Helaro ese Dara Doko Ia Hanaia!

WEBSTER’S Ninth New Collegiate Dictionary bukana lalonai, ia gwau dara doko ena anina be “helaro ia boio momokani.” Unai dainai, ia hedinarai dara doko ita hanaia totona helaro ita abia be namo!

Ena be ogogami ese ia abia tauna be dala dekenai ia mahuta, to bema mai ena helaro, do ia dara doko lasi. Lalohisihisi gorerena idia abia taudia be mai edia helaro neganai gari lasi bona tauanina goada idia abia diba. To namona be idia diba momokani unai helaro do idia abia! Anina be dahaka?

Helaro Ena Badina

Sara dekenai ia vara gauna oi laloa, ia be idau negai bese kwarana Abraham ena adavana. Lagani 90 kahirakahira ia abia neganai, ia do gabani bona ia laloa natuna ta do ia havaraia diba lasi. To, ena adavana be lagani 99 ia abia neganai, Iehova be lagani momo gunanai ia gwauraia gwauhamatana ia gwauraia lou​—Abraham be “garana,” eiava natuna ta do ia abia. Abraham ia diba unai be do ia vara momokani gwauhamatana. Unai moale hoa gauna ia vara bona ia ese Isako ia havaraia, oi laloa Sara ena moale be edena bamona! (Genese 12:​2, 3; 17:​1-4, 19; 21:2) Abraham ena abidadama Dirava dekenai be koikoi gauna lasi, aposetolo Paulo ese ia gwauraia hedinarai hegeregerena, ia gwau: “Dirava ese unai gwauhamata ia henia dainai [Abraham] ia laloa daradara lasi. To iena abidadama ia bada dainai Dirava ese siahu ia henia, unai dainai [Abraham] ese Dirava ia hanamoa henia.”​—Roma 4:20.

Iena nega lalonai Keristen taudia ai idia lao Iuda taudia ia torea henia neganai, Paulo ia gwau idia be badina rua dainai Dirava ese Iesu bagunai ia gwauhamatalaia hahemauri dalana idia abidadama henia diba. Aposetolo tauna ese Dirava ena gwauhamata Abraham dekenai ia gwauraia bona unai neganai Ia gwauraia gwauhamatana ia torea, aposetolo ia gwau: “Tau ta ese gwauhamata ia gwauraia neganai, ia ese ia hereaia tauna ta ena ladanai ia gwauhamata. Bona gwauhamata ese taunimanima edia hepapahuahu ibounai ia hadokoa. Dirava ia ura iena natuna taudia be do idia diba momokani iena gwauhamata be do ia haidaua lasi. Unai dainai gwauhamata ma ta, metau bada gauna, ia gwauraia, helaga bada gauna. Vadaeni, inai gwauhamata rua idia noho, bona idia senisi diba lasi. Ita diba unai gau ruaosi dekenai Dirava ia koikoi diba lasi. Ita be mase dekena amo ita heau, bona Dirava ena mauri ita davaria vadaeni taudia. Vadaeni inai gwauhamata rua ese iseda lalona idia hagoadaia noho. Bona unai dainai iseda abidadama do ita dogoatao noho, badina be ita diba ita naria noho davana namona be do ita abia momokani.” (Heberu 6:​16-18) Oibe, Dirava ena gwauhamata be momokani bona ita abia dae diba gauna. Iehova be siahu ibounai Diravana bona ia sibona be iena hereva hagugurua karana ia hamomokania diba.

Helaro​—“Mauri Gauna bona Momokani Gauna”

Paulo ia torea Keristen helarona be “mauri gauna bona momokani gauna.” (Heberu 6:19) Paulo ia diba iena helaro ena badina be dahaka. Ia gwauraia hedinarai, ia gwau: “Ia [unai helaro be] . . . koua dabuana ia hanaia lao.” Anina be dahaka? Paulo ese idau negai dubuna Ierusalem dekenai ia herevalaia. Unai dubu lalonai Helaga Herea daiutuna ia noho, dabua aukana ta ese unai daiutu be ruma ena kahana ibounai amo ia koua. (Esodo 26:​31, 33; Mataio 27:51) Momokani, Ierusalem ena dubu be idau negai idia hadikaia ore vadaeni. Unai dainai, hari inai nega lalonai, unai Helaga Herea gabuna be dahaka hegeregerena?

Ia be guba bamona, unuseniai Dirava be terona dekenai ia helai! Paulo ese unai ia gwauraia hedinarai, ia gwau Iesu be guba ai ia daekau murinai ia be “taunimanima idia karaia Gabu Helagana dekenai ia raka vareai lasi. Unai be guba gauna ena laulau sibona. Lasi, to Keriso ese maoromaoro guba dekenai ia raka vareai. Unuseni Dirava ena vairanai, ita durua totona ia gaukara noho.” (Heberu 9:24) Unai dainai, ita abia Keristen helarona be ita ia durua dara doko ita hanaia totona, unai helaro be tanobada ena politikol taudia amo ia vara lasi to guba ena kara amo ia vara. Dirava ese ia abia hidi Tauna, Iesu Keriso, dainai do ia vara, unai tauna be sibona ena mauri ia henia boubou gauna ta bamona, iseda kara dika kokia totona, bona ia be ita dainai Dirava ena vairanai ia gini. (1 Ioane 2:​1, 2) Ma danu, inai magasin be nega momo ia hahedinaraia hegeregerena, Iesu be Dirava ese ia abia hidi tauna Dirava ena guba Basileiana ena King gaukara karaia totona, bona 1914 ema bona hari unai gaukara ia karaia. Nega sisina murinai, unai guba Basileiana be taunimanima edia dara doko idia havaraia gaudia do ia kokidia oho.

Helaro​—“Lalona Dogoatao Gauna”

Iena hereva idia duahia taudia dekenai Iesu bagunai hahemauri do idia abia dalana idia abidadama henia totona, Paulo ese haheitalai ta ia gaukaralaia. Ia gwau: “Inai davana namona, Dirava ia gwau do ita naria noho mai abidadama danu gauna, be iseda lalona dogoatao gauna bamona.”​—Heberu 6:19.

Paulo bamona idia loaloa taudia be dogo idia diba momo. Idau negai dogo edia toana be hari inai negai dogo bamona, nega momo auri amo idia karaia bona mai edia isena bamona gaudia davara lalonai miri idia dogoatao totona. Lagani 58 C.E. bamona ai, Roma ai ia lao neganai, Paulo ena lagatoi ia mutu gwauraia. To lagatoi be dobu bada lasi ranuna ai ia lao neganai, lagatoi taria taudia be “dogo hani lagatoi ena murina kahana amo idia negea diho.” Unai dogo dainai, lagatoi be ia hegeregere lai bada herea negana lalonai.​—Kara 27:​29, 39, 40, 44.

Unai dainai, namona be dahaka oi karaia moni hekwarahi negana lalonai, tauanina eiava lalona gorere neganai, eiava dahaka “lai” negana lalonai, oiemu helaro be dogo bamona bona oi hegeregere totona? Gau ginigunana be, oi sibona dekenai oi hamomokania Bible ena gwauhamata be oi abidadama henia diba gaudia. “Gau iboudiai umui tahua namonamo.” (1 Tesalonika 5:​21, NW) Hegeregere, Iehova ena Witness taudia be gabeai oi dekenai idia hereva neganai, edia hereva oi kamonai henia. Bema nega momo oiemu noho gabuna ai idia lao lasi, oi kahirakahira ai Kingdom Hall dekenai idia oi tahua. Oi do idia doria lasi edia orea oi vareai totona, to davana lasi Bible stadi dalana do idia gwauraia, bona oiemu ura gabuna bona negana dekenai do idia karaia.

Unai bamona stadi amo do oi diba momokani Dirava ese “idia tahua taudia ibounai be davana namona . . . do ia henidia.” (Heberu 11:6) Do oi diba nega sisina murinai, King, Keriso Iesu henunai, Dirava ena Basileia be hari inai negai taunimanima momo edia dara doko idia havaraia kara dikadia bona kara gagevadia do ia kokidia. Unai Basileia henunai, inai tanobada be paradaiso ai do ia lou lao, bona idia lalokau henia taudia dekenai Dirava ese mauri hanaihanai do ia henia. (Salamo 37:29; Apokalupo 21:4) Unai be helaro namo hereana!

Bible oi duahia namonamo bena do oi itaia unai helaro be momokani. Bena oi hekwarahi Dirava ida oi turana namonamo totona, Abraham bamona iena turana ai oi lao. (Iakobo 2:23) Iehova be “Guriguri Kamonai Henia Tauna” dainai, iena lalo-hekwarahi gaudia oi hamaoroa. Mai momokani oi tahua neganai, oiemu guriguri ese oi do ia durua oiemu metau oi negea bona emu dara doko oi hanaia totona. Dirava ena lauma helaga be reana dala do ia kehoa oi ia hametaua dalana ia haidaua totona.​—Salamo 55:22; 65:2; 1 Ioane 5:​14, 15.

“Dogoatao Auka Herea”!

Ia bamona hahediba taudia dekenai ia gwau: “Gau iboudiai umui tahua namonamo”; unai murinai, Paulo be ma ia hereva, ia gwau: “Gau namona umui dogoatao auka herea.” (1 Tesalonika 5:​21, NW) Unai oi karaia totona dalana ta be Keristen helarona idia dogoatao taudia oi bamodia. Aonega pavapavana Solomon be sisiba ia henia, ia gwau: “Aonega taudia ida ia raka tauna be do ia aonega, to kavakava taudia ia bamodia tauna ese dika do ia davaria.” (Hereva Lada-isidia 13:20) Namo lasi oiemu lalohadai kerere gunana idia dekenai eiava hemarai mamina ese oi ia koua hebamo namodia oi tahua totona. Hegeregere, Iehova ena Witness taudia bogaragidiai guna idia haida be helaro lasi taudia. To Bible idia stadilaia dainai, bona abidadama taudia edia moale hebamo karana dainai, edia turana karana Iehova dekenai ia hagoadaia bona dogo bamona, helaro namona idia abia. Unai ese dara doko ia hanaia momokani, a? Oibe, ia hanaia momokani.

Annmarie ena sivarai oi laloa, ena adavana ese ia dagedage henia bada dainai ia dara doko. Ia gwau: “Lau laloa lauegu mauri do lau hadokoa, to lau diba lasi dahaka dainai to lau laloa Dirava lau guriguri henia guna. Lau laloatao, lau gwau, ‘Badina be dahaka lau oi durua diba lasi? Nega daudau lalonai oi dekenai lau helaro, to gau ta ia vara lasi.’ Lauegu guriguri lau hadokoa bona lau laloa mauri be anina lasi dainai namona be lau mase. Unai negana ai, ta be iduara dekenai ia pidipidi. Lau laloa do lau kehoa lasi, lau ura ia noho tauna do ia lao.

“Ia pidipidi noho, bona lau lalo-hekwarahi. Lauegu matana ranu lau dahua oho bona lau itaia daika be iduara dekenai ia gini, lau ura idia lao haraga bena lau ura gauna do lau karaia diba.” Annmarie ia gwau: “To, namo herea, Iehova dainai unai bamona ia vara lasi, badina iduara lau kehoa neganai, hahine rua lau davaria idia gini. Momokani, lau daradara, bona edia hereva dekenai lau lalo-parara momokani lasi. To lau dekenai buka ta idia henia toho bona idia gwau ia be mauri ena anina do ia gwauraia. Unai ese egu lalona ia veria mauri ena namo lau tahua lou totona.” Idia be dala idia hegaegaelaia ia dekenai Bible stadi idia karaia totona. Annmarie ia davaria dahaka do ia karaia Dirava ena turana ai ia lao totona. Bena unai ese ia durua mauri ena anina ia hahedinaraia totona. Hari ia be ma haida ia durudia Dirava idia tabekau henia totona.

Reana oi ura dara doko ia ore to oi diba lasi dahaka do oi karaia. To bema guna oi guriguri: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona,” oi be Iesu Keriso henunai do ia mai Dirava ena Basileia totona oi guriguri, unai ese kudou-maoro taudia edia dara doko idia havaraia gaudia do ia kokidia oho. (Mataio 6:10) Bible oi stadilaia neganai bona unai abidadama tamona taudia oi bamodia neganai, unai ese oiemu helaro do ia hagoadaia, bena oi diba momokani Iehova ena Basileia do ia mai bona iseda tanobada dekenai Paradaiso do ia mailaia. (1 Timoteo 6:​12, 19) Inai magasin ta ta iboudiai lalonai unai helaro namo hereana ia harorolaia. Unai helaro oi dogoatao auka dara doko oi hanaia totona. Momokani, helaro dainai “lalohisihisi [do] ita abia lasi.”​—Roma 5:5.

[Picture on page 7]

Bible ita stadilaia neganai ita be “lalona dogoatao gauna ena” helaro ita abia