Iehova ese Kudou Manauna Ia Dadaraia Lasi

“Dirava ese ia abia dae boubouna be lauma manauna; Dirava e, kudou manauna ia abia bona gwau-edeede ia rakatania tauna do oi dadaraia lasi.”​—SALAMO 51:17.

1. Iehova idia tomadiho henia taudia haida be kara dika badana ta idia karaia to murinai idia helalo-kerehai neganai, Iehova ena lalohadai idia dekenai be dahaka?

IEHOVA be ‘ori amo sibona do ia koua diba, guriguri ta do ia hanai lasi totona.’ (Rohe-Ahu Bukana 3:44) To ia ura iena taunimanima be ia dekenai idia mai diba. Ena be ia idia tomadiho henia tauna ta be kerere badana ta do ia karaia, to murinai ena dika amo ia helalo-kerehai, iseda guba Tamana ese unai tau ena kara namo do ia laloatao noho. Unai dainai, aposetolo Paulo be ia gwau diba: ‘Dirava ena kara be ia maoromaoro momokani, bona ia ese emui kara namodia bona iena ladana umui ura henia bada karana do ia laloaboio lasi.’​—Heberu 6:10.

2, 3. Edia Keristen bamodia haida be idia kerere neganai, Keristen elda taudia be idia durudia toho neganai, namona be dahaka do idia laloatao?

² Namona be Keristen elda taudia idia laloatao edia Keristen bamodia be lagani momo lalodiai mai edia abidadama danu Dirava ena hesiai gaukara idia karaia. Keristen elda taudia ese Dirava ena mamoe serina lalonai idia noho taudia iboudiai edia namo lauma dalanai idia tahua.​—Galatia 6:​1, 2.

³ Ena kara dika amo ia helalo-kerehai tauna be Iehova ena hebogahisi ia abia be gau badana. To, ma gau ta ia karaia danu. Unai ia hedinarai goevagoeva David ena hereva Salamo 51:​10-19 dekenai.

Kudou Goevana Abia be Gau Badana

⁴ Bema ia gwauhamata vadaeni Keristen tauna ta be ia kara dika dainai lauma dalanai ia gorere bada, Iehova ena hebogahisi kara bona ena gwauatao herevana do ia tahua be gau badana, to reana ma dahaka do ia abia danu? David ia gwau: “Dirava e, kudou goevana be lau lalonai oi havaraia, bona lauma matamatana bona maoromaorona be lau lalonai oi atoa.” (Salamo 51:10) Reana, David be unai bamona ia noinoi badina ia lalo-parara iena kudouna lalonai kara dika badadia urana idia do noho dainai. David ia karaia kara dikadia Bataseba bona Uria dekenai bamona be reana ita karaia lasi, to ita ese kara dika badadia ma haida edia hetoho ita dadaraia totona gau badana be Iehova ena heduru ita abia. Ma danu, iseda kudouna dekena amo kara dika karadia, hegeregere, haida edia kohu ura dikadika henia bona taunimanima inai henia karadia ita kokidia totona, Dirava ena heduru ita abia be gau badana.​—Kolose 3:​5, 6; 1 Ioane 3:15.

5. (a) Kudou goevana abia ena anina be dahaka? (b) David ese lauma matamatana ia noinoilaia neganai dahaka ia ura abia?

⁵ Iehova ia ura iena hesiai taudia be “kudou goevana” idia abia, unai anina be, edia lalohadai, kara bona ura idia goeva. David ia lalo-parara ia ese goeva karana ia hahedinaraia lasi, unai dainai ia guriguri Dirava dekenai. Salamo torea tauna danu ia ura lauma matamatana bona maoromaorona, eiava lalohadai matamata mauri dekenai ia abia. Hetoho do ia dadaraia bona Iehova ena taravatu bona ia gwauraia maoro daladia ia badinadia totona, gau badana be ia durua laumana do ia abia.

Lauma Helaga Abia be Gau Badana

⁶ Ita kerere eiava ita kara dika dainai ita dara-doko neganai, reana ita laloa Dirava ese ita do ia dadaraia bona ita dekena amo iena lauma helaga eiava siahuna do ia kokia. David be unai bamona ia laloa, badina Iehova ia noinoi henia, ia gwau: “Oiemu vairana amo lau oi negea lasi; emu lauma helagana be lauegu amo oi abia oho lasi.” (Salamo 51:11) David be ena kara dikadia dainai ia sori bona mai manau danu ia laloa ia hegeregere lasi Iehova ena hesiai gaukara ia karaia totona. David be lauma dalanai do ia namo lou totona, Iehova ena lauma helaga ia abia be gau badana. Lauma helaga be ia dekenai ia noho neganai, pavapava be guriguri dekena amo Dirava ena hakaua herevadia ia tahua diba Iehova ia hamoalea totona, kara dika ia dadaraia diba, bona mai aonega danu do ia lohia totona. David ia lalo-parara lauma helaga Henia Tauna dekenai ia kara dika, unai dainai mai ena maoro danu ia noinoi Iehova ese ia dekena amo lauma helaga do ia kokia lasi totona.

7. Dahaka dainai lauma helaga abia totona do ita guriguri, bona ita abia murinai ita naria namonamo ita hahisia garina?

⁷ Ita be edena bamona? Namona be ita guriguri lauma helaga do ita abia totona bona ita hahisia garina namona be ita naria namonamo ena hakaua dalana ita badinaia totona. (Luka 11:13; Efeso 4:30) Bema lasi, lauma helaga be ita dekena amo do ia boio diba bona unai neganai ita be Dirava ena lauma huahuadia, unai be lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana do ita hahedinaraia diba lasi.

Hahemauri Ena Moale

⁸ Ena kara dika amo ia helalo-kerehai bona lauma dalanai ia namo lou tauna, ese Iehova ia havaraia hahemauri dalana dainai do ia moale lou diba. Unai ia laloa momo dainai, David be Dirava ia noia, ia gwau: “Emu hahemauri ena moale be lau oi henia lou, bona ura-kwalimu laumana amo lau oi abia isi.” (Salamo 51:12) Iehova Dirava ese ia henia bona do ia vara momokani ena hahemauri helarona ita moalelaia be namo herea! (Salamo 3:8) Dirava dekenai ia kara dika murinai, David be Ia dekena amo hahemauri moalena abia lou dalana ia tahua. Gabeai negana lalonai, Iehova be iena Natuna, Iesu Keriso ese ena mauri ia bouboulaia karana amo, hahemauri dalana ia kehoa. Bema ita, Dirava ena gwauhamata hesiai taudia, be kara dika badana ta ita karaia, to ita ura hahemauri moalena ita abia lou, gau badana be iseda kara dika amo ita helalo-kerehai.​—Mataio 12:​31, 32; Heberu 6:​4-6.

9. David be Dirava ia noinoi henia neganai “ura-kwalimu laumana” ia abia totona, dahaka ia ura abia?

⁹ David ia noinoi Iehova be “ura-kwalimu laumana amo” ia durua totona. Reana unai be Dirava ena ura-kwalimu eiava iena lauma helaga ena heduru ia gwauraia lasi, to David ena lalohadai mauri dekenai ia gwauraia. Kara maoromaoro ia karaia bona kara dika dekenai do ia moru lou lasi totona, David ia ura Dirava ena heduru dekena amo ura-kwalimu ia abia. Hanaihanai Iehova Dirava ese ena hesiai taudia ia durudia bona hedibagani idauidau dainai idia lalo-hekwarahi taudia danu ia durudia. (Salamo 145:14) Unai ita diba neganai ita moale, bona ena be ita kerere to iseda dika dainai ita sori bona ita ura dikadika Iehova ena hesiai gaukara ita karaia ela bona hanaihanai!

Kara Kerere Taudia be Dahaka Lau Hadibadia?

¹⁰ Bema Dirava ese ia koua lasi neganai, David be Iehova ena hebogahisi ia moalelaia dainai ia ura tanikiu henia bona taunimanima ma haida ia durudia. Ena dika amo ia helalo-kerehai pavapavana be ena lalohadai Iehova dekenai ia gurigurilaia, ia gwau: “Emu dala be kara kerere taudia dekenai do lau hadibaia, bona kara dika taudia ese oi do idia lou henia.” (Salamo 51:13) Mai ena kara dika tauna David be edena bamona kara kerere taudia dekenai Dirava ena Taravatu do ia hadibadia diba? Bona unai ese dahaka namo do ia havaraia diba?

10, 11. (a) Idia kara kerere Israel taudia dekenai David be dahaka ia hadibadia diba? (b) Ia hegeregere totona David be dahaka ia karaia guna, gabeai ia be kara dika taudia ia hadibadia diba?

¹¹ David be idia kara kerere Israel taudia dekenai Iehova ena dala ia hadibadia neganai, ia be helalo-kerehai ena anina, bona Dirava ena hebogahisi abia dalana ia hadibadia. Guna, Iehova ese ia lalo-namo henia lasi ena mamina dikana ia abia dainai bona ena lalona ena mamina ia gwadaia dainai, ia lalohisihisi, unai dainai David be mai hebogahisi danu edia kara dika amo idia helalo-kerehai bona kudou manau taudia ia hadibadia diba. To, iena haheitalai namo amo haida ia do hadibadia lasi neganai, gau badana be guna ia ese Iehova ena taravatu ia badinaia bona Iena gwauatao herevana ia abia, badina Dirava ena taravatu idia ura lasi badinaia taudia be ‘Dirava ena hereva idia gwauraia’ be maoro lasi.​—Salamo 50:​16, 17.

12. David be rara ia bubua ena davana dikana amo Dirava ese ia hamauria ia diba dainai, David ese dahaka namo ia davaria?

¹² David ese ena ura be ma dala ta amo ia gwauraia hedinarai, ia gwau: “Dirava e, lau oi hamauria Diravana, rara bubua karana amo lau oi hamauria, bona mai moale bada lauegu malana ese oiemu kara maoromaoro do ia herevalaia.” (Salamo 51:14) Rara bubu karana ena davana be mase. (Genese 9:​5, 6) Vadaeni, David be Uria rarana ia bubua karana ena davana dekena amo hahemauri Diravana ese do ia hamauria ia diba neganai, David ena kudouna bona lalona dekenai lalo-maino ia abia. (Kohelete 7:20; Roma 3:10) David ia heudahanai bona unai kara ena kerere ia haidaua diba lasi, eiava Uria be mase guria gabuna amo ia hamauria diba lasi, hari inai negai danu, tau ta ese kekeni ta ia hadikaia neganai ena rami hebou karana ia henia lou diba lasi eiava ia alaia tauna ta ia hatoreaisi lou diba lasi. Hedibagani ita abia neganai namona be unai ita laloatao, ani? Iehova be kara maoromaoro bona hebogahisi dalana amo ita ia kara henia dainai iena kara ita laloa bada be gau badana!

13. Edena negai sibona kara dika tauna be ena udu bibinadia amo Iehova do ia hanamoa be ia maoro?

¹³ Kara dika tauna ta ena udu-bibinadia ia kehodia Iehova ia hanamoa totona be maoro lasi, to bema hebogahisi Diravana ese ena udu-bibinadia ia kehodia Iena hereva momokanidia do ia gwauraia hedinarai totona, unai be ia maoro. Unai dainai David be ane amo ia gwau: “Iehova e, lauegu udu-bibinadia oi kehoa, lauegu uduna ese oi ia hanamoa herevana ia herevalaia totona.” (Salamo 51:15) Dirava ese ena kara dika ia gwauatao neganai, David ena lalona gwadaia karana ena mamina ia ore, bona hemarai lasi dekenai Iehova ena ladana ia hanamoa diba. David hegeregerena, namona be edia kara dika murinai gwauatao herevana idia abia taudia iboudiai be Iehova ena hebogahisi karana idia dekenai idia moalelaia bada, bona namona be nega iboudiai dala idia tahua Dirava ena hereva momokani bona ‘iena hanamoa herevadia’ idia harorolaia totona.​—Salamo 43:3.

Dirava Ia Abia Dae Boubou Gaudia

¹⁴ David ia gwau: “[Iehova e,] boubou karadia oi moalelaidia lasi, gole-oho boubouna oi lau henia diba, to unai gaudia oi ura henidia lasi.” (Salamo 51:16) Mose ena Taravatu ia gwau animal do idia bouboulaia. David ia heudahanai bona ta ia alaia mase karadia ena davana be mase, animal do ia bouboulaia karana be unai dika do ia kokia lasi. Bema animal bouboulaia karana be ia hegeregere, davana do ia laloa lasi to Iehova dekenai idia momo herea bema bouboulaidia. Bema ta ese mai ena kudouna ibounai danu ia helalo-kerehai lasi, boubou ia henia karadia be anina lasi. Unai dainai maoro lasi ita laloa ita kara dika noho neganai, bema kara namodia haida ita karaia idia ese unai ita karaia noho kara dikadia do idia koua bamona.

15. Ia gwauhamata tauna be lauma manauna ia abia neganai, iena kara be edena bamona?

¹⁵ David ma ia gwau: “Dirava ese ia abia dae boubouna be lauma manauna, Dirava e, kudou manau ia abia bona gwau-edeede ia rakatania tauna do oi dadaraia lasi.” (Salamo 51:17) Ia helalo-kerehai kara dika tauna dekenai “Dirava ese ia abia dae boubouna be lauma manauna.” Unai bamona tauna be badu lasi tauna. Ia gwauhamata vadaeni tauna be lauma manauna ia abia neganai, ena kara dika dainai ia lalohisihisi bada, Dirava ese ia lalo-namo henia lasi dainai ia manau, bona kara idauidau ia karaia Dirava do ia lalo-namo henia lou totona. Bema iseda dika amo ita helalo-kerehai lasi bona iseda kudouna ibounai ida ia mo sibona ita tomadiho henia lasi, Dirava dekenai ita henia gaudia iboudiai be anina lasi.​—Nahumu 1:2.

16. Tau ta ese ena kara dika dainai kudou manauna ia abia neganai, Dirava ena lalohadai unai tauna dekenai be dahaka?

¹⁶ Dirava ese kudou manauna ia abia dae bona gwau-edeede ia rakatania tauna ena boubou karana ia dadaraia lasi. Unai dainai, ena be ita be iena taunimanima dainai hekwakwanai idauidau ita davaria, to namo lasi ita lalo-metau. Bema iseda mauri lalonai ita hekwakwanai dainai iseda kudouna amo ita boiboi Dirava ena hebogahisi karana ita abia totona, vadaeni dala ia noho heduru ita abia totona. Ena be kara dika badana ta ita karaia, to bema ita helalo-kerehai, Iehova ese iseda kudou manauna do ia dadaraia lasi. Keriso ese ia henia boubou karana dainai iseda dika do ia gwauatao bona Ia ese ita do ia lalo-namo henia lou. (Isaia 57:15; Heberu 4:16; 1 Ioane 2:1) To, David hegeregerena, namona be ita guriguri Dirava ese ita do ia lalo-namo henia lou totona. Dirava ese David ena kara dika ia gwauatao, to danu ia sisiba henia.​—2 Samuel 12:​11-14.

Tomadiho Goevana Laloa Bada

¹⁷ Bema kara dika badana ta ita karaia, bona kudouna amo ita sori bada neganai, Dirava do ita noia goadagoada iseda dika ia gwauatao totona. To, namona be ma haida totona do ita guriguri danu. Ena be David ia moale badina dina vairai dekenai Dirava ese ena hesiai gaukarana do ia abia dae lou totona, to ia sibona ena namo ia tahua lasi. Iena noinoi herevana Iehova dekenai be inai: “Emu lalo-namo ai Siona do oi kara namo henia; Ierusalem ena magu do oi haginidia lou.”​—Salamo 51:18.

18. Dahaka dainai ena dika amo ia helalo-kerehai tauna David be Siona totona ia guriguri?

¹⁸ Oibe, David be Dirava ese do ia lalo-namo henia lou negana ia laloa. To, unai salamo torea manau tauna ena guriguri lalonai ia ura ‘Dirava ese Siona do ia lalo-namo henia.’ Unai be Israel ena siti badana, Ierusalem, bona unai gabu dekenai David ia ura Dirava ena dubu ia haginia gwauraia. David ena kara dika karadia ese bese ibounai dekenai dika ia havaraia diba, bona unai pavapava ena kara kereredia dainai taunimanima iboudiai ese hisihisi do idia davaria diba. (2 Samuel, karoa 24 itaia danu.) Hegeregere, iena kara dikadia ese “Ierusalem ena magu” ia hamanokadia bamona, bona namona be idia haginidia lou.

19. Bema ita kara dika bona Dirava ese iseda dika ia gwauatao, dahaka do ia vara totona ita guriguri be maoro?

¹⁹ Bema kara dika badana ta ita karaia to Dirava ese iseda dika ia gwauatao, iseda kara amo ita havaraia dikana do ia hanamoa lou totona ita guriguri be maoro. Reana iena helaga ladana dekenai hemarai ita mailaia vadaeni, reana kongregesen ena namo ita hadikaia vadaeni, bona reana iseda ruma bese taudia dekenai hisihisi ita mailaia vadaeni. Iseda lalokau guba Tamana ese iena ladana dekena amo hemarai gauna do ia kokia diba, ena lauma helaga siahuna amo kongregesen do ia hagoadaia diba, bona iseda lalokau ruma bese taudia dekenai lalo-maino do ia henidia diba. Herevana kara dika ta ia vara eiava lasi, to Iehova ena ladana hahelagaia karana bona iena taunimanima edia namo ita tahua be gau badadia.​—Mataio 6:9.

²⁰ Bema Iehova ese Siona ena magu do ia haginidia lou, ma dahaka do ia vara? David be ane amo ia gwau: “Unai neganai oi [Iehova] be kara maoromaoro bouboulaia gaudia do oi moalelaia, lahi bouboudia bona gole-ahu bouboudia; bena boromakau maruanedia be emu boubou patana ai do idia hahelagadia.” (Salamo 51:19) David be ia ura dikadika ia bona bese taudia iboudiai be Iehova ena lalo-namo idia davaria, badina unai neganai Ia idia tomadiho henia karana do ia abia dae. Unai neganai Dirava ese edia lahi bouboudia bona gole-ahu bouboudia do ia moalelaidia. Unai be maoro badina edia boubou be kara maoromaoro amo idia henia, bona idia henia taudia be idia gwauhamata, mai edia abidadama, bona edia dika amo idia helalo-kerehai, bona idia be Dirava ia lalo-namo henia taudia dainai. Iehova ena hebogahisi karana idia moalelaia dainai, iena patana dekenai boromakau maruanedia​—namo herea bona davana bada gaudia​—idia bouboulaidia. Hari inai negai, Iehova ita hanamoa dalana be iseda namo gaudia ita henia. Bona iseda hebogahisi Diravana, Iehova, ita hanamoa totona iseda “bibina, boromakau tau matamatadia bamona” do ita henia boubou gauna hegeregerena.​—Hosea 14:2; Heberu 13:15.

Iehova ese Iseda Boiboi Ia Kamonai

²¹ David be ena kudouna ibounai ida ia guriguri herevana be Salamo karoa 51 ai ia noho, bona ia hahedinaraia bema ita kara dika gau badana be iseda dika amo ita helalo-kerehai momokani. Unai salamo lalonai sisiba haida idia noho ita idia durua totona. Hegeregere, ita diba momokani bema ita kara dika to murinai ita helalo-kerehai, Dirava ena hebogahisi karana do ita abia diba. To, namona be ita sori bada herea gauna be Iehova ena ladana ita hadikaia. (Siri 1-4) David hegeregerena, kara dika lalonai ita vara dainai, iseda guba Tamana ita noinoi henia diba iena hebogahisi karana ita abia totona. (Siri 5) Ita koikoi lasi be namo, bona Dirava dekena amo aonega ita tahua be gau badana. (Siri 6) Bema ita kara dika, namona be Iehova ita noinoi henia ita ia hagoevaia totona, kudou goevana, bona lauma goadana ita abia totona.​—Siri 7-10.

21, 22. Salamo karoa 51 ai, ita idia durua totona dahaka sisiba idia noho?

²² Salamo karoa 51 ese ia hahedinaraia namo lasi kara dika ita manadalaia. Bema unai bamona ita karaia, Iehova ese ita dekena amo iena lauma helaga, eiava siahuna do ia kokia. To, Dirava ena lauma helaga be ita dekenai ia noho neganai, taunimanima ma haida dekenai iena dala ita hadibaia gaukarana dekenai do ita kwalimu diba. (Siri 11-13) Bema kara kerere ta ita karaia to murinai ita helalo-kerehai, Iehova ese iena ladana ita hanamoa karana do ia koua lasi, badina ia ese kudou manauna bona gwau-edeede ia rakatania tauna do ia dadaraia lasi. (Siri 14-17) Danu, unai salamo ese ia hahedinaraia ita guriguri neganai, namo lasi ita sibona eda namo sibona ita tahua. To, namona be ita guriguri Iehova ena tomadiho goevana idia karaia taudia iboudiai ese hahenamo do idia abia bona lauma dalanai do idia goada totona.​—Siri 18, 19.

23. Dahaka dainai Salamo karoa 51 ese ita ia hagoadaia ita gari lasi totona, bona ita laloa gau iboudiai do idia namo ena lalohadai ita abia totona?

²³ Namona be David ia torea hebogahisi salamo herevadia ese ita ia hagoadaia ita gari lasi totona, bona ita laloa gau iboudiai do idia namo ena lalohadai do ita abia totona. Ita ia durua bena ita diba ena be kara dikana ta ita karaia, to heduru ia do noho. Badina be dahaka? Badina bema iseda kara dika amo ita helalo-kerehai, Iehova ena hebogahisi karana ese lalo-metau dekena amo ita ia hamauria diba. Bona Iehova ese kudou manauna ia dadaraia lasi dainai ita moale bada!

Edena Bamona Do Oi Haere?

◻ Dahaka dainai Keristen taudia be kudou goevana bona Dirava ena lauma helaga idia abia be gau badana?

◻ Ia helalo-kerehai tauna be Iehova ena taravatu dekenai idia kerere taudia dekenai dahaka ia hadibadia diba?

◻ Iehova ese gwau-edeede ia rakatania tauna be edena bamona ia laloa?

◻ Salamo karoa 51 ena sisiba be dahaka?

4. Dahaka dainai David ia guriguri kudou goevana bona lauma matamatana ia abia totona?

6. Dahaka dainai David ia noinoi Iehova be ia dekena amo lauma helaga do ia kokia lasi totona?

8. Bema kara dika ta ita karaia to ita ura hahemauri ena moale do ita abia, dahaka do ita karaia be gau badana?

14. (a) Mose ena Taravatu ia gwau dahaka idia bouboulaidia? (b) Dahaka dainai ia maoro lasi ita laloa kara namodia haida ita karaia karana ese ita kara dika noho karana ena dika do ia koua diba?

17. Ena be kara dika taudia ese Dirava idia noinoi henia edia kara dika ia gwauatao totona, to ma dahaka idia karaia danu be namo?

20. Edena negai sibona Iehova ese Israel idia henia lahi bouboudia bona gole-ahu bouboudia do ia moalelaidia?

[Picture on page 15]

Oi guriguri lauma helaga abia totona bona oi naria namonamo oi hahisia garina, a?

[Picture on page 17]

Iehova ena hebogahisi karana oi moalelaia oi hahedinaraia totona iena hereva momokani oi harorolaia