Basileia Haroro Ripot

Nigeria Sikuli Natudia Edia Abidadama Dainai Hahenamo Idia Davaria

APOSETOLO Paulo ia gwau: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.” (Roma 12:18) Ena be dagedage idia davaria, to Nigeria dekenai, Iehova ena Witness sikuli natudia ese unai sisiba idia badinaia. Unai dainai, Iehova ese ia hanamodia.

◻ Tisa ta be Iehova ena Witness taudia ia ura henidia lasi momokani. Sikuli natudia edia daba hebouna ta dekenai, unai tisa ese Witness natudia ibounai ia hamaorodia vaira kahana dekenai do idia gini bona bese abia isi anena do idia anelaia. Unai Witness natudia idia gwau unai bamona idia karaia diba lasi, idia gwau Dirava sibona idia tomadiho henia. Unai tisa ese idia ibounai ia hakaudia lasi murimuri dekenai bona ia hamaorodia ava do idia utua. Unai Witness natudia be ava idia utua noho bona sikuli natudia iboudiai be edia klas ta ta idia karaia noho.

Witness tamana ta ese Sikuli bona Iehova ena Witness Taudia buklet ta ia henia unai tisa dekenai, bona ia dekenai Iehova ena Witness taudia edia gini siri karana ia herevalaia. Unai tisa ia ura lasi Witness ena hereva ia kamonai bona ia ura lasi buklet ia abia. To maoromaoro ia ese Witness natudia edia panisia karana ia habadaia momokani.

Unai Witness natudia be mai haheauka danu ava idia utua noho, ena be nega haida tisa ia noho lasi, to idia ese ava idia utua noho. Nega ta ai, unai tisa be ia komu bona hehuni dalanai ia raraidia noho, unai Witness natudia be Basileia ane idia anelaia bona idia gaukara noho. Unai tisa ia hoa bada, unai dainai ia siaidia lou edia klas ta ta dekenai, ia gwau edia kara dainai ia hoa. Dahaka ia vara? Hari unai tisa be Iehova ena Witness taudia danu Bible stadi idia karaia noho!

Momokani, unai sikuli natudia be hahenamo bada idia davaria badina Iehova ena taravatu dekenai abidadama idia hahedinaraia.​—Hereva Lada-isidia 10:22.

◻ Ruth bona ena turadia danu be Iehova ena ura idia badinaia, “idia be tanobada ena lasi” dainai hahenamo idia davaria. (Ioane 17:16) Hari, Ruth ena mauri lagani be 18, iena mauri lagani be 12 neganai, pioneer gaukara ia hamatamaia. Ia bona ma Witness haida be sikuli taudia amo dagedage idia davaria badina bese abia isi anena idia anelaia lasi dainai. Tisa ta ia ura unai kekeni edia tama bona sina ia itaia. Sikuli buklet dekena amo unai kara ena badina be edia tisa dekenai idia gwauraia hedinarai namonamo, bena murinai unai tisa ese Witness sikuli natudia ia hahekwakwanaidia lasi.

To, nega ta India ena tisa ta ese Witness kekeni ta ia gwau henia bona unai kekeni be bese abia isi anena ia anelaia lasi dainai klas taudia ibounai vairanai ia panisia. Unai kekeni be gari lasi dekenai ena abidadama ia gwauraia hedinarai, unai dainai tisa ese ia abia lao sikuli ena biaguna ia itaia totona. Unuseniai idia ginidae neganai, unai Witness kekeni ia itaia sikuli ena biaguna iharuana danu ia noho. Ia hoa badina sikuli biaguna bona biaguna iharuana idia kiri noho. Sikuli biaguna be unai tisa ia hamaoroa, ia gwau: “Inai kekeni dainai oi lalohisihisi lasi. Ena be idia do oi hamasedia gwauraia to mase garina idia gari lasi, to bese abia isi anena do idia anelaia garina idia gari. Edia sivarai oi kamonai lasi, a?” Unai sikuli biaguna bona ena durua hahinena be Iehova ena Witness taudia edia abidadama bona gini goada karana idia kikilaia. Sikuli biaguna ese unai kekeni ia sori henia badina klas dekenai ena tisa ese ia hahemaraia dainai. Bona ma ia gwau: “Oiemu abidadama oi goadalaia noho. Oiemu tomadiho lau matauraia bada bona sikuli gabuna lalonai bona sikuli murimuri dekenai oiemu tomadiho dainai oi gini goada karana dainai lau moale.” Gabeai, ia inai henia tisana ese Witness kekeni ia sori henia, bona ia gwau hari Witness taudia edia gini siri karana ena badina ia lalo-pararalaia.

Unai natudia ese Heberu memero toi edia kara idia tohotohoa, unai memero toi be edia abidadama Dirava dekenai idia rakatania lasi bona idia ese kaivakuku idia tomadiho henia lasi, bona Daniel ena kara idia tohotohoa danu, iena guriguri karana Dirava dekenai ia hadokoa lasi. Unai taudia ibounai be Dirava ese ia hanamodia badina idia ibounai ese Dirava ena taravatu maoromaorodia idia abidadama henia.​—Daniel, karoa 3 bona 6.