Tomadiho Taudia Haboudia

APOSETOLO Ioane ese “Lohiabada ena Dina dekenai” do idia vara hoa karadia ia matahanailaia. Ia itaia Lohiabada Iesu Keriso be hosi kurukurona ai ia guia kara maoromaoro tuarina dekenai​—“mai goada danu ia lao, do ia kwalimu totona.” Ena gaukara ginigunana be Dirava ena inai tauna badana, Satana, guba amo ia negea diho tanobada dekenai. Unai dainai Satana be tanobada ai tuari, hitolo, gorere bona dagedage ia havaraia. Unai hisihisi idauidau be hosi toi​—kakakaka, korema bona labora​—ese idia laulaulaidia. (Apokalupo 1:10; 6:1-8; 12:9-12) Inai hisihisi dikadia ibounai be lagani 1914 ai idia vara matamaia bona unai nega amo ia mai bona hari unai hisihisi ibounai be idia dika momokani. Nega sisina murinai, Iesu ese ia gwauraia hegeregerena, “hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” Unai hisihisi bada herea ese unai dika ibounai edia dokona do ia makaia.​—Mataio 24:3-8, 21.

Unai negai Iehova idia tomadiho henia taudia dekenai dahaka do ia vara? Apokalupo karoa 7, siri 1 ia lao 10, ese aneru 4 ia herevalaia, lai edia toa dalana “idia koua” ela bona unai tomadiho maoromaoro taudia iboudiai do idia haboua. Lagani 1914 amo idia mai laganidia lalodiai, lauma Israel ena 144,000 oreana ena taunimanima oredia be do idia haboua. Unai murinai “itaia, hutuma bada herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau” amo. Inai hutuma bada edia namba be milion haida ia davaria vadaeni. Idia ibounai be mai edia maoro Dirava ena terona vairanai do idia gini badina idia ese Iesu, kerere lasi mamoe bamona idia alaia kava tauna, ena boubou rara ai idia abidadama dainai. “Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ” Inai gaukara goadagoada tomadiho taudia be ma haida dekenai idia gwau, “Oi mai” bona ‘hisihisi badana’ amo hahemauri davaria totona unai taudia idia haboua.​—Apokalupo 7:14-17; 22:17.

“Tanobada Ibounai Dekenai”

Bona unai abidadama bada danu idia tomadiho taudia dekenai inai ia vara: “Edia gadona ena sivarai be tanobada ibounai dekenai idia gwauraia loaloa, bona edia hereva be tanobada ena dokona momokani dekenai idia lao.” (Roma 10:18) Oibe, edia gaukara goadagoada dainai huahua namodia idia davaria. Hegeregere:

Mexico tanonai haroro gaukara ai idia vareai taudia ibounai be 335,965. Unai anina be lagani toi lalonai haroro taudia edia namba be kahirakahira 100,000 amo ia bada daekau! Dahaka dainai hutuma idia vareai unai gaukara lalonai? Inai sivarai ese ia hahedinaraia. Mero matamata ta ladana Aurelio be Katolik dubuna ta ia naria tauna. Iehova ena Witness taudia idia vareai edia hanua lalonai neganai, ia ese gaba ia toua badina ia ura lasi hanua taudia ese Witness taudia idia hakala henidia. Nega sisina murinai ia ese Katolik edia Jerusalem Bible ta ia hoia bona ia duahia hamatamaia, to ena duahiduahi amo lalo-parara ia abia lasi. Nega ta ia ese turana ta ena imana ai New World Translation Bible ia itaia. Aurelio ese ena turana ia gwau henia bona ia hamaoroa unai Bible be koikoi, bona ena turana ia abia lao iena ruma dekenai, Bible “momokanina” hahedinarai henia totona. Ena turana ia gwau: “Esodo 20 oi duahia,” bena Aurelio ia rakatania.

Unai dubu naria tauna ese Esodo karoa 1 amo ia duahia ia lao bona Eso karoa 20, siri 4 bona 5. Ena Katolik Bible ai kaivakuku bona kohoro ena taravatu ia duahia neganai ia hoa dikadika. Sunday ena Mass guriguri murinai ia lao bona pris ia nanadaia unai siri edia hereva dainai. Aurelio ese ia hereva henia guna neganai pris be ia gwau ia ese unai kohoro bona laulau be ia matauraidia sibona; ia tomadiho henia lasi. Pris ia itaia Aurelio ena toana be ia daradara bamona, unai dainai ia gwau sedira Aurelio be Iehova ena Witness taudia danu ia stadi. Aurelio ese ia hamaoroa unai be momokani lasi to ma ia hereva ia gwau, “To hari do lau stadi!”

Witness taudia ese iena hanua ma idia vadivadi henia lou neganai, Aurelio ese ia abidia dae bona Bible stadi idia hamatamaia. Ena Katolik dubu gaukara amo ia doko bona hua toi murinai Iehova ena Witness taudia danu haroro gaukara ia karaia diba. Ia vadivadi henia ruma ginigunana be pris tauna ena ruma. Pris tauna ia hoa bada herea unai guna dubu naria tauna ia itaia inai Basileia sivarai gaukarana ia karaia neganai. Pris tauna ese ia gwau henia bena ia hamaoroa dubu orea amo do idia lulua, to Aurelio ese pris ia hadibaia dubu ia rakatania vadaeni. Iena gini goada karana ese hanua lalonai Iehova Witness ida idia stadi noho taudia ia hagoadadia. Distrik Hebouhebou ia ginidae neganai Aurelio bona ma taunimanima ese bapatiso idia abia. Unai gabu dekenai nega kwadogi lalonai gaukara be ia bada ia lao haraga dainai unai taudia ibounai edia bapatiso abia henanadaidia be elda tauna tamona ese ia karaia.

“Edia Gadona Ena Sivarai . . . Idia Gwauraia Loaloa”

Basileia harorolaia gaukara be gabu iboudiai dekenai ia vara. Italy tano ai Katolik tauna ta be nega hanaihanai ia badu bema Iehova ena Witness taudia be ena ruma dekenai idia lao neganai. Unai dainai moni gaukara totona Singapore dekenai idia siaia lao neganai ia moale badina ia laloa unuseni Witness taudia do ia davaridia lasi. Unuseni ai danu Witness taudia ia itaia neganai ia hoa bona ia badu dikadika. Ia ese dagedage dikadika sisia rua ia abia, gabeai do idia vadivadi Witness taudia idia koria totona. Witness taudia rua idia lao iena ruma ai neganai inai sisia rua idia heau mai. Unai hahine rua be mai gari danu idia heau kerere kerere, bona dala ia parara gabuna ai idia parara danu. Sisia ta ese unai hahine ta ia koria gwauraia neganai hahine ese kara haraga buklet rua ia abia bona sisia ena uduna dekenai ia toia vareai. Unai murinai sisia ia gini bena ia giroa bona ia raka lao ruma dekenai.

Murina pura ai, unai Witness rua be lou henia ta idia karaia dala kahana rumana dekenai. Unai sisia rua edia biaguna be ruma ena vairanai ia gini bona idia ia hanamodia bena ia boiridia vareai ena ruma lalonai. Ia hamaorodia ena mauri ibounai lalonai ia ese Iehova ena Witness taudia ia hereva henidia lasi bona edia buka ta ia duahia lasi. To ena sisia ta ena uduna lalonai unai buklet ta ia itaia neganai ia hoa dikadika. Unai hanuaboi ai unai buklet ia duahia bona ia ura henidia. Ena be ena mauri laganidia ibounai lalonai ia be Katolik dubu tauna, to ia ura Iehova ena Witness danu Bible idia stadilaia.

Gaukara ia ore bona Italy dekenai ia giroa lou gwauraia neganai, tadikaka be Italy ai do ia stadi dalana idia karaia. Mai ena adavana danu Keristen hebou idia lao henia neganai pris tauna ese ia gwau henidia bona idia dekenai hagaria hereva ia gwauraia danu. Taunimanima ta ese edia uma ia gabua neganai, idia ese unai dubu gunana idia rakatania vaitani. Inai tau be inai bamona ia hereva: “Lau ese egu bese taudia lau haroro henidia vadaeni badina lau ura idia danu do idia diba Dirava momokani tamona be Iehova.”

“Tanobada Ena Dokona Momokani Dekenai Idia Lao”

Oibe, ekspiriens ta ma tanobada ena daudau gabuna ta amo ese ia hahedinaraia taunimanima ese Basileia sivaraina idia laloa bada bona ia ese taunimanima edia mauri ia haidaua diba. Witness hahine ta Australia dekenai ese mai bogadia hahine do idia mara namonamo sikuli dekenai ia lao neganai hahine ta ia davaria, ia ese tauanina hadikaia kara momo ia karaia, hegeregere ia ura lasi ena rogorogo lalonai kuku ania karana ia hadokoa. Witness hahine be unai hahine ena kara dainai ia laloa momo. Idia ruaosi ese edia beibi be nega tamona idia abia bona hospital daiutu tamona dekenai idia mahuta danu, unai dainai idia herevahereva hebou diba. Unai hahine be ia maragi neganai hekwakwanai momo ia davaria, bona ena headava maurina danu be ia dika momokani. Hospital ia rakatania murinai, Witness hahine ese unai hahine ia vadivadi henia bena Emu Ruma Bese Hamoalea Dalana buka amo Bible stadi ta ia hamatamaia.

Unai hahine ena adavana be Dirava dekenai ia guriguri tomadiho momokani do ia davaria totona, to unai guriguri lalonai inai bamona ia noinoi danu: “To mani emu kara, Iehova ena Witness taudia lau dekenai oi siaia lasi”! To gabeai ia davaria ena adavana be Witness taudia danu ia stadi neganai, ia ese henanadai momo ia gwauraia bena ia idia hagoadaia stadi lalonai ia helai vareai totona. Unai bamona ia karaia bena nega daudau lasi murinai kongregesen ena hebou dekenai ia lao. Harihari, inai tau bona ena hahine be idia bapatiso vadaeni, bona edia headava maurina be ia namo herea.

Ruma dekenai unai bamona buka amo taunimanima Bible stadi henia karana ese tomadiho taudia momo ia haboua. Haida be gavamani idia tuari henia taudia idia tuari heheni tanodia, bona gavamani ese gaukara idia koua tanodia ai, ruma dekenai Bible stadilaia hebou karana be ia bada daekau. Angola dekenai bese tamona taudia ese idia tuari heheni karana be lagani daudau ia vara bona Iehova ena Witness taudia ese dagedage bona hekwarahi bada herea idia davaria. Ia hanaia lagani ena matamana neganai, ena be edia stadi buka be hegeregere lasi, to haroro ripoti idia hahedinaraia, pablisa ta ta iboudiai edia averes be Bible stadi kahirakahira toi idia karaia. Idia loaloa naria taudia ese dina ta ta iboudiai dekenai grup maragina tamona tamona orea maragi idia vadivadi henia bona dina lalonai haroro gaukara idia karaia bona hanuaboi kongregesen ena hebou idia karaia. Oibe, unai hekwakwanai ibounai idia ore neganai tadikaka idia moale badina Bible stadilaia buka idauidau be South Africa amo idia ginidae, edia metau be 42 ton! Momokani, unai tadikaka edia lalokau be ‘do ia bada lao noho, mai edia laloa diari, bona mai edia aonega danu,’ bena idia ese “gau namodia edia toana” do idia diba. (Filipi 1:9, 10) Oibe, namona be Iehova ese ita ia henia heduru gauna Bible ita stadilaia totona ita gaukaralaia namonamo!​—1 Timoteo 4:15, 16.

Mai abidadama bada danu idia tomadiho taudia edia moale dainai Iesu ena Haroro Badana Ororo Dekenai ita laloa lou, ia gwau: “Hekokoroku lasi taudia be idia namo, badina Guba Basileia be idia edia. . . . Dirava ena kara maoromaoro idia karaia dekena amo hisihisi idia abia taudia be idia namo, Guba Basileia be idia edia. . . . Umui moale bada momokani, badina be emui davana guba dekenai ia bada.” (Mataio 5:3-12) Oibe, Angola dekenai taunimanima momo idia haboua vadaeni.

Tanobada ena kahana idaudia ai, guna Iehova ena Witness taudia latanai idia atoa taravatu be idia hamanokaia o idia kokia. Iesu be ena nega ai inai bamona ia hereva: “Uiti ena anina abia negana ia ginidae vadaeni, to utua taudia be momo lasi.” (Mataio 9:37) Unai hereva be hari inai nega ai ia momokani vaitani! Gaukara be bada to karaia taudia be momo lasi. Oibe, ita moale badina unai haboua karana be iseda tomadiho karana ta. Momokani, Iehova Dirava ena gaukara lalonai huahua namodia havaraia moalena ese inai tanobada latanai idia noho moale ibounai ia hanaia vaitani.

To, dahaka ese Iehova tomadiho henia taudia ia hagoadadia bena unai bamona idia gaukara goadagoada mai moale danu? Do ita itaia.