Golo Idia Hereaia Kohudia Oi Davaria Diba!
BIBLE lalonai idia noho hereva momokanidia be golo, siliva, eiava idia hehuni kohu namodia ma haida bamona. Ena be reana oi be nega ta lasi golo o siliva oi tahua, to reana oi diba unai kara idia karaia totona, taunimanima idia gaukara goadagoada bona idia hesiku haraga lasi be namo. Bona nega momo golo o siliva ia tahua tauna ese unai gaudia ia davaria lasi.
To, bema Bible lalonai idia noho kohu namodia henunidia oi tahua, unai dika ese oi do ia davaria lasi. Inai gwauhamata namona oi laloa: “Bema oi tahua, siliva oi tahua bamona, bona idia hunia kohuna oi tahua bamona, unai neganai Iehova garina ena anina do oi diba, bona Dirava ena diba do oi davaria.” (Hereva Lada-isidia 2:4, 5) To gau badana be unai gaudia oi tahua namonamo.
“Do Oi Tahua bona Do Oi Diba”
Keristen taudia ginigunadia edia negai, Iuda taudia haida ese inai sisiba be ma Farisea tauna ta, ladana Nikodemo, dekenai idia henia: “Do oi tahua bona do oi diba, peroveta tauna ta Galilea dekenai do ia vara lasi.” Unai sisiba ia namo momokani. Dala ia noho hereva momokani do idia tahua bona do idia davaria—unai hereva momokani ese golo ia hereaia.
To, “do oi tahua bona do oi diba” herevana idia gwauraia taudia be unai bamona idia karaia lasi. Edena bamona?
Hahelaga taudia badadia bona Farisea taudia ese ofisa taudia idia siaia Iesu idia dogoatao totona. Iesu ena hadibaia dalana idia ura henia dainai, ofisa taudia ese Iesu idia dogoatao lasi. Unai dainai, Farisea taudia ese ofisa taudia idia nanadaia, idia gwau: “Be, umui danu ia koia vadaeni?” Nikodemo ia hereva ia gwau: “Iseda taravatu ese tau ta do ia kota henia neganai, be ena hereva do idia kamonai guna, ani, bona ena kara do idia diba guna, ani?” Iena hereva dainai Farisea taudia idia gwau: “Do oi tahua bona do oi diba.”—Ioane 7:32, 45-52.
Hahelaga taudia bona Farisea taudia be edena bamona idia kerere? Idia diba lasi, eiava idia gwauraia hedinarai lasi, ena be Iesu be Galilea dekenai ia tubu daekau, to ia be Betelehem dekenai ia vara. Peroveta tauna Mika ia gwau: “Oi [Betelehem] emu amo tau ta do ia mai lau dekenai ia be Israel lalonai do ia lohia.” (Mika 5:2) Unai dainai, unai gunalaia taudia idia tahua lasi bona idia diba lasi Iesu be peroveta tauna, Israel lalonai do ia lohia tauna unai. Unai dainai dika idia davaria, bona unai ese ia hahedinaraia gau badana be ita ese hereva ita tahua namonamo bona hereva momokani ibounai ita diba. To nega momo taunimanima ese hereva momokani edena bamona idia laloa?
Hereva Momokani Idia Hamiroa
Lagani 1800 murinai ia noho toretore tauna ta ia gwau: “Hereva momokani, be golo goevana bamona. Taunimanima ese idia hariharilaia lasi, badina idia davaria bema hereva momokani idia hamiroa unai be auka lasi to bema idia ese sibona idia hagoevaia unai be auka.” Unai hereva be momokani inai tanobada ena tomadiho idauidau dekenai! Satana Diabolo, “koikoi ibounai edia tamana,” ese hereva momokani hamiroa karana ia havaraia. (Ioane 8:44; Apokalupo 12:9) Tomadiho koikoina ia gaukaralaia inai henanadai edia hahediba hereva momokanidia do ia hadikaia totona, gaudia inai: Dirava be daika? Iesu bona Dirava be edena bamona idia gaukara hebou? Tanobada bona tanobada taudia dekenai dahaka do ia vara?
Hahelaga taudia bona Farisea taudia be mai edia dala hereva momokani idia tahua bona idia davaria totona. Kohu namodia idia davaria diba, unai kohu ese golo idia hereaia momokani. Oibe, bema ‘ena hereva do idia kamonai bona ena kara do idia diba,’ Nikodemo ena sisiba hegeregerena, idia ese Iesu ena sivarai momokanina ibounai idia abia diba. Bema mai edia momokani ida unai bamona idia karaia, Iesu ese gau ibounai edia anina do ia gwauraia hedinarai idia dekenai, iena hahediba taudia dekenai ia gwauraia hedinarai hegeregerena. (Mareko 4:34) To hari inai negai ita be hereva momokani goevadaena edeseniai ita davaria diba? Hereva momokani ibounai ita tahua diba bona ita davaria diba, a?
[Picture on page 4]
Guna, tomadiho gunalaia taudia be mai edia dala hereva momokani ibounai Iesu dekenai do idia diba, bema ‘Iesu ena hereva idia kamonai’