Duahia Taudia Edia Henanadai

Farao ese Sara, Abraham adavana, ia adavaia, a? Bible haida be Genese 12:19 idia hahanaia neganai, unai bamona idia hereva.

Lasi, Farao ese Sara (Sarai) be iena adavana ai ia halaoa dalana gau ta ese ia koua. Unai dainai, ta ese Sara ena dagi bona ena ladana namona ia gwauraia dika diba lasi.

Unai sivarai ibounai ita diba neganai unai ita itaia diba. Aniani lasi negana ta dainai Abraham (Abram) be nega sisina lalonai Aigupito dekenai ia lao. Ia gari badina ia laloa iena hahine hairaina, Sara, dainai haida ese ia do idia hamasea toho. Abraham be Sara ena amo natuna mero ta ia do havaraia lasi, unai dainai bema Aigupito dekenai ia mase, Garana ia vara dalana be lasi, unai Garana amo tanobada besedia iboudiai be sibodia do idia hanamoa. (Genese 12:​1-3) Unai dainai Abraham ese Sara ia hamaoroa ia gwau ia be iena taihuna, badina momokani edia tamana be tamona.​—Genese 12:​10-13; 20:12.

Iena gari be mai ena badina. Diba tauna August Knobel ia gwau: “Abram ese Sarai ia hamaoroa Aigupito dekenai ta ese Abram idia alaia mase garina namona be Sarai ese taunimanima ia hamaorodia ia be Abraham ena taihu. Bema idia laloa ia be headava hahine, Aigupito tauna ese ia abia dalana tamona be ena adavana eiava ena biaguna ia hamasea; bema ia laloa ia be tau ta ena taihuna, vadaeni, dala namona ia noho unai tau amo ia abia ia adavaia totona.”

To Aigupito lohia taudia be Abraham danu idia herevahereva lasi Farao ese Sara ia adavaia dalana idia kikilaia totona. Idia be hairai hahinena Sara idia abia lao Farao ena ruma dekenai, bona Aigupito ena lohia tauna be Abraham dekenai harihari gaudia ia henidia, ia laloa Abraham be Sara ena tadikakana sibona. To unai murinai, Iehova be Farao ena ruma bese ia hahisidia. Ita diba lasi dalana ai Sara be mai adavana sivaraina Farao dekenai ia hedinarai neganai, Abraham dekenai ia gwau: “Badina be dahaka oi gwau, ‘Ia be lauegu taihuna,’ unai dainai lau adavaia gwauraia? Vadaeni ia be oiemu adavana. Oi abia, umui lao.”​—Genese 12:​14-19, NW.

The New English Bible bona ma Bible haida be atai ai torea toretore idaudia be unai siri lalonai inai bamona idia hahanaia: “Unai dainai lau abia lauegu adavana” eiava unai bamona hereva ta. Ena be ita gwau lasi unai hereva idia hahanaia kerere, to unai bamona torea dalana be hegeregere Farao ese Sara ia adavaia momokani, bona idia headava vadaeni bamona. Ita laloa Genese 12:19 dekenai unai Heberu herevana “abia” torea dalana anina be unai kara idia do karaia ore lasi. New World Translation Bible be unai Heberu herevana ia hahanaia unai sivarai ena hereva iboudiai edia anina hegeregerena; unai dainai unai hereva ena anina korikori ia hahedinaraia​—“unai dainai lau adavaia gwauraia.”a Ena be Farao be Sara ia “adavaia gwauraia,” to ia be unai kara do ia hamatamaia lasi.

Ena be nega momo taunimanima idia gwau Abraham ena kara be kerere, to gwauhamata Garana ena dala bona unai amo taunimanima iboudiai edia namo dainai ia karaia.​—Genese 3:15; 22:​17, 18; Galatia 3:16.

Unai bamona kara ia vara Isako bona iena hahine, Rebeka, dekenai. Isako ese Rebeka ia hamaoroa taunimanima ia hadibadia lasi ia headava vadaeni. Unai negana ai edia natuna mero, Iakobo, ia dekena amo Garana do ia mai, ia vara vadaeni bona ia be tauhau ta. (Genese 25:​20-27; 26:​1-11) To, reana unai kara maorona ia karaia ena badina be Abraham ese iena kara ia karaia ena badina hegeregerena. Aniani lasi negana ta ai, Isako bona iena ruma bese be Filistia king, ladana Abimeleka, ena gabu ai idia noho. Bema ia diba Rebeka be Isako ena hahine, reana Abimeleka be Isako ena bese taudia iboudiai ia hamasea diba, bona reana anina be Iakobo do ia mase. Unai negana ai danu, Iehova be kara ta ia karaia iena hesiai taudia ia naridia totona bona Garana ena vara dalana ia naria totona.

[Footnotes]