Peroveta Koikoi Taudia Hari Inai Nega Ai

GUNA Ierusalem lalonai, kaivakuku karadia be momo, lebulebu karadia be momo, kara mirodia be momo, bona kerere lasi taudia edia rara bubua kara be bada. Unai neganai, Ieremia be Dirava ena peroveta tauna. (Ieremia 7:​8-11) Unai nega lalonai, ia sibona ia peroveta lasi, to ma peroveta taudia momo idia peroveta danu, to idia be sibodia edia ura idia tahua guna bona idia kara dika. Edena dala ai? Iehova ia gwau: “Peroveta tauna ela bona hahelaga tauna, idia ta ta iboudiai idia kara koikoi noho. Bona lauegu orea taudia edia bero idia hanamoa koikoi toho, idia gwau, ‘Maino! Maino!’ maino be lasi neganai.”​—Ieremia 6:​13, 14.

Ena be unai tano dekenai kara dikadia be momo, to peroveta koikoi taudia idia ura taunimanima idia laloa gau iboudiai idia namo, bona taunimanima be Dirava ida idia maino; to unai be momokani lasi. Ieremia be gari lasi dekenai ia peroveta ia gwau Dirava ena hahemaoro karana be idia dekenai ia mai gwauraia. Lagani 607 B.C.E. ai, Babulono ena tuari taudia be Ierusalem idia gabua, dubu idia hadikaia, bona unai bese taudia idia hamasea eiava gabu daudau ai Babulono dekenai idia abidia lao hesiai gaukara idia karaia totona; unai neganai peroveta koikoi taudia lasi to peroveta tauna korikorina Ieremia ena hereva be ia momokani. Unai tano idia do rakatania lasi taudia be momo lasi bona idia danu be Aigupito dekenai idia heau siri.​—Ieremia 39:​6-9; 43:​4-7.

Peroveta koikoi taudia be dahaka idia karaia? “Iehova ia gwau, ‘Lau ese peroveta taudia lau inai henidia; idia ese lauegu hereva idia henaoa, edia bamodia amo idia henaoa unai.’ ” (Ieremia 23:30) Peroveta koikoi taudia be Dirava ena hereva ena siahu bona ena anina idia henaoa, badina idia be taunimanima idia veridia Dirava ena sisiba momokanina idia kamonai henia lasi totona, bona idia veridia koikoi idia kamonai henia totona. Idia be “Dirava ena hoa gaudia” idia herevalaia lasi, to idia sibona edia lalohadai, taunimanima idia ura idia kamonai henia gaudia, idia hadibaia. Momokani, Ieremia ena hereva be Dirava ena amo ia mai, bona Israel taudia bema iena hereva idia kamonai neganai, do idia roho mauri diba. Peroveta koikoi taudia be ‘Dirava ena hereva idia henaoa’ bona kerere dekenai taunimanima idia hakaudia lao. Idia be Iesu ena nega lalonai abidadama lasi tomadiho gunalaia taudia hegeregerena; Iesu ia herevalaidia, ia gwau: “Idia be matakepulu taudia, bona matakepulu taudia idia hakaua lao noho. Bema matakepulu tauna ese matakepulu tauna do ia hakaua, idia ruaosi guri dekenai do idia moru.”​—Kara 2:11; Mataio 15:14.

Ieremia ena nega lalonai hegeregerena, hari inai nega lalonai peroveta koikoi taudia idia noho, idia gwau Bible ia gwauraia Diravana ena gaukara idia karaia; to idia danu be Dirava ena hereva idia henaoa, badina idia harorolaia herevadia be taunimanima idia veridia kerere bena idia be Dirava ena hereva, Bible ena amo, idia kamonai henia lasi. Edena dala ai unai bamona idia karaia? Unai henanadai ita haerelaia totona, namona be Bible ena hereva badana, Basileia, amo edia kara ita tohoa.

Basileia Ena Hereva Momokani

Dirava ena Basileia be Keriso ia hadibaia hereva badana, bona Evanelia bukadia lalonai nega handred tamona bona ma haida idia gwauraia. Iena hesiai gaukara ia hamatamaia neganai, Iesu ia gwau: “Lau be Dirava ena Basileia ena Sivarai Namo hanua idauidau dekenai do lau harorolaia, lau ia siaia badina be unai.” Ia murinai idia raka taudia ia hadibaia inai bamona idia guriguri: “Oiemu Basileia do ia mai.”​—Luka 4:43; 11:2.

Unai dainai, Basileia be dahaka? The New Thayer’s Greek English Lexicon bukana ia hereva hegeregerena, unai Greek herevana “basileia” be Bible lalonai idia hahanaia neganai, ena anina ginigunana be “pavapava siahuna, king dagina, lohia karana, biagua karana” bona ena anina iharuana be, “king ese ia lohiaia tanona.” Unai amo maorona be ita laloa Dirava ena Basileia be King ta ese ia lohiaia gavamani korikorina ta. Unai ia momokani, a?

Oibe, ia momokani, bona King be Iesu Keriso. Maria ese Iesu ia do havaraia lasi neganai, aneru Gabriel be Maria dekenai ia gwau: “Ia be do ia tau bada herea momokani, ia be Dirava Ataiai Momokani ena Natuna do idia gwauraia, Lohiabada Dirava ese ena tamana [David] ena king dagina do ia henia.” (Luka 1:32) Iesu be terona ia abia dainai unai ese ia hamomokania ia be King ta, gavamani Lohia tauna ta. Danu, Basileia be momokani ia noho gauna hamomokania dalana ma ta be Isaia ena peroveta hereva, ia gwau: “Natuna ta ia vara, ita eda, natuna merona ta ia henia ita dekenai; bona gavamani be iena pagana dekenai do ia atoa. . . . Iena Lohia siahuna habadaia karana bona maino do idia doko lasi.”​—Isaia 9:​6, 7.

Iesu be edeseniai ia lohia? Ierusalem lalonai? Lasi. Peroveta tauna Daniel be matahanai lalonai ia itaia Iesu be Basileia ia abia, bona iena matahanai lalonai ia hedinarai Iesu be guba dekenai. (Daniel 7:​13, 14) Unai be Iesu ese Basileia ia herevalaia dalana hegeregerena. Nega momo ia gwauraia “Guba Basileia.” (Mataio 10:7; 11:​11, 12) Danu ia be Pilato vairanai Iesu ese kota ia abia neganai ia hereva hegeregerena, Pilato dekenai ia hereva neganai, ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.” (Ioane 18:36) Oiemu dubu gunalaia tauna eiava pris tauna ese oi ia hadibaia Iesu ena Basileia be gavamani korikorina ta, guba amo ia lohia, a? Eiava oi ia hadibaia Basileia be kudou lalonai ia noho gauna sibona? Bema unai bamona ia karaia, ia be Dirava ena hereva oi dekena amo ia henaoa.

Basileia gavamanina bona tanobada gavamani idauidau iboudiai be edena bamona? Mircea Eliade ese ia hegaegaelaia bukana, The Encyclopedia of Religion, ena hereva hegeregerena, Dubu Ena Kara Haidaua Tauna Martin Luther ese Basileia ia herevalaia neganai, ia gwau: “Tanobada gavamani . . . danu be idia gwauraia diba Dirava ena basileia.” Haida idia hadibaia idia gwau taunimanima be sibodia edia gaukara amo tanobada gavamanidia be Dirava ena Basileia bamona idia halaodia diba. Lagani 1983 ai, World Council of Churches idia gwau: “Maino ita ura dainai ita karaia karadia ita itaia neganai, ita itaia Dirava ena Lauma ese iseda manoka karadia ia gaukaralaia diba, inai tanobada basileiadia be Dirava ena gavamani kahirakahira ai do ia mailaidia totona.”

To, namona be inai oi laloa, Lohiabada ena Guriguri (“Aiemai Tamana e,” Gurigurina), lalonai, Iesu be iena murinai idia raka taudia ia hadibaia Dirava ena Basileia ia mai totona do idia guriguri, bena gabeai idia ia hadibaia do idia guriguri, idia gwau: “Oiemu [Dirava ena] ura gauna tanobada dekenai do ai karaia, guba dekenai idia karaia bamona.” (Mataio 6:10) Ita gwau lasi Dirava ena ura idia karaia dainai taunimanima be Basileia idia mailaia diba. Lasi, to Dirava ena Basileia ia mai dainai Dirava ena ura be tanobada dekenai do ia vara. Edena dala ai?

Namona be Daniel karoa 2, siri 44 ena peroveta hereva dekenai oi kamonai, ia gwau: “Unai pavapava edia negai, [nega dokona ai idia noho tanobada lohiadia], guba Diravana ese basileia ta do ia haginia, nega ta ai do idia hadikaia ore diba lasi gauna. . . . Unai basileia iboudiai do ia hamakohidia maragimaragi bona do ia haoredia.” Unai dainai, Iesu ia gwau iena Basileia be inai tanobada gauna lasi be hoa gauna lasi! To, iena Basileia be inai tanobada ena basileia iboudiai, ena gavamani iboudiai, do ia hadikadia ore bona edia gabu do ia abia taunimanima lohiadia totona. Ia be taunimanima lohiaia totona Dirava ese ia henia gavamanina dainai, ia be dala do ia karaia tanobada dekenai taunimanima ese Dirava ena ura do idia karaia totona.

Bema inai tanobada ia biagua tauna be daika ita laloa, vadaeni, Basileia be unai kara badana do ia karaia ena badina ita diba. Aposetolo Ioane ia torea, ia gwau: ‘Kara dika tauna ese tanobada taudia ibounai ia gunalaia noho.’ (1 Ioane 5:19) Unai ‘kara dika tauna’ be Satana Diabolo, Paulo ese ia gwauraia “inai tanobada ena dirava.” (2 Korinto 4:4) Satana Diabolo be tanobada ena dirava dainai, tanobada ena orea be Dirava ena Basileia ida ita hahegeregerea diba lasi.

Iesu be politikol karadia lalonai ia vareai lasi ena badina ta unai. Iuda bese abia isi taudia idia ura king ta ai idia halaoa neganai, ia raka siri. (Ioane 6:15) Ita itaia hegeregerena, ia be gari lasi dekenai Pilato ia hamaoroa, ia gwau: “Lauegu Basileia be inai tanobada gauna lasi.” Bona unai hereva hegeregerena, ia be iena murinai idia raka taudia inai bamona ia gwauraidia: “Idia be tanobada ena lasi, lau hegeregerena, lau be tanobada ena lasi.” (Ioane 17:16) Unai dainai, bema tomadiho gunalaia taudia idia gwau Dirava ena Basileia do ia mai haraga inai tanobada ena kara hanamoa gaukarana amo, bona edia mamoe taudia be unai gaukara dekenai idia veria toho, idia be peroveta koikoi taudia. Bible ena hereva ena siahu bona ena anina korikorina idia henaoa.

Badina be Dahaka Ia be Gau Badana?

Inai hereva ibounai be darana gaukaralaia karana sibona, a? Lasi momokani. Dirava ena Basileia hadibaia kerere herevadia ese taunimanima momo idia hakaudia kerere bona idia be idau negai ena sivarai lalonai idia vara gaudia idia haidaua. Haheitalai be, unai buka Théo, Roman Katolik encyclopedia bukana, ia gwau: “Dirava ena taunimanima idia lao noho Keriso be tanobada dekenai ia haginia gauna ta, Dirava ena Basileia unai, idia abia totona . . . Dubu be unai Basileia ena uhe.” Katolik Dubu be Dirava ena Basileia ida idia hahegeregerea dainai, lagani 1100 C.E. bamona ia lao 1500 C.E. bamona ai taunimanima be lauma karadia dainai idia gari bada herea neganai, dubu be tanobada dekenai siahu bada idia abia. Hari inai negai danu, dubu gunalaia taudia be tanobada ena kara idia haidaua toho, idia be politikol karadia haida idia abia isi bona politikol karadia ma haida idia koua toho.

Unai ia herevalaia tauna ta be hari ia bada lalohadaina ma ta ia gwauraia, ia gwau: “Gavamani dikadia hamorua dalana be basileia haginia dalana, badina taunimanima be gavamani idia hamorua neganai dala matamatana ia kehoa taunimanima idia gaukara hebou totona, Dirava be unai toana ia hamatamaia bona ia henia hereva momokani tauna amo​—Iesu . . . Gandhi . . . Berrigan taudia.” Idia hadibaia Dirava ena Basileia ena gaukara be politikol karadia amo idia habadaia diba dainai, bona Basileia ena hereva momokani idia laloa lasi dainai, dubu gunalaia taudia be politikol dagi idia tahua. Unai lalohadai be ma haida ia hakaudia tano ena gavamani idia badu henia bona hehuni dalanai tuari karadia lalonai idia vareai totona. Unai kara ibounai inai hereva momokani ida ia hegeregere lasi, unai hereva momokani be: Basileia be inai tanobada ena lasi. Politikol karadia lalonai idia vareai momokani neganai, tomadiho gunalaia taudia be tanobada ena kahana lasi bamona, to Iesu ia gwau iena hahediba taudia korikoridia be tanobada kahana lasi. Dirava ena Basileia be politikol karadia amo do ia vara herevana idia hadibalaia taudia be peroveta koikoi taudia. Idia be taunimanima edia amo Dirava ena hereva idia henaoa.

Bema Kerisendom ena tomadiho gunalaia taudia be Bible ena hereva idia hadibaia momokani, edia mamoe taudia do idia diba Dirava ena Basileia be ogogami, gorere, bese haida kara dika henia karana, bona gavamani ena dagedage karadia edia hekwakwanai do ia haoredia momokani. To Dirava ese ia gwauraia negana ai bona Dirava ena dala dekenai unai bamona do ia vara. Ia be politikol oreadia hanamoa karadia amo do ia vara lasi; Basileia ia mai neganai do idia ore. Bema unai pris bona pasto taudia be peroveta taudia momokanidia, idia ese edia mamoe taudia do idia hadibadia Dirava ena Basileia ese gau ta do ia karaia negana idia naria noho lalonai, Dirava ese ia henia heduru momokanina bona namona idia abia diba, hari tanobadana ena kerere ese ia havaraia hekwakwanaidia idia hanaia totona.

Edia mamoe taudia do idia hadibaia danu, tanobada dekenai hekwarahi momo ese idia havaraia hisihisidia be Bible lalonai idia perovetalaia vadaeni, bona idia be toa ta, idia hahedinaraia Basileia be kahirakahira do ia mai. Oibe, Dirava ena Basileia be nega kahirakahira gau ta do ia karaia bona hari idia noho politikol oreadia do ia haoredia bena edia gabu dekenai do ia gini. Unai be do ia vara hahenamo bada hereana!​—Mataio 24:​21, 22, 36-39; 2 Petero 3:7; Apokalupo 19:​11-21.

Taunimanima​—Dirava Ena Basileia Henunai

Dirava ena Basileia do ia mai ena anina be dahaka taunimanima dekenai? Oi laloa, daba daba iboudiai bema mai goada ida oi toreisi, oi be edena bamona? Oi diba taudia iboudiai idia gorere lasi eiava idia mase lasi. Oiemu lalokau mase taudia be toreisi lou dalana amo oi dekenai idia giroa vadaeni. (Isaia 35:​5, 6; Ioane 5:​28, 29) Sibodia edia ura idia tahua guna bisinesi taudia bona moni gaukaralaidia kerere dalana ese idia havaraia moni hekwarahina be lasi. Oiemu ruma namona ia noho bona oiemu tano ena bada ia hegeregere tubutubu gaudia oi hadoa bena ruma bese oi ubua totona. (Isaia 65:​21-23) Dina ai eiava hanuaboi ai oi be gabu iboudiai dekenai oi loaloa diba bona ta ese oi ia hadikaia garina oi gari lasi. Tuari idia ore​—gau ta lasi ese oiemu noho namo ia hadikaia diba. Taunimanima iboudiai be oiemu namo idia laloa. Taunimanima dikadia idia ore. Lalokau bona kara maoromaoro be gabu iboudiai dekenai idia noho. Unai negana oi laloa diba, a? Basileia be unai bamona tanobadana do ia havaraia.​—Salamo 37:​10, 11; 85:​10-13; Mika 4:​3, 4.

Unai be nihilaia kava gauna sibona, a? Lasi. Paragraf gunana lalonai ai torea siridia oi duahia, bona do oi itaia unuseniai ai gwauraia gaudia iboudiai ese Dirava ena gwauhamata momokanidia idia gwauraia. Bema taunimanima totona Dirava ena Basileia do ia karaia diba gaudia bona do ia karaia momokani herevadia be guna oi diba namonamo lasi, anina be ta ese Dirava ena hereva be oi dekena amo ia henaoa.

Moale gauna be oi be mai emu dala unai diba lasi nohona do oi rakatania totona. Iesu ia gwau hari iseda nega lalonai, “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Harihari oi duahia magasin be unai haroro gaukarana ena kahana ta. Oi ai hagoadaia peroveta koikoi taudia ese oi idia koia lasi totona. Dirava ena Hereva lalonai oi tahua namonamo Dirava ena Basileia ena hereva momokani oi davaria totona. Bena, unai Basileia dekenai oi kamonai, ia be Mamoe Naria Tauna Badana, Iehova Dirava, ese ia henia gauna. Momokani, unai Basileia sibona be taunimanima edia helaro momokani, bona do ia boio lasi.

[Picture on page 5]

Luther ia hadibaia ita laloa diba tanobada gavamani be Dirava ena Basileia bamona

[Credit Line]

Courtesy of the Trustees of the British Museum

[Picture on page 7]

Lalokau Mamoe Naria Tauna bamona, Iehova be iena Basileia amo taunimanima ese idia havaraia diba lasi gaudia do ia karaia