Basileia Harorolaia Taudia be Tanobada Ibounai Lalonai Idia Gaukara
“Lauegu ladana do umui gwauraia hedinarai . . . ia lao bona tanobada ena kahana ibounai.”—KARA 1:8.
1. Iesu ia gwau ena hahediba taudia ese dahaka sivarai be iseda negai do idia harorolaia?
IEHOVA be ena Natuna tanobada ai ia siaia mai do ia karaia gaukarana be Iesu ese ia herevalaia neganai, ia gwau: “Lau be Dirava ena Basileia ena Sivarai Namo hanua idauidau dekenai do lau harorolaia.” (Luka 4:43) Ma ia gwau, ia be mai ena pavapava siahuna ida do ia lou mai murinai, ena hahediba taudia ese “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”—Mataio 24:14.
2. (a) Dahaka dainai Basileia sivaraina be gabu iboudiai ita harorolaia be gau badana? (b) Dahaka henanadai do ita laloa be namo?
2 Dahaka dainai Dirava ena Basileia ena sivarai be mai anina bada? Dahaka dainai gabu iboudiai ita harorolaia be namo? Badina be Mesia ena Basileia ese Iehova ena lohia siahuna guba ai bona tanobada ai do ia hamomokania. (1 Korinto 15:24-28) Hari Basileia amo, Iehova ese Satana ena tanobada dikana ena davana do ia henia, bona iena gwauhamata, tanobada besedia iboudiai do ia hanamodia gwauhamatana, be do ia hamomokania. (Genese 22:17, 18; Daniel 2:44) Basileia harorolaia gaukarana amo, Iehova ese haida ia abidia hidi bena ena lauma amo ia horodia, idia danu ese ena Natuna ia henia gauna be do idia abia. Bona Basileia harorolaia gaukarana amo taunimanima ia hapararadia noho. (Mataio 25:31-33) Iehova ia ura bese iboudiai taudia be iena ura do idia diba. Ia ura dala do idia davaria, mauri do idia abia hidi, iena Basileia henunai do idia noho totona. (Ioane 3:16; Kara 13:47) Oi ese inai Basileia oi harorolaia momo, a?
Idau Bese Edia Nega Dokona Idia Naria
3 Lagani 1880 ai, Charles Taze Russell, Watch Tower magasin karaia gaukarana naria tauna ginigunana, be United States ena kahana ta ai ia laolao, taunimanima ia hagoadadia grup do idia karadia, Baibel do idia stadilaia totona. Ia harorolai henidia herevana ena sinado be “Dirava ena Basileia Gaudia.” Watch Tower magasin gunadia ese idia hahedinaraia, Bible Student taudia (Iehova ena Witness taudia unai) be idia diba, do idia hegeregere Dirava ena Basileia lalonai edia ahudia do idia abidia totona, namona be Basileia do idia tahua guna, bona edia goada, edia diba, bona edia moni be Basileia gaukarana lalonai do idia gaukaralaidia mai edia ura ida. (Mataio 13:44-46) Edia maduna ta be Dirava ena Basileia ena sivarai namona do idia harorolaia. (Isaia 61:1, 2) Idau bese edia nega be lagani 1914 ai ia do ore lasi neganai, unai gaukara ede badana idia karaia?
4. Lagani 1914 vairanai Bible Student taudia ese buka bona pepapepa hida idia hariharilaidia?
4 Lagani 1870 amo ela bona 1914, Bible Student taudia be momo lasi. Lagani 1914 ai, 5,100 mo sibodia idia haroro. To edia haroro be dahaka bada! Watch Tower ginigunana idia printaia bena lagani rua sibona idia ore murinai, lagani 1881 ai, buka ta ladana Food for Thinking Christians (Aniani, Idia Laloa Namonamo Keristen Taudia Edia) idia hariharilaia. Hua haida lalodiai buka 1,200,000 idia hariharilaidia. Lagani haida murinai, pepapepa milion milion be lagani ta ta iboudiai idia hariharilaidia, gado idauidau momo ai.
5. Pioneer taudia gunadia idia hahedinaraia edia lalodia be edena bamona?
5 Lagani 1881 ai, haida ese gaukara ta, hari ita gwauraia pioneer gaukarana (ful-taim haroro gaukarana), idia karaia matama. Idia haida idia raka eiava basikele ai idia laolao, edia tano edia kahana kahirakahira iboudiai lalodiai idia haroro. Ma haida be tano idaudia, hegeregere, Finland, Barbados, bona Burma (ena ladana matamatana be Myanmar) idia lao, unuseniai sivarai namona idia harorolaia mai edia lalo-goada ida, Iesu Keriso bona ena aposetolo hegeregeredia.—Luka 4:43; Roma 15:23-25.
6. (a) Tadikaka Russell be edeseni ia laolao, Baibel ena hereva momokani harorolaia totona? (b) Dahaka danu ia karaia, Idau Bese Edia Nega dokona vairanai sivarai namona be idau tanodia ai do idia harorolaia totona?
6 Tadikaka Russell be tano idauidau ai ia laolao, hereva momokani harorolaia totona. Canada ia lao loulou; Panama, Jamaica, bona Cuba ai ia haroro; nega 12 ia lao Europe; bona nega ta tanobada ia gegea. Haida ia siaidia, tano idaudia ai sivarai namona harorolaia gaukarana do idia hamatamaia bona do idia gunalaia totona. Lagani 1895 bamona ai Adolf Weber be Europe ia siaia lao, bena ia be Switzerland ai ia haroro, bena unuseni amo ia be France, Italy, Germany, bona Belgium ia lao, haroro totona. E. J. Coward be Caribbean ia siaia lao. Lagani 1912 ai, Robert Hollister be Orient ia siaia lao. Pepapepa be gado idauidau 10 ai idia printadia, bena India, China, Japan, bona Korea ai unai tano taudia haida ese milion momo idia hariharilaidia. Unai neganai bema oi noho, emu lalona ese oi do ia doria, emu hanua ai bona gabu idauidau ai sivarai namona do oi harorolaia totona, a?
7. (a) Niuspepa be edena bamona idia gaukaralaidia, taunimanima momo haroro henidia totona? (b) “Photo-Drama of Creation” be dahaka, bona lagani tamona ai hida ese idia itaia?
7 Idau bese edia nega ena dokona be kahirakahira neganai, Tadikaka Russell ena haroro herevadia be niuspepa amo idia halasidia. Dirava ena palani bona do ia hagugurua momokani dalana ia gwauraidia momo, lagani 1914 ia gwauraia momo lasi. Unai hereva be niuspepa idauidau 2,000 bamona ai nega tamona idia halasidia loulou, bona taunimanima 15,000,000 ese idia duahidia diba. Bena January 1914 ai, Society ese “Photo-Drama of Creation” ia hahedinaraia matama. Ia be mai ena kahana hani, kahana ta ta be hora rua lalodiai idia hahedinaraia. Ia lalonai, Baibel ena hereva momokanidia, Dirava ese gau iboudiai ia karadia negana amo ela bona Iesu ena Lohia Laganidia 1,000 negana herevadia, be idia hahedinaraidia. Lagani tamona lalonai, taunimanima 9 milion mai kahana ese idia itaia, North America, Europe, Australia, bona New Zealand ai.
8. Lagani 1914 ia do ore lasi neganai, Bible Student taudia be tano hida lalodiai idia haroro vadaeni?
8 Lagani 1914 ena dokona kahana ai, sivarai namona harorolaia taudia goadadia ese Dirava ena Basileia ena sivarai be tano idauidau 68 ai idia harorolaia vadaeni.a To, unai be matamana mo!
Ia Gini Vadaeni Basileiana Idia Harorolaia Goadagoada
9 Lagani 1919 ai, Bible Student taudia be Cedar Point, Ohio, ai idia hebou neganai, Tadikaka Rutherford, Watch Tower Society ena presiden, be ia gwau: “Mesia ena basileia mai hairaina harorolaia gaukarana be iseda gaukara korikorina, guna bona hari danu.” Lagani 1922 ai, Cedar Point ena hebouhebou iharuana ai, Tadikaka Rutherford ia gwau Idau Bese Edia Nega dokona ai, lagani 1914 ai, ‘Pavapava mai hairaina ese siahu ia abia sibona ena bona ia lohia matamaia.’ Bena, hebou taudia ia nanadaidia, ia gwau: “Umui abia dae Pavapava mai hairaina ia lohia matamaia vadaeni, a? Vadaeni, atai herea Diravana ena natudia e, umui lao! . . . Inai hereva umui harorolaia gabu iboudiai. Namona be tanobada do ia diba Iehova be Dirava bona Iesu Keriso be pavapava edia Pavapava bona lohia edia Lohia. Inai be dina badana. Kamonai, Pavapava ia lohia! Umui be iena gwaukau taudia.”
10, 11. Reidio, motuka, bona kadi badadia be edena bamona idia gaukaralaidia, Basileia sivaraina harorolaia totona?
10 Unai hebouhebou edia nega amo ema bona hari, lagani 70 mai kahana idia ore vadaeni, bona kahirakahira lagani 80 lalodiai Iehova ese ena lohia siahuna ia hahedinaraia, ena Natuna, Mesia, ena Basileia amo. Baibel ese ia gwauraia gaukarana, Iehova ena Witness taudia edia, be ede badana idia karaia vadaeni? Inai gaukara ai oi be mai emu ahuna a?
11 Lagani 1920 murinai, reidio amo Basileia ena sivarai be gabu momo ai idia harorolaia. Lagani 1930 murinai, distrik hebouheboudia edia hereva, Basileia ese tanobada do ia hanamoa herevadia, be reidio steiseni bona telefon amo idia halasidia tanobada hegegemadai. Motuka mai edia laud-spika idia gaukaralaidia, Baibel herevadia be taoni ariaradia ai halasidia totona. Bena, lagani 1936 ai, Glasgow, Scotland ai, kadi badadia mai revarevadia be taoni lalonai idia hahedinaraidia loaloa, pablik haroro edia sinado hahedinaraidia totona. Unai neganai, Witness taudia be momo lasi neganai, unai dala idauidau ai idia gaukara be namo, taunimanima momo haroro henidia totona.
12. Buka Helaga ena hereva hegeregerena, haroro dalana namona ta be dahaka?
12 Momokani, Baibel ese ia hahedinaraia goevagoeva ita Keristen taudia ta ta ibounai be mai eda maduna do ita haroro. Niuspepa o reidio mo sibodia amo do ita karaia be hegeregere lasi. Keristen taudia daha daha mai edia kamonai—tatau, hahine, bona memero kekeni—ese unai maduna idia abia dae vadaeni. Unai dainai, ruma ta ruma ta ai haroro gaukarana be Iehova ena Witness taudia edia toa ta.—Kara 5:42; 20:20.
Tanobada Ibounai Lao Henia
13 Baibel ia gwau Basileia ena sivarai be tanobada ibounai do idia harorolaia. Iehova ena Witness taudia be unai idia diba dainai, idia haida idia laloa namonamo idia be gabu idaudia ai edena bamona do idia haroro diba.
13, 14. (a) Dahaka dainai Witness taudia haida be taoni idaudia eiava tano idaudia idia lao haroro totona? (b) Haida be sibodia edia tano taudia idia lalodia bada karana ese sivarai namona harorolaia gaukarana edena bamona ia durua?
14 Taunimanima momo be edia hanua korikoridia idia rakatanidia murinai hereva momokani idia dibaia. Ena be tano idauna idia lao be reana moni momo davaria totona, to unai ia hereaia gauna idia davaria, bena haida idia ura edia tano o hanua korikoridia do idia lou henidia, hereva momokani do idia hariharilaia totona. Lagani 1900 murinai, sivarai namona harorolaia gaukarana be unai dala amo ia bada ia lao, Scandinavia, Greece, Italy, Eastern Europe tanodia, bona ma tano haida lalodiai danu. Hari inai negai danu unai dala amo ia bada ia lao.
15. Edia lalohadai be Isaia 6:8 ena hereva hegeregerena taudia haida be lagani 1920 bona 1940 padadiai dahaka idia karaia?
15 Ma haida ese Dirava ena Hereva ena sisiba be edia mauri ai idia badinaia dainai, tano idaudia idia lao diba. Idia ta be W. R. Brown (iena ladana idia hatoa “Baibel Brown”). Sivarai namona harorolaia gaukarana habadaia totona, lagani 1923 ai Trinidad ia rakatania, ia lao West Africa. Lagani 1930 murinai, Frank bona Gray Smith, Robert Nisbet, David Norman, bona ma haida ese Basileia sivaraina idia laohaia Africa konena ena ist kahana. Ma haida be South America ai idia haroro. Lagani 1920 murinai, George Young, Canada tauna, ese haroro gaukarana ia karaia, Argentina, Brazil, Bolivia, Chile, bona Peru ai. Juan Muñiz, Spain ai ia haroro tauna, be Argentina, Chile, Paraguay, bona Uruguay ia lao, haroro totona. Idia iboudiai edia lalohadai be Isaia ena hegeregerena, ia gwau: “Lau inai! Lau oi siaia.”—Isaia 6:8.
16. Lagani 1939 vairanai edena gabu ma haida ai idia haroro danu?
16 Sivarai namona be gabu daudaudia ai idia harorolaia. Witness taudia ese bouti idia taridia idia lao Newfoundland ena kone hanuadia, Norway konena ela bona Arctic, Pacific motumotudia, bona sisima edia hetu gabudia Southeast Asia ai.
17. (a) Lagani 1935 ai Witness taudia be tano hida lalodiai idia haroro? (b) Dahaka dainai unai gaukara be unai neganai ia do ore lasi?
17 Hoa gauna be inai: Lagani 1935 ai Iehova ena Witness taudia be tano 115 ai idia haroro goadagoada, bona ma tano 34 ai nega ta ta idia lao haroro o pos opesi amo buka idia siaidia. To gaukara ia do ore lasi. Unai lagani ai Iehova ese edia matadia ia kehodia, bena iena palani, “hutuma bada herea” do ia gogodia bena iena tanobada matamatana lalonai do idia vareai palanina, idia lalo-pararalaia. (Apokalupo 7:9, 10, 14) Haroro gaukarana bada ia do noho!
18. Gilead Sikuli bona Hesiai Gaukara Hadibaia Sikulina ese Basileia harorolaia gaukarana be edena bamona idia durua?
18 Tanobada Ibounai Tuarina Iharuana negana lalonai, ena be tano momo lalodiai Iehova ena Witness taudia edia buka eiava edia gaukara idia taravatua, to Watchtower Bible School of Gilead idia kehoa, misinari taudia ai idia lao gwauraia taudia idia hadibadia, Basileia harorolaia gaukarana tanobada hegegemadai do idia karaia totona. Unai nega amo ema bona hari, Gilead ai idia sikuli taudia be tano 200 mai kahana ai idia gaukara vadaeni. Buka idia hariharilaidia sibona lasi, to Baibel stadi idia naridia, kongregesen idia haginidia, bona Dirava ena orea ena gaukara naria dalana be haida idia hadibalaidia. Vanegai, elda bona hesiai taudia, Hesiai Gaukara Hadibaia Sikulina ai idia kwalimu taudia, ese unai gaukara idia durua, tano badadia 6 ai. Badi aukana idia atoa vadaeni, ia latanai orea do ia tubu daekau diba.—Timoteo Iharuana 2:2 itaia.
19. Iehova ena hesiai taudia hida be heduru ai idia dabu bada gabudia idia lao haroro totona?
19 Ma haida danu be gabu matamatadia ai do idia haroro diba a? Lagani 1957 ena distrik hebouheboudia ai, headava lasi taudia bona ruma besedia danu—lo Witness taudia unai—idia ha-uradia, heduru ai idia dabu bada gabudia do idia lao, unuseniai edia hesiai gaukarana do idia karaia. Unai be aposetolo Paulo ese ia kamonaia boiboina bamona. Dirava ese ia hanihia, bena nihi ai tau ta ese ia noia, ia gwau: “Makedonia kahana dekenai oi mai, oi durua ai.” (Kara 16:9, 10) Bena Witness taudia 1,000 be Ireland bona Colombia idia lao; handred handred be tano idaudia idia lao. Daha daha be sibodia edia tano ai heduru ai idia dabu bada gabudia idia lao henidia.—Salamo 110:3.
20. (a) Lagani 1935 amo ema bona hari, Mataio 24:14 ese ia gwauraia gaukarana ede badana idia karaia vadaeni? (b) Vanegai laganidia lalodiai, gaukara be edena bamona ia haharagaia?
20 Iehova ese ena orea taudia ia hanamodia dainai, Basileia harorolaia gaukarana ia bada ia lao haraga. Lagani 1935 amo ema bona hari, pablisa taudia edia momo be nega 80 amo idia habadaia, bona pioneer taudia edia momo be nega 134 amo idia habadaia. Lagani 1936 ai taunimanima edia ruma ai Baibel stadi karaia karana idia hamatamaia. Hari, hua ta ta iboudiai Baibel stadi 4,500,000 mai kahana idia karadia. Lagani 1935 amo ema bona hari, hora 15 milion mai kahana lalodiai Basileia sivaraina harorolaia gaukarana idia karaia. Sivarai namona be tano 231 ai idia harorolaia loulou. Eastern Europe bona Africa tanodia ai sivarai namona harorolaia dalana ia hekeho neganai, intenesenel hebouheboudia amo Basileia sivaraina be taunimanima vairadiai idia gwauraia hedinarai. Iehova be gunaguna Isaia 60:22 ai ia peroveta hegeregerena, ia ese ‘ena nega korikori ai gaukara ia haharagaia.’ Ita be mai eda ahuna unai gaukara ai be hahenamo badana ita dekenai, ani?
Sivarai Namona be Taunimanima Iboudiai Harorolai Henidia
21 Lohiabada ia do gwau lasi inai gaukara ia ore vadaeni. Taunimanima daha daha ese tomadiho momokanina idia do abia dae noho. Unai dainai ita henanadai, Iehova ena haheauka dainai inai gaukara totona ia henia negana be ita gaukaralaia namonamo eiava?—2 Petero 3:15.
21, 22. Ita ta ta be dahaka dahaka ita karaia diba, iseda haroro gaukarana ese anina bada do ia havaraia totona?
22 Haida mo be mai edia dala, gabu idaudia, nega ta ta sibodia ai idia haroro gabudia, do idia lao henidia. To dala idaudia idia hekeho negadiai, oi haroro eiava? Oi ida idia gaukara hebou taudia o emu tisa o sikuli ai oi bamodia taudia be oi haroro henidia a? Bema dina neganai taunimanima momo oi davaridia lasi badina be moni gaukarana idia karaia dainai, adorahi ai oi vadivadi henidia toho a? Bema taravatu o sekuriti dainai ruma haida oi lao henidia diba lasi, unai ruma idia noholaidia taudia be telefon o revareva amo haroro henidia daladia oi tahudia a? Kamonai taudia oi davaridia murinai, oi lou henidia bona oi hamaorodia emu lalona be hegeregere Baibel amo do oi stadi henidia, a? Emu hesiai gaukarana oi hagugurua noho a?—Kara 20:21; 2 Timoteo 4:5 itadia.
23. Iehova ese iseda hesiai gaukarana ia itaia lalonai, dahaka ita hahedinaraia goevagoeva be namo?
23 Namona be ita ibounai ese iseda hesiai gaukarana ita karaia namonamo, unai amo do ita hahedinaraia goevagoeva ita laloa hari inai nega badana ai Iehova ese ita be iena Witness taudia ai ia halaoa be hahenamo badana ta. Inai hahenamo danu do ita abia be namo: Iehova ese inai tanobada dikana ena davana do ia henia bona Iesu Keriso ena Lohia Laganidia 1,000 do ia hamatamadia neganai, unai be iseda matana amo do ita itaia!
[Footnotes]
a Inai namba be lagani 1990 bamona ai tanobada be tano idauidau ai idia haria dalana hegeregerena.
Inai Oi Laloa Lou
◻ Dahaka dainai Basileia sivaraina harorolaia gaukarana be mai anina bada?
◻ Lagani 1914 vairanai, sivarai namona harorolaia gaukarana be ede badana idia karaia?
◻ Basileia ia gini murinai, haroro gaukarana ede badana idia karaia vadaeni?
◻ Dahaka ese iseda hesiai gaukarana ena anina do ia habadaia reana?
3. (a) C. T. Russell ese haida ia hagoadadia Baibel stadilaia totona grup do idia karadia neganai, dahaka hereva maorona ia harorolaia? (b) Unai Bible Student taudia idia diba Basileia be edena bamona idia laloa be namo?
9. Cedar Point ai, Tadikaka Rutherford ese edena bamona ia hagoadadia, Basileia harorolaia gaukarana do idia goadalaia totona?
[Box on pages 16 and 17]
IEHOVA ENA WITNESS TAUDIA—Dirava Ena Basileia Harorolaia Taudia
Lagani 1993-94 lalodiai, tanobada hegegemadai, hebouhebou handred momo ai, buka matamatana ta idia halasia; ena ladana be Jehovah’s Witnesses—Proclaimers of God’s Kingdom (Iehova Ena Witness Taudia—Dirava Ena Basileia Harorolaia Taudia). Ia lalonai be idia edia sivarai. Ena rau iboudiai be 752, bona laulau namodia 1,000 mai kahana be ia lalonai, tano idauidau 96 amo idia gogodia. Lagani 1993 dokonai, gado 25 ai idia hahanaia vadaeni, bona gado ma haida ai idia hahanaia noho.
Dahaka dainai hari buka be mai anina bada? Badina be vanegai laganidia lalodiai taunimanima milion rua bamona be Iehova ena Witness taudia ai idia lao. Namona be idia iboudiai be edia orea ena sivarai do idia diba. Inai danu, edia haroro bona edia tomadiho be bese idauidau lalodiai idia vareailaidia, bona taunimanima idauidau ese idia abidia dae vadaeni. Unai dainai taunimanima momo ese Witness taudia edia hahediba herevadia sibodia lasi to edia orea ena matamaia dalana, ena sivarai, ena haheaua dalana, bona idia tahudia gaudia danu idia henanadailaidia. Idau taudia haida ese edia sivarai idia torea vadaeni, to idia haida ese edia sivarai idia mogea. Iehova ena Witness taudia sibodia be edia sivarai hari inai negai idia diba momo, taunimanima oredia be unai idia diba sisina. Hari buka torea taudia ese sivarai korikorina idia torea toho, hereva haida idia hunidia toho lasi. Keriso ena lou mai toana ena kahana ta, Mataio 24:14 ese ia gwauraia gauna, be lagani 1914 amo ema bona hari ia guguru dalana idia gwauraia. Unai gaukara idia goadalaia taudia sibodia be ena sivarai ibounai idia gwauraia goevagoeva diba.
Buka ena kahana badadia 7 be inai:
Kahana 1: Iehova ena Witness taudia edia matamana sivaraina ia gwauraia, bona edia sivarai, lagani 1870 amo ela bona 1992, danu.
Kahana 2: Idia abidia dae herevadia idia vara dalana ia gwauraia; unai hereva dainai idia be idau, tomadiho oreadia oredia hegeregeredia lasi.
Kahana 3: Edia orea ena oromana ia gwauraia. Edia kongregesen heboudia bona distrik hebouheboudia edia sivarai ia gwauraia, bona edia Kingdom Hall, Assembly Hall, bona Baibel bukadia printadia rumadia haginidia dalana danu. Ia hahedinaraia, Iehova ena Witness taudia be mai edia ura-heni ida Dirava ena Basileia idia harorolaia bona nega dikadia ai idia heduru heheni mai edia lalokau ida.
Kahana 4: Dirava ena Basileia ena sivarai be tano badadia bona motumotu daudaudia idia laohaia dalana ia gwauraia. Lagani 1914 ai tano 43 ai idia haroro, to lagani 1992 ai tano 229 ai idia haroro! Unai gaukara idia karaia taudia edia sivarai ese iseda lalodia idia hamoaledia.
Kahana 5: Basileia ena sivarai harorolaia gaukarana badana karaia totona, tano idauidau ai ruma idia haginidia bona masini idia hoidia, Baibel bona Baibel gwauraia bukadia be gado 200 mai kahana ai do idia printadia totona. Inai kahana ese unai ia gwauraia.
Kahana 6: Witness taudia ese hetoho danu idia davaridia—idia haida be idia goevadae lasi dainai, haida be tadikaka koikoidia dainai, bona ma haida be dagedage dainai idia vara. Dirava ena Hereva ese ita ia hadibaia unai do ia vara. (Luka 17:1; 2 Timoteo 3:12; 1 Petero 4:12; 2 Petero 2:1, 2) Inai kahana ese unai hetoho ia sivarailaidia, bona Iehova ena Witness taudia be edia abidadama dainai idia kwalimu daladia danu.
Kahana 7: Buka ena dokona kahana ese inai ia gwauraia: Dahaka dainai Iehova ena Witness taudia idia diba goevagoeva Dirava ese edia orea be momokani ia hakaua, bona dahaka dainai idia laloa edia orea bona idia ta ta danu do idia gima noho be namo.
Unai sibona lasi, to hari buka ena kahana ta be mai ena rau 50, ia lalonai be Iehova ena Witness taudia tanobada hegegemadai edia hedikwota bona edia brens rumadia edia piksa mai edia kala.
Bema English gado oi diba bona hari buka oi do duahia lasi, ta oi abia bona oi duahia be namo, badina be ia amo namo do oi davaria.
Idia Duahia Vadaeni Taudia Edia Hereva
Hari buka idia duahia vadaeni taudia edia lalohadai be dahaka? Haida be inai:
“Hereva momokani be mai ena manau ida ia badinaia oreana sibona ese buka mai ena hereva inai bamodia ia torea diba. Orea ena sivarai ia gwauraia goevagoeva, gau ta ia hunia lasi, bona taunimanima edia lalodia edia mamina ia laloa danu.”
“Ena hereva momokanidia dainai ena mamina be Kara bukana ena mamina bamona.”
“Ia be lalona veria bukana! . . . Orea ena sivarai ia gwauraia goevagoeva.”
Tau ta be buka ena kahana ta ia duahia ore murinai, ia gwau: “Lau hoa dikadika, kahirakahira lau tai. . . . Lau duahidia bukadia iboudiai ta ese egu lalona ia hamarerea lasi, inai buka ese ia hamarerea bamona.”
“Inai buka ese memero kekeni bona orea lalonai idia vareai matamata taudia edia abidadama do ia hagoadaia dalana lau laloa negadia iboudiai, egu lalona ia moale.”
“Nega ibounai lau ese hereva momokani lau laloa bada, to inai buka ese lau ia durua, inai do lau laloa bada totona: Iehova ena lauma helaga ese inai ibounai ia havaraia.”
[Picture on page 18]
Witness taudia be momo lasi neganai danu, taunimanima momo be Basileia sivaraina idia kamonai