Sivarai Gwauhamata Tanona Amo

Shiloh ai Idia Lao—Natudia Namodia bona Dikadia

GWAUHAMATA tanona ena siti, taoni, eiava unai gabudia oi laloa neganai, tatau bona hahine badadia haida oi laloa, a? Sedira unai bamona, badina Bible ena sivarai momo be taunimanima badadia idia herevalaia. To unai nega ena natudia be edena bamona? Oi lalodia danu, a?

Atai laulau be ita ia durua memero kekeni edia sivarai ita laloa namonamo totona, idia haida be haheitalai namodia Keristen taudia dekenai bona haida edia sivarai amo sisiba ita abia diba. Laulau ena bogaragina ai ia noho ororona be sedira idau nega Shiloh gabuna. Dahaka dainai Shiloh ita laloa?a

Reana oi laloatao Israel taudia be Gwauhamata Tanona ai idia vareai neganai, idia be Gilgal ai, Ieriko kahirakahira ai, Dirava ena tomadiho kalagana idia atoa. (Iosua 4:19) To tano idia haria neganai, unai helaga tomadiho kalagana​—Israel ena tomadiho gabuna​—be unai gabu, Shiloh, dekenai idia mailaia. (Iosua 18:1) Unai be Ierusalem amo ia lao north kahana kilomita 30 bamona, Efraim ena ororo gabuna ai. Israel ena gabu iboudiai amo tatau bona hahine idia lao Shiloh dekenai; tomadiho kalagana ia noho gabuna ena diho kahanai kourana dekenai taunimanima momo idia hebou diba. (Iosua 22:12) Oi laloa natudia be unuseniai idia lao, a?

Haida idia lao. Ita laloa bada merona ta be Samuel. Iena tamana sinana, Elkana bona Hana, be west kahana ororodia ena taoni ta dekenai idia noho. Lagani ta ta iboudiai unuseniai idia lao, sedira idia be Elkana ena adavana ma ta ena natudia haida idia abia lao danu. Gabeai Iehova be Hana ia hanamoa bona natuna merona ta ia henia, idia henia ladana be Samuel. Gabeai iena tama sina ese idia abia lao Shiloh dekenai, ia be unuseniai tomadiho kalagana dekenai, hahelaga tauna badana Eli ida ia hesiai karaia.​—1 Samuel 1:​1–2:11.

Unai mero be Dirava ena ruma dekenai ia gaukara, bona sedira nega momo idia noho kahirakahira ororodia ai ia loaloa. (1 Samuel 3:​1, 15) Idia haida dekenai tano idia geia bona olive audia momo idia hatubua, rau 9 ena laulau ese ia hahedinaraia hegeregerena. Nadi amo idia karaia gima kohorona maragina oi laloa. Unai gima kohorona amo, biru taudia eiava mamoe naria taudia idia gima noho diba, to reana tau matamatana Samuel ia daekau bona ia gima danu. (2 Sisiga 20:24 itaia danu.) Unai be gimaia gabu namona dagedage uda boroma idia itaia haraga totona.

Hari inai negai, au be momo lasi, to unai neganai au be momo herea, bona uda bada lalonai dagedage uda boroma momo idia noho. (Iosua 17:​15, 18) Elisaia be Dirava ena peroveta tauna badana ai ia lao neganai sivarai ta amo unai ita diba. Elisaia be Ieriko amo ia lao Betele dekenai, unai dainai, unai gabu ai ia loaloa, Shiloh ena diho kahana amo ia be kilomita 16 bamona. Betele taudia be edena bamona do idia abia dae? Unai gabu be golo boromakau tomadiho henia gabu badana ai ia lao. (1 Hanua Pavapavadia 12:​27-33; 2 Hanua Pavapavadia 10:29) Ia hedinarai unai gabu ena taunimanima badadia be Iehova ena peroveta tauna idia badu henia, bona sedira edia natudia be unai bamona idia karaia danu.

Hanua Pavapavadia Iharuana 2:​23, 24 be ita ia hadibaia memero haida be Dirava ena peroveta tauna idia hevaseha henia, idia gwau: “Kebere e, oi siri! Kebere e, oi siri!” Ia haere neganai, Elisaia be “Iehova ena ladana dekenai ia gwauraidia dika. Bena bea hahinedia rua be uda amo idia mai bona idia amo natudia 42 idia aladia mase.” Unai Suria bea koremadia idia hoa neganai eiava edia natudia idia naridia totona idia toreisi neganai idia dagedage bada. (2 Samuel 17:8; Hereva Lada-isidia 17:12; 28:15) Dirava ese ia siaia tauna idia matauraia lasi, bona unai amo Iehova idia matauraia lasi taudia ia hahemaoro henidia.

Shiloh ororodia dekenai maragidia be dagedage uda boromadia idia davaria diba dainai, namona be ita laloa Samuel ena tamana sinana be tomadiho kalagana ai idia abia lao neganai edia abidadama be bada.

Tomadiho momokani tauna ma ta be idau negai unai bamona abidadama bona Dirava badinaia karana ia hahedinaraia danu​—unai be Hahemaoro Karaia Tauna Iefeta. Ia be Ioridane ena east kahana ai Gilead ororo gabuna ai ia noho. Amono taudia ia tuari henidia dainai, bona Iehova totona ia tuari goadagoada dainai, Iefeta ia gwauhamata iena ruma amo ia mai tauna ginigunana be do ia henia boubou bamona Iehova dekenai. Iena rami hebou natuna kekeni be unai. Unai dainai iena natuna tamona sibona ia abia lao Dirava ena dubu Shiloh dekenai, bena unuseniai ia noho bona lagani momo lalodiai abidadama ai ia hesiai karaia.​—Hahemaoro Taudia 11:​30-40.

Shiloh dekenai, Samuel bona Iefeta ena natuna ese idia hahedinaraia Dirava badinaia abidadama karana be namo unai gabu ai, to Iehova ena peroveta tauna, idia hevaseha henia natudia 42 edia haheitalai be dika.​—1 Korinto 10:​6, 11 itaia danu.

[Footnotes]

[Picture Credit Line on page 8]

Pictorial Archive (Near Eastern History) Est.

[Picture Credit Line on page 9]

Pictorial Archive (Near Eastern History) Est.

[Picture Credit Line on page 9]

Safari Zoo, Ramat-Gan, Tel Aviv