Iehova Ena Noho Hanaihanai Imana Dekenai Oi Tabekau
“Ia noho hanaihanai Diravana be emu noho gabuna, bona henuna ai iena noho hanaihanai imana idia noho.”—DEUTERONOMI 33:27, American Standard Version amo ai hahanaia.
IEHOVA ese iena orea taudia ia lalokau henidia. Hegeregere, Israel taudia edia hisihisi ibounai lalonai, “ia danu ia hisihisi”! Mai ena lalokau bona hebogahisi danu, ia ese “idia ia abia isi bona ia huaia.” (Isaia 63:7-9) Unai dainai bema ita be Dirava dekenai ita kamonai, ita diba ita do ia durua.
1, 2. Dahaka dainai Iehova ena orea taudia idia diba ia ese do ia durudia?
2 Peroveta tauna Mose ia gwau: “Idau negai Diravana be hehuni gabuna ta bamona, bona henunai iena noho hanaihanai imana idia noho.” (Deuteronomi 33:27) Ma Bible ta lalonai, unai siri be inai bamona idia hahanaia: “Ia noho hanaihanai Diravana be emu noho gabuna, bona henuna ai iena noho hanaihanai imana idia noho.” (American Standard Version) To Dirava ena imana be edena bamona iena hesiai taudia idia durua?
Dahaka Dainai Hekwakwanai be Momo?
3. Kamonai taudia be edena negai “Dirava ena natuna edia hairai” bona edia “kwalimu momokani” do idia abia?
3 Ena be Iehova ita hesiai henia, to unai ese hekwakwanai be ita amo ia koua lasi, badina taunimanima iboudiai hegeregerena ita goevadae lasi dainai. Dirava ena hesiai tauna Iobu ia gwau: “Hahine ena bogana amo ia vara tauna ena mauri dinadia be momo lasi bona hekwarahi amo idia honu.” (Iobu 14:1) Salamo torea tauna ia gwau: “Aiemai mauri lagani be 70; bema ai goada neganai idia be 80, to idia be hekwarahi amo bona lalohisihisi amo idia honu.” (Salamo 90:10) Unai bamona do ita mauri ela bona ‘Dirava ese ia karaia gaudia ibounai be do ia ruhaia dika ena bodaga dekena amo, vadaeni Dirava ena natuna edia hairai’ bona ‘ena kwalimu momokani’ do idia abia neganai. (Roma 8:19-22) Unai do ia vara Keriso ena Lagani 1,000 Lohia Negana lalonai. Iesu ena boubou gauna dainai, Basileia ena siahu henunai idia noho tanobada taudia be kara dika bona mase amo do idia roho mauri. Lagani 1,000 Negana ia do ore lasi neganai, Keriso bona ia danu idia lohia hebou king bona hahelaga taudia ese kamonai taudia do idia durudia idia goevadae idia lao totona, bona Satana bona iena demoni ese idia havaraia hetoho dokona lalonai Dirava idia badinaia taudia edia ladana be “mauri bukana” lalonai do idia torea, edia ladana do idia noho ela bona hanaihanai totona. (Apokalupo 20:12-15) Unai negai Dirava ena natuna edia hairai bona mauri namona ena kwalimu momokani do idia abia.
4. Namona be iseda mauri dalana ita maumauraia lasi, to dahaka ita karaia be namo?
4 Hari, unai nega ia do mai lasi neganai, namona be iseda mauri dalana ita maumauraia lasi, to namona be Iehova ita tabekau henia. (1 Samuel 12:22; Iuda 16) Namona be iseda Hahelaga Tauna Badana, Iesu, dainai Dirava ita tanikiu henia. Iesu ena amo Dirava kahirakahira dekenai ita mai diba, “ia ese hariharibada bona durua ita do ia henia, iseda metau hegeregerena.” (Heberu 4:14-16) Namo lasi Adam ena kara ita tohotohoa. Iehova ia samania koikoi, ia gwau Iehova ese hahine dikana ia henia. Ia gwau: “Oi ese oi karaia lau dekenai hahine be unai au huahua ia henigu, bona lau ania.” (Genese 3:12) Dirava ese gau namodia ita ia henia bona hekwakwanai be ita dekenai ia henia lasi. (Mataio 5:45; Iakobo 1:17) Nega momo iseda hekwakwanai edia badina be ita ese aonega ita hahedinaraia lasi dainai eiava ma taunimanima ta ese kara kerere ia karaia dainai. Danu, hekwakwanai ita davaria badina ita be mai eda kara dika bona inai tanobada ita noholaia, bona tanobada be Satana ena siahu henunai ia noho dainai. (Hereva Lada-isidia 19:3; 1 Ioane 5:19) To, nega ibounai, Iehova ena noho hanaihanai imana ese iena abidadama hesiai taudia idia durua; Iehova dekenai idia guriguri bona idia tabekau bona edia mauri lalonai Iena Hereva ena sisiba idia badinaia.—Salamo 37:5; 119:105.
Idia Gorere Neganai Ia Hagoadaia
5. Reana Salamo 41:1-3 ena hereva ese gorere taudia edia lalona edena bamona do ia hagoadaia?
5 Ita kahirakahira iboudiai be nega haida ita gorere, bona unai dainai ita lalohisihisi. To David ia gwau: “Ogogami tauna dekenai ia hebogahisi tauna do ia moale; hekwakwanai dinana lalonai Iehova ese do ia hamauria. Iehova ese ia do ia gimaia bona do ia hamauria. Taunimanima do idia gwau tanobada dekenai unai tau ia moale; bona unai tau ena inai taudia dekenai do oi henia hanai diba lasi. Gorere dainai ena geda dekenai ia hekure neganai, Iehova ese do ia hagoadaia; iena gorere amo do ia abia isi.”—Salamo 41:1-3.
6, 7. Dirava be edena bamona David ia durua ia gorere bona ena geda latanai ia hekure neganai, bona hari inai negai unai ese Iehova ena hesiai taudia edia lalona edena bamona ia hagoadaia diba?
6 Hebogahisi tauna ese ogogami taudia ia durudia. “Hekwakwanai dinana” ena anina be, hekwakwanai negana ta o hekwakwanai nega daudauna ta, taunimanima ta ia hamanokaia negana unai. Hebogahisi tauna ia abidadama, ia gorere negana lalonai Dirava ese ia do ia gimaia. Iehova ena hebogahisi karadia unai tau dekenai be ma taunimanima haida ese idia sivarailaia neganai, idia gwauraia hedinarai unai tau ‘ia moale tanobada dekenai.’ David ia “gorere dainai ena geda dekenai ia hekure neganai,” Dirava ese ia hagoadaia. Reana, David ena natuna Absalom ese Israel besena ena terona ia abia gwauraia neganai, David ia lalo-metau bada negana unai, Dirava ese David ia hagoadaia.—2 Samuel 15:1-6.
7 David ese ogogami taudia ia hebogahisi henia, unai dainai ia laloa, ia gorere bona geda dekenai ia hekure negana lalonai, Dirava ese ia do ia hagoadaia. (Salamo 18:24-26) Ena be ia gorere dikadika, to ia diba namonamo Dirava ese ‘iena gorere amo do ia abia isi.’ Ita gwau diba lasi unai hereva ena anina be Dirava ese David ena gorere be hoa dalanai ia kokia; to anina be David ena lalona be lalohadai namodia amo do ia hagoadaia. Unai be hegeregere David ia gorere neganai Iehova ese David be ena gedana amo do ia abia isi bona do ia hagoadaia lou bamona. Unai hegeregerena, bema ita be Dirava ena hesiai taudia bona gorere dainai hisihisi ita davaria, vadaeni, Iehova ena noho hanaihanai imana ese ita do idia hagoadaia.
Lalo-Metau Taudia Edia Lalona Ia Hagoadaia
8. Ia gorere Keristen tauna ta be edena bamona ia hahedinaraia Dirava dekenai ia tabekau?
8 Taunimanima ta ia gorere neganai, ia lalo-metau diba. Keristen tauna ta ia gorere dikadika; nega haida iena tauanina ia manoka momokani dainai ia duahiduahi diba lasi. Ia gwau: “Unai dainai lalo-metau idauidau lau davaria, bona lau laloa lau hegeregere lasi gau ta lau karaia totona, bona lau taitai danu.” Unai tadikaka ia diba Satana ia ura iena lalo-metau do ia gaukaralaia ia do ia hadikaia totona, unai dainai Satana ia tuari henia, bona ia diba bema Iehova ena heduru ia abia, do ia lusi diba lasi. (Iakobo 4:7) Ma taunimanima haida idia diba unai tau ese Dirava ia abidadama henia bona ena kara ese edia lalona ia hagoadaia. (Salamo 29:11) Danu, ia be hospital dekenai ia noho neganai, gorere taudia bona ma taunimanima haida be telefon amo ia rini henia unai taudia be lauma dalanai do ia hagoadaia totona. Society ena miusik kaset bona Watchtower bona Awake! magasin edia kaset ia kamonaia neganai bona Keristen tadikaka bona taihu danu ia hebamo neganai, unai ese iena lalona ia hagoadaia. Unai tadikaka ia gwau: “Nega ibounai Iehova lau guriguri henia, bona lau noia ia ese goada bona hahekau lau dekenai do ia henia bona lau do ia durua do lau haheauka diba totona.” Bema oi be Keristen tauna ta bona gorere dikadia oi davaria, namona be nega ibounai Iehova oi abidadama henia bona iena noho hanaihanai imana dekenai oi tabekau.
9. Dahaka sivarai idia hahedinaraia, nega haida Dirava idia tomadiho henia taudia idia lalo-metau?
9 Idau negai, taunimanima idia lalo-metau. Iobu ese hetoho ia davaria negana lalonai, ia gwau ia laloa Dirava ese ia rakatania. (Iobu 29:2-5) Nehemia ia lalo-metau badina Ierusalem hanuana bona hanua ena magu idia dika dainai, bona Petro ia lalo-metau bada bona ia taitai bada herea badina ia gwau Keriso ia diba lasi dainai. (Nehemia 2:1-8; Luka 22:62) Epafrodito ia lalo-metau badina Filipi Keristen taudia idia kamonai ia gorere. (Filipi 2:25, 26) Tesalonika lalonai Keristen taudia haida idia lalo-metau, unai dainai Paulo ese Tesalonika tadikaka ia hamaorodia, ia gwau: “Lalo-metau taudia oi gado namo henidia bona idia oi hagoadaia.” (1 Tesalonika 5:14, NW) Unai dainai Dirava ese unai bamona taudia edena bamona ia durudia?
10. Reana dahaka ese ita ia durua lalo-metau ita hanaia toho neganai?
10 Bema tau ta ia lalo-metau bada, namona be ia sibona ia abia hidi doketa taudia edia heduru do ia tahua eiava lasi.a (Galatia 6:5) Reana, bema ia laga-ani namonamo bona iena goada hegeregerena gaukara ia karaia, unai ese ia do ia durua. Bema hekwakwanai momo ia laloa hebou neganai hekwakwanai badana ta ai do idia lao diba, to namona be lalo-metau tauna ese hekwakwanai ta ta ia hapararadia bena ta ia hanaia toho guna, murinai ma ta, ela bona iboudiai ia hanaidia. Kongregesen ena elda taudia ese tadikaka ena lalona idia hagoadaia neganai, reana unai ese ia do ia durua. Bona bema ia lalo-metau dainai lauma dalanai ia manoka, reana elda taudia edia heduru ia abia be gau bada herea. (Iakobo 5:13-15) To gau bada herea momokani be inai: Iehova ita tabekau henia bona ‘iseda laloa hekwarahi gaudia ibounai iena imana dekenai do ita atoa,’ badina ‘ia ese ita ia naria noho.’ Taunimanima ta bema ia guriguri hanaihanai mai ena kudou ibounai ida ‘Dirava ena maino’ ia abia diba, unai maino ‘ese taunimanima edia diba ia hanaia momokani. Keriso Iesu dainai inai maino ese iena laloa gaudia bona iena kudouna idia mamia gaudia ibounai do ia naria namonamo.’—1 Petero 5:6-11; Filipi 4:6, 7.
Iseda Lalokau Tauna Ta Ia Mase Dainai Ita Lalohisihisi Neganai, Iehova ese Ita Ia Durua Ita Haheauka Totona
11-13. Lalokau tauna ta ia mase neganai, lalohisihisi hamaragia totona dahaka heduru ia noho?
11 Lalohisihisi gauna ma ta be inai: Iseda lalokau tauna ta ia mase neganai. Abraham ia taitai bada iena hahine Sara ia mase neganai. (Genese 23:2) Iena natuna Absalom ia mase neganai David ia dara doko. (2 Samuel 18:33) Be, iena turana Lasaro ia mase neganai, tau goevadaena Iesu “ia tai”! (Ioane 11:35) Unai dainai ia hedinarai lalokau tauna ta ia mase neganai, taunimanima idia lalohisihisi. To dahaka ese taunimanima ia durua diba, edia lalohisihisi idia hamaragia totona?
12 Dirava ese iena orea taudia ia durudia, edia lalokau tauna ta ia mase neganai edia dara doko mamina do idia haheaukalaia totona. Iena Hereva ia gwau taunimanima do idia toreisi lou. Unai dainai, idia “lalohisihisi lasi, ekalesia lasi taudia bamona, madi idia laloa goada diba lasi.” (1 Tesalonika 4:13; Kara 24:15) Iehova ena lauma helaga ese ita ia durua ita lalo-maino bona ita abidadama totona bona iena Hereva lalonai ia gwauhamatalaia negana hereadaena, gabeai do ia vara negana unai, do ita laloa totona; unai amo mase tauna dainai hisihisi lalohadai momo ese ita do idia hametaua momokani lasi. Bema Buka Helagadia ita duahia bona “bogahisihisi bona durua ibounai ia henia Diravana” ita guriguri henia, unai danu ese iseda lalohisihisi ia hamaragia.—2 Korinto 1:3, 4; Salamo 68:4-6.
13 Dirava badinaia tauna Iobu hegeregerena, toreisi lou helarona dainai ita lalo-goada diba. Ia gwau: “Mase gabuna lalonai mani lau oi [Iehova] hunia, ela bona emu badu ia ore, lau dekenai nega oi gwauraia hidi bona lau oi laloatao! Bema tau ta ia mase, do ia mauri lou diba, a? Lauegu hesiai dinadia iboudiai lalonai do lau naria ela bona lau oi ruhaia. Do oi boiboi, bena oi do lau haere henia. Badina be oiemu imana ena gaukara do oi ura henia dikadika.” (Iobu 14:13-15) Bema iseda turana namona ta be gabu daudauna dekenai ia lao, ita lalohisihisi bada lasi, badina ita diba ia do ita itaia lou. Iseda lalokau tauna ta ia mase neganai, ita dara doko, to kamonai Keristen tauna ta ia mase neganai, bema iena mase ita laloa hegeregere ia be gabu daudauna dekenai ia lao bamona, reana iseda lalohisihisi do ita hamaragia diba. Bema ena helaro be tanobada dekenai do ia mauri hanaihanai, Keriso ena Lagani 1,000 Lohia Negana lalonai, mase amo do ia toreisi lou inai tanobada dekenai. (Ioane 5:28, 29; Apokalupo 20:11-13) Bona bema iseda helaro be tanobada dekenai do ita mauri ela bona hanaihanai, iseda lalokau tauna ia toreisi lou neganai, reana do ita noho bona ia do ita hedavari lou diba.
14. Keristen vabu rua edia tau idia mase neganai, lalohisihisi bada hanaia totona dahaka idia karaia?
14 Iena tau ia mase murinai, taihu ta ia diba Dirava ena hesiai gaukara ia karaia noho be namo. Ia bisi badina ‘Lohiabada ena gaukara ia karaia goadagoada’ dainai. Danu, dabua maragidia 800 ia turia hebou blanketi ta ia karaia totona. (1 Korinto 15:58) Ia gwau: “Unai gaukara lau karaia be namo, badina unai dabua lau turia negana lalonai, Society ena ane bona Bible duahiduahi kaset dekenai lau kamonai diba, bona unai dainai lalohadai namodia momo lau laloa diba.” Mai moale ida aonega elda tauna ta bona iena hahine edia vadivadi ia laloa lou. Bible amo unai elda ia hahedinaraia, Dirava ese vabu ia lalokau henidia bona ia naridia. (Iakobo 1:27) Iena tau ia mase murinai, Keristen taihuna ma ta be lalohisihisi dainai ia laloa kerere lasi. Ia moale badina iena turadia ese ia idia hagoadaia dainai, bona ma taunimanima haida edia namo ia tahua. Ia gwau: “Nega momo lau guriguri bona Iehova lau tura henia namonamo.” Bona hahenamo badana be Dirava ena noho hanaihanai imana ese ita idia durua!
Ita Kara Kerere Neganai Ia Heduru
15. David ena hereva Salamo 19:7-13 dekenai edia anina be dahaka?
15 Ena be Iehova ena taravatu ita ura henia bada, to nega haida ita kara kerere. Momokani, ita kara kerere neganai ita lalohisihisi, David ia kara kerere neganai ia lalohisihisi bamona. Ia dekenai Dirava ena taravatu, iena sisiba herevadia, iena hahegani, bona iena hahemaoro herevadia edia namo ese golo ena namo idia hereaia. Ia gwau: “Oiemu hesiai tauna idia sisiba henia; idia kamonai henidia ena davana be bada. Daika be tau ta ena kara kereredia do ia diba? Kara kerere hehunidia amo mani lau oi gwauraia goeva. Danu, oiemu hesiai tauna mani oi koua hekokoroku karadia do ia karaia garina; mani dala oi koua lau do idia biagua garina. Unai negai, gau ta do lau reaia lasi bona kara dika momo do lau karaia lasi.” (Salamo 19:7-13) Namona be harihari unai siri ena hereva ita laloa namonamo.
16. Dahaka dainai hekokoroku karana amo ita gini siri be namo?
16 Hekokoroku karadia idia dika herea, idia be taunimanima edia kara dika ma iboudiai bamona lasi. Dirava ese Saulo ia dadaraia bona iena king dagina ia kokia, badina mai hekokoroku ida Saulo ese boubou ia karaia, bona ena be Dirava ese ia hagania Amalek taudia ia hadikaia ore, to Amalek king Agag ia hamasea lasi bona kohu namo hereadia ia hadikaia ore lasi. (1 Samuel 13:8-14; 15:8-19) King Usia ese lepra gorerena ia davaria badina mai ena hekokoroku bada ida hahelaga taudia edia gaukara ia karaia. (2 Sisiga 26:16-21) Nega ta ai, maua helagana be Ierusalem dekenai idia abia lao totona, boromakau ese idia veria gauna latanai idia atoa. Boromakau be kahirakahira idia hamorua neganai, Usa ese maua helagana ia dogoatao ia hamaoromaoroa totona. Unai hemataurai lasi karana dainai Dirava ese Usa ia botaia mase. (2 Samuel 6:6, 7) Unai dainai, bema ita diba lasi dahaka do ita karaia be namo, o bema ita diba lasi ita be mai eda maoro gau ta do ita karaia totona eiava lasi, namona be manau ita hahedinaraia bona aonega taudia ita nanadaia guna. (Hereva Lada-isidia 11:2; 13:10) Momokani, bema nega gunana ta dekenai, hekokoroku karana ita hahedinaraia bona kara ta ita karaia ena be gwaumaoro ita abia lasi, namona be ita guriguri Dirava ese iseda kerere do ia gwauatao totona bona ita noia ita do ia durua unai kerere do ita karaia lou garina.
17. Kara kerere hehunidia be edena bamona taunimanima ta idia hadikaia diba, bona edena dala amo iena kerere gwauatao bona lalona hamainoa dalana ia davaria diba?
17 Reana, kara kerere hehunidia ese lalohisihisi do idia havaraia. Salamo 32:1-5 ena hereva ia hahedinaraia David ese iena kara dika ia hunia toho, to ia gwau: “Egu kara dika lau gwauraia hedinarai lasi neganai, lauegu tauanina ia manoka, dina ibounai lau ganagana dainai. Badina be oiemu imana metauna be lau dekenai ia noho, dina bona hanuaboi ai danu; egu tauanina be ia kakoro, lahara negana ena dina siahuna ese lau ia raraia bamona.” David ia diba ia kara dika dainai iena lalona ena mamina ia dika; to unai ia hunia toho neganai, iena tauanina ia manoka, bona iena lalohisihisi ese iena goada ia haorea, medu lasi neganai o siahu neganai au ena ranu ia ore bamona. Ia hedinarai iena darana ai bona iena tauanina ai dika ia davaria bona moale ia reaia badina iena kerere ia gwauraia hedinarai lasi to ia hunia toho. Iena lalohisihisi haorea dalana be tamona sibona: Dirava vairanai iena kerere ia gwauraia hedinarai bona Dirava ese unai kerere ia gwauatao. David ia gwau: “Iena gwau-edeede oi gwauatao tauna ia moale, iena kara dika oi gwauatao tauna. . . . Egu kara dika oi vairanai lau gwauraia hedinarai, bona egu kerere lau hunia lasi. Lau gwau: ‘Iehova vairanai egu kerere do lau gwauraia hedinarai.’ Bona oi ese egu kara dika edia kerere oi gwauatao.” Keristen elda taudia edia lalokau heduru karana ia heduru tadikaka o taihu be lauma dalanai do idia goada lou totona.—Hereva Lada-isidia 28:13; Iakobo 5:13-20.
18. Dahaka ese ia hahedinaraia kara dika ese ia havaraia gaudia idia noho daudau diba, to unai neganai, dahaka ese lalo-goada ita ia henia diba?
18 Reana kara dika ese ia havaraia gaudia be idia noho nega daudau diba. David dekenai unai ia vara. Bataseba danu ia heudahanai, bona David ese dala ia karaia Bataseba ena tau idia hamasea totona, bona murinai Bataseba ia adavaia, ia rogorogo neganai. (2 Samuel 11:1-27) Ena be Dirava ese hebogahisi ia hahedinaraia Basileia gwauhamatana dainai, David ia helalo-kerehai dainai bona David ese ma taunimanima haida ia bogaia hisi dainai, to David ese ‘ia sibona ena ruma lalona amo dika ia davaria.’ (2 Samuel 12:1-12) Edia heudahanai karana amo ia vara natuna ia mase. David ena natuna Amnon ese iena tadina lahaina Tamara ia hadikaia, bena iena kakana Absalom ese hahegani ia henia Amnon idia hamasea totona. (2 Samuel 12:15-23; 13:1-33) Absalom ese David ia hahemaraia badina iena adavana haida danu ia mahuta hebou. David ena king dagina ia henaoa toho to taunimanima ta ese Absalom ia hamasea. (2 Samuel 15:1–18:33) Kara dika ese gau haida ia havaraia. Hegeregere, kongregesen murimurinai idia atoa kara dika tauna be reana do ia helalo-kerehai bona kongregesen lalonai do ia vareai lou. To reana iena ladana do ia namo momokani lasi bona iena lalona ena hisihisi do ia ore lasi ela bona lagani momo idia ore. To unai nega lalonai, unai tau ia lalo-goada diba badina Iehova ese iena kerere ia gwauatao bona iena noho hanaihanai imana ese ia durua dainai!
Iseda Lalo-Hekwarahi amo Ita Ia Hamauria
19. Dirava ena lauma helaga ese ita edena bamona ia durua diba hetoho badadia ita davaria neganai?
19 Hetoho badana ese ita ia davaria neganai, reana iseda aonega bona iseda goada do idia hegeregere lasi ita ese iseda dala ita abia hidi bona ita badinaia totona. Unai negai Dirava ena lauma helaga “ia mai, ita goada lasi taudia ia durua noho. Ita be guriguri dala maorona ita diba lasi. Unai dainai, Lauma Helaga ese ita totona ia noinoi Dirava dekenai, mai taitai bada danu.” (Roma 8:26) Bema Iehova ese iseda hekwakwanai ia kokia, ita tanikiu henia be namo. To, reana iena imana be ma dala ta amo ita do ia durua. Bema aonega totona ita guriguri, iena lauma helaga amo reana Iehova ese do ia hahedinaraia dahaka ita karaia be namo bena ita do ia hagoadaia unai kara ita karaia totona. (Iakobo 1:5-8) Iehova ena heduru amo, ‘hedibagani idauidau ese ita do idia hahisia’ neganai, ita haheauka diba bena unai murinai do ita gini goada diba, bona unai amo iseda abidadama ia hagoadaia.—1 Petero 1:6-8.
20. Bema Iehova ena noho hanaihanai imana dekenai ita tabekau momokani, dahaka namo do ita davaria?
20 Namona be Dirava guriguri henia karana ita hesikulaia lasi. David ia gwau: “Nega ibounai egu matana be Iehova dekenai lau negea, badina ia ese egu aena be reke lalona amo ia veria oho. Lau oi vaira henia, bona lau oi hebogahisi henia; badina lau be sibona lau noho bona hisihisi lau ania. Egu kudouna ena hisihisi idia bada idia lao; egu hisihisi dekena amo lau oi hakaua. Egu hisihisi bona egu hekwarahi oi itaia, bona egu kara dika iboudiai oi gwauatao.” (Salamo 25:15-18) David bamona, Dirava ese ita do ia hamauria, iseda mauri do ia hanamoa bona iseda dika do ia gwauatao, bema Iehova ena noho hanaihanai imana dekenai ita tabekau.
[Footnotes]
a Noga! magasin, Issue Number 2/1988, rau 2-18 dekenai, lalo-metau ena sivarai haida oi itaia.
Edena Bamona Do Oi Haere?
◻ Iehova be edena bamona iena gorere hesiai taudia ia durua?
◻ Reana dahaka ese ita do ia durua lalo-metau ita hanaia toho neganai?
◻ Lalokau tauna ta ia mase neganai, lalohisihisi hamaragia totona dahaka heduru ia noho?
◻ Edia kara kerere idia hunia taudia be edena dala amo edia lalohisihisi idia haorea diba?
◻ Iehova ena orea taudia ese hetoho badadia idia davaria neganai, dahaka heduru ia noho?
[Picture on page 16, 17]
Dirava badinaia tauna Iobu hegeregerena, toreisi lou helarona dainai ita lalo-goada diba