Oi Dibaia Tauna Eiava Oiemu Turana?

“IOANE, mani egu turana oi hedavari henia. Ia be​—ekskius, oiemu ladana be daika?”

Oi be unai bamona hemarai herevana ta guna oi kamonaia vadaeni, a? Unai haheitalai ese ia hahedinaraia taunimanima momo be unai hereva “turana” idia gaukaralaia kerere. To namona be idia gaukaralaia herevana be “ia idia diba tauna.” Dala kahana dekenai ia noho tauna oi dibaia ena anina be ta, to ia be emu turana oi gwauraia ena anina be idau momokani.

Dikseneri ta ese “ia oi diba tauna” ena anina inai bamona ia gwauraia, ia gwau “ia be nega ta ta oi hedavari henia to umui ruaosi be umui turana karaia momokani lasi.” Ia hahedinaraia inai hereva ena anina be “ia oi diba namonamo lasi, umui hetura momokani lasi, umui hebamo momo lasi, bona umui lalo-namo heheni lasi TURADIA namodia bamona.”

Ita turana namonamo lasi dainai ia dekenai idia vara gaudia ita laloa momo lasi to iseda turana dekenai idia vara gaudia ita lalodia bada. Idia moale neganai ita moale danu, bona edia lalohisihisi lalonai ita lalohisihisi danu, iseda kudouna ia hamarerea. To namona be, iseda lalohadai eiava iseda kudouna ita naria namonamo, idau edia mauri ita haidaua toho kava garina.​—1 Petero 4:15.

Iseda turadia ida ita hetura namonamo dainai ia hahedinaraia nega momo ita ura ita hamoaledia. Bema ita ia diba tauna ta ia gwau iseda kara ta ia ura lasi eiava ia namo lasi, unai ese ita do ia doria lasi iseda kara ita haidaua totona. To iseda turana ese iseda dabua eiava hahegoeva dalana, iseda kara bona lalohadai ia haidaua diba.

Hetura karana lalonai abidadama heheni, ura heheni, hemataurai heheni, bona badinaia heheni karadia idia lalodia bada, to ta oi diba sibona neganai unai gaudia oi lalodia bada lasi. Bema ta ia ura oi danu ia hetura to ia ura lasi unai kara ena maduna ia huaia, ia hahedinaraia ia ura lasi oi ia tura henia to ia ura oi ia diba sibona. Turadia momokani be idia hetura namonamo dainai idia moale unai maduna idia huaia totona, badina unai ese dala ia kehoa edia hetura karana idia hahedinaraia totona.

Dirava Ida Hetura Karana

Iehova be iseda Havaraia Tauna bona ia be taunimanima edia guba Tamana, unai dainai ia ita lalokau henia, ita kamonai henia, bona ita matauraia be namo. To ia ura lasi taunimanima ese unai idia karaia kava ia hamaorodia dainai sibona, to ia ura idia sibodia edia ura momokani dainai idia karaia. (Mataio 22:37) Ia ura ia do idia lalokau henia edia Turana ta bamona. (Salamo 18:1) Ia “ese ita ia lalokau henia guna” dainai, ia ese hetura karana namona ena badina ia haginia.​—1 Ioane 4:19.

Iseda tama sina ginigunadia, Adam bona Eva, be Iehova idia diba. Henanadai ta be inai: Idia ese Iehova ena hetura karana idia dekenai do idia abia dae, a? Madi, idia abia dae lasi. Dirava amo idia siri bona sibodia idia naria dalana idia tahua karana ese ia hahedinaraia Dirava idia turana henia momokani lasi. Ia ena hetura karana amo ia henia gaudia sibona idia moalelaidia, to idia ura lasi ena kara namo idia haloua maduna idia abia dae. Unai be hegeregere idia ura Paradaiso lalonai idia noho bona idia moalelaia to idia noholaia ena davana henia idia ura lasi.

Ita ibounai be nega momo eiava nega haida sibona lalonai, tanikiu lasi karana bona ita sibona naria karana ita hahedinaraia. (Genese 8:21) Hegeregere, matamata taudia haida ese sibona naria lalohadai dainai edia tama sina ese idia karaia gau namodia dainai idia tanikiu henia lasi. Unai kara amo hetura karana namo hereana tama sina bona natu huanai, edia mauri lalonai, ia makohi. Unai hegeregerena, bema iseda hetura karana iseda guba Tamana ida ia makohi, madi unai be dika bada. Momokani, ita ia hamasea diba!

Turana Karaia Taravatudia

Bema abidadama ia noho lasi emu hetura karana tau ta dekenai eiava Dirava dekenai do ia noho daudau diba lasi. Bese kwarana Abraham be unai kara ia diba, unai dainai gau ibounai lalonai ena abidadama be Dirava dekenai ia atoa. Mani Genese 12:​1-5 bona Genese 22:​1-18 oi duahia, bona Abraham ena abidadama Iehova dekenai ena haheitalai rua oi itaia. Oibe, “[Abraham] ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.” Unai dainai “idia gwau [Abraham] be Dirava ena turana.”​—Iakobo 2:23.

Dirava danu ita turana karaia totona taravatu haida ita badinaia be namo, idia be Dirava ese ia atoa taravatudia. Ita be Dirava henunai ita noho dainai, ena taravatu ita badinaia be gau badana, taunimanima ida ita turana karaia bamona lasi. Gau haida sibona dekenai do ita hamoalea be hegeregere lasi​—tau ta danu ita turana karaia negana hegeregerena. Ia ura ita ese ia do ita hamoalea gau ibounai dekenai. Dirava ena turana momokani, ena Natuna Iesu, ese Iehova ia herevalaia neganai inai bamona ia hereva: “Iena ura be nega ibounai lau karaia.”​—Ioane 8:29.

Unai dainai, Iehova eiava ena Natuna danu ita turana karaia neganai, bema maduna ita huaia lasi ita tura henidia diba lasi; idia ruaosi ese idia gwauraia taravatudia do ita badinaia, idia ita diba sibona lasi. (Salamo 15:​1-5 itaia.) Iesu ese ena hahediba taudia danu ia herevahereva neganai unai ia hahedinaraia. Ia hamaorodia ia gwau: “Lauegu taravatu do umui badinaia, unai dekena amo lauegu turana do umui lao.”​—Ioane 15:14.

Hetura karana lalonai ita badinaia taravatuna ma ta be iseda lalohadai ita herevalaia hedinarai momokani. Iesu ena mase dinana ai, ena abidadama aposetolo taudia ia hamaorodia, ia gwau: “Harihari ia lao, umui be hesiai taudia do lau gwauraia lasi, badina hesiai tauna be ena biaguna ena kara ia diba lasi. To umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.” (Ioane 15:15) Iesu ese ena turadia dekenai ena lalohadai ia gwauraia neganai, ia ese ena guba Tamana ena haheitalai ia tohotohoa, Amos 3:7 ese ia gwauraia, ia gwau: “Lohiabada Hereadaena Iehova be gau ta do ia karaia lasi ela bona iena hehuni herevadia be iena peroveta hesiai taudia dekenai ia gwauraia hedinarai.”

Turadia taudia be unai idia karaia momo, ani? Reana ita ura lasi dahaka ia vara ita dekenai be dala kahana dekenai ia noho tauna dekenai ita kikilaia. Bona ita ura lasi iseda lalohadai dobudia bona iseda lalona ena mamina be ia dekenai ita hamaoroa. Badina ia ita diba sibona dainai. To iseda turadia dekenai, ita naria diba lasi, ita ura ita hamaorodia haraga!

Iseda turana karana Dirava ida be unai bamona danu. Ita naria daudau diba lasi to guriguri amo iseda mauri durua gaudia, iseda ura bona iseda lalohadai dobudia ita hamaoroa. Momokani, bema idia herevahereva hebou lasi to ta sibona ese hereva ia karaia noho, unai hetura karana be nega sisina murinai do ia mase diba. Unai dainai namona be ita ura Dirava ese ita ia hereva henia. Unai ita karaia diba bema ita ese ia torea Herevana ita kamonai henia namonamo, ena sisiba ita lalohadalaia loulou, bona ita gaukara goada iseda mauri lalonai ita badinaia totona.

Oiemu Hetura Karana Iehova Ida be Edena Bamona Oi Laloa Bada?

Oi ia durua unai henanadai oi haerelaia totona, mani taunimanima ese idia laloa bada hetura karana ta oi laloa. Bema oi be matamata ta, sedira oi ura hetura karana namona amo headava ia vara. Danu, oi lalo-parara bema oi ura adavaia tauna o hahinena oi diba sibona, unai be hegeregere lasi headava ena badina namona karaia totona. Ia do oi diba guna bena murinai ia be emu turana ta ai oi halaoa be namo. Unai hetura karana do ia goada ia lao ela bona umui hetura namo herea momokani, bena unai amo gabeai emui headava lalonai umui moale diba ena badina umui haginia.

Mani, inai ita laloa. Taunimanima momo ese dahaka idia karaia unai bamona hetura karana ia tubu namonamo totona? Hora hida bona moni hida idia halusia idia hamatamaia bona idia hetura noho totona? Hora hida idia haorea unai hetura karana idia laloa noho totona? Edia palani be edena bamona idia karaia, eiava idia ura edena bamona edia palani idia haidaua edia hetura karana hanamoa totona eiava idia hetura noho totona, a?

Sibomu oi henanadai henia: ‘Unai gaudia be edena bamona lau badinaia egu hetura karana egu Havaraia Tauna ida lau hanamoa bona lau hagoadaia totona? Hora hida lau negea unai lau karaia totona? Dina ta ta ibounai lauegu hetura karana Dirava ida be edena bamona lau lalohadailaia? Egu palani be edena bamona lau karaia, eiava lau ura egu palani lau haidaua egu hetura karana lau hanamoa totona bona ia danu lau hetura noho totona?

Namona be matamata Keristen taudia idia diba edia Havaraia Tauna ida idia hetura karana ena namo ese taunimanima danu hetura karadia iboudiai, headava ena turana karana danu, ena namo ia hanaia. Unai dainai Kohelete 12:1 ia sisiba, ia gwau: “Oi ia havaraia Diravana be emu tauhau negana lalonai oi laloatao.” Momo ese unai hereva idia badinaia badina Dirava ena hesiai gaukara idia karaia, bona nega ibounai haroro gaukara idia karaia eiava pioneer idia lao taudia edia namba ia bada noho.

Ena be taunimanima momo be sibodia edia ura idia tahua bona tomadiho karana idia abia dae lasi karana ia bada ia lao bona taunimanima ese Iehova dekenai hereva koikoi idia gwauraia neganai, to memero kekeni momo be gari lasi dekenai unai hereva idia hakoikoia. Unai bamona kara be Iehova ia ura ena turadia amo ia abia, ani? Ita danu ita ura iseda turadia ese unai bamona idia karaia, ani? Bona bema ita diba iseda turadia be mai edia ura ibounai danu bona mai edia goada danu idia karaia, iseda kudouna ia moale, ani?​—Hereva Lada-isidia 27:11 itaia danu.

Oibe, hetura karana Dirava ida eiava taunimanima ida be mai ena maduna bona unai maduna ita huaia be namo, hetura karana ia noho daudau totona. Bema ta ia ura lasi unai maduna ia huaia, eiava ia ura lasi Dirava ia gwauhamata henia bena ena ura ia karaia, ia be Iehova ia diba sibona. Ia be Dirava Turana ena hahenamo ia do mamia lasi.

[Picture on page 25]

Abraham ese Dirava ia abidadama henia unai dainai ia idia boiria Iehova turana