Iehova Abidadama Henia!

“Iehova oi abidadama henia mai emu lalona ibounai ida.”​—HEREVA LADA-ISIDIA 3:5.

1. Hereva Lada-isidia 3:5 ena hereva be edena bamona tauhau ta ena lalona ia veria, bona ia hasiahua nega daudau lalonai dahaka ia karaia totona?

NEGA daudau lalonai misinari gaukara ia karaia tauna ia torea, ia gwau: “ ‘LOHIABADA DEKENAI OI ABIDADAMA HENIA MAI EMU LALONA IBOUNAI IDA; BONA OI SIBOMU EMU LALO-PARARA OI ABIDADAMA HENIA LASI.’ Unai hereva be Baibel ena amo, bona lau vadivadi henia taudia ese edia ruma ena haba dekenai ia noho laulauna ese egu lalona ia veria. Unai dina ibounai lalonai unai hereva lau laloa momo. Lau sibona dekenai lau henanadai henia, lau gwau, mai egu lalona ibounai ida lau ese Dirava lau abidadama henia diba, a?” Unai nega lalonai unai tau ena lagani be 21. Hari, iena lagani be 90 bona mai ena abidadama danu Perth, Australia dekenai, elda gaukarana ia do karaia noho. Ena mauri ia laloa neganai, ia hedinarai ena lalona ibounai ida ia ese Iehova ia abidadama henia dainai huahua momo ia davaria; ia ese lagani 26 lalodiai Ceylon (hari be Sri Lanka), Burma (hari be Myanmar), Malaya, Thailand, India, bona Pakistan dekenai pioneer misinari gaukara aukana ia karaia.a

2. Hereva Lada-isidia 3:5 ena hereva dainai dahaka ita diba be namo?

² “Iehova oi abidadama henia mai emu lalona ibounai ida”​—unai be Hereva Lada-isidia 3:​5 ena hereva, New World Translation Baibel dekenai ia torea bamona, bona namona be ita ibounai ia hagoadaia iseda mauri lalonai mai iseda lalona ibounai ida Iehova ena gaukara ita karaia noho totona, badina ita diba ia ese iseda abidadama ia hagoadaia diba, bona ena be ita davaria hekwakwanai ena bada be ororo bamona, to ita hanaia diba. (Mataio 17:20) Hari, namona be Hereva Lada-isidia 3:5 ena anina ita tahua.

Tamana Ia Henia Sisibana

³ Hereva Lada-isidia buka ena karoa ginigunadia 9 lalodiai, tamana ese ia henia sisiba namodia idia noho, Iehova ena amo aonega sisiba idia noho iena natudia be gabeai guba maurina do idia moalelaia totona, eiava paradaiso tanobadana dekenai “Dirava ena natuna edia hairai do idia abia.” (Roma 8:​18-21, 23) Tamana bona sinana ese edia natuna kekeni bona memero hadibadia totona inai sisiba namona idia gaukaralaia diba. Hereva Lada-isidia karoa 3 ena sisiba be namo herea momokani, ena hereva ginigunana ena sisiba be inai: “Lauegu natuna e, lauegu taravatu oi laloaboio lasi, bona lauegu hahegani emu kudouna dekenai oi naria.” Satana ena kara dika tanobadana do ia ore negana be ia kahirakahira dainai, namona be Iehova ena sisiba herevadia ita lalodia tao. Ena be ita naria daudau, to idia haheauka taudia dekenai gwauhamata ia henia, ia gwau, “dina momo bona mauri lagani momo bona maino be oi dekenai do idia henia”​—mauri hanaihanai Iehova ena nega matamatana lalonai unai.​—Hereva Lada-isidia 3:​1, 2.

4, 5. (a) Ioane 5:​19, 20 dekenai, daidia be mai moale danu idia hetura heheni karana ia gwauraia? (b) Ema bona hari, Deuteronomi 11:​18-21 ena sisiba ena anina be dahaka?

⁴ Tamana bona ena natuna mero be mai moale danu idia turana karaia be mai anina bada gauna. Ita ia Havaraia Tauna, Iehova Dirava, ese dala ia karaia unai ia vara totona. Keriso Iesu ese iena turana karana Iehova dekenai ia gwauraia inai bamona: “Natuna be sibona kara ta do ia karaia diba lasi, to ia ese Tamana ena kara do ia itaia, vadaeni unai kara sibona do ia karaia. Tamana ese ia karaia noho karadia be Natuna ese danu ia karaia noho. Badina be Tamana ese ena Natuna ia lalokau henia, bona ena kara ibounai ia hedinarai henia ia dekenai.” (Ioane 5:​19, 20) Iehova ia ura ia bona iena ruma bese tanobada taudia be unai bamona idia hetura heheni, bona ia ura tanobada tamadia bona edia natudia idia hetura heheni danu.

⁵ Idaunegai Israel lalonai, taunimanima idia hagoadaia edia ruma bese lalonai idia hetura heheni totona. Unuseniai Iehova ese inai sisiba be tamana dekenai ia henia, ia gwau: “Egu hereva be emui lalona bona emui souli dekenai do umui dogodia tao; idia be toa ai do idia lao emui imana bona baguna dekenai. Emui natudia dekenai umui hadibaia, ruma ai umui helai neganai, dala dekenai umui raka neganai, bona umui hekure neganai, bona umui toreisi neganai, do umui herevalaidia. Bona emui iduara ena kahana kahana audia dekenai do umui toredia, bona emui ikoukou dekenai danu umui toredia; bena emui mauri dinadia bona emui natudia edia mauri dinadia do idia momo, Iehova ese emui sene taudia dekenai ia gwauhamata hegeregerena, guba be tanobada ataiai do ia noho negana hegeregerena.” (Deuteronomi 11:​18-21) Iseda Hadibaia Tauna Badana, Iehova Dirava, ena lauma amo idia torea Herevana be dala namona ia bona tanobada tamana mai natudia bona Keristen kongregesen dekenai ena hesiai idia karaia taudia iboudiai idia hetura heheni totona.​—Isaia 30:​20, 21.

6. Dirava bona taunimanima ese ita idia lalo-namo henia totona dahaka ita karaia be namo?

⁶ Hereva Lada-isidia karoa 3 siri 3 bona 4 dekenai, Dirava ena taunimanima, buruka bona matamata totona, tamana ena aonega sisiba ia noho, ia gwau: “Lalokau mai hebogahisina bona momokani kara do umui negea lasi, to emui aiona dekenai umui kwatua bona emui lalona dekenai do umui toredia. Unai amo lalo-namo bona lalo-parara do umui davaridia, Dirava bona taunimanima vairadiai.” Iehova Dirava ese lalokau mai hebogahisina bona momokani kara ia hahedinaraia goevagoeva. Salamo 25:10 ia gwau, “Iehova ena dala iboudiai be lalokau mai hebogahisi bona kara momokani daladia.” Iehova ita tohotohoa totona, namona be unai kara mai edia naria siahudia ita lalodia bada, davana bada ageva gauna ita laloa bada bamona, namona be unai kara be iseda lalona dekenai ia diho momokani. Unai neganai, mai iseda momokani ida inai bamona ita guriguri diba: “Iehova e, emu hebogahisi . . . emu lalokau bona momokani karana ese lau do ia naria hanaihanai.”​—Salamo 40:11.

Abidadama Noho Dalana

⁷ Webster’s Ninth New Collegiate Dictionary lalonai, ia gwau abidadama ena anina be “taunimanima ta eiava gau ta ena kara, ena diba, ena goada, eiava ena momokani oi abia dae diba.” Iehova ena kara lalonai lalokau mai hebogahisina be bada. Bona ita diba momokani ia gwauhamatalaia herevadia do ia hagugurudia, badina iena ladana, Iehova, ese ia hahedinaraia ia be gaukara Hagugurua Tauna badana. (Esodo 3:14; 6:​2-8) Ia be gau ibounai Havaraia Tauna dainai, ia be goada bona siahu bada edia Badina. (Isaia 40:​26, 29) Ia be hereva momokani ena badina, bona “Dirava ia koikoi diba lasi.” (Heberu 6:18) Unai dainai, ita idia hagoadaia hereva momokani iboudiai edia Badina, Iehova, iseda Dirava, dekenai ita abidadama diba, badina ia be mai ena siahu ia dekenai idia abidadama henia taudia ia naridia, bona iena ura namodia iboudiai do ia hagugurudia totona.​—Salamo 91:​1, 2; Isaia 55:​8-11.

8, 9. Tanobada dekenai, madi, dahaka dainai taunimanima huanai abidadama kara be ia bada lasi, bona Iehova ena taunimanima edia kara be edena bamona ia idau?

⁸ Inai tanobada dikana lalonai, madi, taunimanima huanai abidadama kara be ia bada lasi. To, gabu iboudiai dekenai mata-ganigani bona kara bodaga idia noho. May 1993 World Press Review magasin ena vairana dekenai, inai sivarai idia torea hedinarai: “KARA KERERE IA BADA​—Tanobada Dalana Matamatana ai Dala Kererena ai Moni Idia Abia. Kerere havaraia bisinesi taudia bona karadia idia vara gabudia be Brazil amo ia lao Germany, United States amo ia lao Argentina, Spain amo ia lao Peru, Italy amo ia lao Mexico, Vatican amo ia lao Russia.” Taunimanima idia gwauraia tanobada dalana matamatana be badu, mata-ganigani, bona abidadama lasi karadia amo idia haginia, bona taunimanima hahisia gaudia idia bada idia lao.

⁹ Politikol besedia bamona lasi, Iehova ena Witness taudia idia moale badina “Iehova be ena Dirava ai ia halaoa besena” be idia dainai. Idia mo sibodia be mai momokani danu idia gwau diba, “Dirava dekenai ai abidadama.” Idia ta ta iboudiai, mai moale danu, be inai bamona idia boiboi: “Dirava danu ena hereva do lau hanamoa. . . . Dirava lau abidadama henia. Do lau gari lasi.”​—Salamo 33:12; 56:​4, 11.

10. Dahaka ese Keristen memero kekeni momo ia hagoadadia idia gini auka totona?

¹⁰ Asia tanona ta dekenai, Witness memero kekeni tausen momo idia kwadidia dikadika bona dibura rumadia dekenai idia atodia, to Iehova dekenai idia abidadama dainai idia momo idia haheauka diba. Hanuaboi ta, dibura rumana lalonai, Witness merona ta be mai dagedage ida idia hahisia bada, bona ia laloa unai hisihisi ia haheaukalaia noho diba lasi. To, hanuaboi ena dibura negana lalonai, mero ta be ia dekenai ia mai. Bona rege bada lasi amo ia gwau: “Oi hesiku lasi; guna lau haheauka lasi bona ema bona hari lau lalo-maino diba lasi.” Vadaeni, unai mero ese ena lalona ia hadaia do ia gini goada noho totona. Satana ese iseda abidadama karana ia hadikaia toho, to ita diba bema Iehova dekenai ita abidadama, ia ese ita do ia durua.​—Ieremia 7:​3-7; 17:​1-8; 38:​6-13, 15-17.

11. Dahaka ese ita ia hasiahua Iehova dekenai ita abidadama totona?

¹¹ Taravatu ginigunana ena kahana ta be inai: “[Iehova] oiemu Dirava oi ura henia, mai oiemu lalona ibounai.” (Mareko 12:30) Dirava ena Hereva ita laloa namonamo neganai, ita diba hereva momokanidia be iseda lalona momokani dekenai idia diho, bona ita idia hasiahua iseda goada ibounai ida iseda Dirava hereadaena, Siahu Ibounai Lohiabadana, Iehova, ena hesiai gaukara ita karaia totona. Ena namo dainai ia dekenai iseda lalona be moale amo ia honu​—gau momo ita ia hadibaia, ita ia durua, bona gabeai gau momo ita totona do ia karaia dainai—​ia dekenai ita abidadama, ita diba ita do ia hamauria.​—Isaia 12:2.

12. Idia ore lagani momo lalodiai, Keristen taudia momo be edena dala ai edia abidadama Iehova dekenai idia hahedinaraia?

¹² Unai abidadama karana be lagani momo lalodiai ita habadaia diba. Mai ena manau Witness tauna be mai ena abidadama danu lagani 50 bona ma haida lalodiai Watch Tower Society ena Brooklyn hedikwota dekenai ia gaukara, April 1927 ai gaukara ia hamatamaia, ia torea, ia gwau: “Unai hua dokonai, envelope dekenai K5.00 durua monina bona kadi lau idia henia, unai kadi mai hairaina dekenai Baibel amo Hereva Lada-isidia 3:​5, 6 edia siri idia torea . . . Iehova dekenai lau abidadama ena badina be momo, badina hedikwota rumana dekenai, haraga herea lau lalo-parara Iehova ena ‘hesiai tauna mai ena kamonai bona mai ena kara maoromaoro’ oreana ese tanobada dekenai Basileia ena gaukara ia naria.​—Mataio 24:​45-47.”b Unai Keristen tauna ena lalona ia hadaia lasi kohu ia ura henia totona, to ia hadaia ena badina be “kohu guba dekenai [ia] haboua noho, badina unuseni ia be do ia ore diba lasi.” Hari inai negai hegeregerena, tanobada hegegemadai Watch Tower Society ena Betele rumadia dekenai, idia gaukara taudia iboudiai idia gwau tanobada ena taravatu dekenai idia ogogami noho bamona. Iehova dekenai idia abidadama edia mauri durua gaudia idia davaria totona.​—Luka 12:​29-31, 33, 34.

Iehova Dekenai Oi Tabekau

¹³ Iseda guba tamana ese ita dekenai ia sisiba henia inai bamona: “Oi sibomu emu lalo-parara oi abidadama henia lasi.” (Hereva Lada-isidia 3:5) Sisiba henia karana dekenai, tanobada orea taudia bona taunimanima edia lalohadai dalana idia stadilaia taudia edia aonega be maragi, Iehova ena aonega bona lalo-parara be bada herea. “Ta ese ena aonega ia hadobua diba lasi.” (Salamo 147:5) Taunimanima idia gwauraia bada tanobada taudia edia aonega dekenai, eiava sibona eda diba bada lasi lalohadai dekenai ita tabekau be namo lasi, to sisiba herevadia ita abia totona, namona be Iehova, iena Hereva, bona Keristen kongregesen ena elda taudia dekenai ita lao.​—Salamo 55:22; 1 Korinto 2:5.

13, 14. (a) Sisiba namona be edeseniai sibona ita davaria diba? (b) Dagedage amo ita roho mauri totona, dahaka ita karaia lasi be gau badana?

¹⁴ Hetoho bada dinana be haraga herea ia kahirakahira mai bona unai neganai taunimanima edia aonega eiava iseda dagi bada ese ita do idia durua lasi. (Isaia 29:14; 1 Korinto 2:14) Tanobada Ibounai Tuarina Iharuana lalonai, Japan dekenai, Dirava ena taunimanima ia naria tauna ta be mai ena diba bada, to ia hekokoroku bona ia laloa ia sibona ena aonega dekenai ia tabekau diba. Taunimanima idia dagedage henia neganai hereva momokani ia dadaraia, bona ia naria taudia kahirakahira iboudiai be dagedage idia davaria neganai haroro gaukara idia rakatania. Mai ena abidadama Japan taihuna ta be gari lasi dekenai dibura rumana dekenai idia hahisia bada karana amo ia roho mauri, bona ia gwau: “Idia abidadama noho taudia edia aonega be vaia taunimanima momo hegeregeredia, bona edia kara dainai taunimanima ese idia raraidia momo lasi. Hanaihanai mai iseda lalona ibounai ida Iehova dekenai ita abidadama noho be gau badana.”c

15. Iehova ita hamoalea totona, Dirava ena kara hegeregerena, dahaka kara ita hahedinaraia be gau badana?

¹⁵ Iseda lalohadai dekenai lasi, to Iehova dekenai ita abidadama totona, ita manau be gau badana. Iehova idia ura hamoalea taudia dekenai unai kara be mai anina bada! Oibe, iseda Dirava be guba bona tanobada edia Siahu Ibounai Lohiabadana, to ia havaradia bona mai edia aonega taudia ia kara henidia neganai, ia ese manau ia hahedinaraia. Unai ia karaia dainai ita moale. “Mai manau danu guba bona tanobada ia itadia. Ia ese ogogami taudia be kahu amo ia abidia isi.” (Salamo 113:​6, 7) Iena hebogahisi bada karana amo, iseda dika ia gwauatao, unai ia karaia taunimanima dekenai harihari gauna hereadaena ia henia neganai; ia lalokau henia bada Natuna, Iesu Keriso, ia henia boubou karana amo. Iena hebogahisi karana dainai ita moale be namo!

16. Kongregesen lalonai, tadikaka be mai dahaka danu dagi gaukaradia idia tahua be namo?

¹⁶ Iesu ese ita ia sisiba henia, ia gwau: “Sibona ia habadaia tauna be do idia hamaragia. To sibona ia hamaragia tauna be do idia habadaia.” (Mataio 23:12) Idia bapatiso vadaeni tadikakadia be mai manau danu Keristen kongregesen lalonai dagi gaukaradia idia tahua be namo. To, unai dagi idia abia neganai, namo lasi naria taudia idia laloa unai be tau badadia edia toana, namona be mai manau, mai moale, bona mai edia goada ibounai ida unai gaukara idia karaia, Iesu ia karaia bamona, ia gwau: “Egu Tamana be ia gaukara noho ia mai bona hari, lau danu lau gaukara noho.”​—Ioane 5:17; 1 Petero 5:​2, 3.

17. Namona be ita ibounai be dahaka ita diba, bona unai ese ita ia doria dahaka do ita karaia totona?

¹⁷ Namona be mai manau bona mai guriguri danu ita hahedinaraia ita diba Iehova vairanai ita be kahu bamona. Vadaeni, ita moale badina “Iehova ena lalokau mai hebogahisi karana be sene negana amo ia mai hari ia noho, bona do ia noho ela bona hanaihanai, ia garina idia gari taudia dekenai, iena kara maoromaoro danu, be uru gabedia totona do ia noho”! (Salamo 103:​14, 17) Ita ibounai be Dirava ena Hereva ita stadilaia namonamo be gau badana. Pura ta ta iboudiai sibona eda stadi, ruma bese ena stadi, bona kongregesen heboudia dekenai ita stadi negadia ita laloa bada be namo. Unai dala amo “Helaga Diravana [ita] diba karana” ita habadaia. Unai be “lalo-parara” karana.​—Hereva Lada-isidia 9:10.

“Oiemu Dala Iboudiai Dekenai . . .”

¹⁸ Lalo-parara ena Badina, Iehova, ita laloa totona, Hereva Lada-isidia 3:6 ma ia gwau: “Oiemu dala iboudiai dekenai ia oi laloa, bena ia ese oiemu dala ibounai do ia hamaoromaorodia.” Iehova ita laloa ena anina be guriguri dekena amo ita kahirakahira henia. Edeseniai ita noho eiava dahaka hekwakwanai do ita davaria, maoromaoro ia ita guriguri henia diba. Dina ta ta iboudiai iseda gaukara ita karaia neganai, haroro totona ita hegaegae neganai, ruma ta ruma ta dekenai Basileia ena sivarai ita harorolaia neganai, namona be ia ita guriguri henia iseda gaukara do ia hanamoa totona. Unai neganai, ita be mai iseda dala bona mai moale danu ‘Dirava danu ita raka diba,’ bona ita diba ia ese iseda ‘raka dalana do ia hamaoromaoroa,’ guna ia ese Dirava garina idia gari taudia Enoka, Noa, bona mai edia abidadama Israel taudia, Iosua bona Daniel edia dala ia hamaoromaoroa bamona.​—Genese 5:22; 6:9; Deuteronomi 8:6; Iosua 22:5; Daniel 6:23; bona Iakobo 4:​8, 10 itaia danu.

18, 19. Iseda mauri lalonai, Hereva Lada-isidia 3:6 ena hereva be edena bamona ita badinaia diba, bona unai neganai dahaka do ia vara?

¹⁹ Iseda ura be guriguri amo Iehova ita hamaoroa neganai, ita diba ‘Dirava ena maino ese taunimanima edia diba ia hanaia momokani. Keriso Iesu dekena amo unai maino ese iseda laloa gaudia bona iseda kudouna idia mamia gaudia ibounai do ia naria namonamo.’ (Filipi 4:7) Dirava ena maino be iseda moale vairadia amo ita hahedinaraia dainai, haroro gaukara lalonai ita davaria ruma taudia dekenai sivarai ita harorolaia neganai, haida do idia ura kamonai. (Kolose 4:​5, 6) Bona hari inai negai, Dirava ena maino be hekwakwanai bona kara maoromaoro lasi karadia idia davaria taudia ia hagoadadia diba, murina sivarai ese ia hahedinaraia hegeregerena.d

20, 21. (a) Nazi taudia edia dagedage negana lalonai, Iehova ena Witness taudia edia abidadama ese edena bamona taunimanima ma haida ia hagoadadia? (b) Iehova ena hereva dainai, namona be iseda lalona ita hadaia dahaka do ita karaia totona?

²⁰ Max Liebster, ia be Iuda tauna bona Holocaust (unai be Iuda taudia idia dagedage henidia negana) amo ia roho mauri be hoa gauna ta bamona, ia ese Nazi taudia edia ala-ala dibura kamepa dekenai idia siaia negana ia sivarailaia, ia gwau: “Ai be train ena daiutu lalodiai idia lokaia, unai daiutu ta ta iboudiai idia hapararaia kahana maragi momo dekenai, bona idia ta ta iboudiai dekenai taunimanima rua rua sibona idia vareai diba. Unai daiutu ena kahana maragi ta dekenai edia aena amo lau idia botaia vareai, bona ia noho vadaeni dibura tauna ena manau matadia lau itadia. Dirava ena taravatu ia matauraia dainai, unai tau be unuseniai idia atoa, ia laloa dibura dekenai ia noho bona reana ia mase be namo, to taunimanima edia rara ia hadihoa be namo lasi. Ia be Iehova ena Witness tauna ta. Ena natudia be ia dekena amo idia kokidia bona ena hahine idia hamasea. Bona ia laloa ia do idia hamasea danu. Train amo dina 14 ai heau lao neganai egu guriguri ena haere lau davaria, ena be ai idia abia lao do idia hamasea totona, to mauri hanaihanai ena helaro lau davaria.”

²¹ Unai tadikaka be Auschwitz dibura kamepa ia gwauraia “leona ena kohua,” bona ia dekena amo idia ruhaia murinai, bona bapatiso ia abia murinai, unai tadikaka ese Iehova ena Witness hahine ta ia adavaia; unai hahine danu be guna dibura kamepa dekenai idia atoa bona iena tamana be Dachau dibura kamepa dekenai hisihisi bada ia abia. Hahine tamana be unuseniai ia noho neganai, ia kamonai iena hahine bona ena natuna kekeni maragina idia dogodia tao danu. Unai ia kamonai neganai ena hemami ia gwauraia, ia gwau: “Lau lalo-hekwarahi bada herea. Bena dina ta ai, digu totona laini dekenai lau gini noho lalonai, lau kamonai ta ese Hereva Lada-isidia 3:​5, 6 ia gwauraia hedinarai . . . Regena be guba dekena amo hereva ia mai bamona. Unai ese lau ia hagoadaia lau laloa namonamo lou totona.” Ena be dibura tauna ta ese unai siri ia gwauraia hedinarai, to unai ese ia hahedinaraia Iehova ena Hereva be mai ena siahu bada ita dekenai. (Heberu 4:12) Hari inai negai, namona be lagani 1994 ena siri badana amo Iehova ena hereva ita kamonai henia namonamo, ia gwau: “Iehova oi abidadama henia mai emu lalona ibounai ida”!

[Footnotes]

Hereva Gwauraia Lou

◻ Hereva Lada-isidia bukana dekenai dahaka sisiba ia noho?

◻ Iehova dekenai ita abidadama be edena bamona ita ia durua?

◻ Iehova dekenai ita tabekau ena anina be dahaka?

◻ Iseda dala iboudiai dekenai Iehova ena hereva ita badinaia ena namo be dahaka?

◻ Iehova ese iseda dala be edena bamona ia hamaoromaoroa?

3. (a) Hereva Lada-isidia bukana ena karoa ginigunadia 9 lalodiai dahaka hagoadaia herevadia idia noho? (b) Dahaka dainai Hereva Lada-isidia 3:​1, 2 edia hereva ita laloa namonamo be gau badana?

7. Edena daladia amo Iehova ese ia hahedinaraia ia dekenai ita abidadama henia diba?

[Pictures on page 15]

Basileia ena moale sivaraina ese kudou-maoro taudia edia lalona ia veria