Keristen Ruma Bese be Lauma Gaudia Idia Atoa Guna

“Umui ibounai laloa tamona dekenai do umui noho, umui ta ta dekenai durua do umui henia. Umui ta ta dekenai do umui lalokau henia, tadikaka bamona. Umui ta ta dekenai do umui [hebogahisi] henia, do umui manau.”​—1 PETERO 3:8.

1. Ita iboudiai be edena dala ita abia hidi diba, bona iseda dina vairai maurina dekenai ita abia hidi dalana ena anina be dahaka?

RUMA bese be gunaguna momokani idia karaia gauna, bona atai herevana be mai anina bada ruma bese lalodiai! Tama sina ese edia ruma bese taudia idia hakaudia namonamo be gau badana! Tama sina edia goada karadia bona edia goada lasi karadia be reana edia natudia ese do idia tohotohodia. To, ruma bese taudia ta ta iboudiai be sibodia edia dala idia abia hidi diba. Ita be Keristen taudia dainai, lauma gaudia tahua eiava tauanina gaudia tahua taudia ai ita lao totona dala ita abia hidi diba. Dala ita abia hidi diba Dirava ita hamoalea eiava ita hamoalea lasi totona. Oi abia hidi dalana amo hahenamo, mauri hanaihanai, bona maino do oi davaria​—eiava dika, mase hanaihanai do oi davaria.​—Genese 4:​1, 2; Roma 8:​5-8; Galatia 5:​19- 23.

2. (a) Petro ese ruma bese edia namo ia tahua be edena bamona ia hahedinaraia? (b) Lauma gaudia tahua karana ena anina be dahaka? (Futnot itaia.)

² Aposetolo tauna be headava hahine bona tatau dekenai sisiba namona ia henidia, bona murinai, 1 Petero karoa 3, siri 8 ena hereva ia gwauraia. Petro be Keristen ruma besedia edia namo ia tahua. Ia diba ruma bese taudia idia lalo-tamona, bona idia hebogahisi heheni totona, lauma dalanai idia goada be gau badana.a Unai dainai, siri 7 lalonai ia hahedinaraia bema iena sisiba tatau dekenai ia dadaraia, headava tauna bona Iehova huanai lauma dalana koua gauna ta ia noho. Bema headava tauna be ena adavana ia naria namonamo lasi eiava hebogahisi lasi dalana amo ia kara henia, iena guriguri ia hadikaia diba.

Keriso​—Lauma Gaudia Tahua Goevagoeva Tauna

³ Lauma dalanai ruma bese taudia idia goada totona, ruma bese lalonai kara namodia idia itaia be gau badana. Bema headava tauna be Keristen ena kara ia badinaia, ia ese lauma gaudia hahedinaraia karana dekenai iena ruma bese do ia hakaudia namonamo. Bema tamana be Witness lasi, sinana be unai maduna ia huaia toho. Ena be tau eiava hahine ese unai maduna ia huaia, to Iesu Keriso ena kara goevadaena idia tohotohoa diba. Hanaihanai iena kara, iena hereva, bona iena lalohadai, ese taunimanima idia hagoadaia bona edia lalona ia hamatamataia. Nega momo aposetolo Paulo ese duahiduahi taudia ia hagoadadia Keriso ena lalokau karana idia tohotohoa totona. Inai bamona, ia gwau: “Tau be iena adavana ena kwarana, Keriso be ekalesia ena kwarana bamona. Bona Keriso be ekalesia ena hamauria tauna, ekalesia be iena tauanina. Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.”​—Efeso 5:​23, 25, 29; Mataio 11:​28-30; Kolose 3:19.

4. Lauma gaudia tahua karana dekenai Iesu ena kara namona be dahaka?

⁴ Lauma gaudia tahua karana dekenai Iesu ena kara be namo momokani, bona iena kwarana dagina be lalokau, heduru, bona hebogahisi karadia amo ia naria. Ia be sibona ena ura ia reaia, sibona ena namo ia tahua lasi. Hanaihanai ia ese iena Tamana ena ladana ia hanamoa bona ena kwarana dagina ia matauraia. Ia ese ena Tamana ena hakaua dalana ia badinaia, bona ia gwau diba: “Lau be sibona gau ta do lau karaia kava lasi. Dirava ese lau ia hamaoroa hegeregerena kota henia gaukara lau karaia, bona egu kota henia gaukara be maoromaoro, badina lau sibona egu ura lau karaia lasi, to Dirava ena ura sibona lau karaia.” “Kara ta danu lau sibona lau karaia lasi, to Tamana ese lau dekenai ia hadibaia hegeregerena lau hereva.”​—Ioane 5:30; 8:28; 1 Korinto 11:3.

5. Iesu be ena hahediba taudia ia ubudia karana amo, ia ese headava tataudia dekenai dahaka ia hahedinaraia?

⁵ Unai ena anina headava taudia dekenai be dahaka? Ena anina be gau ibounai dekenai Keriso ena kara idia tohotohoa, ia be nega ibounai iena Tamana ena hereva ia badinaia. Inai bamona, Iehova ese tanobada dekenai mauri gaudia iboudiai totona aniani ia henia, unai hegeregerena, Iesu ese iena hahediba taudia iboudiai totona aniani ia henia. Edia tauanina durua gaudia ia laloaboio lasi. Hoa dalana amo tatau 5,000 bona 4,000 ia ubudia karana ese ia hahedinaraia taunimanima edia namo ia tahua bona ia ura ena maduna ia huaia. (Mareko 6:​35-44; 8:​1-9) Hari inai negai danu, ruma bese kwarana taudia be tauanina dalanai edia ruma bese taudia idia naridia. To edia maduna be unai sibona, a?​—1 Timoteo 5:8.

6. (a) Ruma bese lalonai dahaka mai anina bada gaudia idia karaia be gau badana? (b) Headava tatau bona tamana taudia ese lalo-parara ena hemataurai be edena bamona idia hahedinaraia diba?

⁶ Iesu ese ia hahedinaraia ruma bese taudia be mai anina bada heduru ma haida idia abia be namo. Namona be lauma gaudia bona edia lalona hagoadaia gaudia idia abia. (Deuteronomi 8:3; Mataio 4:4) Ruma bese lalonai bona kongregesen lalonai taunimanima ida ita kara heheni. Namona be hakaua hereva namodia ita abia bena hagoadaia karadia ita karaia diba. Unai kara dekenai headava tatau bona tamana taudia edia gaukara be bada​—bema elda eiava hesiai tauna dagina idia abia unai ese edia maduna ma ia habadaia. Tamana eiava sinana be sibona ia noho neganai, natudia durudia totona unai bamona kara idia badinaia be gau badana. Namona be tamana bona sinana be edia ruma bese taudia edia hereva idia kamonaidia, bona idia herevalaia lasi gaudia danu idia laloa. Unai idia karaia diba totona, lalo-parara ena hemataurai, nega, bona haheauka idia gaukaralaidia. Unai dainai, Petro ia gwau diba namona be tatau be edia adavana idia laloa namonamo bona aonega dalanai idia noho hebou.​—1 Timoteo 3:​4, 5, 12; 1 Petero 3:7.

Oi Dadaraia Dika Gaudia

⁷ Dahaka dainai ruma bese dekenai lauma gaudia tahua karana be mai anina bada? Inai oi laloa, reana ita henanadai, ita gwau, Bouti taria tauna be davara dekenai moemoe gabunai ena bouti ia taria neganai, dahaka dainai ena mapu ia itaia namonamo be gau badana? August, lagani 1992 ai, taunimanima idia guia bouti ta ladana Queen Elizabeth 2 (QE2) be idia hakaua davara ia dika gabuna idia hanaia totona, unuseniai davara ia dobu lasi bona nadi idia noho dainai nega momo idia taria kerere bena dika ia vara. Unai gabu tauna ta ia gwau: “Bouti taria taudia momo ese edia gaukara idia haboioa badina bouti idia taria kerere bona aksiden ia vara dainai.” Unai bouti QE2 be ranu henunai ia noho nadi badana dekenai ia bampa. Idia taria kerere dainai moni bada idia halusia. Bouti kununa kahana badana ia dika, bona idia hanamoa lou totona ranu amo idia kokia bona pura haida lalodiai idia gaukaralaia diba lasi.

7, 8. (a) Lauma dalanai ruma bese ia dika garina, dahaka idia karaia be gau badana? (b) Keristen mauri dala dekenai ita heau hamatamaia be namo, to ma dahaka ita karaia danu? (Mataio 24:13)

⁸ Unai hegeregerena, bema ruma bese “taria tauna” be iena mapu, unai be Dirava ena Hereva, ia itaia namonamo lasi neganai, iena ruma bese taudia be lauma dalanai idia dika haraga diba. Bema unai tau be elda eiava hesiai tauna ta, reana kongregesen lalonai iena dagi gaukarana do ia haboioa, bona reana ena ruma bese taudia haida dekenai dika do ia havaraia. Unai dainai, namona be Keristen ta ta iboudiai idia naria namonamo lauma dalanai idia manoka garina, namo lasi idia laloa guna idia stadi momo bona idia goada karaia dainai idia hegeregere vadaeni. Iseda Keristen mauri dala dekenai, ita heau hamatamaia neganai ita goada karaia, to unai sibona be hegeregere lasi; namona be ita heau lao ela bona dokona gabuna ita davaria.​—1 Korinto 9:​24-27; 1 Timoteo 1:19.

9. (a) Sibona eda stadi be mai anina bada, a? (b) Sibona dekenai dahaka henanadai haida do ita henia be namo?

⁹ Lauma dalanai, moemoe, nadi, bona dobu lasi davara bamona gaudia dekenai dika ita davaria garina, namona be iseda “mapu,” Dirava ena Hereva unai, ita stadilaia hanaihanai. Hereva momokani ita vareai matamaia neganai ita stadilaia gaudia sibodia be hegeregere lasi. Lauma dalanai ita goada totona, hanaihanai ita stadi bona hesiai gaukara ita karaia be gau badana. Inai oi laloa, inai magasin amo kongregesen ena Gima Kohorona Stadi ita karaia neganai, namona be sibona dekenai ita henanadai, ‘Lau, eiava egu ruma bese taudia ida inai hereva ai stadilaia namonamo, Baibel siri iboudiai ai duahidia bona edia anina ai laloa namonamo, a? Eiava haere ai makaia sibona? Sedira, hebou totona unai hereva ai duahia hegaegae lasi, ani?’ Unai henanadai ita lalohadailaidia namonamo neganai, reana iseda lalona do ia veria iseda stadi karana ita laloa namonamo totona, bona do ita ura iseda stadi karana do ita hanamoa​—bema unai ita karaia be namo.​—Heberu 5:​12-14.

10. Dahaka dainai sibona eda kara ita tahua be gau badana?

¹⁰ Dahaka dainai sibona eda kara ita tahua namonamo be gau badana? Badina Satana ena siahu ese ita noholaia tanobadana ia biagua, bona hehuni dala idauidau amo, iseda abidadama Dirava dekenai bona iena gwauhamata dekenai ita dadaraia totona iseda lalona ia ania toho. Inai tanobada ia ura dikadika ita bisi momo bona iseda nega be lasi lauma gaudia ita tahudia totona. Unai dainai namona be sibona dekenai inai bamona ita henanadai, ‘Lauegu ruma bese taudia be lauma dalanai idia goada, a? Lau be tama o sina dainai lauma dalanai lau goada, a? Lau bona egu ruma bese taudia be lauma helaga tahua karana ai habadaia emai lalona ia gaukaralaia siahuna amo heduru ai abia kara maoromaoro bona abidadama ida dala maorodia ai abia hidi diba totona, a?’​—Efeso 4:​23, 24.

11. Lauma dalanai, dahaka dainai Keristen heboudia ese ita idia durua? Kara ta oi gwauraia.

¹¹ Nega iboudiai ita hebou karana ese iseda goada lauma dalanai ia habadaia be namo. Satana ena dagedage tanobada lalonai hora momo lalodiai dika ita dadaraidia, unai dainai Kingdom Hall eiava Kongregesen Buka Stadi dekenai ita noho horadia ese ita idia hagoadaia. Inai bamona, Tau Hereadaena bukana ita stadilaia ese ita ia hamoalea bada! Unai buka ese ita ia durua Iesu, iena mauri, bona iena gaukara ita diba namonamo totona. Idia torea Baibel siridia iboudiai ita duahidia namonamo bona hereva ma haida ita stadilaia neganai, unai ese iseda diba Iesu ena kara dekenai ia habadaia.​—Heberu 12:​1-3; 1 Petero 2:21.

12. Haroro gaukara be edena bamona iseda goada lauma dalanai ia tohoa?

¹² Keristen hesiai gaukarana ese iseda goada lauma dalanai ia tohoa. Ruma ta ruma ta ai bona nega bona gabu idaudia dekenai ita haroro neganai, nega momo taunimanima idia ura lasi kamonai, eiava idia dagedage ita dekenai, bona unai gaukara dekenai ita haheauka noho totona, lalohadai maorona ita abia, Dirava ita lalokau henia, bona dekena taudia ita lalokau henidia karadia be gau badana. Momokani, taunimanima ese ita idia dadaraia karana ita moalelaia lasi, to iseda haroro gaukara lalonai unai kara ia vara diba. To namona be inai ita laloatao, idia dadaraia gauna be hari sivarai namona, ita idia dadaraia lasi. Iesu ia gwau: “Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni. Bema umui be tanobada ena taudia momokani neganai tanobada taudia ese umui do idia lalokau henia. To umui be tanobada ena lasi, lau ese tanobada dekena amo lau abia hidi umui, unai dainai tanobada ese umui do ia badu henia. . . . To inai kara ibounai do idia karaia umui dekenai umui be lauegu dainai, badina be lau ia siaia Diravana be idia diba lasi.”​—Ioane 15:​18-21.

Hereva Haida Lasi to Kara be Mai Anina Bada

¹³ Ruma bese lalonai bema taunimanima iboudiai amo tamona sibona ese ruma ena toana namo ia laloa lasi, dahaka do ia vara? Medu ia diho dinanai, iboudiai amo unai laloaboio tauna sibona ia naria lasi dainai, kopukopu be ruma lalonai ia vareailaia. Unai tau ena kopukopu aena idia rakatania toana ese ia hahedinaraia unai tau be ia laloa namonamo lasi, bona haida dekenai hekwarahi ia henidia. Lauma dalanai unai bamona ia vara diba danu. Ruma bese lalonai, taunimanima iboudiai amo, tamona ese edia ladana namona ia hadikaia diba. Ruma bese lalonai, namona be tamana bona sinana sibodia lasi, to taunimanima iboudiai idia goada karaia Keriso ena lalohadai toana idia hahedinaraia totona. Ruma bese taudia iboudiai idia gaukara hebou bona mauri hanaihanai do idia abia herevana idia laloa be moale bada gauna! Unai bamona ruma bese ese idia hahedinaraia lauma dalanai idia goada (to sibodia idia gwauraia lasi idia be kara maoromaoro momokani taudia). Unai bamona ruma bese lalonai lauma gaudia idia reaia momo lasi.​—Kohelete 7:16; 1 Petero 4:​1, 2.

14. Tauanina dalanai Satana be ita vairanai kohu dekenai dahaka hedibagani ia atoa?

¹⁴ Ita ta ta iboudiai ita mauri noho totona, dina ta ta iboudiai tauanina durua gaudia ita abia be gau badana. (Mataio 6:​11, 30-32) To nega momo ita ura henia gaudia ese ita dekenai idia hegeregere sibona gaudia idia hanaia. Inai bamona, Satana ena tanobada lalonai masini idauidau momo idia karaia. Bema hanaihanai ita ura idia karaia matamata gaudia ita abia, do ita lalohisihisi, badina unai gaudia ita abia murinai matamata gaudia ma haida idia halasidia. Bisinesi oreadia be hanaihanai unai bamona idia karaia noho. Iseda lalona idia ania moni ita tahua totona bona unai neganai ita ura henia gaudia momo ita abia diba. Unai kara ese ita ia hakaudia diba “ura dikadia bona ura kavakava” karadia ita karaia totona. Bona reana iseda mauri lalonai ita karaia lauma gaukaradia ena nega ia maragi ia lao.​—1 Timoteo 6:​9, 10.

15. Edena dala ai ruma bese kwarana ena kara ia namo be gau badana?

¹⁵ Vadaeni, Keristen ruma bese kwarana tauna ena haheitalai namona be mai anina bada. Moni gaukara bona lauma gaudia dekenai iena maduna ia lalohadailaia maoro dainai, iena ruma bese taudia ia hagoadadia be namo. Namo lasi bema tamana be sisiba hereva namodia ia henia, to sibona ena hereva ia badinaia lasi. Bema unai bamona ia karaia ena natudia idia diba. Unai hegeregerena, bema elda eiava hesiai tauna ta ese taunimanima ia hagoadadia ruma ta ruma ta gaukarana idia karaia totona, to iena ruma bese taudia ida unai gaukara ia karaia lasi, iena ruma bese lalonai bona kongregesen lalonai danu iena hereva do idia laloa bada lasi.​—1 Korinto 15:58; Mataio 23:3 itaia danu.

16. Sibona dekenai dahaka henanadai haida do ita henia be namo?

¹⁶ Unai dainai, iseda mauri ena kara ita tahua be namo. Moni gaukara dekenai ita kwalimu totona ita hekwarahi bada dainai lauma dalanai ita tubu lasi, a? Tanobada gaudia ita tahua momo to kongregesen gaudia ita tahua momo lasi, a? Paulo ena sisiba oi laloatao, ia gwau: “Inai hereva be momokani. Bema tau ta ia ura be ekalesia ena gunalaia tauna ena dagi do ia tahua, ia be dagi namona ia ura henia inai.” (1 Timoteo 3:1) Moni gaukara dekenai dagi ita abia karana lasi, to kongregesen lalonai maduna ita huaia ese ia hahedinaraia lauma dalanai ita goada. Namona be ita naria namonamo, namo lasi moni gaukara biagudia ese ita idia biagua, badina iseda mauri be idia dekenai lasi to Iehova dekenai ita gwauhamatalaia.​—Mataio 6:24.

Herevahereva Hebou Karana ese Iseda Goada Lauma Dalanai Ia Habadaia

¹⁷ Hari inai negai, ruma milion momo be mahuta gabudia mo sibodia. Edena bamona? Ruma bese taudia be edia ruma dekenai idia giroa lao idia mahuta bona idia aniani totona, bena murinai ruma idia rakatania. Nega haida sibona idia be aniani patana dekenai idia helai idia aniani hebou totona. Unai ruma bese lalodiai hebogahisi lalo-tamona karana be lasi. Unai dainai dahaka ia vara? Idia herevahereva hebou namonamo lasi, idia kiki hebou momo lasi. Bona reana edia ruma bese taudia ma haida idia laloa lasi, reana edia namo idia laloa bada lasi. Ita lalokau heheni neganai, nega ita atoa ita kiki hebou bona ita kamonai heheni totona. Idia ita hagoadaia bona ita durudia. Lauma dalanai idia goada ruma bese ena toana ta be tau mai adavana idia herevahereva heheni bona tama sina mai natudia idia herevahereva heheni namonamo.b Iseda moale, ekspiriens, bona hekwakwanai ita herevalai heheni totona, gau badana be nega ita atoa bona mai hemataurai danu ita hereva.​—1 Korinto 13:​4-8; Iakobo 1:19.

18. (a) Nega momo dahaka gau ese herevahereva heheni karana ia hadikaia? (b) Dahaka be gau badana ita hebamo heheni namonamo totona?

¹⁸ Herevahereva heheni namonamo totona nega oi atoa bona oi hekwarahi. Ena anina be nega oi atoa umui herevahereva heheni bona umui kamonai heheni totona. Unai kara ia hadikaia gauna badana ta be ruma momo lalodiai idia gwauraia bada bona nega bada ia ania gauna​—televisen unai. Unai be hekwakwanai ta​—televisen ese oi ia biagua, eiava oi ese televisen oi biagua? Televisen oi biagua totona gau badana be emu lalona ia goada​—oi be mai emu goada oi koua totona. Bema unai ita karaia diba, dala ia kehoa iseda ruma bese taudia ida bona lauma dalanai iseda tadikaka bona taihu ida, ita herevahereva heheni totona. Ita hebamo heheni namonamo totona, gau badana be ita herevahereva heheni namonamo, ita hemataurai heheni, ita dekenai idia hegeregere gaudia bona ita moalelaia gaudia ita herevalai heheni, bona ita moale ita davaria hebogahisi karadia dainai ita herevalai heheni. Inai bamona, bema ita herevahereva heheni namonamo, unai ese ia hahedinaraia unai taudia dainai ita moale bona ita lalodia bada.​—Hereva Lada-isidia 31:​28, 29.

19, 20. Bema iseda ruma bese taudia iboudiai ita lalokau henidia, dahaka do ita karaia?

¹⁹ Unai dainai, ruma bese lalonai bema ita lalo-namo bona ita hebogahisi heheni​—unai ena anina be iseda Witness lasi ruma bese taudia ita durudia danu—​unai kara ese ita ia durua bada lauma dalanai ita goada ita lao noho totona. Ruma bese lalonai, ita be Petro ena sisiba ita badinaia, ia gwau: “Hereva ena anina be inai: umui ibounai laloa tamona dekenai do umui noho, umui ta ta dekenai durua do umui henia. Umui ta ta dekenai do umui lalokau henia, tadikaka bamona. Umui ta ta dekenai do umui [hebogahisi heheni], do umui manau. Tau ta bema umui dekenai ia kara dika neganai davana do umui henia lasi. Bema umui dekenai idia hereva dika neganai umui ese hereva dika do umui henia lou lasi. Lasi, to hanamoa hereva do umui henia lou. Badina be umui hanamoa totona Dirava ese umui ia boiria, iena gwauhamata hegeregerena.”​—1 Petero 3:​8, 9.

²⁰ Bema ita goada karaia lauma dalanai ita goada noho totona, harihari Iehova ena hahenamo ita davaria diba, bona unai ese ita ia durua dina vairai dekenai mauri hanaihanai paradaiso tanobadana dekenai ena hahenamo do ita abia totona. Ruma bese lalonai lauma dalanai ita heduru heheni totona, ma kara haida ita karaia diba. Murina sivarai be ruma bese taudia idia gaukara hebou karana amo dahaka namo idia davaria do ia kikilaia.​—Luka 23:43; Apokalupo 21:​1-4.

[Footnotes]

Inai Oi Laloatao, A?

◻ Lauma dalanai oi goada ena anina be dahaka?

◻ Ruma bese kwarana be edena bamona Keriso ena kara ia tohotohoa diba?

◻ Lauma dalanai dika ita davaria garina, dahaka ita karaia diba?

◻ Lauma dalanai, dahaka gau ese ruma bese taudia edia goada ia hadikaia diba?

◻ Dahaka dainai herevahereva heheni namonamo karana be mai anina bada?

3. Headava tatau be Keriso idia tohotohoa totona Paulo ese Keriso ena kara be edena bamona ia hahedinaraia?

13. Ruma bese tauna tamona be edena bamona ena ruma bese taudia edia goada lauma dalanai ia hamaragia diba?

17. Ruma bese lalonai dahaka kara ese lalokau momokani karana ia habadaia?

[Picture on page 12]

Kongregesen Buka Stadi hebouna ese ruma bese taudia ibounai be lauma dalanai ia hagoadadia