Daika ese Taunimanima Do Ia Hakaudia Lao Maino Dekenai?

TAUNIMANIMA ese maino idia havaraia diba lasi, to unai anina be maino do ia vara lasi, a? Lasi. Ena be Satana ena goada ese iseda goada ia hanaia, bona ia be maino koua tauna badana, to Satana ena siahu ia hanaia tauna ta ia noho, bona ia ese taunimanima do ia hakaua maino idia abia totona. Satana ena sivarai ia gwauraia bukana, Bible, ese unai Tau ena sivarai ia gwauraia. Ia gwau: “Gavamani be iena pagana dekenai do ia atoa. Bona iena ladana do idia hatoa, Sisiba Henia Tauna Namona, Siahu Bada Diravana, Noho Hanaihanai Tamana, Maino Lohiana.” (Isaia 9:​6, 7) Unai Maino Lohiana be daika? Ia be Iesu Keriso, bona maino do ia havaraia diba badina iena aonega ese iseda aonega ia hereaia momokani. Ita ia hereaia daladia be dahaka?

Ena Diba be Taunimanima edia Diba Bamona Lasi

Dala ta be inai, Iesu be lauma tauanina ia abia, bona ia mase diba lasi. Momokani, gunaguna ia be taunimanima ta bona boubou karaia totona ia mase. To murinai ia toreisi lou bona guba dekenai mase diba lasi maurina ia abia, bona hari ia be Maino Lohiana. Unai dainai peroveta herevana ta ia gwau: “Ena basileia be do ia doko lasi.” (Luka 1:​32, 33) Pavapava Aśoka bamona lasi, Iesu be do ia mauri ela bona hanaihanai dainai, ma taunimanima haida ese iena gabu do idia abia lasi bona iena gaukara namona do idia hadikaia diba lasi.

Ma danu, Iesu be kara dika lasi tauna. Dirava ena aonega bona dala maorodia amo do ia lohia. Peroveta tauna Isaia ia gwauhamatalaia herevana be inai: “Ia latanai Iehova ena lauma do ia diho mai, aonega bona lalo-parara laumana, sisiba bona goada laumana, diba bona Iehova gari henia laumana. . . . Bona do ia hahemaoro lasi ena matana idia itaia gaudia sibona dainai, bona haida do ia sisiba henidia lasi ena taiana idia kamonai herevadia sibona dainai. Bona mai kara maoromaoro ida ia ese ogogami taudia do ia hahemaoro henidia.” (Isaia 11:​2-4) Iesu be sibona ena tano dekenai maino do ia havaraia to idau besedia do ia tuari henidia lasi. Unai be gunaguna Europe taudia ese maino idia havaraia dalana bamona lasi. Iena lohia siahuna henunai tanobada ibounai dekenai maino do ia havaraia.

Ma danu, Iesu be mai ena siahu dainai maino ia havaraia diba. Unai peroveta herevana ia gwau: “Iehova ena lauma . . . sisiba bona goada laumana,” be ia abia. Unai lauma ena siahu dainai guba bona tanobada idia vara bona kara maoromaoro iboudiai idia vara, Bible ia sivarailaidia gaudia unai. Satana dekenai tuari kohuna ta ia noho lasi Dirava ena lauma siahu ia koua totona.

Maino Abia Dalana

Iesu ese taunimanima be edena bamona do ia hakaudia lao maino idia abia totona? Ia hakaudia hamatamaia vadaeni bona reana unai oi hoalaia. Apokalupo bukana lalonai ia hahedinaraia Iesu be Dirava dekena amo pavapava siahuna ia abia guba Basileia dekenai. (Apokalupo 11:15) Bema Bible ena peroveta herevadia ita tahua namonamo bona hari inai nega lalonai idia vara gaudia danu ita hahegeregeredia, do ita lalo-parara lagani 1914 ai, guba dekenai Iesu be terona dekenai ia helai ia be pavapava dagina ia abia dainai. (Mataio 24:​3-42) Unai be kara badana tanobada dekenai maino do ia havaraia totona.

Bema unai be momokani, dahaka dainai lagani 1914 ai Tanobada Ibounai Tuari Ginigunana ia vara? Bona dahaka dainai lagani 1900 amo tuari dikadia idia vara to idau negai unai bamona tuari dikadia idia vara lasi? Badina unai guba Pavapava ena gaukara ginigunana be Satana ia negea diho tanobada dekenai, bona ia be dala lasi guba dekenai ia giroa lou. Dahaka ia vara unai bamona ia karaia neganai? Unai peroveta herevana ia gwau: “Tanobada bona davara madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:​7-12) Lagani 1900 amo idia vara tuari badadia rua idia vara badina Satana be ia badu dikadika dainai. To inai oi laloa: Satana ena badu negana “be ia kwadogi sibona.” Inai nega dikana be kahirakahira do ia ore!

To ia do ore lasi neganai, unai Maino Lohiana ia hegaegae noho maino do ia havaraia momokani totona. Gau badana be taunimanima idia diba Dirava ena ura be Keriso dekena amo maino do ia havaraia. Unai be maoro badina Iesu ia peroveta, ia gwau, hari inai nega lalonai “Basileia ena Sivarai Namona be tanobada ibounai dekenai do idia harorolaia.” (Mataio 24:14) Unai hereva hagugurua totona, tanobada ibounai dekenai Iehova ena Witness taudia be sivarai namona idia harorolaia noho.

Danu, kudou-maoro taudia be maino dalana ita hadibaia be gau badana. Bible ena gwauhamata be inai: “Oiemu natudia memerodia iboudiai be Iehova ese do ia hadibadia, bona oiemu natudia memerodia edia maino do ia bada.” (Isaia 54:13) Kudou-maoro taudia milion momo be hari idia hadibaia noho.

Ma Kara Ta

Maino havaraia totona ma kara ta do ia vara be namo. Unai be dahaka? Taunimanima momo be unai gau ena ladana idia diba, to momo lasi be do ia vara ena badina idia diba. Bible lalonai ia gwau ia be “Siahu Ibounai Diravana ena Dina Badana” eiava Aramagedono. (Apokalupo 16:​14, 16) Taunimanima momo idia laloa Aramagedono ena anina be niuklia tuari amo taunimanima do idia mase ore. To unai be maoro lasi, badina Iesu, Maino Lohiana, ese unai tuari do ia mailaia badina unai amo maino do ia havaraia diba.

Kara ginigunana be, Aramagedono amo maino idia koua gaudia ibounai do ia haoredia. Peroveta herevana Salamo 37:10 lalonai, ia gwau: “Nega sisina murinai, kara dika tauna do ia noho lasi; ena gabu do oi tahua, to do oi davaria lasi.” Oibe, Iesu ese “kara dika tauna,” hegeregere, tuari havaraia taudia, raskol taudia, ala-ala taudia, bona Maino Lohiana idia abia dae lasi taudia danu, be tanobada dekena amo do ia kokidia. Inai tanobada dekenai do idia mauri noho be maoro lasi.​—Apokalupo 19:​19-21.

Kara iharuana be, Aramagedono lalonai Daniel ia perovetalaia herevana do ia guguru, ia gwau: “Unai pavapava edia negai guba Diravana ese basileia ta do ia haginia, nega ta ai do idia hadikaia ore diba lasi gauna. Bena ena lohia siahuna do ia hanai lasi bese idauna ta dekenai. Unai basileia iboudiai do ia hamakohidia maragimaragi bona do ia haoredia, bena ia sibona do ia gini ela bona hanaihanai.” (Daniel 2:44) Bese idauidau idia parara bona tuari havaraia karana do idia ore. Bona kara ginigabena be, ita abidadama henia diba lohia tauna ese tanobada ibounai ena gavamani tamona do ia biagua!

Aramagedono be edena negai do ia mai? Bible ese ia gwauraia lasi. To idia vara gaudia ese peroveta herevana idia hagugurua dainai ita diba be ia kahirakahira vadaeni. Bible ese ia hahedinaraia goevagoeva kara ta do ia vara bena murinai Aramagedono do ia vara. Aposetolo Paulo ia gwau: “ ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae.” (1 Tesalonika 5:3) Bena, unai hisihisi negana be Aramagedono dekenai do ia ore neganai, maino ia koua tauna badana do ia ore. Satana ena “nega kwadogina” do ia ore, bona do idia guia gabuna dekenai ia be dala lasi tanobada dekenai dika do ia havaraia lou. (Apokalupo 20:​1-3) Unai be namo herea momokani!

Maino Tanobadana

Gabeai do ia vara gauna mani oi laloa. Salamo tauna ia torea peroveta herevana be inai: “Manau taudia ese tanobada do idia abia, bona maino bada dainai do idia moale dikadika.” (Salamo 37:11) Unai manau taudia be Isaia ena peroveta hereva namona do idia hagugurua: “Idia ese edia tuari kaia do idia hodoa, tano geia auridia ai do idia halaoa, bona edia io do idia hodoa, au rigidia utua pakosidia ai do idia halaoa. Bese ta ese tuari kaia do ia abia isi lasi, bese ta hadikaia totona, bona tuari dalana do idia hadibaia lou lasi.”​—Isaia 2:4.

Unai neganai, gunaguna Eden dekenai ia vara bamona, taunimanima iboudiai be Iehova Dirava ena hahenamo do idia davaria, bona ia ese ena gwauhamata herevana do ia hagugurua, ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai bona hisihisi be do idia orea momokani. Badina be gau gunadia be idia ore vadaeni.”​—Apokalupo 21:​3, 4.

Helaro Goadana

Vadaeni, daika ese taunimanima do ia hakaudia maino do idia abia totona? Maino Lohia, Iesu Keriso ese do ia hakaudia. Hari inai nega lalonai unai helaro dekenai ita abidadama be namo, a? Bema Bible dekenai ia gwauraia gwauhamatadia be idia vara lasi, helaro be ia noho lasi maino korikori do ia vara totona. Taunimanima be vaia idia tuari heheni bona idia ala-ala heheni bona koua dalana be lasi. To Bible ia gwauraia gaudia idia vara, bona Keriso ena siahu henunai Dirava ena Basileia be maino korikori do ia mailaia. Iehova ena Witness taudia ese Basileia ena sivarai namona oiemu ruma dekenai idia harorolaia neganai, mani edia hereva oi kamonai unai sivarai oi hamomokania totona. Bena, nega ia ginidae neganai, reana oi be unai manau taudia ta bona tanobada dekenai do oi noho bona maino karana do oi moalelaia bada.

Inai sivarai be maino ena helaro ia kikilaia bona ia be Bible ena amo. To, hari inai nega lalonai taunimanima momo be Bible ena hereva idia abia dae lasi, unai dainai reana oi ura diba unai helaro dekenai ita abidadama be ia namo eiava lasi. Iehova ena Witness taudia ese unai helaro dekenai idia abidadama momokani. Idia abia dae Bible be Dirava ena Hereva, unai dainai ena hereva idia abidadama henia. Lagani 1989 ai, idia ese buka ta ladana The Bible​—God’s Word or Man’s? idia halasia, bona ia lalonai Bible hamomokania herevadia be momo.

Bible lalonai ia gwauhamatalaia mainona ena sivarai ma haida edia ladana be “Tanobada Mainona​—ena Anina be Dahaka?” be December 1, 1990, ena Gima Kohorona lalonai do oi duahia diba.

[Blurb on page 8]

Iesu sibona ia hegeregere taunimanima ia hakaudia lao maino idia abia totona

[Blurb on page 9]

Hari, sivarai namona be tanobada ibounai dekenai idia harorolaia