Moale Momokani be Iehova Ena Hesiai Gaukara Dekenai
“Iakobo ena Dirava ese ia durua tauna ia moale, iena helaro be ena Dirava Iehova dekenai.”—SALAMO 146:5.
1, 2. Taunimanima haida idia gwau moale ena anina be dahaka, bona hari inai negai taunimanima momo idia laloa edia moale dalana be dahaka?
MOALE ena anina be dahaka? Diksenari karaia taudia, aonega taudia, bona tomadiho idia stadilaia taudia be lagani handred momo lalodiai ena anina idia tahua. To taunimanima haida ese idia gwauraia anina idia abia dae lasi. Encyclopædia Britannica bukana ia gwau: “ ‘Moale’ ena anina be ia hedinarai goevagoeva lasi herevana ta.” Taunimanima idauidau dekenai moale ena anina be idauidau, edia lalohadai mauri dekenai idia idauidau.
2 Taunimanima momo herea idia moale bema idia gorere lasi, kohu idia abia, bona mai edia turadia. To, taunimanima haida ena be unai gaudia idia abia, to idia do moale lasi. Iehova Dirava dekenai edia mauri idia gwauhamatalaia tatau bona hahine totona, Bible ese ia hahedinaraia Dirava ia gwauraia moale dalana bona taunimanima idia gwauraia moale dalana be idia idau herea.
Moale Abia Lalohadai Idauna
3, 4. (a) Iesu ia gwau daidia do idia moale? (b) Iesu ena hereva moale abia dalana dekenai ena anina be dahaka?
3 Ororo dekenai ia haroro neganai, Iesu Keriso ia gwau lasi taunimanima be gorere lasi, kohu abia, bona unai bamona kara haida dainai moale do idia davaria. Ia gwau “lauma gaudia idia tahua taudia” bona “kara maoromaoro idia ura dikadika idia karaia taudia” ese moale momokanina do idia davaria. To taunimanima ese moale momokanina idia abia totona ma gau ta idia karaia, Iesu ese hereva idauna ta ia herevalaia, ia gwau: “Tai noho taudia be idia namo, badina Dirava ese do ia hanamodia.” (Mataio 5:3-6, NW) Iesu ia gwau lasi taunimanima edia lalokau tauna ta ia mase neganai do idia moale. To, iena hereva ena anina be edia kara dika bona ia havaraia gaudia dainai taunimanima idia tai.
4 Aposetolo Paulo ia gwau taunimanima iboudiai be kara dika dainai idia hisihisi noho bona edia helaro be unai “dika ena bodaga dekena amo” Dirava ese idia do ia ruhaia.” (Roma 8:21, 22) Keriso ia henia boubou karana amo Iehova ese taunimanima edia kara dika ia gwauatao, unai idia abia dae bona Dirava ena ura idia karaia taudia ese lalo-namo bona moale momokanina idia davaria. (Roma 4:6-8) Ororo dekenai ia haroro neganai, Iesu ia gwau “manau taudia,” “hebogahisi taudia,” “lalona goevagoeva taudia,” bona “maino taudia” ese moale do idia davaria. Ia gwau ena be dagedage do idia davaria, to unai bamona manau taudia ese edia moale karana do idia haboioa diba lasi. (Mataio 5:5-11, NW) Bona ita diba danu, taga taudia bona ogogami taudia be unai dala sibona amo moale do idia abia diba.
Moale Ena Badina Korikori
5. Dirava ena gwauhamata hesiai taudia idia moale ena badina be dahaka?
5 Kohu abia karana ese moale momokanina ia havaraia diba lasi. Aonega tauna Solomon ia gwau: “Iehova ena hahenamo be taga ia habadaia bona lalohisihisi sisina ia atoa kau lasi.” (Hereva Lada-isidia 10:22) Iehova ese guba bona tanobada ia lohiaia ena maoro idia abia dae taudia be idia moale bona Dirava ena hahenamo idia abia. Gwauhamata tauna eiava hahine be Iehova ese ia hanamoa ena mamina ia abia neganai ia moale momokani. Bible dekenai, ia hahedinaraia taunimanima edia lalona idia namo, gaukara amo idia moale, bona Iehova ena hesiai gaukara idia hagugurua dainai moale idia davaria.
6. Iehova ena taunimanima idia moale momokani totona, dahaka idia karaia be gau badana?
6 Moale momokanina ita abia totona iseda turana karana Iehova dekenai be gau badana. Dirava lalokau henia bona abidadama henia be moale ena badina. Iehova ena gwauhamata hesiai taudia be mai edia kudouna ibounai ida Paulo ena hereva idia abia dae, ia gwau: “Tau ta lasi ia sibona dekenai ia mauri noho . . . [Iehova] dekenai ita mauri . . . Ita be [Iehova] ena.” (Roma 14:7, 8) Unai dainai, bema Iehova ita abidadama henia lasi bona ita ura lasi iena ura ita badinaia, moale momokanina do ita davaria diba lasi. Iesu ia gwau: “Gau badana momokani be inai, Dirava ena hereva idia kamonaia bona idia badinaia taudia be idia moale bada.”—Luka 11:28.
Moale Havaraia Gaudia Idaudia
7, 8. (a) Moale havaraia gaudia be edena bamona do ita lalodia be namo? (b) Headava bona natudia havaraia karadia dekenai dahaka ia hedinarai goevagoeva?
7 Ita kikilaia vadaeni gaudia be moale ena “badina,” eiava ita “karaia noho gaudia,” badina moale idia abia totona Iehova ena gwauhamata hesiai taudia be nega ibounai idia badinadia be gau badana. To ma gau haida idia noho danu, unai gaudia ese nega haida ita idia hamoalea to ma nega haida ita idia hamoalea maragi eiava ita idia hamoalea lasi. Idau negai ruma bese kwarana taudia bona Keristen taudia edia nega ia do mai lasi neganai, idia laloa idia headava bona natudia idia havaraia neganai sibona moale do idia davaria. Rahela ena noinoi herevana Iakobo dekenai ese unai ia hahedinaraia, ia gwau: “[Bema] lauegu natuna oi henigu lasi, vadaeni lau mase.” (Genese 30:1) Natudia idia havaraia idia laloa bada karana ese Iehova ena ura unai nega lalonai ia hagugurua.—Genese 13:14-16; 22:17.
8 Idau negai, Iehova ena bese idia headava bona natudia idia havaraia be gau badana, idia gwau unai be Dirava ena hahenamo idia dekenai. To, edia mauri negana lalonai, unai kara bona ma kara haida dainai hisihisi idauidau idia davaria. (Salamo 127, 128; Ieremia 6:12; 11:22; Rohe-ahu Bukana 2:19; 4:4, 5 itaia danu.) Unai dainai ia hedinarai goevagoeva, headava bona natudia havaraia karadia ese nega haida sibona moale do idia havaraia.
Idau Negai Headava Lasi Moalena
9. Dahaka dainai lagani ta ta iboudiai lalonai Iefeta natuna kekenina idia hanamoa?
9 Ena be idia headava lasi, to Dirava ena hesiai taudia momo herea ese moale momokanina idia davaria. Iefeta natuna kekenina be ena tamana ena gwauhamata herevana ia matauraia dainai, mai ena ura danu ia headava lasi. Nega sisina ia bona ena kekeni turadia ese ena rami hebou ai do ia noho maurina idia taitailaia. To nega ibounai Iehova ena ruma dekenai hesiai gaukara ia karaia hanaihanai dainai ia moale bada herea, reana “hebou kalagana ena iduara dekenai idia gima noho hahine” danu ia gaukara hebou! (Esodo 38:8) Unai gaukara ia karaia dainai, lagani ta ta iboudiai hanamoa hereva idia henia.—Hahemaoro Taudia 11:37-40.
10. Iehova ia ura Ieremia be dahaka ia karaia lasi, bona unai dainai ia lalohisihisi, a?
10 Ia be nega dikana lalonai ia noho dainai, Iehova ia ura lasi peroveta tauna Ieremia ia headava bona natuna ia havaraia. (Ieremia 16:1-4) To Ieremia ia davaria Dirava ena hereva be idia momokani, ia gwau: “Iehova ia abidadama henia tauna be namo; ena abidadama be Iehova dekenai.” (Ieremia 17:7) Lagani 40 bona ma haida iena peroveta gaukara ia karaia lalonai, Ieremia be mai ena abidadama danu headava lasi dekenai ia noho. Ita diba maoro lasi, to reana gabeai ia headava lasi bona natuna ia havaraia lasi. To, ita daradara lasi, ita diba Ieremia be ia moale, badina ia sibona ena peroveta herevana dekenai ia gwau abidadama Iuda orena taudia be “edia vairana do idia diaridiari, Iehova ena hahenamo dainai,” ani?—Ieremia 31:12.
11. Ena be edia adavana be lasi, to Bible ese ia gwauraia mai edia moale danu Iehova ena hesiai gaukara idia karaia taudia haida be daidia?
11 Tatau bona hahine momo idia headava lasi eiava idia be vabu eiava dogae, to mai edia moale danu adavana lasi dekenai Iehova ena hesiai gaukara idia karaia. Unai bamona taudia haida be peroveta hahine Ana; reana Doreka, eiava Tabita; aposetolo Paulo; bona haheitalai hereadae tauna Iesu Keriso.
Headava Lasi to Idia Moale
12. Hari inai nega lalonai, Iehova ena gwauhamata moale hesiai taudia haida ese dahaka idia karaia lasi, bona badina be dahaka?
12 Hari inai nega lalonai, Iehova ena Witness taudia tausen momo be mai edia abidadama danu Dirava ena hesiai gaukara idia karaia noho, to edia adavana be lasi. Unai taudia haida ese Iesu ena boiboi herevana idia abia dae diba, ia gwau: “Inai hereva [idia headava lasi] do ia abia dae diba tauna ese do ia abia dae.” Unai bamona idia karaia “Guba Basileia totona.” (Mataio 19:11, 12) Idia be mai edia nega bada bona mai edia goada ibounai danu Basileia ena gaukara idia habadaia diba, bona Dirava ese idia ia henia mauri namona idia gaukaralaia namonamo diba. Idia momo be pioneer, misinari, eiava hedikwota ena Betele rumana eiava Society ena branch opesi ta ta dekenai gaukara idia karaia.
13. Dahaka haheitalai ese idia hahedinaraia adavana lasi taudia idia moale diba?
13 Madi, taihu burukana ta ena mauri sivaraina idia torea bona unai sivarai ena ladana be “Single and Happy as a Pioneer.” (“Headava Lasi, to Mai Moale danu Lau Pioneer.”) (The Watchtower, May 1, 1985, rau 23-6) Ia headava lasi taihu ma ta be lagani 50 bona ma haida Betele rumana dekenai ia gaukara, ia gwau: “Lauegu mauri bona lauegu gaukara lau moalelaia bada. Lau ura henia bada gaukarana dekenai lauegu gaukara lau habadaia noho. Lau lalohisihisi lasi. Bema mai dalana, lau abia hidi vadaeni mauri dalana do lau karaia lou.”—The Watchtower, June 15, 1982, rau 15.
14, 15. (a) Aposetolo Paulo ena hereva hegeregerena, adavana lasi dekenai idia noho totona, dahaka be gau badana? (b) Dahaka dainai Paulo ia gwau adavana lasi tauna be “kara namo herea” bona ‘moale’ dekenai ia noho?
14 Unai hereva “abia hidi” mani oi laloa. Paulo ia torea, ia gwau: “Bema tau ta iena lalona ia auka, bona ia laloa [eiava dala ia abia hidi] do ia headava lasi be namo—bona bema ia be mai ena siahu iena ura do ia biagua, vadaeni ia headava lasi danu be namo. Unai dainai bema tau ta ia headava, ia be kara namo ia karaia vadaeni. To bema tau [eiava hahine] ta ese ia headava lasi, ia be kara namo herea ia karaia vadaeni.” (1 Korinto 7:37, 38, NW) Dahaka dainai “ia be kara namo herea”? Paulo ese anina ia gwauraia, ia gwau: “Lau ura lasi laloa hekwarahi umui abia. Headava lasi tauna [eiava hahine] ese Lohiabada do ia hamoalea daladia ia laloa. Umui durua totona inai bamona lau hereva. . . . Lau ura kara namo bona kara maoromaoro do umui karaia, bona Lohiabada ena gaukara do umui karaia momokani, mai laloa rua lasi.”—1 Korinto 7:32-35.
15 ‘Lohiabada do idia hamoalea totona’ idia ese “Lohiabada ena gaukara do [idia] karaia momokani, mai laloa rua lasi” neganai, unai be moale ia havaraia, a? Paulo be unai bamona ia laloa. Keristen vabu ta ia herevalaia neganai, ia gwau: “Unai hahine ese ia ura henia tauna do ia adavaia diba, taravatu lasi. To ekalesia tauna sibona do ia adavaia diba. To lauegu laloa be inai: bema ia vabu noho be iena lalona do ia namo. Bona lau laloa danu Dirava ena Lauma be lauegu lalona dekenai ia noho.”—1 Korinto 7:39, 40.
Adavana Lasi Ena Namo
16. Adavana lasi Iehova ena Witness taudia ese dahaka hahenamo haida idia abia?
16 Ena be Keristen tau eiava hahine ta ena adavana be lasi badina unai dala ia abia hidi eiava ma badina ta dainai, to ia be adavana lasi dainai gau namodia momo ia davaria diba. Adavana lasi taudia be mai edia nega idia stadi bona idia stadilaia hereva idia laloa namonamo totona. Bema unai nega idia gaukaralaia namonamo, edia diba lauma gaudia dekenai do idia habadaia. Hekwakwanai idia davaria neganai edia adavana be lasi dainai idia kikilaia hebou diba lasi, unai dainai idia momo be Iehova dekenai idia tabekau momo bona gau ibounai dekenai iena heduru idia tahua; unai kara ese edia hetura karana Iehova dekenai ia habadaia. (Salamo 37:5) Unai kara ese edia hetura karana Iehova dekenai ia habadaia.
17, 18. (a) Iehova ena hesiai taudia be adavana lasi neganai, edena dala idauidau amo edia hesiai gaukara idia habadaia diba? (b) Ena be edia adavana be lasi, to Iehova ena hesiai taudia haida edia moale be edena bamona idia herevalaia?
17 Adavana lasi Keristen taudia be mai edia nega dala idauna dekenai edia haroro gaukara idia habadaia bona unai ese Iehova ena ladana ia hanamoa. Society ese sikuli kosi matamatana ta idia karaia, ena ladana be Hesiai Gaukara Hadibaia Sikulina bona adavana lasi eiava dogae taudia sibona ese unai kosi idia karaia diba. Adavana lasi taihudia danu be mai edia nega hesiai gaukara idia habadaia totona. Ai kikilaia vadaeni taihu burukana be sibona ena ura dainai ia lao Africa dekenai hesiai gaukara ia karaia totona, bona ia lao neganai ia gwau “iena lagani be 50 ia hanaia bona ia goada momokani lasi.” Bona ena be haroro gaukara idia taravatulaia bona misinari taudia iboudiai idia luludia, to unuseniai ia noho. Ena be harihari ena lagani be 80 ia hanaia, to unuseniai pioneer gaukara ia do karaia noho. Ia moale, a? Iena sivarai lalonai ia gwau: “Lau be adavana lasi dainai lau be gabu idauidau momo dekenai lau loaloa diba; unai ese lau ia durua lauegu hesiai gaukara idauidau lau karaia bada totona, bona lau be unai amo moale bada lau davaria. . . . Lagani idia hanai lalonai lauegu turana karana Iehova dekenai ia bada ia lao. Africa dekenai lau noho adavana lasi, to Dirava be lauegu Naria Tauna.”
18 Danu, lagani momo herea lalonai Watch Tower Society ena hedikwota rumana dekenai ia gaukara tadikaka ta ena hereva oi laloa. Ena be ia headava lasi bona ia be guba maurina ena helaro ia abia dainai gabeai do ia headava diba lasi, to ia moale. Ena lagani be 79 neganai, toretore dekenai ia gwau: “Dina ta ta iboudiai iseda lalokau guba Tamana be guriguri dekenai lau noia heduru bona aonega lau ia henia totona, lauma dalanai lau goada noho totona, lau gorere lasi bona tauanina goadana lau abia totona, badina unai neganai iena ura helagana lau karaia noho diba. Idia hanaia lagani 49 lalodiai Iehova ena hesiai gaukara lau karaia, bona unai nega lalonai moale bona hahenamo be lauegu mauri lalonai lau davaria. Bona Iehova ena hebogahisi karadia dainai, iena gaukara do lau karaia noho iena ladana hanamoa bona hahairaia totona ela bona iena taunimanima do ia hanamodia. . . . Iehova moalelaia karana ese lau ia durua abidadama goadana lau dogoatao noho totona, bona lau naria noho Iehova ena inai taudia iboudiai do idia ore bona tanobada ibounai be iena hairai amo do ia honu.”—Numera 14:21; Nehemia 8:10; The Watchtower, November 15, 1968, rau 699-702.
Moale Momokanina Havaraia Gaudia be Dahaka?
19. Ela bona hanaihanai edena dala sibona amo moale momokanina ita abia diba?
19 Iseda hebamo karana Iehova dekenai, ita ia lalo-namo henia, bona ita ia hanamoa be gau badadia—unai bamona karadia ese moale momokanina ita dekenai do idia havaraia ela bona hanaihanai. Moale momokanina idia havaraia gaudia dekenai lalohadai maorona idia abia neganai, Iehova ena hesiai gaukara idia karaia headava taudia idia lalo-parara edia mauri lalonai edia headava idia laloa guna lasi be namo. Idia ese aposetolo Paulo ena sisiba idia badinaia, ia gwau: “Varavara taudia e, lauegu hereva ena anina be inai: nega be kwadogi. Unai dainai inai nega kwadogina ia noho lalonai, tatau mai edia adavana be adavana lasi taudia bamona do idia noho be namo.” (1 Korinto 7:29) To ita gwau lasi unai anina be edia adavana idia naria namonamo lasi. Lo Keristen headava tataudia be Iehova ena hesiai gaukara idia laloa guna, bona edia hahine be Dirava idia gari henia dainai mai lalokau danu edia tatau idia durudia, idia haida be edia tatau danu nega ibounai hesiai gaukara idia karaia.—Hereva Lada-isidia 31:10-12, 28; Mataio 6:33.
20. Keristen taudia momo edia lalohadai maorona edia headava maduna dekenai be dahaka?
20 Headava taudia haida be sekit naria taudia, haida be Betele gaukara idia karaia, haida be kongregesen ena elda taudia—oibe, idia headava Keristen taudia iboudiai be Basileia ena gaukara idia laloa guna neganai—idia be ‘tanobada gaudia be anina lasi bamona idia laloa’; edia mauri idia gwauhamatalaia dainai Iehova ena hesiai gaukara idia karaia totona idia goada karaia edia headava ena maduna be edia mauri lalonai idia naria namonamo totona. (1 Korinto 7:31) To, idia moale. Badina be dahaka? Badina edia moale ena badina badana be headava sibona lasi, to Iehova ena hesiai gaukara idia karaia dainai idia moale. Bona mai edia abidadama headava tataudia bona hahinedia—oibe, edia natudia danu—unai bamona kara dainai idia moale.
21, 22. (a) Ieremia 9:23, 24 ena hereva hegeregerena, dahaka dainai ita moale bada be namo? (b) Hereva Lada-isidia 3:13-18 dekenai ia gwau moale havaraia gaudia be dahaka?
21 Peroveta tauna Ieremia ia gwau: “Iehova be inai bamona ia hereva: ‘Aonega tauna ia hekokoroku lasi ena aonega dainai, bona goada tauna ia hekokoroku lasi ena goada dainai. Taga tauna ia hekokoroku lasi ena taga dainai. To hekokoroku tauna ia hekokoroku badina be ena lalona ia parara bona ia diba lau, lau be Iehova, hebogahisi karadia bona hahemaoro goevagoeva bona kara maoromaorodia lau karaia tanobada dekenai; badina be unai gaudia dekenai lau moale,’ Iehova ia gwau.”—Ieremia 9:23, 24.
22 Ena be ita headava eiava ita headava lasi, to ita ia hamoalea bada gauna be Iehova ita dibaia bona ita lalo-parara iena ura ita karaia neganai ita do ia hanamoa. Danu ita moale badina mauri ena kara goeva ita diba, unai be Iehova ese ia moalelaia karadia unai. Pavapava Solomon ia adavaia hahine be momo herea, to ia diba headava sibona lasi be moale ena ki. Ia gwau: “Aonega ia davaria tauna ia moale, bona lalo-parara ia abia tauna danu; badina be unai gau amo idia abia ahuna ese siliva amo idia abia ahuna ia hereaia, bona ena davana ese golo ia hereaia. Ena davana ese herahera nadidia edia davana ia hereaia, bona ia moalelaia gaudia ta be ia ida do idia hegeregere lasi. Mauri daudauna be iena imana idibana dekenai; taga bona hairai be iena imana laurina dekenai. Ena dala be moale daladia; ena dala iboudiai be maino daladia. Ia be mauri auna hegeregerena, idia dogoatao taudia dekenai; idia dogoatao namonamo taudia be moale taudia idia gwauraidia.”—Hereva Lada-isidia 3:13-18.
23, 24. Dahaka dainai ita diba maoro nega matamatana lalonai Iehova ena abidadama hesiai taudia iboudiai do idia moale?
23 Namona be headava taudia be Dirava ena ura karaia karana amo moale hanaihanai do idia davaria. Danu, bema iseda lalokau tadikaka bona taihu be idia headava lasi badina unai dala idia abia hidi eiava ma badina ta dainai, namona be idia davaria hetoho iboudiai idia haheaukalaidia bona Iehova ena hesiai gaukara amo moale bona lalo-namo do idia abia harihari ela bona hanaihanai. (Luka 18:29, 30; 2 Petero 3:11-13) Dirava ena nega matamatana do ia vara negana lalonai, “buka haida” do idia kehoa. (Apokalupo 20:12) Unai buka lalonai taravatu bona hahegani matamatadia do idia noho, bona unai taravatu idia badinaia taudia ese moale do idia davaria.
24 Momokani, ita diba, iseda “moale Diravana” be gau namodia momo ita do ia henia bena moale momokanina do ita abia. (1 Timoteo 1:11, NW) Hanaihanai Dirava ese ‘iena imana ia kehoa bona mauri gaudia iboudiai edia ura gaudia ia henidia.’ (Salamo 145:16) Unai dainai, ita diba harihari bona ela bona hanaihanai danu moale momokanina abia dalana be Iehova ena hesiai gaukara ita karaia.
Edena Bamona Do Oi Haere?
◻ Iehova ena gwauhamata hesiai taudia idia moale ena badina be dahaka?
◻ Bible ia gwauraia negana lalonai, Iehova ena adavana lasi moale hesiai taudia haida be daidia?
◻ Dahaka dainai Paulo ese adavana lasi maurina ia gwauraia namo, bona Keristen taudia haida be edena bamona idia hahedinaraia edia mauri lalonai moale idia davaria?
◻ Ela bona hanaihanai moale abia dalana be dahaka?
◻ Dahaka dainai ita diba maoro nega matamatana lalonai abidadama taudia iboudiai do idia moale?
[Picture on page 16]
Adavana lasi taihu momo be mai edia moale danu nega ibounai Iehova ena hesiai gaukara idia karaia
[Picture on page 18]
Iehova ena hesiai gaukara karaia be moale ena badina badana