“Gau Namodia Ibounai” Henia Tauna

“Nega ta ai, Reformed dubu ena haroro tauna ta ese lau ia vadivadi henia. Ia ura diba edena bamona lauegu dubu lau naria. Ia dekenai lau gwau: . . . ‘Moni davana ai henia lasi; taunimanima idia hepapahuahu gauna ta ia noho lasi. Bona moni ai noinoilaia lasi.’ Ia gwau: ‘Moni be edena dala amo umui abia?’ Lau haere, lau gwau: ‘Dr.​——, ena be oi lau hamaoroa, to reana do oi abia dae be ia auka. Taunimanima be unai dala idia ura kamonai henia neganai, edia vairana dekenai moni gogoa merekina ai atoa lasi. To idia sibodia idia itaia gau haida ese moni idia ania. Bona sibodia dekenai idia laloa, “Inai ruma be mai davana. . . . Gaukara durua totona harihari monina be edena bamona lau henia diba?” ’ Lau ia raraia, bona toana be ia daradara, ‘Oi laloa lau kava​—lau be gau ta ia diba lasi tauna bamona, a?’ Lau gwau, ‘Dr.​——, oi dekenai hereva momokani lau gwauraia. . . . Ta ese hahenamo ia davaria neganai, bema ia be mai ena moni, ia ura unai moni ia henia Lohiabada ena gaukara durua totona. Bema ia dekenai moni be lasi, namo lasi ita doria ia henia totona, ani?’ ”

​—Charles T. Russell, Watch Tower Society ena presiden ginigunana, “The Watch Tower,” July 15, 1915.

HARIHARI gaudia ita henia badina Iehova Dirava be harihari gaudia henia tauna ginigunana dainai. Idaunegai, gau ibounai ia havaraia neganai, henia kara ia hamatamaia​—ia havaraia gauna ginigunana be iena “Natuna tamona sibona.” (Ioane 3:16) Lalokau dainai, ia ese mauri ena harihari gauna be ma haida dekenai ia henia.

Dirava ena Natuna, Iesu Keriso, be Iehova ena harihari gauna badana ita dekenai. Ena be Iehova ese ena Natuna ia henia, to unai be ena harihari gauna ginigabena lasi. “Dirava ena hariharibada” ia gwauraia neganai, aposetolo Paulo ia gwau Iehova ena “hariharibada namo herea momokani dainai . . . tau ta ia gwauraia namonamo diba lasi.” (2 Korinto 9:​14, 15) Iesu dekena amo Iehova ese iena taunimanima dekenai ia henia harihari gaudia be namo bona hebogahisi karadia. Unai hebogahisi kara be bada momokani dainai, taunimanima be dala lasi ena namo idia gwauraia hedinarai totona. To, Dirava ena henia karana ena dala be momo.

Idaunegai, mai ena aonega bona manau pavapavana ta ese ia hahedinaraia ena be harihari gaudia namodia idia henia, to idia iboudiai be Iehova ena gau. Ia gwau: “Gau iboudiai guba dekenai bona tanobada dekenai be oiemu. Iehova e, basileia be oiemu, oi be sibona oi abia isi, gau iboudiai edia kwarana. . . . To, lau be daika, bona lauegu orea taudia be daidia, bena ai be mai emai dala sibona emai ura amo harihari gaudia do ai henia? Badina be gau iboudiai be oiemu amo idia mai, bona oi sibona emu gau be ma ai henia lou oi dekenai.”​—1 Sisiga 29:11-14.

Dirava Ena Haheitalai Namona

Iakobo, Iesu Keriso ena hahediba tauna ta, ia diba Iehova Dirava be gau namodia iboudiai edia badina. Harihari gaudia goevadaedia sibona be ia dekena amo idia mai. Iakobo ia torea, ia gwau: “Gau namodia ibounai, bona harihari gaudia namodia momokani ibounai be Dirava dekena amo idia diho mai. Dirava ese diari ibounai ia karaia, bona nega haida edia toana idia senisia, nega haida mai edia dibura nega. To Dirava ese iena kara ia senisia lasi, ia diari hanaihanai, bona mai ena dibura taina lasi.”​—Iakobo 1:17.

Harihari gaudia henia karana dekenai, Iakobo ia itaia Dirava ena kara be taunimanima edia kara amo ia idau momokani. Taunimanima be mai edia dala harihari gaudia namodia idia henia totona, to nega haida idia henia lasi. Reana harihari gaudia idia henia badina gau ta idia ura abia dainai, eiava unai kara amo tau ta ena lalona idia ania diba kara dikana ta do ia karaia totona. To Iehova ena kara ia haidaua lasi; ia idau lasi. Unai dainai, ia henia harihari gaudia idia idau lasi. Hanaihanai idia goevadae. Idia ese taunimanima edia noho namo bona moale dalana idia habadaia. Hanaihanai idia be hebogahisi bona durua karadia, dika karadia idia havaraia lasi.

Harihari Gaudia Henia Ena Badina

Iakobo ena nega lalonai, taunimanima idia laloa momo tomadiho gunalaia taudia ese harihari gaudia idia henia badina idia ura taunimanima ese do idia itadia. Harihari gaudia idia henia ena badina be ia dika. Taunimanima edia hanamoa herevadia idia ura abia dainai, nega haida kara maoromaoro badinaia karana idia rakatania. To, Keristen taudia idia idau be gau badana. Idia dekenai Iesu be inai sisiba ia henia: “Harihari gauna ogogami taudia dekenai umui henia neganai umui emui toana umui hedinaraia lasi mai hekokoroku danu, guriguri koikoi taudia ese dubu dekenai bona hanua ena huanai idia karaia bamona, taunimanima ese idia hanamodia totona. Umui lau hamaoroa momokani, edia davana ibounai idia abia vadaeni. To harihari gauna oi henia neganai oi sibona mo oi karaia hunia dala bamona, vadaeni oiemu turana momokani ese danu oiemu henia gauna do ia diba lasi. Vadaeni oiemu Tamana ese oiemu hunia gaudia ia itaia dainai ena davana do ia henia oi.”​—Mataio 6:​2-4.

Keristen tauna be harihari gauna ia henia ena badina be ia ura ma haida ia durudia kara ta idia hagugurua totona, eiava ia ura hamoaledia, eiava ia ura tomadiho momokani ia habadaia. Ia henia lasi sibona ena ladana ia habadaia totona. Iehova ena matana be iseda lalona momokani dekenai ia itaia diba. Hebogahisi harihari gaudia ita henia ena badina ia diba.

Harihari gaudia henia kara dekenai, Iehova ena Witness taudia idia goada karaia Iehova bona iena Natuna edia haheitalai idia tohotohoa totona. Idia dekenai idia noho gaudia amo idia henia. Idia dekenai Basileia ena sivarai namona ia noho, bona unai sivarai idia harorolaia neganai haida ese hahenamo idia davaria. Idia diba Hereva Lada-isidia 3:9 ia gwau: “Oiemu gau namodia amo bona oiemu uma ena huahua ginigunana amo Iehova oi hanamoa.” Brens opesi, kongregesen, bona Witness taudia ta ta iboudiai idia gaukara goadagoada taunimanima iboudiai edia namo idia tahua totona, unai dainai, tanobada ibounai tadikaka oreana be lauma dalanai ia goada bona ia tubu ia lao. Tauanina dalanai taga abia ese lauma dalanai taga ia havaraia lasi, to lauma dalanai ita taga neganai, tauanina dalanai ita taga, ita hegeregere Iehova ena gaukara ita karaia totona.

Heduru Heheni Daladia

Ita ta ta sibona sibona ese sivarai namona ena gaukara ita durua daladia be momo. Dala ta be Kingdom Hall ai. Kongregesen ena memba taudia iboudiai ese Kingdom Hall idia gaukaralaia. Taunimanima ese unai ruma haginia eiava rentaia davana, paoa, keru havaraia masini, bona hanamoa davana idia karaia. Kongregesen taudia iboudiai idia heduru be gau badana, unai dainai, kontribusen maua be Kingdom Hall lalonai idia atoa, bona unai maua amo idia davaria monina be idia gaukaralaia kongregesen durua totona. Bema unai moni orena ia noho, bona kongregesen ia gwau ia namo, kontribusen be edia Watch Tower brens opesi dekenai idia siaia diba.

Kontribusen moni idia siaia diba Society ena brens dekenai, bena do idia gaukaralaia misinari taudia hadibaia totona bona special pioneer taudia durudia totona, badina sivarai namona be idia do kamonai momo lasi gabudiai idia harorolaia. Loaloa naria taudia ese sivarai namona harorolaia gaukara idia karaia totona moni idia negea danu. Aposetolo Paulo, ia be idaunegai loaloa naria gaukara ia karaia, ese Filipi ena kongregesen taudia ia hanamodia, ia gwau: “Nega tamona lasi, to nega haida umui ese lau durua totona, moni umui siaia.” (Filipi 4:14-16) Brens iboudiai ese moni idia negea ful-taim haroro gaukara idia karaia taudia durudia totona, to danu, moni idia negea Betele ruma iboudiai hanamodia totona bona idia lalodiai idia noho bona idia gaukara taudia durudia totona. Sivarai namona hereadaena be buka bona magasin dekenai idia torea bona idia printaia be hahenamo bada Dirava ena amo, to unai gaudia haridia be gau badana, bona unai karaia totona moni idia negea danu. Bona hebouhebou karaia totona, bona “Sivarai Namona ena momokani” hahedinaraia totona kota idia karaia neganai, moni idia negea.​—Filipi 1:7.

Iehova ena hesiai taudia iboudiai ese sivarai namona idia harorolaia neganai, mai edia ura danu edia nega bona kohu idia gaukaralaia. Aposetolo Paulo ia gwau namona be moni idia atoa hegaegae tomadiho momokani ena gaukara durua bona habadaia totona, ia gwau: “Ekalesia orea durua totona moni lau ura herevalaia. . . . Pura ena dina ginigunana ibounai umui ta ta ese emui rumai moni taina do umui haboua noho, ena bada be emui gaukara davana ena bada hegeregerena.”​—1 Korinto 16:1, 2.

Tau ta ese moni ena harihari gauna ia henia neganai, reana ia diba maoro lasi edena dala amo do idia gaukaralaia, to idia gaukaralaia dainai Basileia ena gaukara ia bada ia lao ita itaia. Lagani 1993 Yearbook of Jehovah’s Witnesses bukana ai, ia hahedinaraia Keristen haroro taudia 4,500,000 bona ma haida ese Basileia ena sivarai namona be tano bona davara ena motumotu 200 bona ma haida lalodiai idia harorolaia. Unai ripoti ese iseda kudouna ia hamoalea. Vadaeni, herevana ita henia harihari gauna be bada eiava maragi, to idia iboudiai ese tanobada ibounai dekenai sivarai namona habadaia gaukarana idia durua.

Iboudiai edia heduru karana amo moni ia hegeregere gaukara haheaua totona. Haida be moni bada idia henia diba, bona unai ese haroro gaukara ia durua bada. Ma haida be moni sisina idia henia diba. To namo lasi moni sisina idia henia taudia idia hemarai bona idia laloa idia henia gauna be anina lasi. Iehova be unai bamona ia laloa lasi. Iesu ese unai ia haheitalaia goevagoeva, ia hahedinaraia vabu ia henia moni maragina dainai Iehova ia moale, ia gwau: “Vabu ogogamina ta ia itaia, ena moni maragimaragi rua [maua dekenai] ia udaia. Vadaeni Iesu ia gwau: ‘Momokani umui lau hamaoroa, inai vabu mai ogogami danu ia udaia monidia ese idia ibounai edia moni ia hanaia. Badina be idia ese edia moni bada herea dekena amo sisina sibona boubou maua dekenai idia udaia, to inai vabu be mai ogogami danu, to ena moni ibounai, ena mauri dekenai durua gauna ia udaia.’ ”​—Luka 21:2-4.

Herevana iseda moni be bada eiava ia bada lasi, to dala idauidau amo harihari gaudia ita henia diba Iehova ita hamoalea totona. Salamo torea tauna ese iseda Pavapava bona Hahemaoro Tauna ena ladana ita hahairaia dalana ia gwauraia, ia gwau: “Hairai umui gwauraia, Iehova ena ladana ena; boubou gauna umui mailaia, ena magu lalonai umui raka vareai.” (Salamo 96:8) Unai dainai, namona be lalokau guba Tamana ena haheitalai namona ita tohotohoa bona mai moale danu harihari gaudia ita henia, badina ia ese ita dekenai harihari gaudia ia henia guna dainai.

[Box on page 30]

BASILEIA HAROROLAIA GAUKARANA IDIA DURUA DALADIA HAIDA

◻ HARIHARI MONINA, TANOBADA IBOUNAI GAUKARA DURUA TOTONA: Momo ese edia moni idia atoa hegaegae, maua ta ladana “Harihari Monina, Society Ena Gaukara Tanobada Hegegemadai Durua Totona​—Mataio 24:14” lalonai do idia udaia totona. Hua ta ta ai, kongregesen ese unai moni be Society ena hedikwota Brooklyn, New York dekenai, eiava ena branch opesi ta dekenai idia siaia.

◻ HARIHARI GAUDIA: Taunimanima ese harihari monina idia siaia diba Watch Tower Bible and Tract Society of Pennsylvania, 25 Columbia Heights, Brooklyn, New York 11201 dekenai, eiava Society ena branch opesi ta dekenai. Herahera gaudia mai davana bada eiava dava bada gaudia idaudia danu idia henia diba. Revareva ta ida idia siaidia be namo, unai revareva ai idia gwau idia be harihari gaudia.

◻ HARIHARI MONINA MAI TARAVATUNA: Taunimanima ese moni be Watch Tower Society idia henia diba, trust fund ai do idia naria totona ela bona idia mase, to bema nega ta idia dabu, idia be mai edia gwaumaoro do idia abia lou.

◻ INSURENS: Bema ta ese life insurens ia hoia o moni be retirement fund ta ai ia atoa, Watch Tower Society ena ladana ia torea diba, bena ia mase neganai eiava ia buruka neganai unai moni do idia abia. Namona be unai bamona ia karaia tauna ese Society ia hadibaia.

◻ BANIKA AKAUN: Ta ena banika ena taravatu hegeregerena, dala ia karaia diba Watch Tower Society ese ena moni do idia gaukaralaia ia do mauri lalonai, eiava ia mase neganai do idia henia Society dekenai. Namona be unai bamona ia karaia tauna ese Society ia hadibaia.

◻ SHARE MONINA: Ta ena share monina be Watch Tower Society ia harihari henia diba, eiava dala ia karaia diba unai share be idia edia, to ato-kau monina be ia ese do ia abia.

◻ TANO BONA RUMA: Bema ta be mai ena ruma o tano, ia hoia diba gauna, Watch Tower Society ia henia vaitani diba, harihari gauna bamona, eiava do ia noholaia diba ela bona ia mase bena Society ese do ia abia vaitani. Bema ta ia ura unai bamona do ia karaia, namona be Society ia hadibaia guna.

◻ WILLS BONA TRUSTS: Bema ta ena ura be ia mase neganai Watch Tower Bible and Tract Society of Pennsylvania ese ena tano, ruma, kohu, o moni do idia abia, loia dekenai ia lao be namo, will pepana, mase murinai kohu hariharilaia gwaumaoro pepana ai, iena ura do ia torea totona. Eiava bema ena moni be trust fund ai ia noho, ia ese Society ena ladana be trust agreement pepana ai ia torea diba unai moni do idia abia totona. Tano haida ai, bema ta ese ena trust monina be tomadiho oreana ta ia henia, takisi monidia haida do ia henia lasi. Namona be will eiava trust pepana ena kopi ta be Society dekenai ia siaia.

Bema oi ura unai kara dekenai diba ma haida do oi abia, revareva ta oi siaia inai address dekenai: International Bible Students Association of Papua New Guinea Inc., Box 636, Boroko, N.C.D.

[Pictures on page 31]

Umui henia harihari monina idia gaukaralaia dalana:

1. Betele ai idia gaukara taudia

2. Brens opesi haginia gaukara

3. Dika ta ia vara neganai taunimanima durudia

4. Kingdom Hall

5. Misinari taudia