Iehova, Hoa Karadia Ia Karaia Diravana

“Oi be bada, bona hoa karadia oi karaia noho; oi mo sibona be Dirava.”​—SALAMO 86:10.

1, 2. (a) Taunimanima ese idia karadia gaudia dainai tanobada be edena bamona? (b) Helaro namona be edeseniai ita davaria?

HARI inai negai taunimanima ese edia gau matamatadia idia heagilaidia, idia gwau idia be hoa gaudia​—paua gaudia, reidio, vidio, motuka, jet peleinidia bona kompiuta unai. Unai gau dainai tanobada besedia idauidau idia diba heheni. To taunimanima ese maino bona noho namo idia davaria lasi; tuari, raskol karadia, dagedage karadia, tanobada hamiroa karadia, gorere, bona ogogami ese idia hadikadia noho. Bona ena be edia niuklia tuari gaudia haida idia negedia, to idia do noho gaudia ese tanobada taudia iboudiai idia hamasedia ore diba. Tuari gaudia hoihoilaidia taudia ese bisinesi bada herea idia karaia. Taga taudia ese edia taga idia habadaia bona ogogami taudia edia ogogami ia bada ia lao. Ta ese inai kerere hamaoromaorodia dalana ia davaria diba a?

² Oibe! Badina be hahemauri ia gwauhamatalaia Tauna ia noho, “hereadae tauna,” Iehova Dirava unai. (Kohelete 5:8) Iena lauma dainai salamo idia toredia, bona hisihisi negadiai unai salamo amo goada bona sisiba namona ita abia. Idia ta be Salamo 86, David ena guriguri herevana ta. Unai guriguri herevana oi manadalaia diba.

Ena be Hisihisi Ia Ania To Dirava Ia Badinaia

3. David ena kara sivaraina ese ita edena bamona ia hagoadaia?

³ David ese inai salamo ia torea, hisihisi ia ania neganai. Hari inai negai ita be Satana ena tanobada ena “nega dokonai” ita noho dainai, ita danu be hisihisi ita ania. (2 Timoteo 3:1; ma Mataio 24:​9-13 danu itaia.) Ita hegeregerena, David ena lalona ia hekwarahi bona ia hisihisi, iena hekwarahi idauidau dainai. To ia ese ena Dirava ia abidadama henia noho mai ena kamonai ida. Ia gwau: “Iehova e, emu taiana oi hakala. Lau oi haere henia, badina be hisihisi lau ania bona lau ogogami. Egu mauri oi gimaia, badina oi lau badinaia. Emu hesiai tauna oi ia abidadama henia oi hamauria. Oi be egu Dirava.”​—Salamo 86:​1, 2.

4. Eda abidadama be edena bamona ita hahedinaraia be namo?

⁴ David hegeregerena, ita diba momokani “durua ibounai ia henia Diravana,” Iehova, ese ena taiana do ia hakala bona iseda guriguri do ia kamonaidia. (2 Korinto 1:​3, 4) Iseda Dirava ita abidadama henia momokani dainai, David ena sisiba ita badinaia diba: “Emu maduna be Iehova latanai oi tahoa kau, ia ese oi do ia abia isi. Ia ese kara maoromaoro tauna do ia gimaia, do ia marere-marere lasi.”​—Salamo 55:22.

Iehova Ia Tura Henia

5. (a) Iuda toretore taudia edia kerere be edena bamona idia hamaoromaorodia? (b) Edena dala amo Salamo 85 bona 86 ese Iehova idia hanamoa? (Hereva maragina oi itaia.)

⁵ Salamo namba 86 lalonai, David ese inai hereva “Iehova e” ia gwauraia nega 11. David ia guriguri goadagoada bona Iehova ia tura henia momokani! Gabeai, Iuda toretore taudia idia ura lasi Dirava ena ladana unai bamona do idia gwauraia. Idia gari kava, ena ladana do idia gwauraia kerere garina. Ena be Dirava ese taunimanima ia karaia iena laulauna, to unai idia laloa lasi; idia ura lasi Dirava ena kara be taunimanima edia kara ida do idia hahegeregerea. Unai dainai, Heberu gado ai, inai salamo lalonai nega 7 inai hereva ʼAdho-naiʹ (Lohiabada) idia torea, Dirava ena ladana YHWH (Iehova) boloa totona. Ita moale, badina be New World Translation of the Holy Scriptures bona Bible ma haida lalodiai, Dirava ena ladana be ena gabu korikori ai idia haloua, Iena Hereva lalonai. Unai dainai, Iehova ita tura henia dalana ia hedinarai goevagoeva.a

6. Edena dalai ita hahedinaraia diba Iehova ena ladana ita laloa bada?

⁶ David be ma ia guriguri, ia gwau: “Iehova e, lau oi bogaia hisi, badina be oi lau tai henia dina ibounai. Emu hesiai tauna ena souli oi hamoalea, badina be egu souli lau abia isi, oi Iehova emu ai.” (Salamo 86:​3, 4) Mani inai oi laloa: David ese Iehova ia tai henia “dina ibounai.” Nega momo ia be hanuaboi ibounai ia guriguri, ia heau mauri bena tano gagaena ai ia noho neganai hegeregerena. (Salamo 63:6, 7) Unai hegeregerena, hari inai negai Witness taudia haida ese Iehova idia tai henia, haida ese idia reipidia gwauraia o dala idaudia amo idia hadikadia gwauraia negadiai. Nega haida unai ena anina namona idia hoalaia. Iehova ena ladana ita laloa bada, Iesu Keriso, “Davida ena natuna,” ese ia laloa bada hegeregerena. Ia ese ena hahediba taudia ia hadibadia, Iehova ena ladana hahelagaia karana do idia gurigurilaia, bona unai ladana ena anina ia hadibalaidia.​—Mataio 1:1; 6:9; Ioane 17:​6, 25, 26.

7. Iehova ese ena hesiai taudia haida edia souli edena bamona ia abia isi, bona unai dainai edena bamona do ita kara be namo?

⁷ David ese ena souli, iena mauri ibounai, ia abia isi Iehova enai. Ita ia hagoadaia, ita danu be unai bamona do ita karaia; Salamo 37:5 ai ia gwau: “Oiemu dala Iehova ena imana ai oi atoa, ia oi abidadama henia, bena ia ese kara ta do ia karaia.” Iehova do ita noia iseda souli do ia hamoalea neganai, ita do ia haere henia. Iena hesiai taudia momo, ena be hekwarahi, dagedage, bona gorere idia hisihisilaidia, to iena hesiai idia lao henia noho mai edia maoromaoro bona mai edia moale bada ida. Iseda tadikaka, Africa ena tuari gabudia, Angola, Liberia, Mozambique, bona Zaire ai idia noho, ese Iehova ena hesiai gaukarana idia tahua guna noho.b Edia lauma gaukarana ena anina bada ai ia hamoaledia momokani. Idia haheauka hegeregerena, ita danu ita haheauka be namo. (Roma 5:​3-5) Dirava ena gwauhamata be inai: “Matahanai be ena nega ia do naria noho, dokona ia heau henia noho . . . Do ia leiti lasi.” (Habakuku 2:3) Namona be ita ese Iehova do ita abidadama henia momokani bona dokona do ita “heau henia noho.”

Iehova ena Namo

8. Ita ese Iehova edena bamona ita tura henia diba, bona ia ese ena namo edena bamona ia hahedinaraia?

⁸ David be ma ia guriguri, ia gwau: “Iehova e, oi be namo, oi ese dika oi gwauatao; emu hebogahisi be bada, oi idia tai henia taudia iboudiai ediai. Iehova e, egu guriguri oi hakala henia, egu noinoi oi kamonai. Egu hekwarahi dinana ai oi do lau tai henia, badina be oi ese lau do oi haere henia.” (Salamo 86:​5-7) “Iehova e”​—inai hereva amo hetura mamina ita moalelaia loulou! Inai hetura be guriguri amo ita goadalaia hanaihanai be namo. Ma nega ta David ia guriguri, ia gwau: “Egu tauhau negana ena kara dika bona egu gwau-edeede karadia oi laloatao lasi. Iehova e, lau oi laloatao, emu hebogahisi dainai.” (Salamo 25:7) Iehova ena namo be hereadae​—Iesu amo mauri davana ia karaia, helalo-kerehai taudia edia dika ia gwauatao, bona ena Witness taudia mai edia kamonai ia bogadia hisi bada.​—Salamo 100:​3-5; Malaki 3:10.

9. Edia kara dika amo idia helalo-kerehai taudia ese dahaka hereva idia laloa namonamo be namo?

⁹ Iseda kerere gunadia ita lalohisihisilaidia be namo a? Bema hari ita raka maoromaoro, aposetolo Petro ena hereva ese ita ia hagoadaia; ia ese helalo-kerehai taudia ia hamaorodia Iehova ese “goada matamata” do ia henidia. (Kara 3:19) Namona be guriguri amo Iehova kahirakahira dekenai do ita noho, eda Hahemauri Tauna Iesu amo; ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. . . . Vadaeni emui laumana be do idia laga-ani.” Witness taudia mai edia kamonai ese Iesu ena ladanai Iehova idia guriguri henia neganai, goada matamata idia abia.​—Mataio 11:28, 29; Ioane 15:​16.

10. Salamo bukana ese Iehova ena hebogahisi edena bamona ia hahedinaraia bada?

¹⁰ Salamo bukana ese Iehova ena “hebogahisi” ia gwauraia nega 100 mai kahana. Iena hebogahisi be bada herea! Iena siri ginigunadia 4 lalodiai, Salamo 118 ese Dirava ena hesiai taudia ia noidia Iehova do idia tanikiu henia; nega 4 ia gwau, “Badina be ena hebogahisi be ia hesiriu hanaihanai.” Salamo 136 ese “ena hebogahisi” ia gwauraia nega 26. Iakobo 3:2 ena hereva hegeregerena, “ita ibounai ese nega momo kerere ita karaia”; unai dainai namona be ita hegaegae Iehova do ita noia iseda dika do ia gwauatao, badina be ena hebogahisi ita abidadama henia dainai. Ita ia lalokau henia dainai ita ia bogaia hisi. Bema iena ura do ita karaia noho mai eda kamonai ida, iena lalokau do ia hahedinaraia; ita do ia hagoadaia, hedibagani iboudiai do ita haheaukalaidia totona.​—1 Korinto 10:13.

11. Elda taudia ese lalo-metau taudia haida edena bamona idia durudia diba?

¹¹ Reana nega haida, haida ese ita idia hahekwakwanaia. Ita haida ita laloa ita kerere o ita be anina lasi, badina be ita do maragi neganai haida ese ita idia hadikaia dainai. Namona be unai bamona tauna ese Iehova do ia tai henia, badina be ia diba do ia haere henia. (Salamo 55:​16, 17) Namona be elda tauna ta ese do ia durua mai ena hebogahisi ida, bena do ia abia dae kerere be iena lasi. Bena elda tauna ese nega ta ta do ia hagoadaia loulou, ela bona ia ese ena ‘metau do ia huaia’ diba.​—Galatia 6:​2, 5.

12. Hisihisi be edena bamona idia momo daekau, bona edena bamona ita haheaukalaidia diba?

¹² Hari inai negai Iehova ena orea taudia ese hisihisi idaudia momo idia davaridia. Lagani 1914 ai hisihisi badadia be tanobada ai idia vara matamaia, ginigunana be Tanobada Ibounai Tuarina Ginigunana. Iesu ia peroveta bamona, idia be “hisihisi nega ena hamatamaia.” Idia momo daekau, badina be “tanobada dokona” negana be inai. (Mataio 24:​3, 8) Diabolo ena ‘nega kwadogina’ be kahirakahira do ia ore. (Apokalupo 12:12) Ia be “leona mai ena boiboi bada bamona” do ia anidia ore taudia ia tahudia; tiriki karadia iboudiai amo ia ese ita na Dirava ena orea amo ia abia oho toho, ita do ia hadikaia ore totona. (1 Petero 5:8) To do ia kwalimu lasi! Badina be, David hegeregerena, ita ese iseda Dirava tamona, Iehova, ita abidadama henia dainai.

13. Tama sina bona edia natudia ese Iehova ena namo edena bamona idia abia diba?

¹³ David ese ena natuna Solomon ia hadibaia Iehova ena namo do ia abidadama henia totona. Unai dainai, Solomon ese ena natuna inai bamona ia hadibaia diba: “Iehova oi abidadama henia mai emu lalona ibounai ida, bona oi sibomu emu lalo-parara oi abidadama henia lasi. Emu dala iboudiai lalodiai ia oi laloa, bena ia ese emu dala do ia hamaoromaorodia. Sibomu emu aonega oi heagilaia lasi. Iehova garina oi gari, bona dika amo oi raka oho.” (Hereva Lada-isidia 3:​5-7) Namona be tama sina ese edia natudia unai bamona do idia hadibadia, Iehova do idia guriguri henia mai edia abidadama ida bona sikuli ai idia bamodia taudia edia lalo-ani bona edia hedibagani do idia dadaraidia totona. Bema dina dina iboudiai oi be emu natudia ida Bible ena hereva umui badinadia, unai ese edia lalodia do ia hagoadadia, Iehova do idia lalokau henia momokani bona ienai do idia tabekau totona.​—Deuteronomi 6:​4-9; 11:​18, 19.

Iehova ena Gaukara Badadia

14, 15. Iehova ena gaukara badadia haida be dahaka dahaka?

¹⁴ David be ma ia gwau: “Iehova e, dirava idauidau bogaragidiai ta be oi hegeregerena lasi, gaukara ta danu be oiemu hegeregeredia lasi.” (Salamo 86:8) Iehova ena gaukara be bada herea, taunimanima edia lalohadai idia hereadia momokani. Guba ena bada bona ena hairai, saiens taudia ese idia itadia gaudia, ese David ia lalodia gaudia idia hereadia momokani. To ia itadia gaudia dainai ia gwau: “Guba ese Dirava ena hairai ia gwauraia hedinarai; guba gaudia ese iena imana gaukaradia idia hahedinaraia.”​—Salamo 19:1.

¹⁵ Iehova ena gaukara idia hedinarai daladia ma haida be inai: Tanobada be guba padanai ia atoa bona ia hegaegaelaia, dina bona hanuaboi, lahara bona laurabada, hadohado negana bona geigei negana, bona taunimanima ese do idia moalelaidia gaudia momo danu do idia vara totona. Bona ita ia karaia, iena gaukara do ita moalelaidia diba totona.​—Genese 2:​7-9; 8:22; Salamo 139:14.

16. Iehova ese ena namo ia hahedinaraia dalana hereadaena be dahaka, bona unai dainai dahaka gaukara badadia ma haida ia karadia?

¹⁶ Iseda tubudia roboadia ese Dirava idia gwau-edeede henia dainai, hisihisi be tanobada ai idia vara ema bona hari. Iena lalokau dainai Iehova ese hoa karadia ia karaia; ena Natuna be tanobada ai ia siaia, Dirava ena Basileia do ia harorolaia bona taunimanima davalaidia totona do ia mase totona. Bena Iehova ese Keriso ia hatorea isi lou, Pavapava ai do ia lao totona. (Mataio 20:28; Kara 2:​32, 34) Ia ese danu kamonai taudia bogaragidia amo ‘taunimanima matamatadia’ ia abidia hidi, “guba matamatana” ai do idia lao bona Keriso ida idia ese “tanobada matamatana” besena do idia lohiaia, unai bese lalonai be toreisi lou taudia bilion bilion. (2 Korinto 5:17; Apokalupo 21:​1, 5-7; 1 Korinto 15:​22-26) Unai amo Iehova ese ena gaukara do ia hagugurua! Inai bamona ita hanamoa diba: “Iehova e, . . . emu hahenamo be bada herea, oi abia hegaegae, oi idia gari henia taudia edia!”​—Salamo 31:​17-19.

17. Iena gaukara dainai Iehova ese Salamo 86:9 edena bamona ia hamomokania noho?

¹⁷ Iehova be hari inai negai ia karaia gaukaradia haida be David ese ia gwauraidia, ia gwau: “Iehova e, oi karaia besedia iboudiai do idia mai, oiemu vairanai do idia igo diho, bona oiemu ladana do idia hanamoa.” (Salamo 86:9) Iena taunimanima matamatadia oredia, Basileia abia taudia edia “orea maragi,” be taunimanima bogaragidia amo ia boiridia murinai, Iehova ese “mamoe idaudia” “hutuma bada herea” na “bese iboudiai” edia amo ia gogodia, idia danu ese Iesu ena rarana idia abidadama henia. Orea goadana ai ia haboudia, maino ura henia taudia edia orea tamona unai. Guba oreadia ese unai idia itaia bena Iehova vairanai idia goru diho, idia gwau: “Hahenamo bona hairai bona aonega bona tanikiu bona hemataurai bona siahu bona goada be eda Dirava ese do ia abidia, harihari ela bona hanaihanai.” Hutuma bada herea danu ese Iehova ena ladana idia hanamoa, bona “dina bona hanuaboi” iena hesiai idia lao henia; edia helaro be tanobada ena dokona amo do idia roho mauri bena paradaiso tanobadana ai do idia noho hanaihanai.​—Luka 12:32; Apokalupo 7:​9-17, NW; Ioane 10:16.

Iehova ena Siahu Bada

18. Iehova be edena bamona ia hahedinaraia ‘ia mo sibona be Dirava’?

¹⁸ Bena David ese Iehova Dirava ena siahu bada ia gwauraia, ia gwau: “Oi be bada, bona hoa karadia oi karaia noho; oi mo sibona be Dirava.” (Salamo 86:10) Idaunega amo Iehova ese ia hahedinaraia ‘ia mo sibona be Dirava.’ Aigupito pavapavana, Farao ese Mose ia nanadaia mai ena hekokoroku ida, ia gwau: “Iehova be daika? Badina dahaka iena hereva dohore lau kamonai? . . . Iehova be lau diba lasi.” To nega daudau lasi murinai Iehova ena siahu bada ia lalo-pararalaia. Siahu Ibounai Diravana ese hisihisi badadia ia siaidia, Aigupito ena vara guna memerodia ia aladia mase, bona Farao mai ena ami ida be Davara Kakakakana lalonai ia hamasedia ore; unai amo Aigupito ena dirava bona ena babalau taudia ia hahemaraidia. Momokani, dirava bogaragidiai ta be Iehova hegeregerena lasi!​—Esodo 5:2; 15:​11, 12.

19, 20. (a) Edena negai Apokalupo 15:​3, 4 ena ane do idia abia badabada? (b) Ita ese Iehova ena gaukara edena bamona ita durua diba?

¹⁹ Iehova Dirava ese hoa karadia ia karaia vadaeni, unai amo dala ia lailaia, iena orea taudia mai edia kamonai be Aigupito bamona gauna, Satana ena tanobada, amo ia hamauridia totona. Haroro gaukarana bada hereana amo ia ese ena hahemaoro herevadia na tanobada ibounai lalonai ia halasidia, unai amo Iesu ena peroveta herevana Mataio 24:14 ai be ia hamomokania. “Dokona” be kahirakahira do ia ginidae; unai neganai Iehova ese ena siahu bada do ia hahedinaraia badabada, kara dika ibounai tanobada ai do ia haorea. (Salamo 145:20) Bena Mose ena ane bona Mamoe ena Natuna ena ane do idia abia badabada: “[Iehova] Dirava e, Siahu Ibounai Diravana e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi do ia gari henia lasi? Daika ese oiemu ladana do ia hanamoa lasi? Badina be oi sibona be helaga.”​—Apokalupo 15:​3, 4.

²⁰ Vadaeni, namona be Dirava ena palani namo hereadia do ita harorolaidia goadagoada. (Kara 2:11 itaia.) Harihari ela, Iehova ese hoa karadia badadia do ia karadia noho. Unai be iseda stadi herevana gabena ese do ia gwauraia.

[Footnotes]

Inai Oi Laloatao A?

◻ Dahaka dainai Salamo 86 ena guriguri be siboda eda guriguri ai ita halaoa be namo?

◻ Edena bamona Iehova ita tura henia diba?

◻ Iehova ese ena namo ita edai edena bamona ia hahedinaraia?

◻ Iehova ena gaukara badadia haida be dahaka dahaka?

◻ Edena dalai Iehova ‘mo sibona be Dirava’ mai ena siahu bada?

[Picture on page 10]

“Tanobada matamatana” ai, Iehova ena hoa karadia ese ena hairai bona ena namo do idia hahedinaraidia