Lalokau Momokanina be Hahenamo Badana
“Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.”—HEBERU 6:10.
1, 2. Dahaka dainai lalokau momokani karana be ita ta ta ibounai dekenai hahenamo badana ta?
SIBONA ena ura ia tahua lasi lalokauna be hereadae, namo momokani, bona ita hahedinaraia karadia ibounai amo ia be mai anina bada gauna bamona. Unai lalokau karana (Greek, a·gaʹpe) dainai gaukara momo ita karaia noho. To, kara maoromaoro bona lalokau Diravana ese ita ia havaraia dainai, ita diba sibona ena ura ia tahua lasi lalokau karana ita hahedinaraia be hahenamo badana ta. Badina be dahaka?
2 Lalokau momokani be hahenamo badana ena badina ta be ia be mai ena siahu iseda tauanina dekenai, hegeregere mai ena siahu iseda lalohadai bona kudou ena hemami dekenai. Lalo-hekwarahi karana ia stadilaia aonega tauna ta ia gwau: “ ‘Oiemu badibadinai tauna dekenai oi lalokau henia,’ be aonega sisiba namona doketa taudia totona.” Oibe, “lalokau ia hahedinaraia tauna ese sibona ena mauri ia hanamoa.” (Hereva Lada-isidia 11:17) Unai hereva hegeregerena ta be inai: “Hariharibada tauna be ena kohu do ia habadaia; bona taunimanima ia dairia loulou tauna be do idia dairia danu.”—Hereva Lada-isidia 11:25; Luka 6:38 itaia danu.
3. Lalokau momokani karana ena hahenamo ia henia totona Dirava ese dahaka ia karaia?
3 Lalokau be ita ia hanamoa gauna badina Dirava ese sibona edia ura idia tahua lasi taudia ia hanamoa. Bible ia gwau: “Ogogami tauna dekenai hebogahisi ia hahedinaraia tauna be Iehova dekenai ia henia torehai; Iehova ese ena kara davana do ia henia.” (Hereva Lada-isidia 19:17) Iehova ena Witness taudia be unai hereva hegeregerena idia karaia idia ese Basileia ena sivarai namona idia harorolaia neganai. Idia diba ‘Dirava be mai ena kara maoromaoro dainai, edia gaukara do ia laloaboio diba lasi, badina iena ladana idia hanamoa dainai.’—Heberu 6:10.
Haheitalai Namona
4. Daika ese ia hahedinaraia lalokau momokani karana be hahenamo gauna ta, bona edena bamona unai ia hahedinaraia?
4 Daika ese ia hahedinaraia lalokau momokani be hahenamo gauna? Dirava ese unai ia hahedinaraia! Ia ese “inai tanobada [taunimanima unai] ia lalokau henia bada dainai, iena Natuna tamona sibona ia vara, ia henia vadaeni ita dekenai.” (Ioane 3:16) Iehova ese iena Natuna ia henia bona taunimanima ese iena mauri ia bouboulaia karana dekenai idia abidadama neganai mauri hanaihanai do idia abia diba, unai bamona ia karaia be reana auka herea Iehova dekenai, bona unai ese ia hahedinaraia ia be mai ena lalokau bona taunimanima ia hebogahisi henidia. Danu ena lalokau karana ma ia hedinarai badina ‘Aigupito dekenai Israel bese taudia edia hisihisi dainai ia hisihisi.’ (Isaia 63:9) Iehova ese ena Natuna be hisihisi auna dekenai hisihisi ia ania ia itaia neganai, bona ena boiboi “Egu Dirava e, Egu Dirava e, dahaka dainai lau oi rakatania?” ia kamonai neganai, reana ia lalohisihisi bada.—Mataio 27:46.
5. Dirava ese taunimanima ia lalokau henia bada dainai iena Natuna ia henia ena mauri ia bouboulaia totona; unai kara dainai dahaka idia vara diba?
5 Iehova ese lalokau korikori ia hahedinaraia neganai hahenamo ia abia, a? Oibe. Hahenamo bada ia abia, badina ena be Satana ese Iesu ia dibagania bada, to Iesu ena abidadama karana ia goada noho, unai dainai, Dirava ese Diabolo ena hepapahuahu herevana ia hakoikoia diba! (Hereva Lada-isidia 27:11) Oibe, Dirava ena Basileia dekena amo Iehova ena ladana do ia hanamoa, tanobada dekenai Paradaiso do ia havaraia lou, bona taunimanima milion momo dekenai mauri hanaihanai do ia henidia, unai kara ibounai do idia vara diba badina Dirava ese taunimanima ia lalokau henia bada dainai ia lalokau henia bada Natuna ia henia ena mauri do ia bouboulaia totona.
Iesu be Haheitalai Namona
6. Lalokau karana ese ia doria dainai Iesu be dahaka ia karaia?
6 Haheitalai namona ma ta be Dirava ena Natuna, Iesu Keriso, ia hamomokania lalokau momokani ese hahenamo ia havaraia. Ia ese ena guba Tamana ia lalokau henia bada, bona herevana dahaka do ia vara, unai lalokau ese ia doria Iehova ena ura ia karaia totona. (Ioane 14:31; Filipi 2:5-8) Ena be nega haida “mai taitai bona mai matana ranu danu” Iesu ese ena Tamana ia guriguri henia, to ena lalokau Dirava dekenai ia hahedinaraia noho.—Heberu 5:7.
7. Edena dala idauidau amo Iesu be lalokau momokani karana amo hahenamo ia abia?
7 Iesu ese sibona ena ura ia tahua lasi lalokau karana ia hahedinaraia neganai hahenamo ia abia, a? Oibe! Lagani toi mai kahana dekenai ia haroro neganai, ena kara namodia idauidau momo amo moale bada ia abia. Ia ese taunimanima ia durudia bada lauma dalanai bona tauanina dalanai danu! Bona gau badana be inai, herevana Satana be ia dekenai dahaka hedibagani ia mailaia, ia hahedinaraia goevadae tauna be mai ena dala ena abidadama karana Dirava dekenai ia dogoatao noho diba, bona Iesu ese Diabolo ena hereva ia hakoikoia neganai ia moale bada. Ma danu, ia be Dirava ena abidadama hesiai tauna ta dainai, Iesu be ia toreisi lou neganai guba maurina ia abia totona, hahenamo bada ia abia bona ia be mase diba lasi maurina ia abia. (Roma 6:9; Filipi 2:9-11; 1 Timoteo 6:15, 16; Heberu 1:3, 4) Aramagedono do ia ginidae neganai bona ena Lagani 1,000 Lohia Negana lalonai hahenamo momo do ia abia, ia ese tanobada dekenai Paradaiso do ia havaraia lou bona taunimanima milion momo be mase amo do idia toreisi lou neganai, do ia moale bada! (Luka 23:43) Oibe, ia hedinarai goevagoeva lalokau momokani karana dainai Iesu be hahenamo bada ia abia.
Paulo ena Haheitalai
8. Paulo ese Dirava bona taunimanima dekenai lalokau momokani karana ia hahedinaraia dainai, ia dekenai dahaka ia vara?
8 Nega ta aposetolo Petro be Iesu ia nanadaia, ia gwau: “Ai be gau ibounai ai rakatania, vadaeni oiemu murina dekenai ai raka. Unai dainai ai be dahaka do ai abia?” Iesu ia haere henia neganai, ena hereva haida be inai: “Ruma, o ena tadikakana, o ena taihuna, o ena tamana, o ena sinana, o ena adavana, o ena natuna, o tano, lau totona ia rakatanidia tauna ese momo herea momokani do ia abia, bona mauri hanaihanai danu do ia abia.” (Mataio 19:27-29) Aposetolo Paulo be unai kara dekenai ia be haheitalai namona, Luka ese Paulo ena sivarai ia torea Kara bukana dekenai bona ia hahedinaraia ia be hahenamo momo ia moalelaia. Paulo ese Dirava bona taunimanima dekenai lalokau momokani karana ia hahedinaraia, unai dainai, ia ese ena Farisea dagi badana ena gaukara tahua karana ia rakatania. Danu, inai oi laloa, Paulo be Dirava bona Iena helaga hesiai gaukarana ia lalokau henia bada dainai, nega momo idia kwadia, kahirakahira ia mase, bona dika idauidau ia davaria.—2 Korinto 11:23-27.
9. Paulo be lalokau momokani karana ia hahedinaraia dainai dahaka hahenamo ia abia?
9 Lalokau momokani hahedinaraia karana dekenai, Paulo be haheitalai namona dainai Iehova ese ia hanamoa, a? Namona be Paulo ena haroro gaukara oi laloa, ena gaukara amo huahua bada ia vara. Ia be Keristen kongregesen momo ia haginidia. Bona Dirava ena siahu dekena amo hoa bada karadia ia karaia! (Kara 19:11, 12) Danu, Paulo be matahanai haida ia abia bona revareva 14 ia toredia, unai revareva be Taravatu Matamatana bukana dekenai idia noho. To ma hahenamo badana ta ia abia danu, ia be guba dekenai mase diba lasi maurina ia abia. (1 Korinto 15:53, 54; 2 Korinto 12:1-7; 2 Timoteo 4:7, 8) Paulo ia diba Iehova ese lalokau momokani ia hahedinaraia tauna ia hanamoa.
Hari Inai Nega Lalonai Lalokau Momokani ena Hahenamo Ia Vara
10. Iesu ena hahediba taudia be edia lalokau Iehova dekenai idia hahedinaraia neganai, reana idia dekenai dahaka do ia vara diba?
10 Hari inai nega lalonai danu Iehova ena Witness taudia idia diba lalokau momokani hahedinaraia karana amo hahenamo idia vara. Iehova ena kahana dekenai ita gini neganai, bona Iesu ena hahediba taudia ai ita lao neganai, ita hahedinaraia Iehova ita lalokau henia bona reana iseda abidadama karana dainai iseda mauri do ita haboioa diba. (Apokalupo 2:10 oi itaia.) Unai dainai Iesu ia gwau namona be davana ita laloa guna. To hahediba tauna ena davana ia namo eiava lasi ita diba totona ita karaia lasi. To, ita karaia badina ita ura ita hegaegae bena herevana dahaka do ia vara, ita hegeregere hahediba gaukara do ita karaia noho totona.—Luka 14:28.
11. Dahaka dainai haida idia ura lasi Dirava dekenai gwauhamata idia karaia?
11 Hari inai nega lalonai, taunimanima—reana milion momo—be sivarai idia abia dae Iehova ena Witness taudia ese Dirava ena Hereva amo idia harorolaia neganai. To, idia ura lasi Dirava dekenai gwauhamata idia karaia bona bapatiso do idia abia. Taunimanima ma haida bamona idia karaia lasi, badina reana idia be Dirava dekenai lalokau momokanina idia hahedinaraia lasi dainai, ani? Idia momo idia ura lasi gwauhamata herevana idia karaia bona bapatiso idia abia, badina idia ura lasi edia kamonai lasi adavana idia habadua. Ma haida be Dirava kahirakahira dekenai idia mai lasi badina edia lalohadai be inai bisinesi tauna ena lalohadai hegeregerena, Witness ta dekenai ia gwau: “Lau be kara dika lau moalelaia.” Vadaeni ia hedinarai, taunimanima totona Dirava bona Keriso idia karaia gaudia be momo, to unai bamona taudia ese unai heduru idia laloa bada lasi.
12. Inai magasin ia gwau dahaka hahenamo do ita abia bema diba maoromaoro ese ita ia veria Dirava kahirakahira dekenai lalokau momokani karana ita hahedinaraia totona?
12 Bema ita totona Iehova bona Iesu Keriso idia karaia gaudia ita laloa bada, herevana dahaka do ia vara, do ita ura iseda guba Tamana ena hesiai gaukara ita karaia bona do ita ura Iesu ena hahediba taudia ai ita lao noho. Dirava dekenai edia lalokau momokani karana ia bada dainai, edia mauri dalana ia idauidau tatau bona hahine—bisinesi dekenai idia kwalimu taudia, spot gadara diba momo taudia, bona ma taunimanima haida danu—ese sibona idia tahua aonegana idia rakatania bona Paulo bamona idia ese Keristen ena hesiai gaukara idia abia dae. Bona idia gwau Dirava idia dibaia bona ena hesiai gaukara idia karaia ena hahenamo be bada, ma gau ta ese unai namo ia hanaia lasi. Unai hereva hegeregerena, guna The Watch Tower magasin ta ia gwau: “Nega haida ita henanadai, ita gwau, Tadikaka hida do idia ura Hereva Momokani idia rakatania bema kina 1,000 idia henia? Ta ese edia imana idia abia isi lasi! Daika ese Hereva Momokani ia ura rakatania kina 10,000 idia henia neganai? Idia ta be lasi! Daika ia ura Hereva Momokani ia rakatania kina 1,000,000 idia henia neganai? Daika ia ura ena diba Dirava dekenai bona ena diba Dirava ena Palani dekenai do ia rakatania tanobada ibounai ia abia totona? Tau ta lasi! Murinai ai gwau, Tura ibounai e, umui hutuma be lalohisihisi momo lasi taudia. Bema umui ura lasi emui diba Dirava dekenai umui haboioa unai moni abia totona, unai anina be ai bamona umui be taga bada mamina abia taudia.” (December 15, 1914, rau 377) Oibe, diba maoromaoro Dirava bona iena kara dekenai ita abia neganai, unai ese ita ia veria ia dekenai lalokau momokanina ita hahedinaraia totona, bona unai be hahenamo bada gauna.
13. Sibona eda stadi karana be edena bamona ita laloa be gau badana?
13 Bema Dirava ita lalokau henia, do ita goada karaia iena ura ita diba namonamo bona ita karaia totona. (1 Ioane 5:3) Sibona eda stadi karana, guriguri karana, bona Keristen heboudia lao henia karana do ita lalodia bada. Unai kara ibounai ita goadalaia totona, iseda ura karadia haida ita reaia be gau badana, badina unai kara ita karaia totona iseda nega, goada, bona ma gau haida ita negea. Nega haida bema televisen ita ura raraia, to unai nega be ita sibona eda stadi negana, dahaka ita karaia? Bema iseda stadi karana ita laloa bada bona nega ita atoa unai stadi ita karaia totona, lauma dalanai do ita goada ita lao, bona ita ia durua ma haida ita haroro henidia namonamo totona, bona Keristen heboudia dekenai diba bada ita abia!—Salamo 1:1-3.
14. Iehova guriguri henia bona turana henia karana be mai anina bada, eiava?
14 Mai moale danu iseda guba Tamana dekenai ‘guriguri ita goadalaia nega ibounai,’ a? (Roma 12:12) Eiava ita bisi momo dainai unai mai anina bada karana ita karaia namonamo lasi, a? ‘Nega ibounai guriguri’ karana be dala namona iseda turana karana Iehova Dirava dekenai ita hagoadaia totona. (1 Tesalonika 5:17) Hedibagani ita abia neganai, bema iseda turana karana Iehova dekenai ia goada, unai ese ita ia durua bada. Potifara ena adavana ese ia dibagania neganai, dahaka ese Iosef ia durua ia dadaraia totona? Bona dahaka dainai Daniel ese ena guriguri karana Iehova dekenai ia hadokoa lasi, Mede bona Parasa idia taravatua neganai? (Genese 39:7-16; Daniel 6:4-11) Unai taudia edia turana karana Dirava dekenai ese ia durudia idia kwalimu totona, bona ita danu do ia durua!
15. Keristen heboudia be edena bamona ita lalodia be namo, bona dahaka dainai?
15 Vadaeni, pura ta ta ibounai iseda hebou 5 ita lalodia bada, a? Ita hesiku, ita gorere sisina, eiava dina ia siahu o medu ia diho dainai hebou ita reaia, eiava taravatu ita badinaia bona iseda guriguri hebou kara ita reaia lasi, a? (Heberu 10:24, 25) America dekenai masini ia gaukaralaia tauna ta be davana bada ia abia, to iena gaukara dainai nega momo ena Keristen heboudia ia reaia. Unai dainai, ena moni gaukara ia haidaua, ena be unai ia karaia neganai ena moni davana ia diho, to unai neganai ia be mai ena dala hebou iboudiai ia lao henidia totona. Iseda hebou dekenai iseda abidadama karana ita hagoadaia heheni. (Roma 1:11, 12) Unai kara ibounai dekenai, ia hedinarai goevagoeva, “uhe momo do ia hadoa tauna be anina momo do ia geia,” ani? (2 Korinto 9:6) Oibe, unai dala amo lalokau korikori hahedinaraia be hahenamo badana.
Lalokau Momokanina bona Iseda Haroro Gaukara
16. Bema lalokau ese ita ia doria, gabu bona nega idaudia dekenai taunimanima ita haroro henidia totona, reana dahaka ia vara diba?
16 Ita be Iehova ena taunimanima dainai, lalokau karana ese ita ia doria sivarai namona ita harorolaia totona. Hegeregere, ita ia doria gabu bona nega idaudia dekenai taunimanima ita haroro henidia totona. Reana unai bamona ita haroro ita gari sisina, to lalokau karana ese ita do ia doria ita hereva totona. Oibe, lalokau karana ese iseda lalona do ia durua bena dala ta do ita laloa mai hemataurai danu taunimanima dekenai hereva ita hamatamaia totona, bona ita hereva lalonai Basileia ena sivarai ita kikilaia diba. Haheitalai ta be inai: Peleini dekenai ia guia neganai, Keristen elda tauna ta be Roman Katolik fada tauna badinai ia helai. Unai elda tauna be fada tauna dekenai henanadai namodia haida ia henia. Bona unai henanadai ese ena lalona ia veria dainai fada tauna be peleini amo ia do diho lasi neganai, iseda buka rua ia abia. Gabu bona nega idaudia dekenai ia haroro dainai ekspiriens namona ia abia unai!
17, 18. Keristen haroro gaukara dekenai, lalokau ese ita do ia doria dahaka do ita karaia totona?
17 Lalokau momokani karana ese ita ia doria hanaihanai ruma ta ruma ta dekenai haroro gaukara ita karaia totona, bona ma hesiai gaukara haida ita karaia totona danu. Taunimanima dekenai Bible ita kikilaia neganai, ita ese Iehova Dirava ena ladana ita hanamoa bona mamoe bamona taudia ita durudia mauri hanaihanai ena dala idia diba totona. (Mataio 7:13, 14 oi itaia.) Ena be taunimanima momo idia ura lasi Bible ena sivarai ita kikilaia, to ita hekwarahi kava lasi unai. Taunimanima edia ruma dekenai ita lao neganai idia diba dahaka dainai ita mai, bona unai gaukara ese ita ia hagoadaia, badina Bible ena hereva momokanidia ita harorolaia neganai iseda abidadama ia hagoadaia. Momokani, manau taudia sibodia be ruma ta ruma ta gaukarana idia karaia diba, bona ‘sivarai namona dainai inai kara ibounai idia karaia, iena mauri namona lalonai hanamoa do idia abia totona.’ (1 Korinto 9:19-23) To Dirava bona taunimanima ita lalokau henidia dainai, mai iseda manau danu gaukara ita goadalaia noho bona unai dainai hahenamo momo ita abia.—Hereva Lada-isidia 10:22.
18 Danu, lalokau momokani karana dainai Iehova ena hesiai taudia be Bible ena hereva momokani idia kamonai namonamo taudia dekenai idia lou-henia. Danu, Dirava bona taunimanima idia lalokau henidia dainai, pura bona hua ta ta iboudiai dekenai Bible stadi idia karaia totona, edia nega, edia goada, bona edia kohu idia gaukaralaia. (Mareko 12:28-31) To, unai Bible stadi taudia ta ia bapatiso ita itaia neganai, bona reana gabeai nega ibounai hesiai gaukara ia karaia, ita diba lalokau momokani karana ena hahenamo be bada, ani?—2 Korinto 3:1-3 oi itaia.
19. Lalokau karana ena anina be dahaka nega ibounai hesiai gaukarana dekenai?
19 Sibona ena ura ia tahua lasi lalokauna ita hahedinaraia neganai, reana ita ia durua kohu haida ita reaia, to bema mai dalana, unai lalokau ese ita ia doria nega ibounai hesiai gaukara ita karaia totona. Witness taudia tausen tausen momo edia lalokau karana dainai unai gaukara idia karaia, bona idia gwau hahenamo bada idia abia. Bema mai emu dala nega ibounai hesiai gaukara oi karaia diba totona, to unai gaukara oi karaia lasi, oi be hahenamo momo do oi reaia.—Mareko 10:29, 30 oi itaia.
Hahenamo Ma Haida
20. Lalokau karana ese ita edena bamona ia durua kerere ita gwauatao totona?
20 Lalokau momokani karana ena hahenamo ma ta be ita ia durua kerere ita gwauatao totona. Oibe, “lalokau ese edia dika ia laloatao noho lasi.” To “kara dika momo do ia gwauatao.” (1 Korinto 13:5; 1 Petero 4:8) Ia gwau “kara dika momo,” ani? Bona kerere ita gwauatao karana be hahenamo badana ta! Bema tau ta ena kerere oi gwauatao neganai, oiemu lalona ia namo bona oi dekenai ia kerere tauna ena lalona ia namo danu. To gau badana be inai, bema tau ta be ita dekenai ia kerere bona unai kerere ita gwauatao lasi, ita diba Iehova ese iseda kerere do ia gwauatao lasi danu.—Mataio 6:12; 18:23-35.
21. Lalokau momokani karana ese ita edena bamona ia durua ita manau totona?
21 Ma danu, lalokau momokani karana be hahenamo badana ta badina ita ia durua ita manau totona. Bema Iehova ita lalokau henia, ita be iena imana goadana henunai do ita manau. (1 Petero 5:6) Danu, Iehova lalokau henia karana ese ita ia doria ia abia hidi oreana, “hesiai tauna mai ena kamonai bona mai ena kara maoromaoro” oreana unai, ita badinaia totona. Unai anina be kongregesen dekenai mai manau danu gunalaia taudia edia hereva ita kamonai henidia. Unai be hahenamo badana ta badina bema unai bamona ita karaia lasi neganai “anina namona ta do [ita] davaria lasi.” (Mataio 24:45-47; Heberu 13:17) Momokani, ruma bese lalonai ita ese manau karana ita hahedinaraia be gau badana danu. Bema unai bamona kara ita karaia ita be hahenamo bada do ita abia, badina ruma bese lalonai, moale, maino, bona lalo-tamona ia habadaia, bona ita moale badina ita diba iseda kara amo Iehova ita hamoalea.—Efeso 5:22; 6:1-3.
22. Moale momokani be edena bamona do ita abia diba?
22 Vadaeni, ia hedinarai goevagoeva, sibona ena namo ia tahua lasi a·gaʹpe lalokauna ita habadaia be gau badana. Bona ita diba lalokau momokani karana be hahenamo badana ta. Unai dainai, bema unai lalokau karana ita habadaia bona ita hahedinaraia bada do ita moale bona iseda lalokau Diravana, Iehova, ena ladana do ita hahairaia.
Edena Bamona Do Oi Haere?
◻ Edena dala idauidau amo Iehova Dirava ese lalokau momokani karana ia hahedinaraia?
◻ Iesu Keriso be edena dala amo lalokau karana ia hahedinaraia?
◻ Paulo ese lalokau momokani karana ia hahedinaraia dalana be dahaka?
◻ Iehova ena Witness taudia ese lalokau karana idia hahedinaraia noho daladia be dahaka?
◻ Dahaka dainai oi gwau diba lalokau momokani karana amo hahenamo idia vara?
[Picture on page 24]
Iehova ese taunimanima ia lalokau henia bada dainai, iena Natuna ia henia ita be mauri hanaihanai do ita abia totona. Unai lalokau momokani karana oi laloa bada, a?
[Picture on page 26]
Lalokau momokani Iehova dekenai ese ita do ia doria ‘guriguri ita goadalaia totona’