Hebogahisi amo Mamoe Idia Naridia

TAUNIMANIMA kahirakahira dekenai idia noho animal iboudiai amo, mamoe be idau. Animal momo be mai edia goada bona mai edia diba aniani idia tahua totona bona dagedage animal ma haida amo idia hunia totona, to mamoe be unai bamona lasi. Dagedage animal ese mamoe idia hadikaia diba, bona mamoe be goada bada lasi ia koudia totona. Naria tauna lasi neganai, mamoe ia gari bona sibona ia durua diba lasi. Mamoe serina amo ta ia siri neganai, ia boio haraga diba. Unai dainai, manau mamoe be edia naria tauna idia ura henia bada. Bema ia noho lasi, do idia mase. Edia kara dainai, Baibel ese laulau dalanai mamoe ia gaukaralaidia ia ese kerere lasi, bero davaria, eiava dika koua diba lasi taudia ia haheitalaidia totona.

Momokani, mamoe naria tauna ia hekwarahi bada dainai hahenamo ia davaridia be namo. Ena mauri be mai ena hekwarahi. Dina ena siahu bona hanuaboi ena keru ia davaria, hanuaboi momo ia mahuta lasi. Mamoe be dagedage animal amo ia hamauridia be gau badana, nega momo unai ia karaia neganai ia mase diba. Mamoe naria tauna ena gaukara be mamoe ia haboudia seri tamona lalonai idia noho totona, unai dainai seri amo idia raka oho eiava idia boio mamoe tahudia totona nega bada ia negea. Idia gorere bona bero idia davaria mamoe ia durudia. Idia manoka eiava idia hesiku mamoe natudia ia huadia. Hanaihanai aniani bona ranu idia hegeregere gabudia ia tahudia. Nega momo mamoe naria tauna be hanuaboi ai, uda dekenai ia mahuta, mamoe ese dika ta idia davaria garina. Unai dainai, mamoe naridia be gaukara auka maurina, namona be naria tauna be ia gari lasi, ia gaukara namonamo, bona dala idauidau ai mamoe durua daladia ia diba. Bona gau badana be inai, namona be ia naria mamoe edia namo ia tahua momokani totona.

Dirava Ena Mamoe Serina Naria Dalana

Baibel lalonai, Dirava ena taunimanima be manau mamoe bamona ia gwauraidia, bona naria taudia be mamoe naria taudia ia gwauraidia. Iehova be iseda “lauma ia dogoatao Tauna, bona Mamoe Naria Tauna [Badana].” (1 Petero 2:25) Iesu Keriso, “mamoe naria tauna namona,” ese ia hahedinaraia ia ura mai hebogahisi danu mamoe idia naridia, badina aposetolo Petero dekenai ia gwau: ‘Lauegu mamoe do oi ubudia, lauegu mamoe do oi naridia, lauegu mamoe do oi ubudia.’ (Ioane 10:11; 21:​15-17) Keristen naria taudia ese hahegani idia abia ‘Dirava ena ekalesia taudia idia ubudia totona.’ (Kara 20:28) Bona lauma dalanai edia naria gaukara idia karaia namonamo totona, mamoe korikori naria tauna bamona, namona be idia gari lasi, idia gaukara namonamo, bona dala idauidau ai mamoe durua dalana idia diba, bona mamoe edia namo idia laloa bada be gau badana.

Dirava ena peroveta tauna Esekiel ena nega lalonai, Israel lalonai Iehova ena taunimanima naridia totona, naria taudia idia abidia hidi, to kahirakahira idia iboudiai be edia gaukara idia hagugurua lasi. Dirava ena mamoe serina be ia dika bada herea, bona ena mamoe momo be hereva momokani idia rakatania. (Esekiel 34:​1-10) Hari inai negai, Kerisendom tomadiho edia gunalaia taudia be sibodia idia gwauraia idia be Keristen kongregesen naria taudia, to lauma dalanai idia gorere, bona unai ese ia hahedinaraia Iesu be tanobada ai ia noho neganai, idia be unai tomadiho koikoi taudia bamona, taunimanima idia naridia lasi bona idia kara dika henidia. Kerisendom tomadiho edia gunalaia taudia be “gaukara tauna mai ena davana” bamona, ia be “mamoe dekenai ia laloa lasi.” (Ioane 10:​12, 13) Idia ura lasi, idia hegeregere lasi, bona naria taravatu idia badinaia lasi dainai, Dirava ena mamoe serina naria gaukara idia karaia diba lasi.

Hebogahisi Bada Mamoe Naria Taudia

Iehova ena mamoe serina do idia ura naria taudia iboudiai dekenai, Iesu ena haheitalai be goevadae idia tohotohoa totona. Ena kara iboudiai dekenai lalokau, hebogahisi, bona heduru ia henia ena hahediba taudia dekenai. Idia dabu taudia ia tahudia do ia durudia totona. Ena be ia bisi bona nega momo ena tauanina ia hesiku, to edia hekwakwanai ia kamonai henidia totona bona ia hagoadadia totona, hanaihanai nega ia atoa. Ia ura ena mauri ia henia idia totona, unai be lalokau namo herea momokani.​—Ioane 15:13.

Hari inai negai, dagi idia abia kongregesen elda taudia iboudiai, hesiai taudia iboudiai danu, be mai edia maduna mamoe idia naridia totona. Unai dainai, ena be gabu idauna ta dekenai bema idia lao kohu ma haida idia abia diba, to edia maduna idia huaia taudia momo lasi ese kongregesen idia rakatania, badina idia ura lasi kongregesen ena heduru bona hakaua dalana ia manoka. Ita be “metau dikadia momo” negana lalonai ita noho, bona mamoe be hagoadaia bona hakaua herevadia idia abia be gau badana. (2 Timoteo 3:​1-5) Hanaihanai dala ia noho Satana ese idia haida ia hamorudia diba totona, ia be “leona mai ena boiboi bada bamona . . . ia raka loaloa noho, do ia ania ore taudia ia tahua noho.” (1 Petero 5:8) Guna idia karaia to hari idia karaia badabada gau badana be mamoe naria Keristen taudia be ‘heiriheiri taudia idia sisiba henidia, gari taudia idia hagoadaia, bona manoka taudia idia durudia.’ (1 Tesalonika 5:14) Idia gima hanaihanai be gau badana, manoka taudia be mamoe serina amo idia raka oho garina.​—1 Timoteo 4:1.

Mamoe naria tauna be edena bamona ia diba mamoe be heduru ia abia be namo? Toa haida be inai, Keristen heboudia dekenai ia mai lasi, hua ta ta sibona haroro gaukara ia karaia, bona tadikaka ia bamodia momo lasi. Mamoe bamona taudia edia kara bona hereva dibaia namonamo karana amo edia manoka gabudia idia hedinarai. Reana edia kara be haida idia maumauraia, edia badu be ma haida dekenai idia gwauraia. Edia hereva dekenai kohu tahua karana idia gwauraia momo, to lauma gaudia tahua karana idia gwauraia momo lasi. Bema idia goada karaia lasi, idia laloa gau ibounai do idia namo lasi, bona idia moale lasi, reana unai ese ia hahedinaraia edia abidadama ia manoka vadaeni. Edia vairana idia huaia neganai, reana unai ese ia hahedinaraia edia Witness lasi varavara eiava edia tanobada turadia ese idia doridia. Mamoe naria tauna ese unai bamona toana ta ia itaia neganai, ia laloa namonamo diba bena edena bamona ia durudia dalana namona ia tahua.

Abidadama Witness tauna durua totona idia vadivadi henia neganai, Keristen naria taudia ese idia vadivadi henia ena badina idia laloa noho be gau badana. Anina bada lasi gaudia kikilaia bona moale hebou totona idia vadivadi henia lasi. Aposetolo Paulo be ena tadikaka ia vadivadi henidia ena badina be ia ura ‘lauma dalanai hanamoa gaudia do ia henidia bona idia goada heheni totona.’ (Roma 1:​11, 12) Unai karaia totona, hegaegae guna be gau badana.

Gau ginigunana be, unai tau ena goada lauma dalanai do oi diba totona, ena lalohadai bona kara oi laloa namonamo. Unai oi diba neganai, ia oi durua bada totona, edena bamona oi hereva henia, oi hagoadaia, eiava oi sisiba henia diba dalana oi laloa namonamo. Dirava ena Hereva, Baibel, oi gaukaralaia momo be gau badana, badina ia be “mai ena siahu.” (Heberu 4:12) Mamoe bamona taudia be hekwakwanai idia davaria neganai, Gima Kohorona bona Noga! magasin lalodiai, durudia sivaraidia haida oi tahua diba. Yearbook of Jehovah’s Witnesses lalonai, moale bona hagoadaia ekspiriens oi davaridia diba. Gau badana be lauma dalanai hagoadaia herevana oi henia “iena abidadama do ia goada totona.”​—Roma 15:2.

Mamoe Naria Gaukara Namona

Mamoe korikoridia ia naria tauna ia diba mamoe idia dika garina ia naridia bona ia durudia be gau badana. Idia davaria dika haida be inai: idia raka oho, idia gorere, idia manoka, bero idia abia, bona animal idia dagedage henidia. Unai hegeregerena, lauma dalanai, gau badana be mamoe ia naridia tauna ia diba mamoe idia hadikaia gaudia be dahaka, bona kara ta ia karaia ia koudia totona be namo. Henuai, idia vara diba hekwakwanai, bona dahaka oi hereva diba lauma dalanai taunimanima oi hagoadadia totona ai toredia.

(1) Gari lasi mamoe korikoridia bamona, Keristen taudia haida be Dirava ena mamoe serina amo idia raka oho, badina idia laloa idia dika lasi moale karadia ese edia lalona idia veria dainai. Reana kohu, laga-ani, eiava moale karadia idia tahua momo dainai, idia laloa maoromaoro lasi bona orea amo idia raka oho. (Heberu 2:1) Namona be unai bamona taudia oi hamaorodia idia laloaboio lasi, ita be dokona negana lalonai ita noho, namona be Iehova ena orea kahirakahira dekenai ita noho, bona iseda mauri lalonai Basileia ena gaukara ita atoa guna. (Mataio 6:​25-33; Luka 21:​34-36; 1 Timoteo 6:​8-10) Heduru hereva namona be The Watchtower magasin May 15, 1984, rau 8-11 ai, sivarai ena ladana be “Keep Your Balance​—How?”

(2) Mamoe korikoridia ia naria tauna be idia gorere mamoe ia durudia be gau badana. Unai hegeregerena, bema Keristen taudia edia mauri lalonai idia vara hagoadaia lasi karadia dainai lauma dalanai idia gorere, mamoe naria taudia idia durudia be gau badana. (Iakobo 5:​14, 15) Reana moni gaukara idia abia diba lasi, idia gorere bada, eiava edia ruma bese lalonai hekwakwanai idia vara. Unai bamona taudia be reana lauma aniani idia ura lasi ania bona Dirava ena taunimanima bamoa karana idia ura lasi. Unai neganai, sibona idia noho bona idia lalo-goada lasi. Namona be idia diba Iehova ese idia ia lalodia bona nega dikadia lalodiai idia do ia hagoadadia. (Salamo 55:22; Mataio 18:​12-14; 2 Korinto 4:​16-18; 1 Petero 1:​6, 7; 5:​6, 7) The Watchtower, June 1, 1980, rau 12-15 ai, sivarai ta ena ladana be “Look Straight Ahead as a Christian,” oi riviulaia neganai heduru oi abia diba.

(3) Mamoe naria tauna be ia gima noho mamoe idia manoka garina. Idia haida be lagani momo mai edia abidadama danu Iehova ena hesiai gaukara dekenai idia haheauka. Idia hekwarahi hedibagani bona hetoho momo idia hanaidia totona. Bema edia toana be idia manoka, namo karadia karaia idia hesikulaia, bona reana idia gwau haroro gaukara habadaia ena badina be lasi. Namona be idia ita hagoadaia, bena Iesu Keriso ena kara idia tohotohoa lou totona, kudouna ibounai ida Dirava ena hesiai gaukara amo moale bona hahenamo do idia abia. (Galatia 6:​9, 10; Heberu 12:​1-3) Reana oi durudia diba bena do idia lalo-parara Iehova be edia abidadama hesiai gaukara gunana dainai ia moale, bona ia hagoadadia diba dina vairai dekenai gaukara ma haida do idia karaia totona bona unai ese iena ladana do ia hanamoa. (Isaia 40:​29, 30; Heberu 6:​10-12) Reana ia dekenai hereva namona, The Watchtower, July 15, 1988, rau 9-14 ena sivarai ta ladana “Do Not Give Up in Doing What is Fine,” be ia dekenai oi kikilaia diba.

(4) Bero idia davaria mamoe korikoridia bamona, Keristen taudia haida idia lalohisihisi badina idia laloa ta ese ia kara dika henidia dainai. To, bema taunimanima edia dika ita dekenai ita gwauatao, iseda guba Tamana, Iehova, ese iseda dika do ia gwauatao. (Kolose 3:​12-14; 1 Petero 4:8) Tadikaka eiava taihu haida be hagoadaia hereva eiava sisiba hereva idia henidia neganai, idia gwau idia kerere lasi dainai unai sisiba idia abia be maoro lasi. To, lauma dalanai ita ibounai be hagoadaia bona sisiba herevadia amo namo ita davaria diba, bona ita moale badina ita diba Iehova ese ia lalokau henia taudia ia sisiba henidia. (Heberu 12:​4-11) Ma haida idia laloa idia hegeregere gaukara dagi ta idia abia totona, to unai dagi idia abia lasi neganai idia badu, bena idia bona kongregesen huanai magu ta bamona ia noho. To bema Iehova ena orea amo ita siri, gabu ma ta be lasi hahemauri bona moale momokani ita abia totona. (Ioane 6:​66-69 itaia danu.) The Watchtower, August 15, 1988, rau 28-30 ai, hereva ta ladana “Maintaining Our Christian Oneness” amo, heduru hereva ma haida oi davaria diba.

(5) Dagedage animal idia hadikadia garina mamoe korikori idia naridia be gau badana. Unai hegeregerena, tadikaka haida edia kamonai lasi varavara eiava gaukara turadia ese idia dagedage henidia eiava idia hagaridia toho. Edia hesiai gaukara Dirava dekenai eiava edia Keristen haroro gaukara idia hadokoa totona unai taudia ese idia doridia neganai, unai ese edia abidadama ia tohoa diba. To, bema ita durudia bena idia diba dahaka dainai unai dagedage karana idia davaria, unai ese do ia hagoadadia, bena do idia diba unai be toa ta, ia hamomokania ita be Iesu Keriso ena hahediba taudia momokanidia. (Mataio 5:​11, 12; 10:​32-39; 24:9; 2 Timoteo 3:12) Durudia totona namona be oi hamaorodia bema idia abidadama noho, Iehova ese idia do ia rakatania diba lasi, bona edia haheauka karana dainai do ia hanamodia. (2 Korinto 4:​7-9; Iakobo 1:​2-4, 12; 1 Petero 5:​8-10) The Watchtower, April 15, 1982, rau 21-7 ai, hereva ta ladana “Enduring Joyfully Despite Persecution” amo hagoadaia hereva ma haida oi davaria diba.

Mamoe Naria Taudia—Emui Gaukara Umui Hagugurua

Dirava ena mamoe edia ura be momo, bona naridia namonamo be gaukara mai hekwarahina. Unai dainai, mamoe naria Keristen taudia ese mamoe idia hebogahisi henidia, idia lalodia bada, bona idia ura momokani durudia be gau badana. Haheauka bona lalo-parara be gau badadia. Ena be taunimanima haida ese sisiba bona hereva auka amo heduru idia abia, to momo be hagoadaia herevadia amo heduru bada idia abia. Durudia totona, nega haida idia vadivadi henidia be hegeregere, ma haida dekenai reana Baibel stadi idia karaia be ia namo. To nega ibounai idia ura gauna be hereva namodia amo lauma dalanai idia hagoadaia, eiava lalokau sisibana amo idia hasiahua sibona ia stadi henia karana ia hamatamaia bona ia karaia namonamo noho totona, kongregesen heboudia dekenai ia lao hamatamaia eiava ia lao noho totona, bona mai moale danu Keristen hesiai gaukara ia karaia noho totona. Unai be dala badadia abidadama Witness taudia hagoadadia totona, bona dala ia kehoa Iehova ena lauma helaga be idia dekenai ia heau maoromaoro diba totona.

Unai bamona heduru idia henia mamoe naria taudia be Dirava ena seri lalonai mai anina bada gaukarana idia karaia. (The Watchtower, November 15, 1985, rau 23-7 itaia.) Lauma dalanai mamoe naria taudia edia gaukara dainai, mamoe idia moale. Unai bamona heduru idia abia murinai, ruma bese kwarana ta ia gwau: ‘Lagani 22 lalodiai ai be hereva momokani lalonai ai noho, to murinai kohu tahua karana ese ai ia veria inai tanobada dekenai. Nega momo ai ura hebou dekenai ai lao, to ai lao lasi. Satana ena tanobada ai ura henia momokani lasi, unai dainai aiemai gabu ta be lasi, sibona ai noho bamona. Unai dainai ai lalo-hekwarahi bona ai lalo-metau. Hagoadaia herevadia ai abia be namo. Elda ta ese ai ia vadivadi henia neganai, dala ia kehoa ta ese aiemai ruma dekenai Baibel stadi ia karaia totona, mai moale danu ai ura. Hari, ai ibounai be Iehova ena noho namo oreana lalonai ai vareai lou. Lau moale dikadika!’

Idia raka oho eiava idia manoka tadikaka bona taihu be lauma dalanai idia hagoadaia lou bona idia gaukara lou neganai ita moale bada herea. (Luka 15:​4-7) Iehova ena taunimanima be “mamoe edia magu lalonai bamona” idia noho neganai, iena ura idia dekenai ia guguru. (Mika 2:12) Unai noho namo gabuna dekenai, Mamoe Naria Tauna Namona, Iesu Keriso, ena heduru amo ‘edia laumana idia laga-ani.’ (Mataio 11:​28-30) Tanobada hegegemadai, lalo-tamona mamoe ese hakaua herevadia, hagoadaia herevadia, naria namonamo karana bona lauma aniani bada idia abia.

Hari inai negai, unai mamoe naria gaukarana amo, Iehova ena siahu amo lalokau gaukarana idia karaia, bona unai be idaunegai ia gwauhamata herevana hegeregerena, ia gwau: “Lau ese egu mamoe do lau tahudia bona lau naridia. . . . Idia karoho rohoroho gabudia iboudiai amo do lau ruhadia. . . . Ava idia vara namonamo gabuna dekenai do lau ubudia . . . Ia boio gauna do lau tahua, . . . bona ena aena ia dika gauna do lau kumia bona ia manoka gauna do lau hagoadaia.” (Esekiel 34:​11-16) Iehova be iseda Mamoe Naria Tauna Badana, unai ita diba neganai ita moale!​—Salamo 23:​1-4.

Dirava ena amo heduru gaudia idia noho iena mamoe serina naria totona, ita be Iehova ena hesiai taudia dainai David bamona ita hereva diba, ia gwau: “Maino dekenai do lau hekure diho bona do lau mahuta, badina Iehova e, oi sibona ese lau oi gimaia dainai gari lasi dekenai lau noho.” (Salamo 4:8) Oibe, Iehova ese mai lalokau danu ia naridia dainai iena taunimanima be noho namo mamina idia abia, bona Keristen elda taudia be mai hebogahisi danu mamoe idia naridia dainai idia moale.

[Picture Credit Line on page 20, 21]

Potter’s Complete Bible Encyclopedia