“Ai be Mesia Ai Davaria Vadaeni”!

“Karaharaga [Andrea be] ena kakana korikori Simona ia davaria, vadaeni ia hamaoroa, ia gwau, ‘Ai be Mesia ai davaria vadaeni.’ Mesia ena anina be Keriso.”​—IOANE 1:41.

1. Ioane Bapatiso be Nasareta tauna Iesu edena bamona ia gwauraia, bona Andrea be ia dekenai dahaka ia laloa?

ANDREA ese Iuda tauna idia gwauraia, Nasareta tauna, Iesu, ia itaia namonamo. Iena toana be king, eiava aonega tauna, eiava rabi tauna bamona lasi. Iena king dabuana be lasi, eiava huina sisina kurokuro be lasi, eiava imana manokadia bona kopina manokamanokana be lasi. Iesu be tau matamatana​—lagani 30 bamona​—ena imadia idia auka bona kopina ia korema sisina, gaukara tauna ta bamona. Unai dainai, ia kamonai ia be kapenta tauna neganai reana Andrea ia hoa lasi. To, Ioane Bapatiso ese unai tauna ia gwauraia: “Umui itaia, Dirava ena Mamoe Natuna be inai.” Dina gunanai, Ioane ena hereva ta be idau momokani, ia gwau: “Ia be Dirava ena Natuna.” Unai be momokani, a? Unai dina ai, Andrea be nega bada ia henia Iesu ia kamonai henia totona. Iesu ena hereva be dahaka ita diba lasi; to ita diba iena hereva ese Andrea ena mauri ia haidaua. Haraga ia lao ena kakana, Simona ia davaria, bona ia gwau: “Ai be Mesia ai davaria vadaeni”!​—Ioane 1:​34-41.

2. Dahaka dainai idia perovetalaia Mesia tauna be Iesu idia hamomokania herevadia ita tahua be gau badana?

² Gabeai, Andrea bona Simona (Iesu ese ladana Petro ia henia) be Iesu ena aposetolo taudia ai idia lao. Iena hahediba tauna ai ia lao vadaeni lagani rua murinai, Petro be Iesu dekenai ia gwau: “Oi be Keriso [Mesia], Mauri Diravana ena Natuna.” (Mataio 16:16) Abidadama aposetolo bona hahediba taudia be unai lalohadai dainai idia hegeregere edia mauri idia henia totona. Hari inai negai, kudou-maoro taudia milion momo be unai bamona danu. To hamomokania hereva be dahaka? Badina hamomokania hereva dainai abidadama be hereva abia dae kava karana amo ia idau. (Heberu 11:1 itaia.) Unai dainai, Iesu be momokani Mesia tauna ena hamomokania daladia toi ita laloa be namo.

Iesu Ena Sene Taudia

3. Mataio bona Luka edia Evanelia herevadia lalonai Iesu ena sene taudia dekenai dahaka idia hahedinaraia?

³ Keristen Greek Revarevadia lalonai Iesu be Mesia tauna ia hamomokania gauna ginigunana be iena sene taudia ladadia idia torea. Bible ia peroveta Mesia be King David ena bese amo do ia mai. (Salamo 132:​11, 12; Isaia 11:​1, 10) Mataio ena Evanelia ia hamatamaia, ia gwau: “Iesu Keriso ia vara ena revareva be inai: ia be [David] ena natuna, [Abraham] ena natuna.” Mataio ese unai hereva ia hamomokania, badina Iesu ena sene taudia, iena heubu tamana Iosef ena kahanai, edia ladadia ia torea. (Mataio 1:​1-16) Luka ena Evanelia ese Iesu ena sene taudia, iena sinana Maria ena kahanai, edia ladadia ia torea bona David, Abraham, bona Adam danu ia torea. (Luka 3:​23-28)a Unai dainai Iesu be David ena garana amo tauna idia hamomokania totona, Evanelia Bukadia idia torea taudia be taravatu dalanai bona ena bese edia ladadia amo idia torea bona idia hamomokania.

4, 5. (a) Iesu ena negai idia noho taudia idia gwau ia be David amo ia mai lasi, a? Bona dahaka dainai unai be mai anina bada? (b) Edena dala ai Bible lasi herevadia idia hamomokania unai be Iesu ena sene taudia?

⁴ Ena be haida idia daradara Iesu be Mesia o lasi, to idia gwau diba lasi Iesu be David ena natuna lasi. Dahaka dainai? Badina be rua. Badina ta be, Ierusalem be 70 C.E. neganai idia do hadikaia ore lasi neganai, unai hereva idia gwauraia momo. (Mataio 21:9; Kara 4:27; 5:​27, 28 itaia danu.) Bema unai hereva be koikoi, Iesu idia inai henia taudia​—idia be momo​—be unai hanua edia bese taudia ladadia edia lista dekenai idia tahua diba bona do idia gwauraia koikoi.b To tanobada ena sivarai dekenai ta lasi ia gwau Iesu be King David natuna lasi. Ia hedinarai ta ese unai hereva ia hakoikoia diba lasi. Reana Mataio bona Luka be unai hanua edia bese taudia ladadia edia lista amo ladana korikoridia idia torea hanai.

⁵ Hamomokania gauna iharuana be, Bible lasi herevadia ese Iesu ena sene taudia edia ladadia idia abia dae. Hegeregere, Talmud lalonai, lagani 300 ia lao 399 C.E. ai rabi tauna ta be Maria, Iesu ena sinana, ia gwauraia dika, ia gwau ia be ‘kapenta taudia ida ariara kara ia karaia’; to unai hereva ia gwau danu “ia be king natudia bona lohia taudia amo ia mai.” Haheitalai gunana ma ta be, lagani 100 ia lao 199 C.E. ai, tanobada sivarai ia torea tauna Hegesippus. Ia gwau Roman Kaisara Domitian ia ura David ena bese taudia ia haoredia neganai, Keristen taudia gunadia edia inai taudia haida ese Iuda, Iesu ena tadina, ena tubudia memero haida be idia gwauraia dika, idia gwau idia be “David ena bese taudia.” Bema taunimanima idia diba Iuda be David ena bese tauna, Iesu danu be iena bese tauna, ani? Momokani vaitani!​—Galatia 1:19; Iuda 1:1.

Mesia Perovetalaia Herevadia

6. Heberu Revarevadia lalonai Mesia perovetalaia herevadia be momo, a?

⁶ Iesu be Mesia ia hamomokania dalana ma ta be peroveta herevadia idia guguru. Heberu Revarevadia lalonai Mesia perovetalaia herevadia be momo. Iena buka The Life and Times of Jesus the Messiah lalonai, Alfred Edersheim ia gwau Heberu Revarevadia lalonai idau negai rabi taudia ese idia abia dae mesia herevadia 456 idia noho. To, rabi taudia edia lalohadai idauidau Mesia dekenai be kerere; idia gwauraidia hereva momo be mesia herevadia lasi. To, Iesu be Mesia idia hamomokania peroveta herevadia be momo.​—Apokalupo 19:10 itaia danu.

7. Tanobada dekenai ia noho neganai Iesu ese dahaka peroveta herevadia haida ia hagugurua?

⁷ Idia haida be inai: ia vara hanuana (Mika 5:2; Luka 2:​4-11); ia vara murinai beibi momo idia hamasedia kara dikana (Ieremia 31:15; Mataio 2:​16-18); Aigupito amo do ia boiria (Hosea 11:1; Mataio 2:15); tanobada besedia do idia hebou idia hadikaia ore totona (Salamo 2:​1, 2; Kara 4:​25-28); siliva moni 30 totona ena mauri do idia hoia (Sekaria 11:12; Mataio 26:15); iena mase dalana danu.​—Salamo 22:16; Ioane 19:​18, 23; 20:​25, 27.c

Do Ia Mai Negana Idia Perovetalaia

8. (a) Dahaka peroveta hereva ese Mesia ia mai negana ia gwauraia? (b) Dahaka hereva rua edia anina ita diba guna unai peroveta hereva dekenai ita lalo-parara totona?

⁸ Namona be peroveta hereva tamona ita laloa. Daniel 9:25 dekenai, Iuda taudia ia hamaorodia Mesia be edena negai do ia mai. Ia gwau: “Namona be oi diba bona oi lalo-parara, Ierusalem hanamoa lou bona haginia lou herevana do ia hedinarai negana ela bona Mesia, Hakaua Tauna, do ia mai be pura 7, bona pura 62 danu.” Oi duahia neganai reana anina be ia hedinarai haraga lasi. To ena hereva badadia rua be inai: hamatamaia negana bona nega ta ena lata ia hahedinaraia. Haheitalai be inai, bema mapu ta be oi dekenai idia henia bona ia gwau kohu bada idia hunia “rod 50 hanua ena uma ena ranu guri amo,” reana do oi daradara​—do oi daradara unai ranu guri be edeseniai, bona ‘rod’ ena lata be edena bamona. Unai hereva rua edia anina do oi tahua guna bena gabeai kohu bada do oi tahua diba, ani? Vadaeni, Daniel ena peroveta hereva be unai bamona danu, to ita be nega ena hamatamaia gabuna ita diba bona unai nega amo nega ita duahia.

9, 10. (a) Wiki 69 be edena nega amo ita duahia hamatamaia? (b) Wiki 69 edia lata be edena bamona, bona edena bamona unai ita diba?

⁹ Gau ginigunana be, hamatamaia negana ita laloa, unai be ‘Ierusalem hanamoa lou bona haginia lou herevana ia hedinarai’ negana. Vadaeni, do ita tahua unai nega amo nega ena lata be edena bamona, unai wiki 69 (7 bona 62) ena nega ena lata be hida. Unai hereva rua edia anina be auka lasi. Nehemia be ita ia hamaoroa namonamo Ierusalem ena magu haginia lou totona herevana be “King Aratasasta ia lohia laganina namba 20 lalonai.” (Nehemia 2:​1, 5, 7, 8) Unai ese 455 B.C.E. dekenai iseda hamatamaia negana ia atoa.d

¹⁰ Unai wiki 69 edia lata be dina 7 wiki edia lata hegeregerena, a? Lasi, lagani 455 B.C.E. murinai lagani tamona ia ore neganai Mesia ia do hedinarai lasi. Unai dainai Bible tahua taudia momo bona Bible idia hahanaia bukadia momo (Iuda taudia edia Tanakh Bible dekenai inai siri ena rau henunai danu) idia gwau unai wiki be “lagani” edia wiki. Idau negai Iuda taudia be ‘lagani edia wiki,’ eiava lagani 7 ia lao lagani 7 ia mai negadia idia diba. Idia be dina 7 7 ai sabati dinana idia hahelagaia hegeregerena, lagani 7 7 ai sabati laganina idia hahelagaia danu. (Esodo 20:​8-11; 23:​10, 11) Unai dainai lagani 69 edia wiki ena anina be lagani 7 be nega 69 amo oi habadaia, unai be lagani 483. Vadaeni, unai ita duahia sibona. Lagani 455 B.C.E. amo ita duahia neganai lagani 483 be lagani 29 C.E. dekenai ita ginidae​—unai lagani lalonai Iesu be bapatiso ia abia bona ma·shiʹach, Mesia, ai ia lao!​—Insight on the Scriptures, Volume 2, rau 899 dekenai “Seventy Weeks” henunai oi itaia.

11. Taunimanima idia gwau unai be hari inai negai ita sibona be anina ta ita atoa Daniel ena peroveta hereva dekenai; edena bamona ita haere henidia diba?

¹¹ Haida be reana do idia gwau unai be hari inai negai ita sibona be peroveta hereva dekenai anina ta ita atoa tanobada ena sivarai ida ita hahegeregerea totona. Bema unai bamona, dahaka dainai Iesu ena nega lalonai idia naria noho Mesia be unai negana ai ia hedinarai totona? Keristen sivarai ia torelaia tauna Luka, Roma sivarai torelaidia taudia Tacitus bona Suetonius, Iuda sivarai torea tauna Josephus, bona Iuda aonega tauna Philo be unai negana ai idia noho bona idia hamomokania taunimanima be unai bamona idia naria noho. (Luka 3:15) Hari inai negai, diba taudia haida idia gwau Roma edia dagedage dainai Iuda taudia be unai neganai Mesia totona idia naria. To dahaka dainai unai neganai Iuda taudia be Mesia idia naria, to lagani sinahu momo gunanai, Greek taudia idia dagedage neganai, Mesia idia naria lasi? Dahaka dainai Tacitus ia gwau “hereva dobudia edia peroveta herevadia” dainai Iuda taudia idia naria siahu bada lohia taudia do idia mai Iudea amo bona “gabu ibounai lohia gabuna” do idia abia? Abba Hillel Silver be iena buka A History of Messianic Speculation in Israel lalonai ia gwau “lagani 25 ia lao 50 C.E. huanai Mesia idia naria noho,” Roma edia dagedage dainai lasi, to Daniel bukana amo “unai nega lalonai taunimanima ese nega idia duahia” dainai.

Dirava ese Ia Hamomokania

12. Iehova be edena dala ai ia hahedinaraia Iesu be Mesia?

¹² Iesu be Mesia hamomokania gauna ihatoina be Dirava ena hereva. Luka 3:​21, 22 ena hereva hegeregerena, Iesu ia bapatiso murinai, guba bona tanobada edia gau ibounai ataiai ia helaga bona ia siahu herea gauna, Iehova Dirava ena lauma helaga, amo horoa ia abia. Bona sibona ena gadona amo, Iehova ia gwau iena Natuna, Iesu, ia abia dae. Ma nega rua ai, Iehova be guba amo Iesu dekenai ia hereva, unai ese ia hahedinaraia Ia moale ia dekenai: nega ta be Iesu ena aposetolo taudia toi vairanai, bona ma nega ta ai kamonai taudia momo vairanai. (Mataio 17:​1-5; Ioane 12:​28, 29) Ma danu, guba amo aneru haida ia siaia mai Keriso, eiava Mesia, ena dagi idia hamomokania totona.​—Luka 2:​10, 11.

13, 14. Iehova be edena dala ai ia hahedinaraia ia moale Iesu be Mesia dainai?

¹³ Iehova ia hahedinaraia ia ese ia horoa tauna dekenai ia moale badina siahu ia henia siahu bada karadia ia karaia totona. Hegeregere, Iesu be gabeai do idia vara gaudia ia perovetalaidia​—unai peroveta herevadia haida be iseda nega totona.e Ia ese hoa karadia ia karaia danu, hegeregere hitolo taudia hutuma ia ubudia bona gorere taudia ia hanamodia. Ia ese mase taudia ia hatoredia isi lou. Unai hoa karadia idia vara murinai, ia murinai idia raka taudia be unai sivarai idia gwauraia sibodia edia lalohadai kava amo, a? Iesu be taunimanima vairadiai iena hoa karadia momo ia karaia, nega haida ia karaia taunimanima tausen momo idia noho neganai. Iesu idia inai henia taudia danu idia gwau diba lasi unai gaudia ia karaia lasi. (Mareko 6:2; Ioane 11:47) Ma danu, bema unai hoa karadia idia vara lasi, to Iesu murinai idia raka taudia be unai sivarai idia gwauraia kava, dahaka dainai sibodia edia kerere idia gwauraia hedinarai bona idia hunia lasi? Idia sibodia ese idia gwauraidia kava gori herevadia idia abidadama henia dainai idia ura do idia mase, a? Lasi. Iesu ese ia karaia hoa karadia be tanobada ena sivarai ena hereva momokanidia.

¹⁴ Dirava ena hereva Iesu be Mesia ia hamomokania totona ia habadaia noho. Iesu be Mesia ia hamomokania totona lauma helaga ia gaukaralaia tanobada ena sivarai ibounai dekenai gado dekenai idia hahanaia bona idia halasia bada bukana lalonai unai hereva idia torea.

Dahaka Dainai Iuda Taudia be Iesu Idia Abia Dae Lasi?

15. (a) Iesu be Mesia idia hamomokania herevadia be hida? (b) Iuda taudia be dahaka idia ura dainai idia momo idia abia dae lasi Iesu be Mesia?

¹⁵ Unai hamomokania daladia toi dekenai Iesu be Mesia hamomokania herevadia be momo. Unai ibounai be hegeregere, ani? Mani inai oi laloa: bema oi ura motuka taria totona license oi abia gwauraia, bona oi idia hamaoroa hamomokania pepa toi sibona be hegeregere lasi, to namona be handred momo oi mailaia, oiemu mamina be edena bamona? Unai be kava karana! Momokani, Bible ese Iesu ia gwauraia hedinarai namonamo. To, badina be dahaka Iesu ena bese taudia momo be unai hamomokania herevadia ia be Mesia idia dadaraia? Badina, ena be hamomokania hereva be gau badana abidadama momokani dekenai, to ia ese abidadama ia havaraia lasi. Madi, ena be hamomokania herevadia be momo herea to taunimanima momo be sibodia edia ura hegeregerena hereva idia abia dae. Mesia idia laloa neganai, Iuda taudia momo be sibodia edia lalohadai bona ura hegeregerena idia laloa. Idia ura politikol mesiana ta idia abia, idia ura ia ese Roma ena dagedage ia haorea bona Israel do ia hakaudia lou Solomon ena nega ai, kohu bada idia abia hairaina ena nega unai. Edena bamona kapenta natuna manauna, politikol gaudia bona kohu bada ia ura lasi Nasareta tauna, idia abia dae diba? Ia hisihisi bona idia gwauraia dika murinai hisihisi auna dekenai ia mase dainai idia laloa ia be Mesia lasi, ani?

16. Dahaka dainai Iesu murinai idia raka taudia be edia lalohadai Mesia dekenai idia haidaua?

¹⁶ Ia mase neganai Iesu ena hahediba taudia idia gari bada. Iena toreisi lou hairaina murinai, ia hedinarai idia ura ia be maoromaoro ‘Israel dekenai basileia do ia henia lou.’ (Kara 1:6) To unai ia vara lasi neganai idia laloa lasi Iesu be Mesia lasi. Idia noho hamomokania daladia momo dainai idia abidadama henia, bona edia lalo-parara ia bada noho; hehuni herevadia edia anina idia hedinarai. Idia lalo-parara tanobada dekenai ia be tau bona nega kwadogi ia noho lalonai ia idia perovetalaia herevadia iboudiai ia hagugurua diba lasi. Peroveta hereva ta ia gwau mai ena manau toana do ia ginidae badina doniki dekenai ia gui, to ma hereva ta be ori dekenai do ia mai bona mai ena hairai bada! Edena dala ai hereva ruaosi do idia momokani diba? Ia hedinarai namona be nega iharuana ai do ia mai.​—Daniel 7:13; Sekaria 9:9.

Mesia Ia Mase be Namo Ena Badina

17. Daniel ena peroveta hereva be edena dala ai ia hahedinaraia namonamo Mesia be do ia mase be namo, bona dahaka dainai do ia mase?

¹⁷ Ma danu, Mesia idia perovetalaia herevadia idia hahedinaraia Mesia do ia mase be namo. Hegeregere, Mesia do ia lou mai negana ena peroveta hereva be murina siri dekenai ia gwau: “Pura 62 murinai [unai be wiki 7 murinai] Mesia do idia utua oho.” (Daniel 9:26) Unai Heberu herevana ka·rathʹ idia gaukaralaia bona ena anina be “utua oho,” bona unai hereva idia gaukaralaia Mose Taravatu dekenai ta be mase do ia abia ena kota idia karaia neganai. Daradara be lasi to Mesia do ia mase be namo. Badina be dahaka? Haere be Da 9 siri 24 dekenai: “Kerere haorea, kara dika hadokoa, kara kerere dainai maino karaia totona, bona kara maoromaoro haginia totona ela bona gwauraia lasi negana.” Iuda taudia idia diba boubou ta, mase ta, sibona be kara kerere ia koua diba.​—Levitiko 17:11; Heberu 9:22 itaia danu.

18. (a) Isaia karoa 53 be edena dala ai ia hahedinaraia Mesia be do ia hisihisi bona do ia mase? (b) Unai peroveta hereva ese dahaka hereva idaudia ia havaraia?

¹⁸ Isaia karoa 53 ia gwau Mesia be Iehova ena Hesiai Tauna idauna ta, bona do ia hisihisi ma haida edia kara dika do ia koua totona. Is 53 Siri 5 ia gwau: “Iseda kerere dainai idia gwadaia bona iseda kara dika dainai idia hahisihisia.” Unai peroveta hereva ia gwau Mesia be “dika ena boubou gauna totona” do ia mase murinai, Ia be “iena mauri dinadia do ia halataia, bona Iehova ena ura ena anina be iena imana dekenai do ia tubu.” (Is 53 Siri 10) Unai herevadia rua be idau, a? Edena dala ai Mesia ia mase, bena “iena mauri dinadia do ia halataia”? Edena dala ai boubou gauna bamona ia mase bena murinai ia be “Iehova ena ura ena anina be iena imana dekenai do ia tubu”? Edena dala ai ia mase bona mase dekenai ia noho to ia perovetalaia herevana badana ia hagugurua diba, unai be do ia lohia ela bona hanaihanai King bona tanobada ibounai dekenai maino bona moale do ia havaraia?​—Isaia 9:​6, 7.

19. Iesu ia toreisi lou be edena dala ai Mesia idia perovetalaia herevadia idaudia bamona ia hahegeregeredia bona ia hatamonadia?

¹⁹ Unai hereva idaudia rua be hoa karana badana ta amo ia hanaia. Iesu be toreisi lou ia abia. Kudou-maoro Iuda taudia handred momo be unai gau namo hereana idia itaia. (1 Korinto 15:6) Gabeai aposetolo Paulo ia torea, ia gwau: “Keriso ese kara dika kokia totona boubou karana tamona sibona ia henia. Inai boubou karana be mai ena siahu ela bona hanaihanai. Keriso ese unai bamona ia karaia murinai, Dirava ena idiba kahanai ia helai diho. Unuseni ia naria noho ela bona Dirava ese ia idia tuari henia taudia be iena aena henunai do ia atodia.” (Heberu 10:​10, 12, 13) Oibe, guba maurina dekenai ia toreisi lou bona ia “naria” negana murinai, ia be King terona do ia abia bona iena Tamana, Iehova, ena inai taudia dekenai kara do ia karaia. Ia be guba King dagina ia abia dainai, Mesia Iesu be hari inai negai taunimanima iboudiai edia mauri dekenai mai anina kara ta do ia karaia. Edena dala ai? Aiemai sivarai gabena ese unai do ia herevalaia.

[Footnotes]

Edena Bamona Do Oi Haere?

◻ Dahaka dainai Iesu be idia perovetalaia Mesiana idia hamomokania herevadia ita tahua be namo?

◻ Edena dala ai Iesu ena sene taudia ese iena Mesia dagina idia hamomokania?

◻ Edena dala ai Bible peroveta herevadia idia hamomokania Iesu be Mesia?

◻ Edena dala ai Iehova ese ia hamomokania Iesu be Mesia?

◻ Badina be dahaka Iuda taudia momo be Iesu idia dadaraia bona idia gwau ia be Mesia lasi, bona dahaka dainai idia karaia ena badina be idia maoro lasi?

[Picture on page 12]

Iesu ena hoa karadia momo be iena Mesia dagina idia hamomokania