Keriso ena Noho Neganai Gaukara Idia Habadaia

“Vadaeni Lohiabada ese ena idiba kahana taudia dekenai do ia hamaoroa, do ia gwau, ‘Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.’ ”​—MATAIO 25:34.

1. Edena dala ai Keriso ena pa·rou·siʹa be “Noa ena nega” hegeregerena?

KERISO ena noho negana​—nega daudau idia naria negana unai! Unai nega, Iesu ese “tanobada dokona” ia gwauraia neganai “Noa ena nega” ida ia hahegeregerea negana, be lagani 1914 ai ia ginidae. (Mataio 24:​3, 37) To Keriso be ia lou mai vadaeni anina be dahaka, “hesiai tauna mai ena kamonai bona mai ena kara maoromaoro” oreana taudia oredia ediai? (Mataio 24:45) Anina be diari loalaia karana do idia habadaia! Hoa gaudia do idia vara! Taunimanima gogodia gaukarana badana idia karaia gwauraia.

2. Dahaka hahegoeva gaukarana be Malaki 3:​1-5 hegeregerena ia karaia?

² To unai horoa Keristen taudia do ia hagoevadia guna be namo. Malaki 3:​1-5 hegeregerena, lagani 1918 lalonai Iehova Dirava mai ena “gwauhamata ena gwaukau tauna,” Iesu Keriso, be idia mai, lauma dubuna itaia namonamo totona. ‘Dirava ena orea’ idia kota henia guna. (1 Petero 4:17) Malaki 3:3 ia gwau: “Ia [Iehova] be siliva hamanadaia bona hagoevaia tauna bamona; ia ese Levi ena natuna taudia do ia hagoevadia; bona do ia hamanadadia, golo bona siliva bamona.”

3. Dahaka dainai lauma dalanai ia hagoevadia be mai anina bada?

³ Unai hahemaoro negana lalonai, Iehova ese hesiai tauna oreana taudia oredia na tanobada bona tomadiho koikoi edia miro amo ia hagoevadia. Badina be dahaka? Badina be ena lauma dubuna ia laloa dainai. Iesu Keriso ena boubou gauna dainai Iehova tomadiho henia dalana, dubu bamona dalana, be unai. Ia ura ena dubu do ia goeva, bena tanobada helarona do idia abia taudia be unuseniai do idia mailaidia neganai, do idia davaria ena lohia siahuna idia matauraia, ena ladana idia hahelagaia, bona ena taravatu idia badinadia gabuna be unai. Unai dainai, Iehova do idia laloa bada, bona ena palani hereadia do idia harorolaidia.

Gaukara Ma Haida Ia Henidia

⁴ Lagani 1919 ai Iesu Keriso ese ena hesiai tauna oreana ena gaukara ia habadaia diba. Guna, lagani 1914 lalonai, ia ese guba Basileina ta ia abia. Ia be ena “memero” iboudiai itadia totona ena ruma naria taudia dekediai ia lou mai neganai, ia be pavapava dagina ia abia vadaeni. Dahaka ia davaria? Hesiai tauna oreana ese edia Biaguna ena kohu idia naria noho eiava? Iesu ena henanadai Mataio 24:​45-47 ai ese unai horoa taudia ta ta ia doridia, sibodia edia kara do idia tahua totona​—Iehova ena Mesia idia badinaia momokani eiava. Iena henanadai be inai: “Hesiai tauna mai ena kamonai bona mai ena kara maoromaoro, ena biaguna ese ia abia hidi, ena ruma do ia naria, bona aniani neganai [ena memero] edia aniani do ia henia, tauna be daika? Ena biaguna do ia mai neganai do ia davaria, unai bamona ia karaia noho tauna be ia namo. Umui lau hamaoroa momokani, ena kohu ibounai naria tauna do ia halaoa.”

4, 5. (a) Iesu Keriso ena henanadai ta ese hesiai tauna oreana taudia ta ta edena bamona ia tohodia? (b) Inai hereva “hesiai tauna mai ena kamonai bona mai ena kara maoromaoro” bona “ena memero” edia anina be dahaka dahaka? (c) Iesu ese hesiai tauna edena bamona ia haduaia?

⁵ Momokani, Iesu ese hesiai tauna mai ena kamonai ia gwauraia gauna be taunimanima tamona lasi. Lasi, Keriso ese ena horoa taudia edia ekalesia oreana ibounai ia herevalaia unai. Iena orea taudia ta ta ia gwauraidia “memero.” Iesu ia diba ia ese unai horoa taudia be sibona ena rarana amo do ia hoidia, unai dainai edia orea be iena hesiai tauna ia gwauraia. Korinto Ginigunana 7:23 ese inai bamona ia gwauraidia: “Dirava ese umui ia hoia, mai davana, unai dainai taunimanima edia hesiai mai guia taudia umui lao lasi.” Iesu ese ena hesiai tauna oreana ia haduadia edia diari do idia hahedinaraia, unai amo taunimanima be hahediba taudia ai do idia halaodia, bona iena memero edia lauma anianina be nega korikori ai do idia henidia.

6. Iesu ese ena hesiai tauna na dahaka davana namona ia henia?

⁶ Ena be haida ese idia inai henidia bona idia dagedage henidia, bona idia daradara danu, to Keriso ia lou mai negana amo ela bona lagani 1918, hesiai tauna oreana ese aniani negadia korikoridia ai ena memero edia aniani idia henidia toho. Edia Biaguna, Lohiabada Iesu Keriso, ese ia sekedia matamaia neganai unai ia davaria dainai, lagani 1919 ai unai hesiai tauna oreana mai ena kamonai be ia hanamoa. Dahaka davana namona ia henia? Ena dagi ia habadaia! Ena kohu ibounai naria tauna ai ia halaoa. Biaguna be guba ai pavapava ai ia lao vadaeni; unai dainai ena kohu tanobada ai edia davana ia bada daekau.

7, 8. (a) Biaguna ena “kohu ibounai” be dahaka? (b) Hesiai tauna ese hari kohu edena bamona do ia naria be namo?

⁷ Vadaeni, “ena kohu ibounai” be dahaka? Gaudia be inai: Guba ai Iesu be Pavapava ai ia lao dainai tanobada ai ia abia gaudia. Unai gau ta be taunimanima na Keriso ena hahediba taudia ai halaodia gaukarana, bona Dirava ena Basileia, ia haginia vadaeni gauna, ena gwaukau taudia hegeregeredia tanobada besedia iboudiai kara henidia gaukarana hereana danu.

⁸ Hesiai tauna oreana ena Biaguna ese ena kohu ibounai naria tauna ai unai bamona ia halaoa dainai, namona be unai orea ese Basileia gaukarana do idia laloa bada bona idia habadaia; edia ruma bona edia faktori do idia habadadia, badina be tanobada ibounai lalonai do idia gaukara.

Mamoe Idia Gogodia

⁹ Vadaeni, Keriso ena hesiai tauna mai ena kamonai bona mai ena kara maoromaoro oreana ese ena gaukara ia habadaia. Unai dainai horoa taudia ginigabedia idia gogodia. Bena Ioane ena matahanai Apokalupo 7:​9-17 ai ena anina be ia vara. Lagani 1935 amo ema bona hari, unai matahanai ena anina ia bada ia lao noho lalonai, hesiai tauna oreana ese ia moalelaia noho. “Hutuma bada herea,” tanobada ibounai amo, ese Iehova ena lauma dubuna ena magu lalonai idia hebou, ia idia tomadiho henia. Iehova ena aneru ese Ioane ia hamaoroa ta ese ia duahidia diba lasi. Anina be, hesiai tauna oreana ese Iehova ena lauma dubuna ai do idia mailaidia taudia edia momo be ia gwauraia guna lasi. Dala do ia hekeho noho lalonai, do idia gogodia noho.

10. Hari inai negai hesiai tauna ese dahaka lalokau karana ia karaia noho?

¹⁰ Hesiai tauna mai ena kamonai oreana be mai edia maduna metauna, “mamoe idaudia” hutuma bada herea naridia gaukarana unai. Idia diba edia Biaguna, Iesu, ese inai mamoe bamona taudia bese idauidau amo na ia lalokau henidia bada. Idia be iena mamoe. (Ioane 10:16; Kara 20:28; 1 Petero 5:​2-4) Hesiai tauna oreana ese edia Biaguna bona ena mamoe idia lalokau henidia dainai, hutuma bada herea edia lauma anianina idia henidia mai edia moale ida.

11-13. Watch Tower Society ena presiden gunana ese hesiai tauna ena gaukara edena bamona ia herevalaia?

¹¹ Oibe, hesiai tauna ena diari loalaia gaukarana ena kahana badana be, Dirava ena Basileia henunai tanobada ai do idia noho taudia gogodia gaukarana. Vanegai, Society ena presiden gunana, F. W. Franz ese unai gaukara ia herevalaia, ia gwau:

¹² “Egu mauri laganidia 99 lalodiai idia vara gaudia ese idia hahedinaraia, Iesu Keriso ese orea na hoa dalanai ia gaukaralaia noho. Taunimanima ta ese orea ia naria lasi, Lohiabada Iesu Keriso ese. Ia gaukaralaia dalana ese iseda lalohadai ia hanaia momokani. Hari iseda orea ia bada ia lao vadaeni ela bona tanobada ena kahana iboudiai. . . . Unai ia havaraia diba tauna tamona be Dirava ena Natuna, hesiai tauna mai ena kamonai bona mai ena kara maoromaoro ena Biaguna unai. Ia ese ena maduna ia huaia namonamo, unai dainai orea ena gaukara be inai bamona ia bada ia lao vadaeni.

¹³ “Inai gaukara be taunimanima ta ese ia naria diba lasi. Iseda orea be Dirava ena siahu henunai ia gaukara, bona iena ura hegeregerena ia gaukara, ia ese ia haduaia hegeregerena. Orea ese tanobada hegegemadai ia karaia vadaeni gaukarana be tau ta ese ia heagilaia diba lasi, bona unai gaukara dainai ita ese tau ta ita hanamoa diba lasi, Watch Tower Bible and Tract Society ia haginia tauna danu. Hari gaukara ita hoalaia.” Hutuma bada herea taudia iboudiai ese Tadikaka Franz ena hereva idia hamomokania, ani? Oibe, Keriso idia tanikiu henia bada, ena hesiai tauna mai ena kamonai ena gaukara ia bada ia lao dainai.

Basileia Henunai Noho Taudia

¹⁴ Mataio karoa 25 lalonai Iesu ese mamoe bona nanigosi ia parabolelaidia; Dirava ena Basileia henunai tanobada do idia noholaia taudia gogodia gaukarana badana ia gwauraia. Guna, moni parabolena lalonai, ia hahedinaraia horoa taudia, edia helaro be iena guba Basileiana lalonai ia ida do idia lohia taudia, ese ena kohu tanobada ai do idia habadaia be namo. Bena parabole gabena lalonai ia hahedinaraia idia ura iena guba Basileiana henunai do idia noho taudia be dahaka do idia karaia be namo.

14, 15. (a) Moni parabolena ai Iesu ese dahaka ia hahedinaraia (Mataio 25:​14-30)? (b) Bena Mataio karoa 25 ena orena ai dahaka ia hahedinaraia?

¹⁵ Mataio 25:​31-33 ai ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be ena idiba kahana dekenai do ia atoa, nanigosi be ena lauri kahana dekenai do ia atoa.”

16. Bese be edena bamona ia haboudia, bona taunimanima be edena bamona ia hapararadia?

¹⁶ Iesu be ena hairaina ai ia ginidae, lagani 1914 ai. Ia mai ena aneru ida ese lauma dikadia na guba amo idia negedia diho. Ena terona namo hereana latanai ia helai, anina be, ia noho negana lalonai ia hahemaoro. Bese iboudiai be ia vairanai idia haboudia bena ia kara henidia, sibona ena mamoe oreana ia kara henidia bamona. Hari orea lalonai be mamoe bona nanigosi danu. Mamoe korikoridia bona nanigosi korikoridia hapararadia be haraga, to taunimanima na tanobada ibounai lalonai hapararadia be haraga lasi. Badina be idia ta ta ese namo eiava dika idia abia hidi diba, bona ta ta ena kara ena kara hegeregeredia ia hapararadia.

17. Dahaka dainai hari inai negai taunimanima iboudiai do idia naria namonamo be namo?

¹⁷ Parabole lalonai, Pavapava ese mamoe bamona taudia na iena idiba kahanai ia atodia, bona nanigosi bamona taudia be ena lauri kahanai ia atodia. Ena idiba kahanai ia atodia taudia na edia davana namona ia henidia​—mauri hanaihanai unai. Ena lauri kahanai ia atodia taudia edia davana dikana be mase hanaihanai. Pavapava ena hahemaoro be mai anina bada.

18. Ena be King ita itaia diba lasi, to dahaka dainai ta be mai ena ekskiusi lasi?

¹⁸ Ena be Taunimanima ena Natuna ena pa·rou·siʹa negana lalonai taunimanima ese ia idia itaia diba lasi, to ia idia abia dae be namo. Hari inai negai mamoe bamona taudia momo herea ese hesiai tauna oreana ida Dirava ena Basileia ena sivarai namona na tanobada ibounai idia harorolaia hebou bona edia diari idia hahedinaraia.​—Mataio 24:14.

19. Parabole hegeregerena, mamoe bamona taudia edia kara namodia be dahaka dahaka?

¹⁹ Pavapava ese mamoe bamona taudia unai hahenamo ia henidia, badina be Basileia harorolaia gaukarana idia durua mai edia lalodia iboudiai, bona ena tadikaka, horoa taudia, idia kara namo henidia dainai. Iesu ia laloa ia be unai bamona idia kara henia. Unai dainai ia hereva henidia, ia gwau: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.”​—Mataio 25:​34; 28:​19, 20.

Pavapava Idia Durua

²⁰ Pavapava ese inai mamoe ia boiridia, Dirava ena Basileia ese do ia lohiaia tanobadana do idia abia totona neganai, idia hoa. Idia nanadaia, idia gwau: ‘Edena negai ai ese inai kara iboudiai oi dainai ai karaia?’ Ia haere, ia gwau: “Umui lau hamaoroa momokani, inai lauegu tadikakana ogogami herea dekenai unai bamona umui karaia neganai, be lau dekenai umui karaia vadaeni danu.” (Mataio 25:40) Iesu ia toreisi lou dinana ai, ia ese Maria, Magadala hahinena, na ena lauma tadikakadia ia hamaorolaia, ia gwau: “Lauegu varavara taudia dekenai oi lao.” (Ioane 20:17) Idia iboudiai be 144,000, to hari inai negai idia oredia momo lasi be tanobada ai idia do noho.

20, 21. Edena bamona idia hahedinaraia Basileia idia badinaia?

²¹ Iesu be guba ai ia noho dainai, hari mamoe bamona taudia ese ia idia itaia dalana tamona be edia abidadama ena matana amo, bona unai bamona idia durua dalana tamona be ena lauma tadikakadia idia durudia. Ia ese unai heduru karadia iboudiai ia lalodia bada, ia sibona dekenai idia karaia karadia bamona. Mamoe bamona taudia ese idia durudia, badina be idia diba idia be Keriso ena tadikaka. Idia diba Iesu ena lauma tadikakadia be Iehova ena Basileia ena gwaukau taudia, bona idia ura edia kara amo do idia hahedinaraia idia be idia ida unai Basileia idia badinaia.

22. Mamoe bamona taudia edia davana namona be dahaka? (Apokalupo 7:​14-17 itaia.)

²² Iehova be gunaguna ia diba ena Natuna be do ia noho neganai inai mamoe bamona taudia do idia hedinarai, bona ia ese davana namona ia hegaegaelaia idia edia! King Iesu Keriso be lagani 1,000 lalodiai do ia lohia neganai, hutuma bada herea ese maino ena hahenamo na tanobada ai do idia abia.

23. Edena dala ai mamoe ese Pavapava ena tadikaka idia durudia mai edia lalo-parara ida?

²³ Baibel ena peroveta herevadia, Keriso ena noho neganai idia momokani herevadia, bona Iesu ena parabole, mamoe bona nanigosi herevadia, be ita lalodia neganai, dahaka ita diba? Gauna be inai: Ta be mamoe ai ia lao bona Dirava bona ia haginia Pavapavana vairadiai ia maoromaoro, badina be ia ese Pavapava ena lauma tadikakadia ta ia kara namo henia mai ena lalo-parara ida dainai. Ena be mamoe bamona taudia ese ia lohia noho Pavapavana na edia matadia korikoridia amo idia itaia lasi, to edia kara ena anina idia diba. Iena tadikaka idia durudia, tauanina dalanai bona lauma dalanai danu. Dirava ena Basileia ena sivarai namona harorolaia gaukarana ai idia durudia, bona Baibel stadi amo taunimanima na Keriso ena hahediba taudia ai halaodia gaukarana ai danu. Hari inai negai Dirava ena Basileia harorolaia taudia milion hani mai kahana ese edia diari idia loalaia.

Edia Gaukara Ia Bada Ia Lao

²⁴ Hesiai tauna mai ena kamonai oreana ena kara namodia momo mani ita lalodia. Ginigunana be, ena Biaguna ese ia na ena Basileia kohuna ibounai tanobada ai naria tauna ai ia halaoa, bona unai kohu ia habadaia noho. Iharuana be, hari orea ese Keriso ena memero mo sibodia lasi to hutuma bada herea danu lauma anianina ia ubulaidia. Ihatoina be, Basileia diarina halasia gaukarana ia gunalaia. Namba foa be, ena gaukara​—mamoe idaudia hutuma bada herea gogodia bona Iehova ena lauma dubuna ai mailaidia gaukarana​—be ia habadaia momokani. Namba faiv be, mamoe bamona taudia ese mai edia lalodia iboudiai idia durua noho lalonai, hesiai tauna ese branch oreadia edia ruma ia habadadia tanobada hegegemadai, bona hedikwota ai danu, United States ai. Unai gaukara dainai hesiai tauna oreana taudia idia moale bada, bona idia ese taunimanima milion milion idia hamoaledia. Idia iboudiai ese hesiai tauna mai ena kara maoromaoro ena gaukara idia biagua taudia, Iehova Dirava bona Iesu Keriso, idia tanikiu henidia bada!

25. Mamoe ese hesiai tauna edena bamona do idia durua noho, bena dahaka do idia kamonai?

²⁵ Hesiai tauna oreana ese ena gaukara, Dirava ese ia henia gaukarana, be ia karaia goadagoada noho. ‘Hisihisi badana’ be ia kahirakahira momokani! (Mataio 24:21) Gau badana be Dirava ena mamoe iboudiai be iena Mamoe Naridia Pavapavana ena idiba kahanai, iena lalo-namo gabunai, do idia noho, bona hesiai tauna mai ena kamonai bona mai ena kara maoromaoro do idia durua goadagoada noho. Bena nega daudau lasi murinai inai moale herevadia do idia kamonai: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.”

Oi Haere Diba A?

◻ Pavapava ese daidia ia hahemaoro henidia guna?

◻ Mataio 24:​45-47 be edena bamona ia momokani, hari inai negai?

◻ Dahaka dainai hesiai tauna oreana bona hutuma bada herea ese Iehova bona Iesu idia tanikiu henidia bada?

◻ Mataio 25:​34-40 be edena bamona ia momokani, pa·rou·siʹa neganai?

9. Hesiai tauna ese ena gaukara ia habadaia dainai, dahaka ia vara?

24. Dahaka lalokau karadia dainai hesiai tauna oreana taudia idia moale bada herea?

[Picture on page 16]

Biaguna ese ena kohu ibounai na ena hesiai tauna mai ena kamonai ia henia

[Picture on page 18]

Iesu be ena terona amo taunimanima ia kota henidia