Gaukara ena Dagi Oi Tahua, A?
“Bema tau ta ia ura be ekalesia ena gunalaia tauna ena dagi do ia tahua, ia be dagi namona ia ura henia inai.”—1 TIMOTEO 3:1.
1. Iehova ena Witness taudia dekenai gau badana be dahaka gaukara idia hagugurua?
IEHOVA ena Witness taudia be gaukara ena dagi namodia idia tahua bona Dirava ia ura henia dalanai idia karaia. Unai be hoa gauna lasi, badina edia Dirava ia karaia karadia be namo bona ena ura ibounai hanaihanai ia hagugurudia. (Isaia 55:8-11) Taunimanima momo be gaukara ena dagi namona idia ura lasi tahua, idia edia mauri ibounai lalonai taunimanima idia durua momo lasi, to sibodia edia namo idia tahua, namo lasi Iehova ena Witness taudia be idia edia kara idia tohotohoa. Dirava ena Witness taudia dekenai gau badana be Basileia ena sivarai harorolaia gaukarana do idia hagugurua, bona Dirava ena Hereva amo taunimanima idia durua mauri hanaihanai ena dala idia diba totona.—Salamo 119:105; Mareko 13:10; Ioane 17:3.
2. Timoteo Ginigunana 3:1 dekenai Keristen tatau totona Paulo ese dahaka gaukara ia herevalaia?
2 Iehova ena orea lalonai, ita tahua gaukara namodia ma haida idia noho danu. Aposetolo Paulo ena toretore dekenai unai gaukara ta ia herevalaia, ia gwau: “Inai hereva be momokani. Bema tau ta ia ura be ekalesia ena gunalaia tauna ena dagi do ia tahua, ia be [gaukara] dagi namona ia ura henia inai.” Unai bamona tauna be ia ura taunimanima haida ia durudia. Ia ura ‘gaukara namona’ ia karaia, ia ura lasi ia helai kava bona taunimanima idia heagilaia maurina ia abia. Ma Bible ta dekenai unai siri idia hahanaia inai bamona: “Inai hereva be ia momokani, bema tau ta be ena kudouna ibounai ida gunalaia gaukarana ta ia tahua ia be gaukara namona tahua tauna unai.”—1 Timoteo 3:1, Phillips.
Elda Idia Kerere Diba Gabudia
3, 4. Tau ta be gunalaia dagi ia tahua neganai, dahaka dainai ena kudouna ia naria namonamo be gau badana?
3 Bema tau ta ese ena lalona ia hadaia Keristen gunalaia tauna ai do ia lao totona, dahaka dainai ia be “gaukara namona tahua tauna”? Inai bamona, gaukara ena dagi ta oi tahua neganai unai anina be oi ura dikadika unai gaukara oi karaia. Momokani, gaukara haida ita tahua be namo to ma gaukara haida ita tahua be namo lasi. To, bema tau ta be mai ena manau danu gunalaia tauna ena dagi ia tahua badina ia ura taunimanima ia hesiai henidia, bona mai ena ura maorona danu ia gaukara, lauma dalanai hahenamo momo do ia davaria diba. To gau badana be ena kudouna ia naria namonamo.—Hereva Lada-isidia 4:23.
4 Dagi badana idia tahua taudia haida idia ura taunimanima amo hemataurai karana bada idia tahua. Ma haida idia ura taunimanima ataiai idia lohia. Dagi eiava siahu bada idia mata-ganigani henia karana be ia bodaga ramuna bamona, ena be au toana be ia namo to ramuna idia dika neganai do ia moru diba. Keristen tauna danu do ia moru diba bema dagi ena gaukara ia tahua ena badina be namo lasi. (Hereva Lada-isidia 16:18) Aposetolo Ioane ia gwau: “Revareva kwadogina ekalesia oreana dekenai lau torea. To Diotrefe, sibona ia gwauraia ia be gunalaia tauna [“ia ura gau ibounai ia biagua,” Phillips], ia ese lauegu hereva ia kamonai henia lasi. Unai dainai, umui dekenai do lau mai neganai iena kara do lau laloatao. Ia ese mai hereva dika bona koikoi danu aiemai kara ia maumauraia noho. Bona inai sibona lasi, to ekalesia varavara taudia idia vadivadi gwauraia neganai, idia ia abia dae lasi. Ma inai vadivadi taudia idia ura abia dae taudia edia dala be Diotrefe ese ia koua. Ma ia ese unai abia dae kara taudia ekalesia dekena amo ia atodia siri gwauraia danu.” (3 Ioane 9, 10) Diotrefe ena kara dagi tahua dekenai be Keristen ena kara lasi. Hekokoroku karana bona siahu abia totona dagi idia tahua taunimanima idia biagudia totona, be Iesu ena hahediba korikori taudia edia kara lasi.—Hereva Lada-isidia 21:4.
5. Namona be gunalaia dagi idia abia taudia edia lalohadai edia gaukara dekenai be dahaka?
5 Bema Keristen taudia be mai edia ura namo danu edia gunalaia gaukara idia karaia neganai, idia be sibona edia ura do idia tahua lasi. Idia diba unai Keristen gunalaia gaukara namona be Dirava ena amo, unai dainai idia ese Dirava ena mamoe orea idia naria namonamo, idia “maumau lasi, to mai [edia] ura namona inai dagi do [idia] karaia. Ta ese [idia] ia oda dainai do [idia] karaia lasi, to sibona [edia] ura dainai. Kohu do [idia] davaria totona do [idia] karaia lasi. Lohia bamona [edia] orea do [idia] gunalaia lasi, to [edia] kara namodia do [idia] hedinaraia, vadaeni [edia] kara bamona do idia karaia.” (1 Petero 5:2, 3) Oibe, namona be gunalaia dagi idia abia taudia idia naria namonamo, namo lasi idia hekokoroku bona dagi ena siahu idia gaukaralaia kerere.
6. Dahaka dainai elda tauna be Dirava ena taunimanima dekenai ia lohia be namo lasi?
6 Elda tauna be ma Keristen taudia ia lohiadia be namo lasi, badina ia danu be gaukara tauna sibona, ia be edia “abidadama [ia] biagua lasi.” (2 Korinto 1:24) Aposetolo taudia haida be dagi badana idia tahua neganai, Iesu ia gwau: “Umui diba lohia taudia be mai siahu danu edia taunimanima idia biagua karaia, bona gunalaia taudia be do idia lohia edia taunimanima dekenai. To umui be unai bamona umui laloa lasi. Bema ta ia ura be do ia lohia gwauraia, ia be umui emui hesiai gaukara do ia karaia. Bona bema ta ia ura be guna tauna, ia be umui emui hesiai tauna do umui halaoa. Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia henia taunimanima ibounai hamauria totona.” (Mataio 20:20-28) Elda tauna be Mamoe Naria Tauna Badana lasi, ia be durua tauna sibona. Bema mamoe orea dekenai ia lohia bamona, unai be hekokoroku karana. Bona kerere do ia vara diba bema taunimanima ma haida ia veria iena hekokoroku urana idia habadaia totona. Hereva Lada-isidia ena siri ta ia gwau: “Iehova ese hekokoroku taudia ibounai ia inai henidia bada; inai oi diba momokani, idia ta be mata-hakani amo do idia roho mauri lasi.”—Hereva Lada-isidia 16:5.
7, 8. (a) Dahaka dainai Keristen elda taudia idia manau be gau badana? (b) Mai ena manau elda tauna ta ena sivarai namona oi gwauraia.
7 Unai dainai namona be Keristen elda taudia be ‘Dirava ena imana goadana henunai do idia manau.’ Tau ta ia hekokoroku neganai ia hegeregere lasi lauma dalanai gaukara ia karaia namonamo totona, badina manau taudia sibona edia kudouna bona lalona idia hegeregere Dirava ena ura idia karaia namonamo totona. “Dirava ese hekokoroku taudia edia dala ia koua, to manau taudia dekenai iena hariharibada ia henia.” (1 Petero 5:5, 6) Oibe, Iehova ese lalo-manau taudia ia hanamodia. Unai taudia dekena amo idia hegeregere taudia idia abia hidi Keristen elda ena dagi idia karaia totona.
8 Hari inai nega lalonai, Iehova ena Witness taudia edia gaukara idia hamatamaia negana amo ia mai harihari, Dirava idia abidadama henia taudia be mai edia manau danu idia gaukara sivaraidia be momo herea. Hegeregere, mai ena manau tauna ta, ladana W. J. Thorn, ena kara oi laloa, guna ia be pilgrim, eiava loaloa naria tauna ta, bona nega daudau Betele rumana dekenai ia gaukara. Keristen tauna ta ese ia herevalaia neganai, ia gwau: “Tadikaka Thorn ena hereva ta lau laloaboio diba lasi, badina unai hereva ese lau ia durua ia mai hari inai nega lalonai. Iena hereva be inai: ‘Bema nega haida lau sibona lau laloa bada, lau sibona egu lalona lau tahua, lau gwau: “Oi be kahu sibona. Dahaka dainai oi hekokoroku?” ’ ” Unai bamona kara be namo elda bona ma haida idia hahedinaraia totona! Inai oi laloatao: “Manau bona Iehova gari henia karadia ena davana be taga bona hairai bona mauri.”—Hereva Lada-isidia 22:4.
Dirava Ia Henia Urana Hesiai Gaukara Idia Karaia Totona
9. Dahaka dainai ita gwau diba gunalaia gaukara ena dagi tahua karana be Dirava ena amo?
9 Gunalaia gaukara ena dagi tahua karana be Dirava ena amo, a? Oibe, badina Iehova ena lauma helaga ese unai bamona tauna ia doria, ia durua ia gari lasi totona, bona ia hagoadaia Dirava ena helaga hesiai gaukarana do ia karaia totona. Haheitalai ta be inai, Iesu ena hahediba taudia be idia dagedage henidia bona gari lasi dekenai do idia haroro totona idia guruguri neganai, dahaka ia vara? “Edia guriguri ia ore neganai, idia hebou ruma ia marere, bona Lauma Helaga ese ibounai ia hahonua, bona Dirava ena hereva idia gwauraia, mai goada danu.” (Kara 4:27-31) Lauma helaga ese unai bamona kara ia havaraia, unai dainai, ia be mai ena siahu taunimanima ta ia doria gaukara ena dagi ia tahua totona.
10. (a) Keristen tauna be gaukara ena dagi ia tahua lasi ena badina ta be dahaka? (b) Bema Dirava ese gaukara ta ita ia henia, momokani dahaka do ia vara ita dekenai?
10 Reana dahaka dainai ia lo vadaeni Keristen tauna be gaukara ena dagi ia ura lasi tahua? Reana lauma dalanai ia goada to ia laloa ia hegeregere lasi. (1 Korinto 2:14, 15) Momokani, ita sibona ita laloa bada be namo lasi, bona namona be ita diba dahaka ita karaia diba lasi. (Mika 6:8) Namo lasi ita laloa ita mo sibona ita hegeregere gaukara ena maduna ta ita karaia namonamo totona, to namona be inai ita laloatao, “aonega be manau taudia dekenai.” (Hereva Lada-isidia 11:2) To namona be ita diba bema Dirava ese ita dekenai gaukara ena maduna ia henia, ita do ia hagoadaia danu unai gaukara ita hagugurua totona. Paulo ia gwau: “Keriso ese lau ia hasiahua, vadaeni gau ibounai lau goadalaia diba.”—Filipi 4:13.
11. Bema gaukara ena dagi ia tahua lasi Keristen tauna ta ia laloa ena aonega be ia hegeregere lasi ma ta ia sisiba henia totona, dahaka do ia karaia diba?
11 Keristen tauna ta be reana gaukara ena dagi ia tahua lasi badina ia laloa ena aonega be hegeregere lasi haida ia sisiba henidia totona. Vadaeni, Dirava ena Hereva stadilaia momo karana amo ena aonega ia habadaia diba, bona gau badana be ia guriguri unai aonega do ia abia totona. Iakobo ia gwau: “Bema umui ta be aonega lasi, namona be Dirava do ia noia, vadaeni Dirava ese ia dekenai do ia henia. Badina be Dirava ese taunimanima ibounai dekenai gau namodia ia henia noho. Bona tau ta bema ia be gau ta lasi, vadaeni Dirava do ia noia neganai Dirava ese do ia badu henia lasi. To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao doria mai, ia be gini gabuna lasi. Bema daradara tauna ia laloa gau ta [Iehova] dekena amo do ia abia diba, iena laloa be anina lasi. Badina be laloa rua tauna be iena kara ibounai lalonai dala tamona ia badinaia diba lasi.” (Iakobo 1:5-8) Dirava ese Solomon ena guriguri ia haerelaia neganai, ia dekenai “aonega bona lalo-parara kudouna” ia henia, unai dainai hahemaoro gaukarana ia karaia neganai ia diba dahaka be namo bona dahaka be dika. (1 Hanua Pavapavadia 3:9-14) Dirava ese Solomon ia durua be mai ena badina, to hari, stadi goadagoada karana amo bona Dirava ena heduru amo, kongregesen dekenai gaukara ena dagi idia abia taudia be mai kara maoromaoro danu ma haida idia sisiba henidia diba. “Iehova ese aonega ia henia; ia ena uduna amo aonega bona lalo-parara idia mai.”—Hereva Lada-isidia 2:6.
12. Bema daradara bona gari karana dainai tau ta be gaukara ena dagi ia tahua lasi, dahaka karadia ese ia durua diba?
12 Reana ia daradara bona ia gari sisina dainai tau ta be gaukara ena dagi ia ura tahua lasi. Reana ia laloa ia hegeregere lasi elda ena maduna bada do ia huaia totona. Paulo ia gwau: “Lauegu lalona danu dina ibounai ia hekwarahi, ekalesia orea ibounai lau naria dainai.” (2 Korinto 11:28) To aposetolo tauna ia lalo-hekwarahi neganai, ia diba dahaka do ia karaia, badina ia torea herevana be inai: “Gau ta totona do umui laloa hekwarahi lasi. To emui dabu gaudia do umui abia totona Dirava do umui noia. Bona umui noia negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia bona emui kudouna idia mamia gaudia ibounai do ia naria namonamo.” (Filipi 4:6, 7) Oibe, guriguri bona Dirava abidadama henia karadia be heduru namona iseda lalo-hekwarahi kokia totona.
13. Bema ia do lalo-hekwarahi sisina dainai tau ta be gaukara ena dagi ia tahua lasi, edena bamona do ia gurigurilaia diba?
13 Bema lalo-hekwarahi sisina ia do noho dainai tau ta be gaukara ena dagi ia tahua lasi, namona be do ia guriguri David bamona, ia gwau: “Dirava e, oi ese lau oi tahua, bona egu kudouna oi diba. Oi ese lau oi tohoa, bona lauegu lalohadai oi diba, bona oi itaia, dala dikana ta lau lalonai ia noho eiava, bona noho hanaihanai dalana dekenai oi ese lau oi hakaua.” (Salamo 139:23, 24) Herevana iseda “gari” eiava “lalo-hekwarahi” ena bada be dahaka, to Dirava ese ita ia durua diba ita haheaukalaidia lauma dalanai ita tubu ita lao totona. (The New International Version Bible oi itaia.) Salamo ena siri namona ma ta dekenai ia torea maoro, ia gwau: “Inai bamona lau gwau neganai: ‘Lauegu aena idia dedi neganai,’ Iehova e, oiemu hebogahisi ese lau ia dogoatao. Lau lalo-hekwarahi momo neganai, oiemu heduru hereva ese lau ia hamoalea.”—Salamo 94:18, 19.
Mai Moale Danu Hesiai Gaukara Karaia Iehova ena Ura Hegeregerena
14. Bema tau ta be gaukara ena dagi ia tahua lasi, dahaka dainai Dirava ena lauma helaga abia totona ia guriguri be gau badana?
14 Bema Keristen tauna ta be ia lalo-hekwarahi, ia laloa ia hegeregere lasi, eiava ura ia abia lasi dainai gaukara ena dagi ia tahua lasi, dala maorona be ia guriguri Dirava ena lauma helaga ia abia totona. Iesu ia gwau: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga idia noinoi taudia dekenai do ia henidia lasi, a?” (Luka 11:13) Maino bona haheauka be lauma helaga ena huahua haida, unai dainai unai lauma helaga ese ita ia durua diba lalo-hekwarahi eiava ita laloa ita hegeregere lasi mamina ita hanaia totona.—Galatia 5:22, 23.
15. Tatau be heduru idia abia bona edia ura idia habadaia gaukara ena dagi do idia tahua totona, edena bamona do idia guriguri be namo?
15 Ura idia abia lasi neganai be edena bamona? Ita be bapatiso Keristen taudia dainai, namona be Dirava ita guriguri henia ita ia doria ia moalelaia gaudia do ita karaia totona. David ia noinoi henia inai bamona: “Iehova e, oiemu kara lau oi hadibaia; . . . Oiemu hereva momokani dekenai lau oi hakaua, bona lau oi hadibaia.” (Salamo 25:4, 5) Unai bamona guriguri ese ita ia durua dala dikana ita dadaraia totona, bona iseda ura ia habadaia diba gaukara ena dagi do ita tahua totona. Iehova do ita noia diba gaukara ena maduna urana do ita abia totona. Oibe, bema ita guriguri Dirava ena lauma helaga ita abia totona, bona ena hakaua dalana ita badinaia, hesiai gaukarana ta ita idia henia neganai, do ita ura karaia. Badina, Dirava ena hesiai taudia be idia ura lasi dala ta dekenai iena lauma helaga idia dadaraia.—Efeso 4:30.
16. Kongregesen dekenai gaukara maduna huaia gaukarana idia tahua ena ura habadaia totona, dahaka lalohadai ese tatau ia doria unai bamona idia karaia totona?
16 Bema “Keriso ena laloa” ita abia, Dirava ena ura karaia karana do ita moalelaia. (1 Korinto 2:16) Iesu bona salamo torea tauna edia lalohadai be tamona, salamo tauna ia gwau: “Egu Dirava e, oiemu ura karaia karana lau moalelaia, oiemu taravatu be lauegu lalona dekenai ia noho.” (Salamo 40:8) Keriso ia gwau: “Lau inai, oiemu ura do lau karaia,” bona Dirava ena ura ia karaia ela bona hisihisi auna dekenai ia mase. (Heberu 10:9, 10) Bema emu lalona oi hadaia emu goada ibounai danu Iehova ena hesiai gaukara do oi karaia totona, unai ese oi do ia doria kongregesen maduna ta huaia gaukarana do oi tahua totona.
Nega Vairana Oi Laloa
17. (a) Guna, Dirava ena hesiai gaukara idia karaia momo diba taudia, to hari idia karaia diba lasi taudia unai, be dahaka dainai do idia lalohisihisi bada lasi be namo? (b) Gaukara iboudiai ia hanaia gaukara hereadaena be dahaka?
17 Guna, dagi idia abia taudia haida be mai anina bada kongregesen gaukarana idia karaia, to hari, idia gorere dainai eiava ma badina haida dainai, unai gaukara idia karaia lasi. Unai bamona taudia idia lalohisihisi be namo lasi. Ita diba abidadama taudia momo be guna idia karaia diba gaukarana be hari idia karaia diba lasi, to idia be do abidadama goada noho taudia bamona idia gini. (Salamo 25:21) Oibe, mai edia manau danu nega daudau elda gaukara idia karaia taudia be elda edia orea dekenai do idia noho diba edia heduru hereva idia gwauraia totona. Ena be guna bamona idia gaukara diba lasi idia buruka eiava idia gorere dainai, to edia gaukara ena dagi idia do dogoatao noho diba. Namona be Iehova ena Witness taudia ta ta ibounai be gaukara maduna hereadaena ta idia laloa bada, unai be ‘Dirava ena Basileia ena hairai do idia herevalaia,’ badina idia be iena ladana helagana idia abia isi taudia.—Salamo 145:10-13.
18. (a) Bema elda ta eiava hesiai tauna ta ese ena gaukara dagina ia haboioa, dahaka do ia karaia be namo? (b) Gaukara dagina ia haboioa tauna ta ena lalohadai namona be dahaka?
18 Bema guna oi be elda ta eiava hesiai tauna ta, to hari unai gaukara ena dagi dekenai oi noho lasi, namona be oi diba Dirava ese oi ia do naria noho, bona reana nega vairana dekenai oi tahua lasi gaukara ena maduna ma ta oi do ia henia. (1 Petero 5:6, 7) Bema emu kara haida oi haidaua be namo, namona be oi gwau oi kerere bona Dirava ena heduru amo dala oi tahua unai kerere oi hamaoromaoroa totona. Haida be edia elda dagina idia haboioa neganai, idia be Keristen lasi lalohadai idia abia, bona idia haida be edia haroro gaukara idia hadokoa eiava hereva momokani oreana idia rakatania. To, namona be lalohadai maorona idia abia taudia ita tohotohodia! Hegeregere, Central America dekenai, elda ta be lagani momo lalonai elda ena gaukara ia karaia, to ena elda dagina ia haboioa neganai, ia gwau: “Lau lalohisihisi bada badina nega daudau lalonai lau laloa bada gaukara dagina lau haboioa dainai. To herevana dahaka gaukara tadikaka ese lau do idia henia, do lau karaia mai egu lalona ibounai danu, bona do lau hekwarahi noho lau haboioa gaukara dagina do lau abia lou totona.” Nega ia hanaia murinai, unai tadikaka be elda ena gaukara dagina ia abia lou.
19. Bema tadikaka ta ese ena elda eiava hesiai tauna ena gaukara dagina ia haboioa, dahaka sisiba namona idia henia?
19 Bema oi ese emu elda eiava hesiai tauna ena gaukara dagina oi haboioa, namona be manau karana oi hahedinaraia noho. Namona be badu lalohadaina oi abia lasi, badina unai ese oi do ia koua nega vairana dekenai gaukara maduna haida do oi abia totona. Oi do idia hemataurai henia bema Dirava badinaia karana oi hahedinaraia. Namo lasi oi lalohisihisi, to namona be Iehova ese oiemu haroro gaukara eiava oiemu ruma bese ia hanamoa daladia oi laloatao. Namona be oiemu ruma bese be lauma dalanai oi hagoadaia, gorere taudia oi vadivadi henia, bona manoka taudia oi hagoadaia. To gau badana be, Dirava ena ladana oi hanamoa bona sivarai namona oi harorolaia, badina oi be Iehova ena Witness tauna ta dainai.—Salamo 145:1, 2; Isaia 43:10-12.
20. Bema gunalaia tauna ta eiava hesiai tauna ta be ena gaukara dagina ia haboioa, elda edia orea taudia be edena bamona idia durua diba?
20 Namona be elda edia orea taudia idia diba bema gunalaia tauna ta eiava hesiai tauna ta ese ena gaukara dagina ia haboioa, eiava sibona ena ura dainai ia rakatania, unai tau ena lalona do ia hisihisi bada diba. Bema orea murimurinai idia atoa lasi, to elda taudia idia itaia ia lalo-metau, namona be mai edia lalokau danu lauma dalanai idia durua. (1 Tesalonika 5:14) Namona be idia durua bena do ia diba ia be mai ena gabu kongregesen lalonai. Ena be sisiba idia henia, to bema ia manau bona ia moale noho reana daudau lasi kongregesen gaukara maduna ma ta do idia henia.
21. Daika daika idia naria daudau murinai hesiai gaukara ena maduna idia abia, bona hari inai negai gaukara ena maduna abia totona idia naria noho taudia dekenai, sisiba be dahaka?
21 Bema gaukara ena dagi oi tahua, reana do oi naria sisina daudau gaukara maduna ma haida do oi abia totona. Oi haragaharaga lasi. Mose be ia naria noho lagani 40 lalonai, bena murinai Dirava ia gaukaralaia Israel taudia be Aigupito ena igui hesiai gaukara amo ia ruhadia totona. (Kara 7:23-36) Mose ena gabu ia do abia lasi neganai, Iosua be sisina daudau Mose ia durua noho. (Esodo 33:11; Numera 27:15-23) Israel ena terona dekenai ia do helai lasi neganai, David be nega daudau ia naria. (2 Samuel 2:7; 5:3) Petro bona Ioane Mareko be nega ta ta ai sisiba idia abia edia kara idia namo idia lao totona. (Mataio 26:69-75; Ioane 21:15-19; Kara 13:13; 15:36-41; Kolose 4:10) Unai dainai bema harihari kongregesen dekenai, gaukara maduna ta oi do abia lasi, reana Iehova ia ura oi idia hadibaia noho guna emu aonega kara do ia bada ia lao totona. To, namona be unai gaukara ena dagi oi tahua noho lalonai, Dirava ena heduru oi tahua, reana oi do ia hanamoa bona gaukara ena maduna ma haida oi do ia henia. Unai gaukara dagina oi tahua noho lalonai, namona be emu diba oi habadaia noho bena gabeai do oi hegeregere kongregesen dekenai maduna do oi abia totona, bona David bamona do oi karaia, ia gwau: “Lauegu uduna ese Iehova do ia hanamoa; bona taunimanima iboudiai ese iena ladana helagana do idia hanamoa ela bona hanaihanai.”—Salamo 145:21.
Edena Bamona Do Oi Haere?
◻ Dahaka ia vara garina Keristen elda taudia be idia naria namonamo be gau badana?
◻ Bema tatau ese gaukara dagina idia tahua lasi idia lalo-hekwarahi dainai eiava idia laloa idia hegeregere lasi dainai, dahaka ese ia durudia diba?
◻ Dahaka ese tau ta ia doria kongregesen lalonai maduna do ia tahua totona?
◻ Elda eiava hesiai taudia edia gaukara dagina idia haboioa neganai idia be nega vairana totona, edena bamona idia lalohadai?
[Picture on page 11]
W. J. Thorn be haheitalai namona ia be manau elda tauna dainai
[Picture on page 13]
Iesu bamona, oi ura oi goada karaia Iehova ena hesiai gaukara oi karaia totona, a?