Edia Lalodia Idia Hadaidia Iehova Ena Hesiai Do Idia Lao Henia!

“OI LAO lasi haroro totona!” “Emu orea taudia do idia mai lasi iniseni!” Keristen hahinedia momo edia adavadia ese unai bamona idia gwau henidia. To bema edia adavadia be ami taudia, edia abidadama idia dogoatao be mai hekwarahina bada. (Isaia 2:4; Ioane 17:16) Vadaeni, edena dala ai lauma ai idia goada noho bona Basileia gaukarana idia karaia noho?

Idia haheauka, badina be Iehova Dirava idia badinaia bona edia lalodia idia goada dainai. Idia ta ladana Yvonne ia gwau: “Lau laloa egu lalo-goada dainai lau kwalimu. Lau diba ena be egu adavana ia badu to do lau kwalimu diba.”

Keristen hahinena ma ta, ena adavana be ami opesa ta, be sibona ena lalo-goada ena anina namona ena adavana dekenai be ia gwauraia, ia gwau: “Sibona ena sediual mo lasi to lauegu danu be ia diba, bona ia be ami tauna ta dainai unai ia laloa bada.” To hari hahine be Iehova ena hesiai ia lao henia noho be mai hekwarahina.

Lalo-Metau Idia Halusia

Ami taudia edia adavadia be nega momo idia hekwarahi, badina be idia be edia adavadia ida gabu daudaudia idia siaidia haraga. Reana unai idau gabudia ai edia lalodia idia metau, to Iehova ena hesiai hahinedia ese namo idia davaria diba, badina be Iehova ena Witness taudia kahirakahira 5 milion, tano 231 lalodiai, be Keristen ruma besena badana ta bamona bona tadikaka edia orea ta bamona. Gabu iboudiai idia davaridia diba.​—1 Petero 2:​17.

Susan be ena taoni ia rakatania haraga, ena adavana ida ami gabuna ta ai do idia noho totona. Ia be matamata abidadama lalonai, bona ena adavana ese ia doria Keristen gaukarana do ia rakatania totona. Ia gwau: “Maoromaoro lau be hebou lau lao. Unuseniai taihu haida ida ai helai hebou bona ai kiki hebou. Momokani, edia hebamo dainai lau haheauka diba.”

Ta be mai ena bamona lasi dainai bema ena lalona ia metau, sivarai namona ta ese ia hagoadaia lou. Glenys, taihu ta England amo, be ena adavana ida idau gabuna ta idia lao. Ia gwau: “Egu lalona ia metau bada neganai, guna lau danu be ami lalonai lau noho neganai lau diba hahinena ta ese ia tore henigu, ia gwau vanegai bapatiso ia abia, Iehova ena Witness taudia edia orea lalonai. Unai ese nega korikori ai lau ia hagoadaia.”

Jane be ena adavana ida idia lao Kenya. Unuseniai ia davaria ena be Keristen heboudia be ia diba lasi gadodia ai idia karadia to idia hamauria. Ia gwau: “Lau diba Iehova ia ura do lau lao henidia. Egu tadikaka edia hebamo be muramura namona bamona. Lau idia abia dae, bona mamina lau abia ai be famili ta bamona.”

Jane mo sibona lasi, to ma momo danu idia davaria lauma dalanai idia be mai edia varavaradia, guna idia diba lasi taudia unai!​—Mareko 10:​29, 30.

Badu Vairanai Idia Gini Auka

Iesu ia gwau: “Umui emui lalona dekenai umui gwau lasi, maino lau mailaia tanobada dekenai totona lau mai. Maino lau mailaia lasi, to tuari kaia sibona.” (Mataio 10:34) Anina be ruma besena ta lalonai danu, ta ese “tuari kaia” do ia gaukaralaia haraga reana. Iesu be ma ia gwau: “Ruma taudia ese ruma ena biaguna do idia badu henia.” (Mataio 10:36) Unai be momokani, ta ena adavana ese hereva momokani ia badu henia neganai.

Diane be Iehova ena Witness taudia ida Baibel idia stadilaia matama neganai, ena adavana, ami tauna ta, be ia badu dikadika. Diane ia gwau: “Unai be aisi badana ta ese ai ruaosi ia hapararaia bamona. Guna aiemai headava ai moalelaia, bena karaharaga moale ia ore.” Vadaeni, edena bamona ia haheauka? Ia gwau: “Egu lalona ai egu abidadama lau goadalaia, bona egu lalona lau hadaia auka. Inai danu, Iehova bona ena lauma ese lau idia durua.” Diane ese peroveta tauna Daniel ena haheitalai ia laloa.

Babulono ai, aniani be Daniel idia henia, unai aniani be Dirava ena hesiai tauna ta ese ia ania be mai taravatuna. Daniel ese ‘ena lalona ia hadaia vadaeni ia be pavapava ena aniani gaihodia amo sibona do ia hamiroa lasi.’ Mai ena boga-auka ida ia ese “hesiai tauna badana ia noia loulou, do ia gwau maoro, ia be sibona do ia hamiroa lasi”! Unai dainai Iehova ese ia hanamoa.​—Daniel 1:​8, 9, 17.

Unai hegeregerena, bema hahine ta ena adavana ese ia haduaia kongregesen heboudia do ia lao henidia lasi, edena bamona do ia karaia be namo? Jane ia gwau: “Egu adavana ese lau ia koua toho neganai, lau manoka lasi. . . . Lau diba namona be do lau hahedinaraia hebou be anina bada lau dekenai.” Hebou ia lao henidia loulou lalonai Iehova ese ia hanamoa.

Glenys ia gwau: “Ena be egu adavana ese lau ia koua toho, hebou do lau lao henidia lasi totona, to lau lao. Ruma lau lou henia negadiai, nega haida lau ia botaia, nega haida ia hereva lasi.” To Glenys ia guriguri loulou bona ia haheauka. Inai danu, kongregesen ena elda taudia rua be ia danu idia guriguri loulou; unai ese ia hagoadaia momokani, hebou do ia lao henidia loulou totona.​—Iakobo 5:​13-15; 1 Petero 2:23.

Reana ami tauna ta ena biaguna ese idia doria iena adavana do ia koua, sivarai namona do ia haroro lasi. Diane ese ia davaria ia laloa bada gaudia be ena adavana ia haheitalaia be namo. Ia gwau: “Egu lalona ia hegeregere, egu haroro gaukarana dainai hisihisi do lau ania.” Iena lalohadai be aposetolo edia lalohadai hegeregerena vaitani! (Kara 4:​29, 31) To ia haroro negadiai ia naria namonamo. Ia gwau: “Lau be hahine haida lau boiridia kofi do ai inua hebou, bena Hereva Momokani bukadia lau henidia.”​—Mataio 10:16; 24:14.

Idia Kamonai Henidia, to Idia Manoka Lasi

Ena be edia headava idia lalo-hekwarahilaidia, to Keristen hahinedia ese nega vaira idia naria bona Iehova dekenai idia tabekau dainai, idia laloa maoromaoro diba. Edia adavadia idia durudia, to edia abidadama idia negea lasi. Unai dala amo Petero ena sisiba idia badinaia; ia gwau: “Hahine taudia e, emui adavana do umui kamonai henia.” (1 Petero 3:1) Jane ese inai sisiba ia badinaia dalana mani oi laloa. Ia gwau: “Egu adavana ese ia hamaorogu egu ura gaukarana amo iena gaukara do lau hadikaia lasi; unai dainai, ia do lau durua daladia lau tahudia.”

Unai hegeregerena, Keristen hahinedia haida edia lalodia be hegeregere edia adavadia ida pati o aria do idia lao henia, gau tamona edia lalodia idia hadaidia, edia abidadama hadikaia karana ta do idia karaia lasi. Jane ese ena adavana ia hamaoroa ena lalona ia hegeregere do ia bamoa, to ia ura lasi do ia hahemaraia. “Lau diba nega haida idia ura hebou taudia iboudiai do idia gini bona uaina do idia inua hebou, tau ta hanamolaia totona. Lau diba vadaeni Iehova sibona ita badinaia be namo, bona unai kara be hemataurai karana mo sibona lasi. Egu adavana ena lalona ia parara hemarai be reana do ia vara, unai dainai ia gwau: ‘Oi lao lasi.’ Vadaeni, lau lao lasi.”

Glenys ese ena adavana ia bamoa lao, to opesa taudia aniani patana ena kwarana ai idia helai be ia raraidia, bena unai kara idia karaia gwauraia neganai, mei rumana ia lao! Oibe, unai hahine ese edia adavadia kamonai henidia daladia idia tahudia, to nega ta idia kara kerere lasi.

Hereva Lasi Neganai Ia Veria

Yvonne be ena lalona ai ia gwau: “Bema egu kara lau hanamoa, egu adavana do ia diba hereva momokani ese lau ia haidaua noho.” Unai dainai Ruma Bese bukana ena karoa ta ladana “Ena Adavana ese Ia Lalokau Henia Bada Hahinena” be ia duahia loulou.a “Kahana ta, iena kwarana be ‘Taitai Momo Hahine Bona Hereva Momo Hahine,’ be lau laloa namonamo! To egu adavana lau hereva henia toho negadiai, emai headava be ma ia dika ia lao.” To, gabeai, 1 Petero 3:1 ena sisiba ia badinaia neganai, unai dala amo ena adavana ia veria, bena ia danu ese Iehova ena hesiai ia lao henia.

Keristen hahinedia ese edia famili bema idia naridia namonamo, unai ese Keristen tomadihona do ia hahairaia haida vairadiai. Diane ia gwau: “Hereva momokani lau hahairaia bada toho. Hebou lau lao henidia negadiai, egu adavana ena lalona ia hisihisi badina ia be sibona ia noho; unai dainai natugu lau sisiba henidia, ruma do ai lou henia negadiai edia kara do idia naria namonamo, bona unai negadiai lau ese danu iena hesiai lau lao henia badabada.” Unai edia lalokau karadia dainai ena adavana be metaira ia helalo kerehai.

Iehova ena hesiai taudia ma haida idia heduru diba danu. Jane ia gwau, Kenya ai ena adavana ese Witness misinari taudia edia hebamo ia moalelaia. “Idia tura henia, futbolo idia kikilaia, bona edia heabidae karadia be bada. Nega haida, misinari taudia ruma idauidau ai ese idia boirimai idia ida do ai aniani hebou.” Gabeai ena adavana ia gwau: “Jane ena abidadama be dala idauna amo lau laloa matama. Ena turana be diba momo taudia, gau idauidau idia herevalaidia diba taudia.” Unai hegeregerena, Diane ena adavana ese ena lalohadai hereva momokani dekenai ia haidaua danu. Ena motuka be dala ai ia dika neganai, Witness uhauna ta ese ia durua. Ia gwau: “Unai lau laloa bada.”

To, momokani, haida ese edia adavadia idia veridia diba lasi. Unai hahine mai edia kamonai be Iehova ese ia durudia do idia haheauka totona. (1 Korinto 10:13) Glenys ena hahegoada herevana idia dekediai be inai: “Inai oi laloaboio lasi: Iehova be headava ia havaraia Diravana, bona ia ura headava taudia ese edia adavadia do idia badinadia. Unai dainai, herevana emu adavana be dahaka do ia karaia . . . to Iehova ese oi do ia naria, do oi hekwakwanai lasi.” Ena be ena adavana ese Iehova ia do tomadiho henia lasi, to ena lalohadai ia bona hereva momokani dekediai be ia namo ia lao.

‘Hadohado mai Taitai ida; Geigei mai Moale Ida’

Momokani, hari Keristen hahinedia be edia lalodia idia hadaidia Iehova ena hesiai do idia lao henia. Bema emu noho be edia hegeregerena, oi danu be unai bamona oi karaia. Inai hereva mani oi laloa: “Iehova, emu Dirava, garina oi gari; iena hesiai oi lao henia; ia oi badinaia.”​—Deuteronomi 10:20.

Salamo torea tauna ia gwau: “Uhe hadodia totona mai ena taitai ida ia raka lasi tauna be mai ena moale boiboina ida ena ruma do ia lou henia, ena uiti do ia huaia lao.” (Salamo 126:6) Witness hahinena ta ia gwau: “Hereva momokani be emu adavana oi haheitalaia toho negadiai oi taitai momo, . . . to dokona ai oi boiboi mai emu moale ida, badina be, herevana ia abia dae eiava lasi, to Iehova ese oi ia hanamoa, emu hekwarahi dainai.”

Ena be edia adavadia ese idia agenisi henidia, to unai hahine be Iehova ena hesiai idia lao henia noho mai edia kamonai ida. Ita hanamodia, ita durudia, bona ita lalokau henidia be namo. Eda ura be edia lalohadai aukana ai do idia gini noho!

[Footnotes]

[Picture on page 28]

Stadi mai guriguri ida ese Keristen lalohadaina ia ha-aukaia