Hereva Momokani Dekenai Ia Gini Abidadama Karana Oi Hahedinaraia
“Tau ta bema Dirava ia abidadama henia lasi neganai ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava ia mauri noho do ia abidadama henia guna. Bona unai tau ena abidadama be inai bamona, Dirava idia tahua taudia ibounai be davana namona Dirava ese do ia henidia.”—HEBERU 11:6.
1, 2. Adam ena abidadama dekenai dahaka hahetoho ia vara, bona dahaka ia vara?
ABIDADAMA ita hahedinaraia neganai Dirava ia mauri sibona do ita laloa lasi. Tau ginigunana, Adam, ia daradara lasi, ia diba Iehova Dirava ia noho. Dirava be Adam danu ia herevahereva, bona ita laloa unai be Iena Natuna, Hereva, dekena amo ia karaia. (Ioane 1:1-3; Kolose 1:15-17) To, Adam ese mauri hanaihanai ena helaro ia haboioa badina ia be Iehova ena hereva ia badinaia lasi bona ia abidadama henia lasi.
2 Adam ena hahine, Eva, ese Iehova ia badinaia lasi neganai, unai ese Adam ena gabeai moalena ia hadikaia gwauraia. Ia laloa ena hahine do ia haboioa diba neganai, unai ese tau ginigunana ena abidadama ia tohoa! Dirava be unai hekwakwanai hanaia dalana ia henia diba Adam be moale bona namo dekenai do ia noho totona, a? Eva danu ia kerere neganai, Adam ia hahedinaraia ia laloa unai bamona ia vara diba lasi. Ia be unai hekwakwanai ia hanaia toho sibona ena dala dekenai, bona ia be Dirava ena hakaua dalana ia tahua lasi. Ia be Iehova dekenai abidadama ia hahedinaraia lasi dainai, Adam be sibona dekenai bona ena natuna iboudiai dekenai mase ia mailaia.—Roma 5:12.
Abidadama Karana be Dahaka?
3 Dikseneri ta ia gwau abidadama karana be “idia hamomokania diba lasi gauna ta oi abia dae momokani.” To Bible be unai hereva ia abia dae lasi, bona ia be lalohadai idauna ta ia gwauraia. Abidadama karana be hereva momokani, idia vara momokani gaudia, latanai ia gini. Bible ia gwau: “Abidadama ena anina be inai bamona: ita daradara lasi, to ita diba Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani inai gauna do ita abia.” (Heberu 11:1) Abidadama tauna ia diba momokani Dirava ese ia gwauhamatalaia gaudia iboudiai be do idia vara momokani. Idia diba momokani ita itaia diba lasi gaudia do idia vara dainai, abidadama taudia dekenai idia be hegeregere idia vara vadaeni gaudia bamona.
4. Buka ta be edena dala ai Bible ese abidadama ena anina ia gwauraia dalana ida ia hegeregere?
4 New World Translation Bible lalonai, Heberu gado verb (kara gwauraia herevana) ʼa·manʹ be nega haida idia torea “abidadama”. Theological Wordbook of the Old Testament ia gwau: “Unai hereva ena anina be unai gau do ia vara momokani . . . hari inai nega abidadama dekenai ena lalohadai haida bamona lasi, hegeregere idia laloa reana do ia vara diba, bona idia ura do ia vara, to idia diba momokani lasi do ia vara eiava lasi.” Unai buka be ma ia gwau: “Unai hereva amo idia be ma hereva ta, ʼāmēn, eiava ‘momokani’, idia abia bona unai be Taravatu Matamatana dekenai idia atoa danu; English gado dekenai unai hereva be ‘amen.’ Nega momo Iesu be unai hereva ia gwauraia (Mat. 5:18, 26 ena hereva bamona) badina ia ura ia hamomokania gau ta momokani do ia vara.” Keristen Greek Revarevadia dekenai, unai hereva “abidadama” ena anina ma ta be unai hereva be do ia vara momokani gauna ta eiava hereva momokani dekenai ia gini.
5. Edena dala ai idau negai bisinesi toretoredia dekenai, unai Greek herevana, “diba momokani,” idia torea, bona ena anina be dahaka Keristen taudia dekenai?
5 Heberu 11:1 dekenai Greek herevana, “ita diba,” (hy·poʹsta·sis) idia gwauraia momo gunaguna papyrus bisinesi toretoredia dekenai, badina idia ura idia hahedinaraia gabeai unai gau do idia abia momokani. Diba tahua taudia Moulton bona Milligan idia gwau namona be unai siri be inai bamona idia torea: “Abidadama be gwaumaoro pepana oi naria gauna do oi abia totona.” (Vocabulary of the Greek Testament) Momokani, bema tau ta be tano ta ena gwaumaoro pepana ia dogoatao, ia “diba momokani” dina ta ia naria gauna do ia abia.
6. Heberu 11:1 dekenai ia noho Greek herevana, “lalona ia diba momokani,” ena anina be dahaka?
6 Heberu 11:1 dekenai, Greek herevana “lalona ia diba momokani,” (eʹleg·khos), ena anina be gau ta do ia vara ena hamomokania hereva ia hahedinaraia totona; ena be toana be unai gauna do ia vara lasi bamona, to hamomokania hereva idia hahedinaraia. Hamomokania hereva be guna idia itaia lasi gaudia ia hahedinaraia, bona unai ese ia vara diba lasi bamona toana ia hakoikoia bamona. Unai dainai, Heberu bona Greek Revarevadia lalonai, abidadama karana be “hamomokania diba lasi gauna abia dae karana” lasi. To lasi, unai abidadama karana be hereva momokani dekenai ia gini.
Hereva Momokani Dekenai Ia Gini
7 Aposetolo Paulo be hereva momokani ta ia gwauraia ia be Havaraia Tauna ia gwauraia neganai, ia gwau: “Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina be edia matana dekenai Dirava ese ia karaia gaudia ibounai idia itaia vadaeni. Inai gaudia idia itaia dainai idia be Dirava ena hunia gaudia idia kamonai diba danu. Unai dainai [hereva momokani idia inai henia taudia] be dala lasi edia kerere idia hunia, bona ‘Lau diba lasi’ herevana idia gwauraia diba lasi.” (Roma 1:20) Oibe, “guba ese Dirava ena hairai ia gwauraia hedinarai,” bona “[ia] karaia gaudia ese tanobada idia hahonua.” (Salamo 19:1; 104:24) To tau ta bema ia ura lasi hamomokania herevana ia laloa be edena bamona? Salamo torea tauna, David, ia gwau: “Kara dika tauna be iena hekokoroku dainai hereva ia tahua lasi; iena lalohadai iboudiai be inai: ‘Dirava be lasi.’ ” (Salamo 10:4; 14:1) Abidadama ena kahana ta ena badina be ta ia diba Dirava ia noho be hereva momokani.
8. Abidadama idia hahedinaraia taudia ese dahaka dekenai idia tabekau diba, bona dahaka dekenai idia lalo-parara diba?
8 To Iehova ia noho sibona lasi to iena hereva ita abidadama henia diba danu, bona iena hereva dekenai ita tabekau diba. Ia gwau: “Lauegu lalona dekenai lau gwauraia hegeregerena do ia vara; bona lau hereva hegeregerena unai bamona do ia vara momokani.” (Isaia 14:24; 46:9, 10) Unai be hereva kava lasi. Hamomokania hereva idia noho Dirava ena Hereva lalonai idia torea peroveta herevadia handred momo idia guguru vadaeni. Unai idia diba dainai, abidadama taudia be ma Bible peroveta herevadia momo idia guguru noho idia lalo-pararalaia diba. (Efeso 1:18) Haheitalai ta be inai: Iesu ena noho “toana” ia guguru noho, bona ia gini vadaeni Basileiana harorolaia bada gaukarana, bona tomadiho momokani do ia bada ia lao karana idia itaia, peroveta herevadia idia gwauraia hegeregerena. (Mataio 24:3-14; Isaia 2:2-4; 60:8, 22) Idia diba nega kahirakahira tanobada besedia be ‘Maino bona noho namo!’ herevana do idia boiboilaia bona unai nega sisina murinai, Dirava be “tanobada idia hadikaia vadaeni taudia do [ia] alaia ore.” (1 Tesalonika 5:3; Apokalupo 11:18) Peroveta hereva momokani dekenai ia gini abidadama karana ita hahedinaraia dainai ita be hahenamo momo ita abia!
Lauma Helaga Ena Huahua Ta
9 Bible lalonai ita be hereva momokani dekenai ia gini abidadama karana ena hereva ita davaria diba, unai be Dirava ena lauma helaga ese ia havaraia gauna. (2 Samuel 23:2; Sekaria 7:12; Mareko 12:36) Unai dainai, bema lauma helaga be lasi neganai abidadama ia noho diba lasi. Unai badina dainai Paulo ia torea diba: “Lauma Helaga ese inai bamona karadia ia havaraia: . . . abidadama momokani kara.” (Galatia 5:22) To taunimanima momo be Dirava ena hereva momokani idia dadaraia, edia mauri be tauanina ena hegahusi bona Dirava ena lauma ia hahisia lalohadai momo amo idia hamiroa. Unai dainai, “haida sibona mo Dirava ena hereva idia abia dae,” badina idia dekenai abidadama ia vara diba lasi.—2 Tesalonika 3:2; Galatia 5:16-21; Efeso 4:30.
10. Iehova ena hesiai taudia gunadia haida be edena dala ai edia abidadama karana idia hahedinaraia?
10 To Adam ena natudia haida ese abidadama karana idia hahedinaraia. Heberu karoa 11 ese unai taudia ia gwauraidia: Abel, Enoka, Noa, Abraham, Sara, Isako, Iakobo, Iosef, Mose, Rahaba, Gideon, Barak, Samson, Iepeta, David bona Samuel, bona Iehova ena hesiai taudia momo edia ladana idia torea lasi, to idia be “Dirava idia abidadama henia, bona ladana namo herea idia abia.” “Abidadama” dainai idia karaia karadia oi laloa. Abidadama dainai Abel be “boubou gauna Dirava dekenai ia henia” bona Noa ese “lagatoi badana ia karaia.” Abidadama dainai Abraham be “Dirava ena hereva ia kamonai henia. Iena hanua ia rakatania, Dirava ese ia ura do ia henia tanona dekenai do ia lao totona.” Abidadama dainai, Mose be “Aigupito ia rakatania.”—Heberu 11:4, 7, 8, 27, 29, 39.
11. Kara 5:32 dekenai Dirava idia badinaia lasi taudia be edena bamona ia gwauraidia?
11 Momokani, Iehova ena hesiai taudia iboudiai idia laloa lasi Dirava ia noho sibona. Abidadama karana idia hahedinaraia dainai, ia dekenai idia tabekau badina idia diba Ia be “Dirava idia tahua taudia ibounai be davana namona Dirava ese do ia henidia.” (Heberu 11:6) Dirava ena lauma ese ia hakaudia hegeregerena idia karaia, ena be edia diba be bada lasi to unai neganai idia diba hereva momokanina hegeregerena idia karaia. Idia be Adam ena kara amo idia idau! Ia be hereva momokani dekenai ia gini abidadama karana ia hahedinaraia lasi eiava lauma helaga ia hakaua hegeregerena ia karaia lasi. Dirava ese ena lauma helaga ia idia badinaia taudia sibona ia henidia.—Kara 5:32.
12. (a) Abel be dahaka dekenai ia abidadama, bona edena bamona ia hahedinaraia? (b) Abidadama idia hahedinaraia to Keristen edia nega ia do mai lasi neganai idia noho Iehova ena Witness taudia be dahaka idia abia lasi?
12 Iena tamana, Adam, bamona lasi, to Dirava ia laloa tauna, Abel, ese abidadama karana ia hahedinaraia. Reana ia be ena tamana bona sinana amo peroveta hereva ginigunana ena hereva ia diba: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW) Unai dainai, Dirava ia gwauhamata kara dika do ia haorea bona kara maoromaoro do ia havaraia lou. Abel ia diba lasi unai gwauhamata be edena bamona do ia guguru. To iena abidadama ia goada dainai ia diba Dirava ese Ia idia tahua taudia dekenai davana do ia henidia dainai, ia ese boubou gauna ia henia. Reana unai peroveta herevana ia laloa bada bona ia laloa unai gwauhamata do ia guguru bona taunimanima be do idia goevadae lou totona ena rara ia bubua be maoro. Unai dainai Abel ese animal ia bouboulaia be maoro. Ena be abidadama karana idia hahedinaraia, to Abel bona Keristen taudia edia nega ia do mai lasi neganai idia noho Iehova ena Witness taudia be unai neganai ‘gwauhamata gaudia idia abia lasi.’—Heberu 11:39.
Abidadama Idia Habadaia
13 Lagani handred idia lao noho lalonai, Dirava ese ma hereva momokani haida amo ia hahedinaraia edena dala ai ‘hahine ena garana’ ena gwauhamata herevana do ia guguru. Abraham ia hamaoroa: ‘Oiemu garana dainai tanobada besedia be sibodia do idia hanamoa.’ (Genese 22:18) Gabeai, King David ia hamaoroa iena pavapava iduhuna dekenai gwauhamata Garana do ia hedinarai. Lagani 29 C.E. lalonai, unai Garana, Iesu Keriso, ia hedinarai. (Salamo 89:3, 4; Mataio 1:1; 3:16, 17) Abidadama lasi tauna, Adam, bamona ia karaia lasi, to Iesu Keriso, “Adam dokona,” be abidadama ia hahedinaraia namo herea. (1 Korinto 15:45) Iena mauri lalonai Iehova ia hesiai henia namonamo bona Mesia dekenai idia perovetalaia hereva momo ia hagugurudia. Unai dainai gwauhamata Garana ena hereva momokani momo edia anina ia hahedinaraia goevagoeva bona Mose ena Taravatu ese ia laulaulaia gaudia momo ia hamomokanidia. (Kolose 2:16, 17) Unai dainai idia gwau diba ‘Iesu Keriso dekena amo hereva momokani ia mailaia.’—Ioane 1:17.
14. Paulo be edena dala ai Galatia taudia ia hadibaia abidadama ena toana ma haida idia hedinarai?
14 Iesu Keriso dekena amo hereva momokani ia mailaia dainai, “gwauhamata” abidadama henia karana ena badina idia habadaia. Abidadama karana idia hagoadaia bona ena toana ma haida idia hedinarai. Unai dekenai Paulo ese ia bamona idia horoa Keristen taudia ia hamaorodia: “Buka Helaga ia gwau taunimanima ibounai be kara dika ese ia guidia. Unai bamona ia torea badina ita taunimanima bema Iesu Keriso ita abidadama henia neganai Dirava ena gwauhamata harihari gauna abidadama dainai do ita abia. Iesu abidadama henia ena nega do ginidae lasi neganai Taravatu ese ita ia guia. Oibe, ita ia guia noho ia mai bona abidadama ena nega ia hedinarai. Unai dainai Taravatu be iseda naria tauna bamona, ia mai bona Keriso ia ginidae. To Keriso ia ginidae neganai abidadama dekena amo Dirava vairanai do ita maoromaoro diba. Harihari be abidadama ena nega ia ginidae vadaeni, Taravatu ese ita do ia naria lou lasi. Umui ibounai be Dirava ena natuna, Keriso Iesu umui abidadama henia dainai.”—Galatia 3:22-26.
15. Edena dala ai sibona abidadama karana idia hagugurua diba?
15 Israel taudia be Taravatu gwauhatamana amo Dirava ena kara idia dekenai idia abidadama henia. To unai abidadama karana idia habadaia be namo. Edena dala ai? Lauma ese ia horoa tauna, Iesu, idia abidadama henia karana amo, Taravatu be ia dekenai ia hakaudia unai. Unai dala dekenai sibona, Keristen taudia edia nega ia do mai lasi neganai, abidadama karana idia hagugurua diba. Gunaguna Keristen taudia be ‘Iesu, edia abidadama Ia Havaraia Tauna bona Ia Hagugurua Tauna, idia raraia noho’ be gau badana! (Heberu 12:2) Momokani, Keristen taudia iboudiai ese unai idia karaia be namo.
16. Edena dala ai lauma helaga be idia dekenai ia bada ia lao, bona badina be dahaka?
16 Dirava ena hereva momokani dekenai edia diba ia bada ia lao dainai bona unai ese abidadama kara namona ia hagugurua dainai, lauma helaga be idia dekenai do ia bada ia lao, a? Oibe. Pentekoste, 33 C.E. ai, Dirava ena lauma, Iesu ese ia gwauhamatalaia heduru gauna unai, be iena hahediba taudia dekenai ia bubua. (Ioane 14:26; Kara 2:1-4) Idia be Keriso ena horoa tadikaka dainai, lauma helaga be dala matamatana dekenai idia abia unai. Edia abidadama, lauma helaga ena huahua ta unai, ia goada ia lao. Unai ese ia hegaegaelaidia hahediba taudia karaia gaukara badana do idia karaia totona.—Mataio 28:19, 20.
17. (a) Hereva momokani be edena dala ai ia mai bona lagani 1914 amo edena dala ai abidadama idia hagugurua? (b) Dahaka ese ia hamomokania lauma helaga be lagani 1919 negana amo ia gaukara noho?
17 Abidadama ia mai, lagani 1,900 gunanai bamona, Iesu be King dagina ia abia gwauraia neganai. To hari ia be guba ena King ai ia lohia, iseda abidadama ena badina—ia hedinarai hereva momokanina—ia bada momokani bona unai ese iseda abidadama ia hagugurua. Unai hegeregerena, lauma helaga ena gaukara dalana ia goada ia lao. Lagani 1919 lalonai unai ia hedinarai momokani, lauma helaga be Dirava ena gwauhamata hesiai taudia ia hagoadaia lou bena edia gaukara lasi karana idia rakatania bona gaukara idia karaia lou. (Esekiel 37:1-14; Apokalupo 11:7-12) Lauma paradaisona ena badina ia vara, bona unai nega murinai unai lauma paradaiso ia hedinarai goevagoeva bona ena hairai be lagani lagani ai ia bada ia lao noho. Unai ese ia hamomokania Dirava ena lauma helaga ia gaukara momokani, ani?
Badina be Dahaka Iseda Abidadama Ita Tahua?
18 Israel taudia be Aigupito ena hesiai gaukara dikana amo idia siri bona hahemauri idia abia nega sisina murinai, tatau 12 idia siaia Kanana tanona idia itaia hehuni totona. To, idia 10 be abidadama lasi taudia, idia laloa Iehova ia hegeregere lasi Israel taudia dekenai tano do ia henia, bona iena gwauhamata ia hagugurua totona. Idia be edia matana ese idia itaia gaudia bona tauanina gaudia dekenai idia raka. Unai tatau 12 amo, Iosua bona Kaleb sibona idia hahedinaraia idia be matana dekenai lasi, to abidadama dekenai idia raka. (2 Korinto 5:7 itaia danu.) Abidadama karana idia hahedinaraia dainai, idia ruaosi sibona be unai taunimanima iboudiai amo idia roho mauri bona Gwauhamata Tanona dekenai idia vareai.—Numera 13:1-33; 14:35-38.
19. Edena dala ai hari inai nega ai iseda abidadama ena badina ia goada momokani, bona dahaka ita karaia be namo?
19 Hari inai negai, ita be Dirava ena kara maoromaoro tanobada matamatana dekenai ita vareai gwauraia. Bema ita ura ita vareai, abidadama karana be gau badana. Ita moale badina hereva momokani dekenai ia gini abidadama karana ia bada momokani. Ita dekenai Dirava ena Hereva ibounai ia noho, Iesu Keriso bona ia murinai idia raka horoa taudia edia haheitalai namona ita itaia, lauma dalana ai iseda tadikaka bona taihu milion momo edia heduru ita abia, bona Dirava ena lauma helaga ena siahu ita abia, guna taunimanima idia abia bamona lasi to hari ita abia bada. To namona be iseda abidadama ena goada ita tahua bona dala ita tahua ita hagoadaia noho totona.
20. Ita be dahaka henanadai ita sibona dekenai ita henia be namo?
20 Reana oi gwau: “Lau diba hereva momokani be inai.” To oiemu abidadama ena goada be edena bamona? Oi sibona oi nanadaia: ‘Lau diba Iehova ena guba Basileiana ia noho momokani, tanobada ena gavamani ta ia noho hegeregerena, a? Lau be Iehova ena tanobada oreana bona ena Hakaua Oreana lau diba bona lau durua, a? Abidadama ena matana amo, lau itaia tanobada besedia be Aramagedono totona idia hebou, a? Lauegu abidadama karana be Heberu karoa 11 ese ia gwauraidia “ita idia itaia noho taudia hutuma bada” edia abidadama bamona lau karaia, a?—Heberu 12:1; Apokalupo 16:14-16.
21. Abidadama ese idia abia taudia edena bamona ia doridia, bona edena dala ai hahenamo idia abia? (Namona be “Abidadama Taudia . . . ” rau 13 dekenai, ena hereva haida oi gwauraia.)
21 Hereva momokani dekenai ia gini abidadama karana idia hahedinaraia taudia be kara ta idia karaia. Dirava be Abel ese ia henia boubouna ia abia dae hegeregerena, Dirava be idia karaia boubou karadia ia moalelaidia. (Heberu 13:15, 16) Noa, Dirava ena hereva ia badinaia kara maoromaoro ia harorolaia tauna bamona, idia be kara maoromaoro dalana idia badinaia bona Basileia idia harorolaia. (Heberu 11:7; 2 Petero 2:5) Abraham bamona, hereva momokani dekenai ia gini abidadama karana idia hahedinaraia taudia be Iehova ena hereva idia badinaia noho, herevana idia hekwarahi eiava gau haida idia vara bona hisihisi idia davaria. (Heberu 11:17-19) Iehova ena abidadama hesiai taudia idau negai bamona, hari inai nega abidadama taudia be hahenamo momo idia abia bona edia lalokau guba Tamana ese ia naridia.—Mataio 6:25-34; 1 Timoteo 6:6-10.
22. Abidadama karana be edena dala ai ita hagoadaia diba?
22 Bema oi be Iehova ena hesiai tauna ta to oi davaria oiemu abidadama be dala ta dekenai ia manoka, dahaka oi karaia diba? Oiemu abidadama oi hagoadaia dalana be Dirava ena Hereva oi stadilaia namonamo bona oiemu kudou be hereva momokani ena ranu amo ia honu dainai, oiemu uduna ese unai hereva momokanina ia gwauraia. (Hereva Lada-isidia 18:4) Bema oiemu abidadama karana be hanaihanai oi hagoadaia lasi, ia manoka diba, ia gaukara lasi, bona reana ia mase diba. (1 Timoteo 1:19; Iakobo 2:20, 26) Namona be oiemu lalona oi hadaia oiemu abidadama karana be unai bamona do ia manoka lasi. Iehova ena heduru oi noia, oi guriguri: “Lauegu abidadama maragimaragi mani oi durua.”—Mareko 9:24.
Oiemu Haere be Dahaka?
◻ Abidadama karana be dahaka?
◻ Badina be dahaka bema hereva momokani bona lauma helaga be lasi abidadama ia noho diba lasi?
◻ Iesu Keriso be edena dala ai iseda abidadama Ia Hagugurua Tauna ai ia lao?
◻ Badina be dahaka iseda abidadama ena goada ita tahua be namo?
3. Bible be abidadama karana ena anina ia gwauraia dalana bona dikseneri ta be abidadama ena anina ia gwauraia dalana be edena bamona idia idau?
7. Paulo bona David ese idia gwau Dirava ia noho lasi taudia edena bamona idia gwauraidia?
9. Abidadama bona lauma helaga idia gaukara hebou dalana be dahaka?
13. (a) Abraham bona David be unai gwauhamata ena guguru karana dekenai dahaka diba idia abia? (b) Badina be dahaka ita gwau diba ‘Iesu Keriso ese hereva momokani ia mailaia’?
18. Tano idia itaia hehuni Israel taudia edia abidadama be edena dala ai idia idauidau?
[Box on page 13]
ABIDADAMA TAUDIA . . .
◻ Iehova idia herevalaia.—2 Korinto 4:13.
◻ Iesu ena kara bamona idia karaia.—Ioane 14:12.
◻ Ma haida idia hagoadaia.—Roma 1:8, 11, 12.
◻ Tanobada dekenai idia kwalimu.—1 Ioane 5:5.
◻ Idia gari ena badina be lasi.—Isaia 28:16.
◻ Mauri hanaihanai do idia abia diba.—Ioane 3:16.