Ruhaia Mauri Namona Besena to Mai Edia Maduna
“Hereva momokani be do umui diba, bona hereva momokani ese umui do ia ruhaia.”—IOANE 8:32.
1, 2. (a) Tanobada ena sivarai dekenai ruhaia mauri namona be edena bamona gau badana? (b) Daika sibona be ruhaia mauri namona momokanina dekenai ia noho? Anina oi gwauraia.
RUHAIA mauri namona. Unai be mai anina bada herevana ta! Taunimanima ese ruhaia mauri namona idia ura henia dainai tuari momo bona gavamani hamorua karadia momo idia karaia, bona ita gwau diba lasi taunimanima edia noho hadikaia karadia hida idia vara. Momokani, The Encyclopedia Americana ia gwau: ‘Idia vara noho besedia iboudiai lalonai taunimanima idia laloa bada gauna be ruhaia mauri namona do idia abia.’
2 To taunimanima hida be ruhaia mauri namona korikorina dekenai idia noho? Taunimanima hida be ruhaia mauri namona ena anina idia diba? The World Book Encyclopedia ia gwau: “Taunimanima be ruhaia mauri namona korikorina idia abia totona, namona be ta ese edia lalohadai, edia hereva, eiava edia kara ia koua lasi. Namona be idia diba dahaka idia abia hidi diba, bona namona be idia dekenai abia hidi siahuna ia noho.” Unai oi laloa neganai, ruhaia mauri namona korikorina dekenai ia noho tauna ta oi diba, a? Daika ia hereva diba “ta ese edia lalohadai, edia hereva, edia kara ia koua diba lasi”? Momokani, gau ibounai dekenai taunimanima tamona sibona be unai bamona—Iehova Dirava. Ia sibona be mai ena ruhaia mauri namona korikorina. Ia sibona be ia ura gauna ia abia hidi diba bona herevana daika ese ia koua toho to ia be do ia karaia diba. Ia be “Siahu Ibounai Diravana.”—Apokalupo 1:8; Isaia 55:11.
3. Nega momo dahaka idia karaia dainai taunimanima be ruhaia mauri namona idia moalelaia diba?
3 Taunimanima edia ruhaia mauri namona be mai ena hetoana. Nega momo siahu tauna ta ese unai ia henia ita dekenai bona ia ita badinaia neganai iseda ruhaia mauri namona ita dogoatao diba. Momokani, kahirakahira nega ibounai, tau ta bema iena ruhaia mauri namona ia henia tauna ena siahu ia abia dae neganai ruhaia mauri namona ia dogoatao diba. Haheitalai be, “ruhaia mauri namona tanobadana” ai idia noho taudia be gau namo momo idia moalelaia, hegeregere, edia ura gabudia ai idia loaloa diba, idia ura herevadia idia herevalaia diba, bona idia ura henia tomadihona idia karaia diba. Unai bamona idia noho ena badina be dahaka? Gavamani ena taravatu. Taravatu ia badinaia noho neganai sibona tau ta ese unai gaudia ia moalelaidia diba. Bema iena ruhaia mauri namona ia hadikaia bona taravatu ia utua, siahu taudia ese do idia kota henia, bona reana dibura ai ia noho dainai iena ruhaia mauri namona ia koua haraga.—Roma 13:1-4.
Dirava ese Ia Henia Ruhaia Mauri Namona be Mai Ena Maduna
4, 5. Iehova idia tomadiho henia taudia be dahaka ruhaia mauri namona idia moalelaia, bona idia ia henia maduna be dahaka?
4 Keristen ginigunadia edia nega lalonai, Iesu ese ruhaia mauri namona ia herevalaia. Iuda taudia dekenai ia gwau: “Bema lauegu hadibaia hereva umui badinaia neganai umui be lauegu diba tahua taudia momokani. Hereva momokani be do umui diba, bona hereva momokani ese umui do ia ruhaia.” (Ioane 8:31, 32) Ia be hereva dalanai eiava tomadiho dalanai ruhaia mauri namona ia herevalaia lasi. Ia be Roma ena lohia dalana metau amo ruhaia dalana ia herevalaia lasi, ena be Iuda taudia momo be unai idia tahua. Lasi, ia herevalaia gauna be gau herea momokanina ta, ia be tanobada taudia edia taravatu eiava tanobada lohia tauna ena ura kava gauna lasi, to ia be Guba bona Tanobada Edia Siahu Ibounai Lohiabadana, Iehova, ese ia henia ruhaia mauri namona. Ia be meamea dainai gari kava karana, diba lasi tomadiho karadia, bona ma gau momo amo idia ia ruhaia mauri namona ia herevalaia. Iehova ese ia henia ruhaia mauri namona be ruhaia mauri namona korikorina, bona do ia noho ela bona hanaihanai.
5 Aposetolo Paulo ia gwau: “[Iehova] be Lauma. Bona [Iehova] ena Lauma ia noho gabudia dekenai ura kwalimu danu ia noho.” (2 Korinto 3:17) Lagani daha momo lalodiai Iehova be taunimanima ia kara henidia badina ia ura abidadama taudia be tanobada dekenai ruhaia mauri namo hereana do idia moalelaia, unai be “Dirava ena natudia idia abia ruhaia mauri namona.” (Roma 8:21, NW) To hari, Iehova be Bible ena hereva momokani amo ita dekenai ruhaia mauri namona sisina ia henia, bona unai ruhaia mauri namona bema ita hadikaia neganai ita do ia hahemaoro henia. Aposetolo Paulo ia torea, ia gwau: “Gau ta Dirava dekena amo ita hunia diba lasi. Ia ese ia karaia gaudia ibounai be nega ibounai ia itaia. Idia be hanaihanai iena matana vairanai idia noho. Bona Dirava ese danu iseda kara do ia kota henia.”—Heberu 4:13.
6-8. (a) Adam bona Eva ese idia moalelaia ruhaia mauri namona daladia haida be dahaka, bona dahaka dainai unai ruhaia mauri namona daladia idia dogoatao noho diba? (b) Adam bona Eva be dahaka idia haboioa idia sibodia bona edia natudia edia?
6 Iseda tama sina ginigunadia, Adam bona Eva, idia noho neganai, Iehova ese ia hahedinaraia idia be mai edia maduna. Iehova ese idia ia havaraia neganai edia ura hegeregerena dala idia abia hidi diba siahuna ia henidia harihari gauna ta bamona. Unai dala abia hidi diba siahuna bema idia gaukaralaia namonamo neganai, idia be ma hahenamo haida idia moalelaia diba, hegeregere, gari, gorere, bona mase garina do idia gari lasi, bona mai edia lalona goevana amo edia guba Tamana dekenai idia lao henia diba. To edia dala abia hidi diba siahuna idia gaukaralaia kerere neganai, unai hahenamo idia boio.
7 Iehova ese Adam bona Eva ia atodia Eden umana lalonai, bona idia moalelaia totona uma ena au iboudiai edia huahua ia henidia—to tamona sibona idia ia henia lasi. Unai au be ia sibona ena; ia be “kara namona bona kara dikana hadibaia au.” (Genese 2:16, 17) Unai au ena huahua idia ania lasi neganai, unai ese ia hahedinaraia Adam bona Eva idia diba Iehova sibona ese namo bona dika ena taravatu ia gwauraia diba. Bema edia maduna idia huaia namonamo bona ia taravatulaia huahua idia ania lasi, Iehova be edia ruhaia mauri namona daladia ma haida do ia henidia noho.
8 To, madi, Eva ese Gaigai ena koikoi herevana ia kamonai henia, ia gwau ia sibona do ia abia hidi ‘dahaka be namo bona dahaka be dika.’ (Genese 3:1-5) Ia ese ia ania guna, bena murinai Adam ese taravatu huahuana ia ania. Unai dainai, Eden umana lalonai, Iehova Dirava ese idia ia hereva henia neganai idia hemarai bona idia komu. (Genese 3:8, 9) Idia be kara dika taudia ai idia lao, idia be mai edia lalona goevana amo Dirava idia lao henia diba dalana idia haboioa unai. Unai dainai, idia sibona totona bona edia natudia totona danu, idia be gorere bona mase amo ruhaia dalana idia haboioa. Paulo ia gwau: “Tau tamona [Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika.”—Roma 5:12; Genese 3:16, 19.
9. Daidia edia sivarai idia torea ruhaia mauri namona idia gaukaralaia maoro dainai?
9 To, taunimanima be sibodia edia ura hegeregerena edia dala idia abia hidi diba, bona nega ia lao noho lalonai, goevadae lasi taudia haida be edia maduna idia gaukaralaia namonamo Iehova idia hesiai henia totona. Gabeai unai taudia ita diba totona edia ladana haida idia torea. Unai taudia haida be Abela, Enoka, Noa, Abraham, Isako, bona Iakobo (danu idia gwauraia Israel), bona idia edia negai idia moalelaia diba ruhaia mauri namona idia gaukaralaia Dirava ena ura idia karaia totona. Bona unai dainai namo idia davaria.—Heberu 11:4-21.
Dirava ese Ia Abia Hidi Besena Edia Ruhaia Mauri Namona
10. Iehova be iena abia hidi besena dekenai dahaka gwauhamata ia karaia?
10 Mose ena nega lalonai, Iehova ese Israel natudia—unai neganai edia namba be milion momo—ia ruhadia Aigupito ena igui hesiai gaukarana amo, bona idia dekenai gwauhamata ta ia karaia idia be ia abia hidi besena ai idia lao totona. Unai gwauhamata henunai, Israel taudia be mai edia hahelaga taudia bona animal idia bouboulaia edia kara dika be laulau dalanai idia kokia oho totona. Unai dainai, edia dala ia kehoa Dirava idia lao henia idia tomadiho henia totona. Danu, idia be mai edia taravatu bona hahegani herevadia, meamea dainai gari kava karadia bona tomadiho koikoi amo idia gini siri totona. Gabeai, edia ahuna, Gwauhamata Tanona unai, do idia abia, bona edia inai taudia idia tuari henia neganai idia diba Dirava ena heduru do idia abia. Gwauhamata dekenai Israel taudia edia maduna be Iehova ena Taravatu idia badinaia. Israel taudia be mai edia moale ida unai maduna idia abia dae, idia gwau: “Ai be Iehova ena hereva ibounai do ai karaia.”—Esodo 19:3-8; Deuteronomi 11:22-25.
11. Israel taudia be Iehova dekenai idia karaia gwauhamatana idia badinaia karana idia rakatania neganai dahaka ia vara?
11 Lagani 1,500 bona ma haida lalodiai, Israel taudia be Iehova ida turana karana dekenai idia noho. To, nega momo idia be unai gwauhamata idia badinaia lasi. Nega momo tomadiho koikoi ese ia koidia bona kaivakuku idia tomadiho henidia bona meamea dainai gari kava karadia ena igui hesiai gaukara ese ia kwatudia, unai dainai idia be tauanina dalanai igui hesiai taudia ai idia lao neganai Dirava ese edia inai taudia ia koudia lasi. (Hahemaoro Taudia 2:11-19) Bema gwauhamata idia badinaia, ruhaia mauri namona ena hahenamo idia moalelaia diba, to idia be unai gwauhamata ena taravatu idia utua dainai panisi idia abia. (Deuteronomi 28:1, 2, 15) Gabeai, 607 B.C.E. lalonai, Iehova ese ia koua lasi dainai Babulono dekenai unai bese be igui hesiai taudia ai idia lao.—2 Sisiga 36:15-21.
12. Gabeai Mose ena Taravatu gwauhamatana dekenai dahaka ia hedinarai?
12 Unai be sisiba aukana bamona idia dekenai. Namona be idia diba gau badana be Taravatu idia badinaia. To, lagani 70 murinai, Israel taudia be sibodia edia tano dekenai idia giroa lao neganai, idia be Taravatu gwauhamatana idia do badinaia namonamo lasi. Kahirakahira lagani handred tamona idia giroa lao murinai, Iehova be Israel ena hahelaga taudia ia hamaorodia, ia gwau: “Umui tatau e, umui be dala amo umui raka gageva. Umui be taunimanima momo umui hahekwakwanaidia taravatu badinaia karana dekenai. Umui be Levi ena gwauhamatana umui hadikaia vaitani.” (Malaki 2:8) Momokani, kudou-maoro Israel taudia be Taravatu goevadaena idia badinaia maoromaoro diba lasi. Unai be hahenamo lasi idia dekenai, to ia be aposetolo Paulo ia hereva bamona, idia “ia gwauraia dika momokani” gauna ai ia lao. (Galatia 3:13) Ia hedinarai namonamo, Mose ena Taravatu ena gwauhamata sibona lasi to ma gau ta idia abia be namo bena goevadae lasi, abidadama tanobada taudia be Dirava ena natudia edia ruhaia mauri namo hereana idia abia diba.
Keristen Ruhaia Mauri Namona Ena Toana
13. Ruhaia mauri namona ena badina namo hereana ta be dahaka?
13 Idia abia gauna ma ta be Iesu Keriso ena boubou gauna. Lagani 50 C.E. bamona, Paulo be Galatia ena horoa Keristen taudia edia kongregesen ia tore henidia. Ia ese Taravatu gwauhamatana ena igui hesiai amo Iehova ese ia ruhadia karana ia herevalaia, bena ia gwau: “Keriso ese Taravatu ena metau bona ena guia dekena amo ita ia ruhaia vadaeni. Ura kwalimu ita abia vadaeni. Inai ura kwalimu do umui dogoatao noho, tau haida ese umui do idia guia lou garina.” (Galatia 5:1) Iesu be edena daladia ai taunimanima ia ruhadia?
14, 15. Edena dala namo hereadia ai Iesu be Iuda taudia bona Iuda lasi taudia ia ruhadia?
14 Iesu ia mase murinai, idia abia dae ia be Mesia bona iena hahediba taudia ai idia lao Iuda taudia be gwauhamata matamatana henunai idia lao, unai gwauhamatana ese Taravatu gwauhamatana gunana ena gabu ia abia. (Ieremia 31:31-34; Heberu 8:7-13) Unai gwauhamata matamatana henunai, Iuda—bona gabeai idia ida idia gaukara hebou Iuda lasi bese taudia—be tanobada Israel ena gabu idia abia bona lauma bese matamatana ai idia lao, idia be Dirava ese ia abia hidi besena idauna unai. (Roma 9:25, 26; Galatia 6:16) Idia be unai bamona dainai, idia be Iesu ese ia gwauhamatalaia ruhaia mauri namona idia moalelaia, ia gwau: “Hereva momokani ese umui do ia ruhaia.” Mose ena Taravatu ena metau dikana amo ia ruhadia, to unai sibona lasi, hereva momokani be tomadiho gunalaia taudia ese idia gwauraidia sene karadia metaudia amo Iuda Keristen taudia ia ruhadia. Bona Iuda bese lasi Keristen taudia be edia tomadiho gunadia edia kaivakuku tomadiho henia karadia bona meamea dainai gari kava karadia amo ia ruhadia. (Mataio 15:3, 6; 23:4; Kara 14:11-13; 17:16) Bona ma gau haida danu.
15 Taunimanima ia ruhadia hereva momokanina ia herevalaia neganai, Iesu ia gwau: “Momokani, momokani umui lau hamaoroa, kara dika taudia be dika ese ia guia, vadaeni idia be dika ena hesiai gaukara idia karaia.” (Ioane 8:34) Adam bona Eva idia kara dika dainai, taunimanima iboudiai idia kara dika bona unai dainai idia be kara dika ena hesiai taudia. Unai bamona lasi tauna be Iesu sibona, bona Iesu ena boubou gauna ese unai abidadama taudia be igui hesiai karana amo ia ruhadia. Momokani, idia be do goevadae lasi bona kara dika taudia. To, hari edia kara dika amo idia helalo-kerehai diba bona Iesu ena boubou karana dainai edia kerere gwauatao totona idia noia diba, bona idia diba momokani Dirava be edia noinoi do ia kamonai henia. (1 Ioane 2:1, 2) Iesu ena boubou karana dainai, Dirava ese ia gwauraidia kara maoromaoro taudia, bona mai edia lalo-goevana ida idia lao henia diba. (Roma 8:33) Ma danu, boubou henia karana ese toreisi lou mauri hanaihanai dalana ia kehoa dainai, hereva momokani be ia ruhadia mase garina idia gari lasi.—Mataio 10:28; Heberu 2:15.
16. Keristen ruhaia mauri namona be tanobada ese ia henia toho ruhaia mauri namona edia idau be dahaka?
16 Dala namo hereana dekenai, tatau bona hahine dekenai, herevana edia noho be edena bamona tanobada dekenai, to Keristen ruhaia mauri namona dalana ia kehoa. Ogogami taudia, dibura taudia, bona igui hesiai taudia danu, be ruhaia mauri namona dekenai idia noho diba. To, tanobada besedia edia tau badadia be Keriso ena sivarai idia dadaraia neganai, idia be meamea dainai gari kava, kara dika, bona mase garina ena igui hesiai dekenai idia do noho. Namona be ita moalelaia ruhaia mauri namona dainai Iehova ita tanikiu henia hanaihanai. Tanobada ese ia henia diba gauna ta lasi be unai hegeregerena.
Idia Ia Ruhaia to Mai Edia Maduna
17. (a) Keristen taudia ginigunadia edia nega lalonai edena dala ai haida be Keristen ruhaia mauri namona idia haboioa? (b) Badina be dahaka Satana ena tanobada ia henia ruhaia mauri namona koikoina ese ita ia koia lasi be namo?
17 Keristen ginigunadia edia nega lalonai, reana horoa Keristen taudia momo be edia ruhaia mauri namona idia moalelaia bona herevana dahaka ia vara to edia abidadama be nega ibounai idia dogoatao. To, madi, haida be Keristen ruhaia mauri namona bona ena hahenamo idia mamia to murinai idia dadaraia, tanobada ena igui hesiai karana dekenai idia giroa lao. Badina be dahaka? Sedira idia momo edia abidadama ia manoka, bona idia ‘hure oho.’ (Heberu 2:1) Ma haida be ‘abidadama bona laloa maoromaoro dekena amo idia raka siri bona unai dainai edia abidadama ia dika, vanagi be davara nadina dekenai ia dika bamona.’ (1 Timoteo 1:19) Reana idia be kohu momo ura henia karana eiava sihari kava ena lebulebu mauri dalana dekenai idia moru. Gau badana be iseda abidadama ita naria bona ita habadaia, ita sibona ita stadi karana, iseda hebamo karana, iseda guriguri, bona Keristen gaukarana dekenai ita gaukara momo! (2 Petero 1:5-8) Namona be Keristen ruhaia mauri namona ita moalelaia hanaihanai! Momokani, kongregesen ena murimurinai idia itaia karadia dainai haida ia veria, idia laloa tanobada taudia edia mauri lalonai taravatu be momo lasi. To, tanobada ena ruhaia mauri namona koikoina be maduna idia huaia lasi nohona sibona. Bema ita be Dirava ena hesiai taudia lasi, ita be kara dika ena hesiai taudia, bona unai hesiai karana ena davana be ia dika.—Roma 6:23; Galatia 6:7, 8.
18-20. (a) Edena dala ai haida be “Keriso ena mase satauro dekenai ena anina idia hadikaia noho” taudia ai idia lao? (b) Edena dala ai haida ese ‘edia ruhaia mauri namona idia gaukaralaia kerere kara dika idia hunia totona’?
18 Ma danu, Filipi taudia dekenai iena revareva lalonai, Paulo ia torea, ia gwau: “Mai tai danu umui lau hamaoroa lou: Haida be idia raka kerere, idia ese Keriso ena mase satauro dekenai ena anina idia hadikaia noho.” (Filipi 3:18) Oibe, guna idia be Keristen taudia to abidadama ena inai taudia ai idia lao, reana idia be hereva momokani dadaraia taudia ai idia lao. Edia kara ita badinaia lasi be gau badana! Ma danu, Petro ia torea, ia gwau: “Umui be ura kwalimu taudia, to inai ura kwalimu do umui gaukaralaia kerere lasi. Unai ura kwalimu lalonai umui noho neganai hunia dekenai kara dika do umui karaia lasi, to Dirava ena hesiai taudia mai guia danu do umui noho.” (1 Petero 2:16) Edena dala ai tau ta be iena ruhaia mauri namona ia gaukaralaia kerere iena kara dika ia hunia totona? Ia be kara dika ia karaia neganai—reana hehuni dekenai ia karaia—kongregesen ida ia do hebamo noho neganai.
19 Diotrefe oi laloa. Ioane ese ia gwauraia, ia gwau: “Diotrefe, sibona ia gwauraia ia be [kongregesen] gunalaia tauna, ia ese lauegu hereva ia kamonai henia lasi. . . . Ekalesia varavara taudia . . . ia abia dae lasi. Ma inai vadivadi taudia idia ura abia dae taudia edia dala be Diotrefe ese ia koua. Ma ia ese unai abia dae kara taudia ekalesia dekena amo ia atodia siri gwauraia danu.” (3 Ioane 9, 10) Diotrefe ese iena ruhaia mauri namona ia gaukaralaia sibona ena mataganigani ura dikana ia hunia totona.
20 Hahediba tauna Iuda ia torea, ia gwau: “Haida ese umui emui orea dekenai hunia dala dekenai idia vareai vadaeni. Gunaguna Buka Helaga ia gwau unai bamona taudia be Dirava ena Kota dekenai edia kerere davana do idia davaria momokani. Idia ese Dirava idia negea. Idia ese Dirava ena hariharibada idia hadibaia kerere, edia lebulebu karadia do idia karaia diba totona. Inai taudia ese iseda Lohiabada Iesu Keriso, iseda Biaguna tamona, idia negea vadaeni.” (Iuda 4) Kongregesen ida idia hebamo neganai unai taudia be miro idia havaraia taudia. (Iuda 8-10, 16) Apokalupo lalonai ita duahia Peregamo bona Tuatira kongregesen ruaosi dekenai, idia be orea maragimaragi ai idia parara, kaivakuku idia tomadiho henia, bona idia heudahanai. (Apokalupo 2:14, 15, 20-23) Unai be Keristen ruhaia mauri namona gaukaralaia kerere dalana momokani!
21. Edia Keristen ruhaia mauri namona idia gaukaralaia kerere taudia dekenai dahaka do ia vara?
21 Unai dala dekenai edia Keristen ruhaia mauri namona idia gaukaralaia kerere taudia dekenai dahaka do ia vara? Israel taudia dekenai ia vara gauna oi laloa. Israel be Dirava ese ia abia hidi besena, to Iehova ese ia dadaraia. Badina be dahaka? Badina Israel taudia be edia turana karana Dirava dekenai idia gaukaralaia kerere edia kara dika idia hunia totona. Hekokoroku dekenai idia gwau idia be Abraham ena natudia to Iesu, Abraham ena Garana bona Iehova ese ia abia hidi Mesiana idia dadaraia. (Mataio 23:37-39; Ioane 8:39-47; Kara 2:36; Galatia 3:16) “Dirava ena Israela” ena orea be idia bamona abidadama karana do idia haboioa lasi. (Galatia 6:16) To Keristen tauna ta bema lauma dalana ai eiava mauri ena kara goeva dalana ia hadikaia, ia ese sisiba do ia abia, hahemaoro hereva dikana do ia abia. Ita ibounai be mai iseda maduna iseda Keristen ruhaia mauri namona ita gaukaralaia dalana dekenai.
22. Edia Keristen ruhaia mauri namona idia gaukaralaia Dirava idia hesiai henia totona taudia be dahaka moale do idia abia?
22 Dirava ita hesiai henia be namo herea bona unai amo ita be ruhaia mauri namona momokanina ai do ita noho. Iehova sibona ese mai anina bada ruhaia mauri namona ia henia diba. Hereva Lada-isidia ena hereva ia gwau: “Lauegu natuna e, oi aonega karaia, bona lauegu kudouna oi hamoalea, unai amo lau ia gwau henia tauna lau haere henia diba.” (Hereva Lada-isidia 27:11) Namona be iseda Keristen ruhaia mauri namona ita gaukaralaia Iehova ita abia isi totona. Bema unai bamona ita karaia neganai, iseda mauri be mai anina, iseda guba Tamana do ita hamoalea, bona gabeai ita be ruhaia mauri namo hereana Dirava ena natudia edia moale idia moalelaia taudia bogaragidiai do ita noho.
Anina Oi Gwauraia Diba, A?
◻ Daika sibona be ruhaia mauri namona momokanina dekenai ia noho?
◻ Adam bona Eva ese idia moalelaia ruhaia mauri namona daladia be dahaka, bona badina be dahaka idia haboioa?
◻ Israel taudia be Iehova ena gwauhamatana idia do badinaia noho neganai dahaka ruhaia mauri namona idia moalelaia?
◻ Iesu idia abia dae taudia be dahaka ruhaia mauri namona daladia idia abia?
◻ Keristen ginigunadia edia negai haida be edia Keristen ruhaia mauri namona idia hadikaia dalana be dahaka?
[Picture on page 13]
Iesu ese ia henia ruhaia mauri namona be taunimanima ese idia henia ruhaia mauri namona ia hereaia