Moale amo Umui Honu
“Iesu diba tahua taudia ibounai be moale bada, bona Lauma Helaga dekenai idia honu.”—KARA 13:52.
1. (a) Moale be edena bamona huahuana? (b) Dahaka moale gauna ia henia dainai, Dirava ita hanamoa be namo?
MOALE! Paulo ese lauma ena huahua ia herevalaia neganai, unai Keristen karana, moale, be lalokau sibona murinai ia gwauraia. (Galatia 5:22-25) Bona unai moale ena badina be dahaka? Unai be lagani 1,900 gunanai, Dirava ena aneru ese manau mamoe naria taudia dekenai ia gwauraia sivarai namona, ia gwau: “Hereva namona lau mailaia vadaeni, taunimanima ibounai idia moale totona. Badina be hari inai dina, [David] ena hanua dekenai, umui emui Hamauria Tauna ia vara vadaeni, Keriso Lohiabada unai.” Bena aneru hutuma idia hedinarai bona aneru danu mai moale danu Dirava dekenai ane idia abia, idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia taudia ese inai maino do idia abia.”—Luka 2:10-14.
2, 3. (a) Dahaka dainai Dirava ese iena vara guna Natuna taunimanima edia Hamauria Tauna ai ia lao totona ia siaia be maoro? (b) Dahaka dala ma haida dekenai tanobada ai ia noho neganai Iesu be Dirava ena ura ia karaia?
2 Iehova ena moale taunimanima dekenai ia hahedinaraia Lohiabada Keriso ena hahemauri dalana amo. Dirava ena vara guna Natuna be aonega korikori ia laulaulaia bona gau ibounai havaraia negana ai, ia ese iena Tamana be inai bamona ia gwauraia: “Unai neganai lau be ia kahirakahira dekenai lau noho, gaukara ia diba momo tauna bamona, bona dina iboudiai ia ese lau ia moalelaia bona lau be iena vairanai lau moale nega ibounai, iena tanobada ena tano namona lau moalelaia noho, bona taunimanima edia natuna iboudiai dekenai idia noho gaudia lau moalelaidia.”—Hereva Lada-isidia 8:30, 31.
3 Unai dainai, Iehova ese unai Natuna, taunimanima natudia ia moalelaia tauna, be taunimanima ia Hamauria Tauna ai ia lao totona ia siaia be maoro. Bona edena dala ai unai ese Dirava ia hahairaia? Dala ia kehoa iena ura namona do ia hagugurua totona, unai be tanobada be kara maoromaoro bona maino ura henia taudia amo ia hahonua. (Genese 1:28) Ma danu, tanobada dekenai ia noho neganai, hari Natuna, Iesu, be hahetoho dikadia ia haheaukalaia neganai, ia hahedinaraia tau goevadaena ese Atai Herea Lohiabadana, Iehova, ia badinaia diba mai ena kamonai ida, bena unai ese ia hamomokania iena Tamana be mai ena maoro Ia havaraia gaudia iboudiai ia lohiaia totona. (Heberu 4:15; 5:8, 9) Iesu be abidadama dekenai ia raka noho dainai, ia ese Keristen korikori taudia iboudiai edia haheitalai ta ia karaia idia be ia bamona idia raka totona.—1 Petero 2:21.
4. Iesu ena haheauka ese dahaka moale bada ia havaraia, bona edena dala ai unai ese ita ia hagoadaia be namo?
4 Iesu be iena Tamana ena ura ia karaia neganai, ia be moale bada herea ia davaria, bona ia laloa ena moale do ia habadaia, aposetolo Paulo be Heberu 12:1, 2 dekenai ia hahedinaraia hegeregerena: “Iseda vairana dekenai ia noho heau helulu mai haheauka danu do ita heau. Iseda matana Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua ela bona dokona. Iesu be satauro dainai ia hesiku lasi. Lasi momokani. Ia diba guba ena moale be ia vairanai ia noho dainai ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” Unai be dahaka moale? Unai be Iesu ese ia abia moalena, ia be Tamana ena ladana ia hahelagaia bona mase amo taunimanima ia hamauridia dainai sibona lasi, to ia be King bona Hahelaga Tauna Badana ai ia lohia dainai, ia be paradaiso tanobadana dekenai kamonai taudia be mauri hanaihanai ia henidia lou neganai.—Mataio 6:9; 20:28; Heberu 7:23-26.
5. Iesu ena “tadikaka” be daidia, bona idia be dahaka moale idauna ta ai idia vareai?
5 Oibe, Dirava ena Natuna be nega ibounai ia moale taunimanima ia hesiai henidia neganai. Bona ia moale iena Tamana ia hesiai henia dainai, bena kara maoromaoro taudia, iena “tadikaka” ia gwauraidia taudia unai, ia abia hidi dainai, bona idia mase neganai guba dekenai idia toreisi lou. Unai taudia be Iesu ida moale idauna dekenai idia vareai. Idia gwauraidia “moale bona helaga” bona idia be “Dirava bona Keriso edia boubou helaga karaia taudia. Bona lagani 1,000 lalonai Keriso danu do idia lohia.”—Heberu 2:11; Apokalupo 14:1, 4; 20:6.
6. (a) King ese dahaka moale boiboina ia henia “mamoe idaudia” dekenai? (b) Hari inai negai, unai mamoe momo be dahaka gaukara namodia idia moalelaia?
6 Ma danu, “mamoe idaudia” hutuma bada herea taudia, ia lohia King ese idia iena idibana kahana dekenai ia atodia badina ia moale henidia dainai, be iena boiboi idia kamonai: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.” (Ioane 10:16; Mataio 25:34) Unai be moale bada herea gaukarana ta! Basileia ena tanobada kahana do idia abia taudia amo, momo be horoa taudia ida maduna badadia idia abia, Iehova ese ia perovetalaia hegeregerena: “Idau taudia do idia gini, emui mamoe do idia naridia to umui be Iehova ena hahelaga taudia, bona idau bese taudia be emui tano biru henia taudia ai bona emui vine utua taudia ai do idia lao. Bona umui be Iehova ena hahelaga taudia ai do idia gwauraia; iseda Dirava ena hesiai taudia umui do idia gwauraia.” Idia ibounai be Dirava ena peroveta tauna danu do idia hereva tamona, idia gwau: “Lau be Iehova do lau moalelaia bada. Lauegu mauri ese Dirava do ia moalelaia. Badina hahemauri ena dabua amo lau ia hadabualaia.”—Isaia 61:5, 6, 10.
7. Badina be dahaka hari “nega,” 1914 ena amo ia mai negana unai, ia idau momokani?
7 Hari ita be nega idau hereana ta dekenai ita mauri noho. Lagani 1914 negana amo, Keriso be guba King bamona ia lohia, Salamo 118:24, 25 ese ia herevalaia hegeregerena: “Inai be Iehova ese ia karaia dinana, do ita moale bona do ita moalelaia. Iehova e, oi ai noia, ai oi hamauria! Iehova e, oi ai noia, ai dekenai kwalimu oi henia!” Unai neganai, kara badana be Iehova ese Babulono tomadihona do ia hadikaia ore bona Keriso ena headava matamata hahine, iena tadikaka 144,000 unai, be edia guba King ida ia hatamonadia. Dirava ena taunimanima iboudiai be unai gau dekenai ‘do idia moale bona do idia moalelaia.’ Do idia moale danu edia Mesia King be Aramagedono dekenai ia tuari neganai, iena abidadama bese taudia ia hamauridia totona bona iena kara maoromaoro tanobada matamatana dekenai do idia vareai. (Apokalupo 19:1-7, 11-16) Iehova be iena taunimanima dekenai kwalimu ia henia unai moale helarona idia harorolaia neganai, a? Henunai ai torea ripoti ese do ia gwauraia.
Tanobada Ibounai Dekenai Gaukara Ia Bada Ia Lao
8. (a) Hari magasin ena rau 18 ia lao 21 ena ripoti dekenai, lauma helaga ia havaraia moalena be edena bamona ia hedinarai? (b) Unai ripoti ena sivarai badadia haida be dahaka?
8 Hari inai negai, Iehova ena Witness taudia be ‘Lauma Helaga ena siahu dainai helaro dekenai idia tubu daekau.’ (Roma 15:13) Hari magasin ena rau 18 ia lao 21 dekenai ia noho ripoti dekenai unai idia hahedinaraia. Unai rau dekenai, lagani 1990 ai, tanobada ibounai dekenai idia karaia Basileia gaukarana ena ripoti idia torea. Ita moale bada badina, haroro taudia iboudiai edia namba ia bada daekau ia lao 4,017,213! Unai be idia hanaia lagani 10 lalonai, 77 pesen amo ia bada, mamoe haboua gaukarana be tano 212 dekenai idia karaia noho neganai. Hanaia lagani 15 lalonai bapatiso taudia edia namba ia hanaia bona 301,518 idia bapatiso. Hebouhebou momo dekenai, Eastern Europe Witness taudia ese idia lao henidia hebouheboudia dekenai danu, unai ia vara momokani, bapatiso taudia edia namba ia bada momokani. Idia momo be matamata taudia, bona idia be socialist gavamani taudia edia hereva, tomadiho be taunimanima burukadia danu do ia mase, idia hakoikoia.
9. (a) Tama sina be natudia idia hadibaia idia do maragi momokani neganai, unai dainai dahaka moale gauna ia vara? (b) Edena sivarai haida, iniseniai bona ma gabu haida dekenai, ese unai ia hamomokania?
9 Matamata taudia hutuma be Salamo 32:11 ena boiboi idia kamonai henia: “Iehova umui moalelaia! Kara maoromaoro taudia e, umui moale! Umui laloa maoromaoro taudia e, umui moale bada!” Unai anina be tama sina momo be sisiba idia badinaia, edia maragidia be ‘maragi negana’ amo idia hadibaia. (2 Timoteo 3:15) Maragidia totona idia karaia bukadia bona kaset idia gaukaralaia namonamo. Unai matamata taudia be sikuli lalonai idia vareai neganai, idia be haroro gaukara namona idia karaia, lagani 8 Japan kekenina ta ena sivarai ese ia haheitalaia hegeregerena: “Sikuli ena laga-ani negana murinai, lauegu hadibaia tauna lau hereva henia bona lau nanadaia, lau gwau: ‘Laga-ani negana ai, oiemu tamana ena guria gabuna oi vadivadi henia, a?’ Ia haere, ia gwau: ‘Lauegu tamana be hebogahisi tauna, bona lagani ta ta iboudiai iena guri gabuna lau vadivadi henia.’ Lau hamaoroa: ‘Bema Bible oi stadilaia bona Dirava ena hadibaia hereva oi badinaia, tanobada paradaisona dekenai oiemu lalokau tamana do oi itaia lou diba.’ Bena Lau Egu Bible Sivarai Buka lau henia. Hari, aiemai tisa be wiki ta ta ibounai, dina tubua ena aniani neganai, karoa tamona be kalasi taudia ibounai dekenai ia duahia.”
10. Young People Ask bukana ese dahaka gau namodia ia havaraia, bona haheitalai haida be dahaka?
10 Matamata taudia momo be Questions Young People Ask—Answers That Work bukana idia gaukaralaia namonamo, idia sibona idia stadilaia neganai bona ma matamata taudia momo idia haroro henidia neganai danu. Tama sina taudia danu be unai buka idia moalelaia. Switzerland dekenai ia noho taihuna ta, heduru pioneer gaukara karaia totona ena ladana ia torea taihuna, ia lao iena natuna ena sikuli turadia edia tama sina ia vadivadi henidia. Unai ese dala ia kehoa tama sina momo danu kiki namodia idia karaia totona, bona buka 20 (idia momo be Young People Ask bukadia) bona magasin 27 idia dekenai ia rakatania. Sikuli kekeni ta, Trinidad dekenai, be sikuli dekenai ena tisa dekenai unai buka ia henia neganai, kekeni ena sinana be unai gaukara ia habadaia bona tisa taudia 36 dekenai buka 25 ia henidia. Unai hua murinai, ia diba tama sina taudia ia lao henidia, bona ma buka 92 ia hariharilaidia bona Bible stadi haida ia hamatamaia. Korea dekenai, haisikuli tisa ta ese Young People Ask bukana ia gaukaralaia bona “How Can I Improve My Grades?” bona “How Can I Get Along With My Teacher?” herevadia ia gaukaralaia sikuli taudia ia hereva henidia totona bena buka ia henidia toho. Sikuli taudia be buka 39 idia abia dae murinai, tama sina haida idia maumau. To tisa badana ese unai buka ia tahua bona ia gwauraia “namo herea,” bona sibona ena natuna kekeni durua totona tamona ia abia.
Diba Abia Dalana Hereana
11, 12. Taunimanima haida be dahaka idia gwau, bona unai ese ia hamomokania Watch Tower Society ese idia printaia buka be diba bada idia henia?
11 Taunimanima momo idia laloa iseda magasin be diba idia henia; haheitalai ta be U.S. sikuli ta ese July 22, 1990 Noga! magasin, English gado gauna, (crack muramura dikana ania kava karana ia hahedinaraia gauna) 1,200 abia totona oda idia siaia edia kalasi dekenai idia gaukaralaia totona. Ma danu, sikuli dekenai Iehova ena Witness natudia momo edia haheitalai namona dainai, taunimanima momo idia hoa mai moale danu. Thailand ena regerege momo kalasi ta dekenai, tisa ese lagani 11 merona, Racha, ia boiria kalasi vairanai ia gini bona ena kara namona dainai ia hanamoa, ia gwau: “Namona be umui ibounai be iena haheitalai namona umui tohotohoa, ani? Ia be ena stadi dekenai ia gaukara namonamo bona ia kara namo.” Bena ia gwau: “Lau laloa bema emui kara umui hanamoa toho, umui be Iehova Witness ta ai, Racha bamona, umui lao be namo.”—Hereva Lada-isidia 1:8; 23:22, 23 danu hahegeregerea.
12 Dominican Republic dekenai, taihu matamata ta ia torea, ia gwau: “Egu mauri laganidia be 4 neganai, tomadiho sikuli ta lau haorea gwauraia, unuseniai lau idia hadibaia duahiduahi bona toretore dekenai. Lauegu tisa, sisita ta, dekenai Mauri Hanaihanai Paradaiso Lalonai bukana lau henia, harihari gauna ta bamona, bona hereva ta lau torea: ‘Lau moale bada herea badina lau oi hadibaia lau duahiduahi bona lau toretore totona. Lau ura oi be lauegu tomadiho oi diba bona lauegu helaro, hari tanobadana be paradaiso ai do ia lao neganai mauri hanaihanai oi abia diba, oi danu oi abia dae.’ Unai kara dainai, sikuli amo lau idia lulua. Lagani 8 murinai unai tisa lau davaria lou. Ia gwau, herevana pris ese ia dagedage henia bada, to unai buka ia duahia. Hanua badana dekenai ia lao, bona unuseniai ia be Witness ta danu Bible ia stadilaia. Ia be ‘Gado Goevadaena’ Distrik Hebouhebouna dekenai lau danu ia bapatiso.” Peroveta hereva hegeregerena, aonega be “natudia karukarudia edia uduna amo” ia mai diba!—Mataio 21:16; Salamo 8:1, 2.
13. Matamata taudia momo be edena dala ai Solomon ena sisiba idia badinaia, bona unai be edena dala ai tanobada ibounai ena ripoti dekenai ia hedinarai?
13 Solomon ese hagoadaia sisiba ia henia: “Tauhau e, emu tauhau negana lalonai oi moale, emu tauhau dinadia ai oiemu kudouna ese oi do ia hamoalea be namo, bona oiemu kudouna ena dala dekenai bona oiemu matana ese idia itaia gaudia edia dala dekenai oi raka.” (Kohelete 11:9) Hari inai negai, ita moale bada badina ita itaia diba Iehova ena Witness taudia momo edia natudia be unai hereva idia badinaia, bona edia matamata negana idia gaukaralaia nega ibounai Iehova hesiai henia maurina totona idia hegaegae, bona maoromaoro sikuli idia haorea neganai, unai gaukara namo hereana lalonai idia vareai. Pioneer taudia edia namba ia bada ia lao haraga, bona lagani 1990 hesiai laganina lalonai 821,108 ese pioneer gaukara idia karaia. Betele dekenai, tadikaka bona taihu 11,092 danu idia gaukara, bona unai be 21 pesen pablisa iboudiai edia namba amo.
14. Iseda taihu be dahaka gaukara bada idia karaia, bona namona be dahaka hanamoa hereva ita henidia?
14 Tano momo dekenai, United States bamona, pioneer pablisa taudia iboudiai 100 100 amo 75 75 be taihu, bona unai ese Salamo 68:11 ena hereva ia hamomokania: “Iehova sibona ia hereva: sivarai namona idia gwauraia hahinedia be tuari oreana badana ta.” Iseda taihu ita hanamodia be namo badina idia be haroro gaukara ena kahana badana idia karaia. Taunimanima edia ruma dekenai Bible stadi idia karaia mai edia diba bada dainai, momo be hereva momokani dekenai idia mai, bona mai edia abidadama headava taihu be edia adavana idia durua kongregesen gaukaradia momo idia karaia totona be mai iseda ura bada danu ita hanamodia diba.—Hereva Lada-isidia 31:10-12; Efeso 5:21-25, 33.
Bible Hadibaia Gaukarana Ia Bada Ia Lao
15. (a) Tanobada ibounai ena haroro ripoti dekenai, tano haida be edena dala ai Bible stadi gaukara dekenai idia goada herea? (b) Dahaka sivarai haida oi gwauraia diba, bona unai ese ia hahedinaraia edena dala ai Bible stadi ese huahua idia havaraia diba?
15 Bible hadibaia gaukarana ia bada ia lao, bona tanobada ibounai hua ta ta ibounai lalonai stadi 3,624,091 idia karaia. Bible ena hereva momokani ese taunimanima edia kara ia haidaua diba, Australia amo ia mai ripoti ta ese ia hahedinaraia hegeregerena. January 1987 ena hamatamaia negana ai, Australia amo, tau ta be New Zealand dekenai idia lulua. Ia be Australia dekenai henaohenao bona cheque ia sainia koikoi dainai, hua 25 lalonai dibura dekenai ia noho. Ia be drag ia ania kava bona lagani 17 lalonai ia hoihoilaidia. Lagani tamona murinai, iena hahine be Iehova ena Witness taudia ida Bible ia stadilaia hamatamaia, bona iena diba ia bada ia lao noho lalonai, ia itaia iena kara ia idau momokani. Ia be headava hahine namona bona sinana namona ta ai ia lao. Ia ese iena tau ia hagoadaia momo dainai, ia be June 1989 lalonai, sekit hebouhebou ta ia lao henia. Ia be ruma dekenai Bible stadi ia abia, bona iena toana bona mauri dalana idia idau momokani. Iena ruma bese taudia iboudiai 7 be hebou dekenai idia lao. Ia be January 1990 ai ia bapatiso, Paulo ena sisiba namo hereana Efeso 4:17-24 dekenai ia badinaia dainai.
16. (a) Lagani 1990 ena Anibou ripoti be edena bamona moale idia havaraia? (b) Ita itaia dahaka gaukara ia haraga noho, bona dahaka ita karaia ita durua totona?
16 Lagani 1990 ripoti ena namo herea gauna be Tuesday, April 10, 1990 idia karaia Anibou totona idia mai taudia edia namba be 9,950,058. Tano 212 amo, tano 70 bona ma haida dekenai, Anibou idia mai taudia edia namba be nega toi amo edia pablisa edia namba ia hanaia! Haheitalai ta be, ena be edia dala ia auka sisina, to Africa tanodia 7 dekenai, Anibou dekenai idia mai taudia be 204,356 bona edia pablisa ibounai be 62,712. Dika ese ia hadikaia tanona Liberia dekenai, pablisa 1,914 idia moale badina Anibou dekenai idia mai taudia be 7,811. Haiti ena pablisa be 6,427 bona Anibou dekenai idia mai taudia be 36,551. Micronesia ena motumotu idauidau dekenai, pablisa 886 be Anibou idia mai taudia 3,958 idia itaia. Sri Lanka ena pablisa be 1,298 bona Anibou dekenai idia mai taudia be 4,521. Zambia ena pablisa be 73,729 bona Anibou dekenai idia mai taudia be 326,991—Zambia ena taunimanima 25 25 amo, unai be tamona tamona. Tanobada ibounai ena ripoti ia hahedinaraia lou taunimanima milion momo idia ura mamoe oreana lalonai idia vareai. To idia ura momokani sibona be do hegeregere lasi. Iseda Bible stadi gaukara karaia dalana ita hanamoa bona ita habadaia diba, Anibou dekenai idia mai taudia ese abidadama goadana idia abia totona, a? Ita ura idia be ita danu idia gaukara hebou bona Iehova idia hanamoa. Unai amo mauri do idia davaria!—Salamo 148:12, 13; Ioane 17:3; 1 Ioane 2:15-17.
Moale Momokani
17. Keristen ginigunadia edia haheitalai ese ita idia hagoadaia iseda moale ita dogoatao noho totona. Unai haheitalai be dahaka dahaka?
17 Herevana dahaka hahetoho ita davaria, namona be ita ura momokani iseda moale ita dogoatao noho. Reana ita be Stefano ese ia davaria hekwarahi do ita abia lasi, to iena haheitalai ese ita ia hagoadaia diba. Idia samania neganai, ia be iena moale toana ia hahedinaraia noho diba. Iena inai taudia “ena vairana idia itaia noho neganai iena vairana be aneru ta ena vairana hegeregerena.” Iena hekwakwanai lalonai, Dirava be ia danu ia noho. Ia haroro goadagoada bona “Lauma Helaga dekenai ia honu” ela bona iena abiadadama dainai ia mase. Paulo bona Banaba be idau bese dekenai idia haroro hamatamaia neganai, idia danu “idia moale bada, bona [Iehova] ena hereva idia hanamoa.” Dagedage ia matamaia lou. To abidadama taudia idia gari lasi. “Iesu diba tahua taudia ibounai be moale bada, bona Lauma Helaga dekenai idia honu.” (Kara 6:15; 7:55; 13:48-52) Herevana iseda inai taudia be dahaka idia karaia ita dekenai, herevana dina iboudiai iseda mauri hekwarahi be dahaka, namo lasi lauma helaga ese ita ia henia moalena ia boio. Paulo ena sisiba be: “Lohiabada dekenai do umui naria noho mai moale danu. Dika neganai do umui gini goada. Guriguri do umui goadalaia nega ibounai.”—Roma 12:12.
18. (a) Ierusalem Matamatana be dahaka, bona badina be dahaka Dirava ena taunimanima be ia danu idia moale be namo? (b) Edena dala ai “guba matamatana bona tanobada matamatana” ese taunimanima iboudiai do ia hanamodia?
18 Unai helaro be namo bada herea! Iena taunimanima ibounai dekenai, Iehova ia gwau: “Lau ese guba matamatana bona tanobada matamatana lau karaia; gau gunadia do idia laloatao lasi bona edia kudouna dekenai do idia vara lou lasi. To umui lalo-namo, umui moale hanaihanai lau karaia gaudia umui moalelaia.” Lohiabada Keriso bona ‘Ierusalem Matamatana’ (hari unai be Dirava ena guba oreana ena hanua badana, ‘atai Ierusalem’ unai) bona tanobada ena orea matamatana be taunimanima dekenai moale bada herea do idia mailaia. (Galatia 4:26) Mase taudia do idia toreisi lou, kamonai taudia iboudiai be goevadae taudia ai do idia lao, ela bona hanaihanai paradaiso tanobadana dekenai mauri mai anina bona mai siahuna do idia abia—unai be helaro namo hereana bona moale bada ena badina namona ta! Iehova danu be ‘Ierusalem ia moalelaia bona iena taunimanima ia moalelaia neganai,’ iena peroveta tauna ese Dirava ena taunimanima ia boiboi henia: “Ierusalem ida umui moale hebou, bona ia dainai umui moale, ia umui ura henia taudia ibounai. Ia danu umui moale hebou.” (Isaia 65:17-19; 66:10; Apokalupo 14:1; 20:12, 13; 21:2-4) Namona be hanaihanai ita moale bona lauma helaga amo ita honu, ita be aposetolo Paulo ena sisiba ita badinaia noho neganai: “Nega ibounai do umui moale, Lohiabada lalonai umui noho dainai. Ma lau gwau lou: do umui moale.”—Filipi 4:4.
Iseda Moale Ita Herevalaia Lou:
◻ Iesu ese dahaka haheitalai ia karaia mai moale danu ita haheauka totona?
◻ Idia gwauhamata orea rua edia moale ena badina be dahaka?
◻ Hari inai negai, matamata bona buruka taudia be edena dala ai hereva momokani idia moalelaia?
◻ Lagani 1990 ena ripoti ita laloa neganai, “Iehova e, ai dekenai kwalimu oi henia” gurigurina ena haere be dahaka?
◻ Edena negai bona edena dala ai moale momokani do ita abia?
[Chart on page 18-21]
1990 SERVICE YEAR REPORT OF JEHOVAH’S WITNESSES WORLDWIDE
(For fully formatted text, see publication)
[Picture on page 16]
Iehova ena aneru ese Lohiabada Keriso ena vara ia gwauraia hedinarai ia be “hereva namona, . . . taunimanima ibounai idia moale totona”