‘Gabu Ibounai Dekenai Do Ia Hanaia Gorerena Idia Vara’

GUNA unai bamona ia vara lasi to taunimanima momo herea dekenai do idia hanai goreredia be ‘Iesu Keriso ia giroa mai, bona tanobada dokona danu, ena toana’ perovetalaia herevana ena kahana ta. (Mataio 24:3) Evanelia torea tauna, Luka be unai hereva ia torea, to Mataio bona Mareko ese idia torea lasi. (Mataio, karoa 24 bona 25; Mareko, karoa 13) Dina dokodia ai taunimanima momo herea dekenai idia hanai bona idia hamasedia goreredia be “gabu ibounai” dekenai do idia vara. (Luka 1:3; 21:11) Unai gorere be edeseni amo idia mai?

Magasin ta, ladana Science News, ia gwau: “Saiens taudia idia diba siahu bada to medu momo gabudia dekenai hodahoda lalonai muramura dikana bamona ia hanai gaigaigaigai maragimaragidia [virus] idia noho. Idia diba bema mauri gaudia be dala idia kehoa neganai, unai gaudia ese idia hamasedia taudia edia namba be AIDS gorerena amo idia mase taudia edia namba do ia hanaia. Ena be tanobada dekenai idia noho virus edia ladana idia diba bona idia havaraia dikadia idia bada idia lao lasi, to unai gorere idia tahua taudia idia gwau, medu momo bona au momo siahu gabudia dekenai idia noho virus goreredia edia ‘siahu’ ia hegeregere Tanobada ena hutuma momo idia hamasedia totona.”

Unai gorere ese ita idia hadikaia diba dalana ia bada noho badina tanobada taudia edia namba ia bada ia lao haraga, bona idia noholaia gabudia be hegeregere lasi dainai edia mauri durua gaudia momo idia tahua bada. Science News ia gwau: “Tanobada ena histori ese ia hahedinaraia, taunimanima be guna taunimanima ese idia itaia namonamo lasi gabudia ai idia lao neganai eiava hanua lalodiai mauri dalana ia dika ia lao neganai, unai virus matamatadia idia vareai.” Taunimanima be virus idia noho gabudia, guna idia noholaia diba lasi gabudia, dekenai idia vareai neganai, nega momo virus gorere badadia idia mai danu. Tanobada ena keru bona siahu negadia idia idau neganai manumanu be ma gabu ta ai idia lao neganai unai bamona ia vara. Unai magasin ia gwau: “Ma danu, muramura henia daladia matamatadia, hegeregere tauanina ena varo lalonai rara idia henia bona tauanina ena kahana haida be ma tauanina amo idia abia karadia, ese virus be taunimanima idauidau dekenai idia hanaia dalana idia kehoa. Bona taunimanima idia noho hebou karadia bona idia mauri dalana idia idau dainai, unai virus be taunimanima ta ta dekenai idia hanai diba; hegeregere taga taudia bona taunimanima momo vairanai ladana bada taudia be tanobada gabu momo dekenai idia loaloa, drag idia ania kava taudia be needle amo muramura idia atoa edia tauanina dekenai bena ma taunimanima ta ese unai needle ia gaukaralaia danu.”

Unai magasin be ma ia gwau, nega daudau lasi gunanai, gabu idauidau dekenai virus idia hedinarai bona reana anina be gabeai do idia vara ma gabu momo dekenai. Haheitalai haida be inai: guna taunimanima idia diba lasi Marburg virus; West Germany dekenai lagani 1970 ia mai kahirakahira negana ai, unai virus, medu momo to siahu bada tanodia ai ia vara gauna, be saiens taudia momo ia hadikadia. Rift Valley gorerena ena virus dainai, lagani 1977 ai, Egypt dekenai, taunimanima milion milion be heudeheude gorerena idia abia bona idia tausen tausen idia mase. Medu momo to siahu bada tanona dekenai ia vara Ebola virus dainai, lagani 1976 ai, Zaire bona Sudan dekenai taunimanima tausen bona kahana be gorere idia abia bona 500 bamona idia mase, idia momo be doketa bona sisita, idia be unai gorere idia abia taudia idia durudia.

Nega momo taunimanima idia gwau diba lasi edena negai virus gorere badadia do idia vara. Science News magasin ia gwau: “Haheitalai ta be lagani 1918 ai, ia dika momokani virus ta dainai, taunimanima 20 milion bamona be tauanina ia hadikaia kuru gorerena ta amo idia mase. Kahirakahira iseda nega ai, taunimanima lalonai virus ta idia davaria bona guna unai virus be Africa edia monki lalonai sibona ia noho, unai dainai tanobada taudia idia hoa. World Health Organization ia gwau AIDS virus be tano 149 dekenai taunimanima 5 milion ia lao 10 milion ia hagoreredia. To, ena be taunimanima momo be unai gorere idia laloa momo, virus idia stadilaia taudia idia gari badina idia dika momokani daihanai gorere momo do idia vara diba.”

Ena be unai daihanai goreredia dainai ita hekwarahi bada, to idia be Iesu ena nohona Basileia hairaina dekenai ena toana kahana ta, bona do idia vara gaudia ma haida be tuari, doe, bona tano mareremarere bada. (Mareko 13:8; Luka 21:​10, 11) Unai gaudia idia vara dainai ita moale diba, badina Luka be Iesu ena hereva ma haida ia gwauraia, ia gwau: “To inai gaudia do idia vara hamatamaia neganai be emui kwarana do umui abia isi. Badina be umui emui hahemauri be ia kahirakahira vadaeni.”​—Luka 21:28.