Hahediba Namona, Hari Inai Nega Dikana Lalonai
“Namona be oi diba, nega dokonai metau dikadia momo do idia vara. Kara dika taudia bona koikoi taudia ese edia kara dika bona edia koikoi do idia habadaia.”—2 TIMOTEO 3:1, 13.
1, 2. Dahaka dainai ita badinadia herevadia ita tahudia namonamo be namo?
OI IDIA durua noho, eiava oi idia hahisia noho, a? Emu hekwakwanai idia haoredia a, eiava idia habadadia a? Dahaka amo? Hahediba herevadia amo. Oibe, hahediba herevadia ese emu mauri idia hanamoa bada diba bona idia hadikaia bada diba.
2 Vanegai, profesa toi ese inai idia tahua, bena idia davaridia gaudia be Journal for the Scientific Study of Religion lalonai idia gwauraidia hedinarai. Unai gau ese idia hahedinaraia, hahediba herevadia dainai taunimanima do idia kwalimu eiava do idia darere, hari inai nega dikana haheaukalaia karana lalonai. Idia davaridia gaudia be hereva gabena lalonai do ita tahudia.
3, 4. Dahaka dahaka ese idia hahedinaraia ita be nega dikana lalonai ita noho?
3 To inai henanadai mani oi laloa guna: Inai hereva, hari inai negai ‘metau dikadia momo idia vara’ herevana, be oi hamomokania a? (2 Timoteo 1:3-5) Bema oibe, unai hereva hamomokania gaudia be momokani oi itadia. Reana tano haida oi diba, unuseniai politikol oreadia idauidau idia tuari heheni lalonai, unai tano taudia idia hapararadia bona idia hadikadia. Ma gabu haida ai, edia tomadiho o edia bese be idauidau dainai idia ala-ala heheni. Ami taudia idia pididia, bona hahine bona kekeni momo herea idia reipidia, bona taunimanima burukadia be aniani, siahu, bona ruma idia davaridia diba lasi. Taunimanima momo herea ese hisihisi bada idia ania noho, unai dainai momo herea ese edia tano idia heautanidia.
4 Hari inai negai kampani momo be moni ai idia dabu dainai, edia faktori idia koudia bona gaukara taudia idia hasakidia, bena edia pensen monina idia abia diba lasi. Moni ena siahu ia maragi ia lao, bona haida ese aniani sisina mo idia hoia diba. Taunimanima milion momo be hitolo bona gorere ese idia hahisidia. Laulau dikadia East Africa amo be reana oi itadia vadaeni, tatau, hahine, bona memero kekeni edia tauanidia idia maragi herea momokani. Asia ai milion momo be hisihisi unai bamona idia ania.
5, 6. Dahaka dainai gorere be hekwakwanai badana ai ia lao, hari inai nega dikana lalonai?
5 Hahegari goreredia be idia bada idia lao sivaraidia be ita ibounai ita kamonai vadaeni. January 25, 1993 ai, The New York Times ia gwau: ‘Matabodaga karadia, koikoi karadia, bona unai kara koudia toho daladia kereredia bogaragidiai, Latin America ena AIDS gorerena be ia bada ia lao, . . . badina badana ta be hahine momo ese idia abia.’ October 1992 ai, U.S.News & World Report ia gwau: “Lagani 20 mo idia lao vadaeni, U.S. ena pablik-helt dipatmen gunalaia tauna . . . ia gwau dai-hanai goreredia do idia uarilaidia lou lasi be namo.” To hari be edena bamona? “Hospital be gorere taudia ai ma idia honudae lou; guna doketa taudia idia laloa unai gorere idia hadareredia vadaeni. . . . Maikrobi ese dala matamatadia idia havaradia, unai edia kara ese muramura matamatadia karadia karana ia hanaia. . . . ‘Ita be dai-hanai goreredia negana matamatana ai ita vareai noho.’ ”
6 Haheitalai ta be inai: Newsweek, January 11, 1993 ena, ia gwau: “Lagani ta ta iboudiai maleria ena gaigai maragimaragidia be taunimanima 270 milion edia tauanidia ai idia vareai, 2 milion idia hamasedia . . . bona 100 milion idia hagoreredia bada. . . . Bona unai gorere ena siahu ia bada ia lao dainai, . . . nega daudau lasi maleria goreredia haida hanamodia dalana do ia ore.” Unai ita garilaia bada.
7. Hari inai nega ena dika dainai, momo be dahaka idia karaia?
7 Hari inai nega dikana lalonai taunimanima momo ese heduru idia tahua, edia hekwakwanai haoredia totona. Haida ese gorere hanamodia daladia idia gwauraidia bukadia idia tahudia. Ma haida idia ura bada haida ese edia headava dikadia, eiava edia natudia naridia karana, eiava kekero muramuradia o drag, eiava edia lalo-hekwarahi idauidau haheaukalaidia daladia be do idia sisibalai henidia. Oibe, heduru do idia abia be namo! Reana oi be sibomu emu hekwakwanai ta oi hekwarahilaia noho, eiava tuari, doe, o dika badana idauna ta dainai idia vara gaudia oi hisihisilaidia noho. Vadaeni, inai bamona oi henanadai be maoro, ‘Dahaka dainai inai metau dikadia momo idia vara?’
8. Dahaka dainai lalo-parara bona sisiba be Baibel lalonai do ita tahua be namo?
8 Do ita kwalimu bona moale do ita davaria totona, namona be do ita diba guna dahaka dainai inai metau dikadia momo idia vara. Anina be, Baibel do ita laloa be namo. Dahaka dainai Baibel ai duanaia? Badina be ia mo sibona lalonai be peroveta herevadia maoromaorodia; unai hereva ese iseda hisihisi edia badina bona nega vairai ita dekenai do idia vara gaudia ita idia hadibalaia diba.
Sivarai ese Ita Idia Hadibaia
9 February 15, 1994 ena Gima Kohorona ese Iesu ena peroveta herevana Mataio karoa 24 lalonai ia gwauraia goevagoeva. Mt 24 Siri 3 lalonai, Iesu ena aposetolo ese idia nanadaia, do ia giroa mai bona tanobada dokona danu, edia toana be dahaka. Bena, Mt 24 siri 5 ela bona 14 lalodiai, Iesu ese Keriso koikoidia, tuari, hitolo, Keristen taudia dagedage henidia karadia, taravatu utua karadia, bona Dirava ena Basileia tanobada ibounai lalonai harorolaia gaukarana be ia perovetalaidia.
9, 10. Iesu ena peroveta herevana Mataio karoa 24 ai be edena bamona ia momokani, aposetolo edia nega lalonai?
10 Idaunegai sivaraidia ese idia hamomokania unai gau be Iuda besena ena dokona negana lalonai idia vara. Unai hisihisi idia bada idia lao, ela bona hisihisi bada hereana be Ierusalem bona Iuda besena ai ia vara. Roma taudia be lagani 66 C.E. ai Ierusalem idia tuari henia neganai ia vara gauna herevana matamana be Mt 24 siri 15 lalonai. Unai ia bada ia lao ela bona Iesu be Mt 24 siri 21 ai ia gwauraia hisihisina ia vara—lagani 70 C.E. lalonai Ierusalem idia hadikaia ore; unai ese unai hanua ai idia vara guna hisihisidia iboudiai ia hereadia. To unai neganai tanobada ena dokona ia ginidae lasi, bona Iesu ia gwau lasi unai neganai do ia ginidae. Mt 24 Siri 23 ela bona 28 lalodiai, ia hahedinaraia lagani 70 C.E. ena hisihisi murinai gau ma haida do idia vara.
11. Unai hereva be unai neganai ia momokani, anina be dahaka, hari inai negai?
11 Unai sivarai ita laloa maragi be kerere. Unai nega gunana ai peroveta herevadia idia momokani be mai anina bada. Badina be tuari, hitolo, tano-laga, dai-hanai goreredia, bona hahehisi karadia, Iuda besena ena dokona negana lalonai idia vara gaudia, be dala badana ai do idia hedinarai, “idau bese edia nega” be lagani 1914 ai do ia ore murinai. (Luka 21:24) Hari idia mauri noho taudia momo ese unai tuari idia itaia. Bona, ena be oi be lagani 1914 murinai oi vara, to Iesu ena peroveta herevadia idia momokani be oi itaia. Hari inai negai idia vara gaudia ese idia hamomokania ita be inai nega dikana ena dokona lalonai ita noho.
12. Iesu ena hereva hegeregerena, dahaka be gabeai do ita itaia?
12 Anina be, Mataio 24:29 ese ia gwauraia ‘negana dikana’ be ita vairanai ia hure. Unai neganai hoa gaudia be guba ai do idia hedinarai. Mt 24 Siri 30 ese ia hahedinaraia, unai murinai taunimanima ese toa idauna ta do idia itaia, do ia hamomokania hamasedia ore negana be kahirakahira. Luka 21:25-28 ese ia hahedinaraia, unai neganai “edia kudouna dekenai do idia gari momokani, edia laloa danu do idia doko, unai idia vara gaudia dainai.” Luka ena sivarai be ma ia gwau, unai neganai Keristen taudia ese edia kwaradia do idia abidia isi, badina be hamauridia negana be kahirakahira momokani.
13. Dahaka dala badadia rua do ita tahudia be namo?
13 To, oi laloa gauna be inai: ‘Inai hekwarahi negana edena bamona do lau lalo-pararalaia bona do lau haheaukalaia?’ Dala ginigunana be, hekwakwanai badadia do ita dibadia bona idia amo do ita raka siri dalana do ita tahua. Dala iharuana be, Baibel ena hereva ese ita idia durua, mauri namona be hari inai negai do ita davaria totona. Mani emu Baibel be 2 Timoteo karoa 3 ai oi kehoa. Do oi itaia, aposetolo Paulo ena hereva ese oi do idia durua diba, inai hekwarahi negana lalonai do oi haheauka totona.
Eda Nega Ia Perovetalaia
14 Dirava ese ena lauma amo aposetolo Paulo ia hasiahua, bena Paulo ese Keristen tauna mai ena kamonai, Timoteo, ia tore henia; sisiba namona amo ia durua, do ia kwalimu momokani bona do ia moale bada totona. Paulo ese ia toredia herevadia haida be mai anina bada, hari inai negai. Timoteo Iharuana 3:1-5 ai ia gwau: “To namona be oi diba, nega dokonai metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea.”
15. Dahaka dainai 2 Timoteo 3:1 be hari ita laloa bada be namo?
15 Gau 19 ia toredia unai. Ita do tahudia lasi bona namo davaria gabuna ai ita do vareai lasi neganai, 2Ti 3 siri 1 mani oi itaia guna. Paulo ia gwau: “Nega dokonai metau dikadia momo do idia vara.” Edena ‘nega dokona’? Nega dokodia be momo, idaunegai hanuana Pompeii ena nega dokona, eiava pavapava ta o lohia iduhuna ta ena nega dokona unai. Baibel danu ese nega dokodia haida ia gwauraidia, ta be Iuda besena ena nega dokona. (Kara 2:16, 17) To Iesu ena parabole ta dainai ita diba Paulo ese iseda nega ia herevalaia.
16. Uiti bona ava dikadia parabolena ese dahaka ia perovetalaia, iseda negai do ia vara?
16 Iesu ese uiti bona ava dikadia ia parabolelaidia; uma ai idia hadodia, bena idia rakatanidia, do idia tubu. Ia gwau uiti ese Keristen taudia momokanidia idia laulaulaidia bona ava dikadia ese Keristen taudia koikoidia idia laulaulaidia. Inai parabole ese ia hahedinaraia nega daudau do ia ore guna, bena gau ta do ia tubu rohoroho neganai, inai tanobada oromana dikana ibounai ena dokona do ia ginidae. Unai gau be dahaka? Keristen tomadihona momokanina negea karana unai, ia dainai kara dikadia momo do idia vara. Baibel ena peroveta herevadia ma haida ese idia hamomokania unai be tanobada ena dokonai do ia vara. Vadaeni, dokona negana be hari ia ginidae vadaeni.—Mataio 13:24-30, 36-43.
17. Unai hegeregerena, 2 Timoteo 3:1-5 ese tanobada ena dokona edena bamona ia gwauraia?
17 Anina oi lalo-pararalaia, a? Timoteo Iharuana 3:1-5 danu ese ia hahedinaraia, tanobada ena dokonai, dina gabedia ai, Keristen taudia do idia gegedia ahu huahuadia iboudiai do idia dika. Paulo ia gwau lasi ia gwauraidia gaudia 19 be nega dokona ia ginidae vadaeni herevana hamomokania dalana badana. Lasi, to nega dokonai do ita hekwarahilaidia gaudia ia herevalaidia unai. 2Ti 3 Siri 1 ai “metau dikadia momo” ia gwauraidia. Unai hereva be Greek herevadia ida idia hahegeregeredia, edia anina be “ia gwauraidia hidi negadia dagedagedia.” Hari inai nega be unai bamona ia gwauraia be maoro, ani?
18. Paulo ena peroveta herevadia ita stadilaidia neganai, dahaka ita lalodia be namo?
18 Hari peroveta herevadia ita tahudia dainai, iseda nega ena dika bada ita lalo-pararalaia diba. Ita tahudia gaudia badadia ruaosi be inai: (1) Hari inai negai ita idia hahekwarahia gaudia do ita dibadia, bona idia amo raka siri dalana be do ita lalo-pararalaia; (2) hahediba herevadia maorodia, ita do idia durua iseda mauri do ita hanamoa totona herevadia, be do ita badinadia. Gau dikadia mo do ita herevalaidia lasi, to hahediba herevadia namodia do ita herevalaidia momo; ita bona eda ruma besedia idia durua diba, inai metau dikadia momo negana lalonai.
Hahenamo Badadia Abidia
19 Paulo ia gwau, nega dokonai “taunimanima ese idia edia ura sibona do idia tahua.” (2 Timoteo 3:2) Ena hereva ena anina be dahaka? Gunaguna amo ema bona hari, hekokoroku taudia, sibodia edia ura idia tahua taudia, be idia noho, to hari inai nega lalonai unai bamona taudia be momo herea. Bona idia momo ese unai kara idia habadaia momokani. Unai be politik taudia bona bisinesi taudia edia kara korikori bamona. Tatau bona hahine ese siahu bona ladana bada idia tahudia; nega momo unai amo ma haida idia hadikadia, to unai idia laloa lasi. Taunimanima idia samanidia haraga eiava idia koidia haraga. Hekokoroku taudia bona sibodia edia ura idia tahua taudia be momo herea.
20. Baibel ena sisiba be edena bamona ia idau, momo be sibodia idia lalokau henia karana bamona lasi?
20 Ita ura lasi ‘edia ura sibona idia tahua taudia’ ese ita idia hadikalaia vadaeni karadia do ita lalodia lou, ani? To Baibel ese inai kerere ia gwauraia hedinarai neganai, ita ia durua, badina be inai tarapu amo do ita raka siri dalana ita ia hadibalaia. Ia gwau: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ Bona haida edia namo do umui tahua, to umui emui namo sibona do umui tahua lasi.” “Do umui hekokoroku lasi, to do umui manau.” Unai sisiba namo hereana be Filipi 2:3, 4 bona Roma 12:3 ai.
21, 22. (a) Dahaka ese ia hahedinaraia unai bamona sisibana ese haida ia durudia, hari inai negai? (b) Dirava ena sisiba ese taunimanima edena bamona ia haidaudia?
21 Reana ta ia gwau, ‘Unai hereva edia mamina be namo, to unai kara kwalimulaia dalana be lasi.’ To hari inai negai taunimanima ese idia kwalimulaia noho. Lagani 1990 lalonai Oxford University ena buka ta ladana The Social Dimensions of Sectarianism idia halasia. Iehova ena Witness taudia, Katolik tanona Belgium ai, be ia gwauraidia. Ia gwau: “Ai nanadaidia taudia be idia gwau idia be Witness taudia ai idia lao mai edia ura ida, ‘Hereva Momokani’ ese ia veridia dainai mo sibona lasi, to Witness taudia edia kara namodia dainai danu. . . . Idia momo ese edia heabidae, hetura, lalokau, bona lalo-tamona idia gwauraidia, to Witness taudia ese danu kara momokani bona ‘Baibel ena hahegani badinadia karadia’ idia ura henidia bada.”
22 Bema unai taunimanima ta ta ena noho ena noho oi itadia goevagoeva diba, inai do oi davaria diba: Idia haida be tatau, guna idia hekokoroku bona sibodia edia namo idia tahua, to hari idia manau bona edia adavadia bona edia natudia bona taunimanima ma haida idia kara henidia mai edia hebogahisi ida. Idia haida be hahine, guna idia hekokoroku eiava idia hebogahisi lasi, to hari idia ese ma haida na Keristen dalana momokanina idia hadibalaidia. Momokani, unai bamona taudia tausen tausen idia noho. Vadaeni, mani inai oi laloa mai emu momokani ida: Unai bamona taudia bogaragidiai bema oi noho, hari inai nega dikana ai do oi haheauka be haraga, to sibodia idia lalokau henia bada taudia bogaragidiai do oi noho be auka, ani? Vadaeni, unai bamona Baibel herevadia badinadia karana ese emu moale do ia habadaia, ani?
23. Dahaka dainai 2 Timoteo 3:2-5 be ma do ita tahua lou be namo?
23 To, Paulo be 2 Timoteo 3:2-5 ai ia toredia gaudia ginigunana mo ita herevalaia vadaeni. Bema oredia danu oi tahudia namonamo, unai ese oi do ia durua a, eda nega ena hekwakwanai badadia do oi dibadia bona idia amo do oi raka siri totona, bona oi bona emu lalokau taudia be moale bada davaria dalana do umui diba totona, a? Hereva gabena ese oi do ia durua, inai henanadai do oi haerelaidia bona hahenamo bada do oi abia totona.
Inai Oi Laloa Lou
◻ Dahaka dahaka ese idia hahedinaraia ita be nega dikana lalonai ita noho?
◻ Dahaka dainai ita diba momokani ita be nega dokonai ita noho?
◻ Dahaka gau badadia rua be 2 Timoteo 3:1-5 lalonai ita davaridia?
◻ Hari inai negai, momo be sibodia idia lalokau henia neganai, Baibel ena hereva ese Iehova ena orea taudia edena bamona idia durudia?
14. Dahaka dainai ita laloa 2 Timoteo 3:1-5 stadilaia karana ese ita do ia durua?
19. Dahaka oi itaia vadaeni, ia hahedinaraia taunimanima be sibodia idia lalokau henia?
[Picture Credit Line on page 8]
hoto top left: Andy Hernandez/Sipa Press; photo bottom right: Jose Nicolas/Sipa Press