia.

Sivarai Namona Laloa Lasi Karana Hanaia Dalana

¹⁹ Tano haida lalonai Witness taudia be nega momo ruma idia vadivadi henidia, bona unai tano lalonai taunimanima momo be sivarai namona idia laloa lasi. Finland dekenai taunimanima be unai bamona. Unai tano ena dubu be taunimanima idia henanadai henidia neganai, idia 100 100 amo 70 70 idia gwau idia ura lasi Witness taudia be edia ruma dekenai do idia mai vadivadi totona. To, taunimanima 100 100 amo 30 30 idia gwau idia badu lasi bona unai taudia 100 100 amo 4 4 idia gwau Iehova ena Witness taudia idia ura henidia. Unai namba be sisina ia bada. Unai anina be Finland ena taunimanima iboudiai amo taunimanima 200,000 be Witness taudia idia ura henidia. Hari unai tano dekenai pablisa taudia iboudiai be 17,303 sibona!

19, 20. (a) Finland dekenai dahaka ia vara dainai Witness taudia idia haheauka be namo, bona dubu orea ese taunimanima idia henanadai henidia karana ese dahaka ia hahedinaraia? (b) Edena ekspiriens ese ia hahedinaraia sivarai namona ita harorolaia mai haheauka danu be gau badana?

²⁰ Pablisa ta be haroro gaukara ia karaia neganai ruma tauna ta ia gwau: “Oi diba lasi a, taunimanima 100 100 amo 70 70 be umui idia ura henia lasi. Dahaka dainai hanaihanai umui mai aiemai ruma dekenai?” Unai pablisa ia haere henia, ia gwau: “Oibe, lau diba, to danu unai ripoti ese ia hahedinaraia taunimanima 100 100 amo 4 4 be ai idia ura henia. Ai be unai taudia ai tahudia noho. Bema taunimanima 100 100 amo 1 1 sibona ese ai idia ura henia, to ruma ta ruma ta dekenai do ai lao unai taudia do ai tahudia totona.” Unai ruma tauna be ena hereva ia laloa, bena ia gwau: “Idia dekenai oi mailaia sivaraina be mai anina bada, a?” Unai pablisa tauna ia haere neganai, ia gwau: “Oi ura unai sivarai oi kamonai, a?” Daudau lasi murinai unai ruma tauna be sivarai namona ia ura kamonai tauna ta ai ia lao.

Dina Vairai Do Ia Vara Gauna

²¹ Hari inai negai ita ibounai be edena bamona? Ita ura Iehova bona Keriso Iesu danu ita haheauka ela bona dokona ia ginidae, a? Reana dokona be ia kahirakahira, to gau badana be ita haheauka noho! Satana ena tanobada lalonai, sihari kava karadia, kara dika idauidau, bona inai henia karadia ese ita idia koua hegege dainai, gau badana be ita goada karaia iseda abidadama ita dogoatao noho totona. (Iuda 3, 20, 21) Bema dagedage karana ta do ita davaria, namona be ita haheaukalaia. Hari inai nega lalonai, iseda tadikaka tausen tausen be hisihisi idia ania, haida be dibura rumana dekenai idia noho, bona haida idia dadabaia dikadika. Idia totona ita guriguri dainai ita idia tanikiu henia. (2 Tesalonika 3:​1, 2) Kahirakahira, inai tanobada dikana do ia ore! Habakuku ia gwau: “Matahanai be ena nega korikori ia naria noho, bona dokona dekenai ia heau lao noho, bona do ia leiti lasi. Ena be ia mai metairametaira, to oi naria noho; badina do ia vara momokani. Nega korikori dekenai do ia vara.”​—Habakuku 2:3.

22. Bema peroveta taudia bona Iobu idia hahedinaraia haheauka karana ita tohotohoa, ita dekenai dahaka do ia vara?

²² Hahediba tauna Iakobo be mai lalokau danu ita dekenai ia gwau: “Lauegu varavara taudia e, peroveta taudia do umui laloa. [Iehova] ena ladanai idia hereva neganai hisihisi lalonai idia haheauka bona idia goada.” Isaia, Ieremia, Daniel, bona ma haida hegeregeredia, hari inai negai danu ita be Iehova ena ladana dekenai ita hereva bona hetoho dikadia idia vara neganai abidadama goada dekenai ita haheaukalaia diba. Iobu bamona, ita haheauka diba. Ia haheauka dainai hahenamo momo ia davaria! Iehova ena hebogahisi bona lalokau karadia amo hahenamo do ita davaria diba danu​—bema ita haheauka ela bona dokona negana. Namona be Iakobo ena hereva be ita ta ta ibounai dekenai do ia guguru, ia gwau: “Ita diba inai haheauka taudia ese moale idia davaria vadaeni, ani?”​—Iakobo 5:10, 11; Iobu 42:​10-13.

Edena Bamona Do Oi Haere?

◻ Iesu ia gwau dahaka do ia vara dainai ita haheauka be gau badana?

◻ Iehova ia haheauka ena badina haida be dahaka?

◻ Lagani 1989 dekenai dahaka gaukara namona ita karaia mani oi gwauraia.

◻ Iseda tadikaka Poland dekenai idia haheauka dainai dahaka hahenamo idia davaria?

◻ Witness taudia Lebanon, Colombia, bona Italy dekenai be hetoho idia davaria neganai, edia abidadama karana be edena bamona idia hahedinaraia?

1. Lagani 1914 amo ema bona hari, dahaka kara haida ese Mataio 24:​3-8 ena hereva idia hagugurua, bona edena hereva League of Nations bona United Nations dekenai idia guguru lasi?

6. Dahaka dainai Iehova be haheauka tauna badana, bona ia haheauka ena badina ta be dahaka?

8. Dahaka dainai ita ibounai be ita haheauka be namo, bona edena haheitalai ita laloa namonamo be gau badana?

10. (a) Lagani 1989 lalonai tano bona motumotu idauidau hida lalonai ese Basileia ena sivarai namona idia harorolaia, bona haroro gaukara idia karaia taudia iboudiai be hida? (b) April lalonai pioneer taudia hida idia gaukara, bona hora hida idia negea haroro gaukara dekenai?

11. (a) March 22, 1989 ai, hida be Memorial hebouna dekenai idia mai dainai ita moale? (b) Hida ese bapatiso idia abia, bona edena tano lalodiai momo idia bapatiso henidia?

12. Unai ripoti dekenai dahaka sivarai idia torea lasi (a) Watch Tower Society edia faktori dekenai? (b) magasin bona sabskripsen dekenai?

15. Lebanon dekenai Witness taudia be haheauka bona goada be edena bamona idia hahedinaraia, bona unai dainai dahaka ia vara?

21. (a) Hari inai nega lalonai dahaka tuari do ita karaia, bona badina be dahaka? (b) Reana dahaka do ita haheaukalaia, bona Habakuku ena peroveta herevana ese ita dahaka ia hadibaia?

[Chart on page 20-23]

IEHOVA ENA WITNESS TAUDIA EDIA LAGANI 1989 ENA HARORO GAUKARA RIPOTI

(For fully formatted text, see publication)