Memero Kekeni E—Daika Ena Hahediba Herevadia Umui Badinadia?

“Nega gabeai tau haida ese Iesu badinaia kara do idia rakatania, . . . lauma dikadia edia hadibaia herevadia do idia abia dae.”​—1 TIMOTEO 4:1.

1. (a) Memero kekeni ese edena dala idia abia hidi diba? (b) Iehova ese ita be edena dala amo ia hadibaia?

INISENIAI memero kekeni dekenai idia henia henanadai be inai, Daika ena hahediba herevadia umui badinadia? Unai henanadai amo ia hedinarai dala rua idia noho umui abia hidi diba totona. Dirava ena hahediba herevadia do umui badinadia eiava lauma dikadia edia hahediba herevadia do umui badinadia. Iehova be iena Hereva, Baibel, bona tanobada dekenai idia haroro taudia ia gaukaralaidia taunimanima ia hadibadia totona. (Isaia 54:13; Kara 8:​26-39; Mataio 24:​45-47) Umui kamonai lauma dikadia be mai edia hahediba herevadia neganai, sedira umui hoa, a?

2. Hari inai negai, dahaka dainai lauma dikadia edia hahediba herevadia ita dadaraidia be gau badana?

² Aposetolo Paulo ia toretore, ia gwau: “Nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.” (1 Timoteo 4:1) Ita be “nega dokonai” ita noho dainai, bona Satana bona iena lauma dikadia be idia gaukara goadagoada dainai, namona be umui diba inai henanadai be mai anina bada, Daika ena hahediba herevadia umui badinadia? (2 Timoteo 3:​1-5; Apokalupo 12:​7-12) Satana bona iena lauma dikadia be mai edia aonega, bona hehuni karadia amo taunimanima idia koidia, unai dainai unai henanadai umui laloa namonamo be gau badana.​—2 Korinto 11:​14, 15.

Lauma Dikadia Bona Edia Hahediba Herevadia

³ Lauma dikadia be gunaguna Iehova ena aneru, to edia Havaraia Diravana dekenai idia gwau-edeede bona unai neganai idia be Satana durua taudia ai idia lao. (Mataio 12:24) Idia ura taunimanima idia hadikadia bona idia ura Dirava hesiai henia karana amo idia hakaudia oho. Unai idia karaia totona, lauma dikadia ese taunimanima idia gaukaralaidia bena unai taudia ese sibona ena namo tahua karana bona sihari kava karadia idia gwauraia namo, to Iehova ese unai bamona karadia ia gwauraia dika. (Petero Iharuana 2:​1, 12-15 itaia danu.) Mai edia kamonai anerudia be gabeai lauma dikadia ai idia lao dalana mani ita laloa, unai ese umui do ia durua edia hahediba herevadia bona unai hahediba herevadia idia gwauraia namo gaudia do umui diba totona.

4. (a) Noa ena negai, gwau-edeede aneru be tanobada dekenai idia diho mai ena badina be dahaka? (b) Abata ia vara neganai, aneru dikadia bona edia natudia dekenai dahaka ia vara?

⁴ Noa ena negai, aneru haida ese taunimanima edia natuna kekenidia idia raraidia bona idia ura henidia dainai, idia ese edia guba dagina idia rakatania bona tanobada dekenai idia diho mai. Unai kekeni idia adavaia bona idia havaraia natudia idia gwauraidia Nefilim. Aneru bona kekeni idia mahuta hebou be dika, unai gwau-edeede aneru edia kara unai hahine dekenai ena dika be gabeai Sodoma hanua dekenai memero bona tatau be idia mahuta hebou karana ena dika hegeregerena. (Genese 6:​1-4; 19:​4-11; Iuda 6, 7) Ena be aneru edia hahine bona edia natudia be abata ranuna lalonai idia mase, to unai aneru dikadia be edia tanobada tauanidia idia kokia bona guba dekenai idia giroa lao bona unuseniai Satana Diabolo bamoa lauma dikadia ai idia lao.​—2 Petero 2:4.

⁵ Vadaeni, gunaguna unai ia vara dainai, umui diba lauma dikadia edia kara be edena bamona, ani? Ena be taunimanima ese lauma dikadia idia itadia diba lasi, to idia be kara bodaga idia ura henia bona edia siahu dainai inai tanobada be sihari kava karadia amo ia honu. Ena be hari tanobada tauanina idia atoa diba lasi guna idia karaia hegeregerena, to tanobada dekenai aneru dikadia ese taunimanima idia hasiahua diba kara bodaga idia karaia totona, bena unai amo kara bodaga idia moalelaia. (Efeso 6:​11, 12) Lauma dikadia ese idia hahedinaraia toho Iehova ena taravatu mauri ena kara goeva bona kara maoromaoro dekenai be taunimanima idia koua momo bamona. Unai aneru dikadia ese sihari kava karadia idia gwauraia namo, mauri ena moale karadia idia gwauraia.

Lauma Dikadia Edia Hahediba Herevadia Habadaia Dalana

⁶ Lauma dikadia be koikoi dalana amo edia hahediba herevadia taunimanima dekenai idia hadibaia be ita hoalaia lasi, badina edia gunalaia tauna, Satana Diabolo, be unai dala amo Eva ia koia. Mani oi laloa lou, ia hereva henia be hegeregere ia ura durua totona. Satana ia gwau: “Momokani, uma gabu ena au huahua ta ania lasi taravatu Dirava ese ia atoa o lasi?” Bena mai koikoi danu Dirava ena hahediba herevana ia hadikaia toho, Eva dekenai ia gwau bema taravatu auna amo do ia aniani namo do ia davaria. Diabolo ia gwauhamata, ia gwau: “Umui ania neganai aonega do umui davaria, bona Dirava bamona do umui noho, kara namona bona kara dikana do umui diba.” (Genese 3:​1-5) Unai amo Eve ena lalona ia ania, oibe ia koia dainai Dirava dekenai ia gwau-edeede.​—2 Korinto 11:3; 1 Timoteo 2:​13, 14.

7. Lauma dikadia edia hahediba hereva koikoi amo dahaka ia vara, bona ita dekenai dahaka sisiba ia henia?

⁷ Danu, hari inai nega lalonai, taunimanima momo idia koidia. Lauma dikadia be aonega dalana amo sihari kava karadia idia gwauraia namo, unai dainai guna unai kara idia dadaraia taudia momo ese hari idia abia dae. Hegeregere, United States lalonai, taunimanima idia diba momo niuspepa sivarai ia torea hahine ta ese revareva ia davaria, idia ura diba headava lasi taudia idia mahuta hebou be ia namo eiava lasi, niuspepa dekenai haere ia torea, ia gwau: “Lau laloa egu lalohadai unai kara dekenai do lau haidaua diba lasi, to hari lau laloa mero bona kekeni idia ura headava neganai, namona be Saturday bona Sunday haida do idia lao gabu ta dekenai bona idia mahuta hebou, bena do idia diba gabeai idia noho hebou be ia namo eiava lasi.” Bena ma ia gwau: “Unai lau torea dainai lau hoa!” Ena be ia laloa unai be namo, to ia ese sihari kava karana ia gwauraia namo! Ia hedinarai goevagoeva, lauma dikadia edia hahediba herevadia ita hadibaia garina do ita naria namonamo be gau badana, namo lasi iseda lalohadai eiava kara amo Dirava ia gwauraia dika gaudia do ita badinaia.​—Roma 1:​26, 27; Efeso 5:​5, 10-12.

8. (a) Baibel lalonai “tanobada” ena anina be dahaka? (b) Daika ese tanobada ia lohiaia, bona Iesu ena hahediba taudia be edena bamona inai tanobada idia laloa be namo?

⁸ Namona be ita laloaboio lasi, Satana be “inai tanobada ena lohia.” Oibe, aposetolo Ioane ia gwau ‘Satana ese tanobada taudia ibounai ia gunalaia noho.’ (Ioane 12:31; 1 Ioane 5:19) Momokani, nega haida Iesu ese inai hereva “tanobada” ia gaukaralaia, taunimanima iboudiai ia gwauraidia unai. (Mataio 26:13; Ioane 3:16; 12:46) To, nega momo unai hereva “tanobada” ia gaukaralaia neganai, ena anina be Keristen kongregesen murimurinai idia gaukara hebou tanobada oreadia iboudiai. Hegeregere, Iesu ia gwau gau badana be iena hahediba taudia be “tanobada ena lasi” (kara maoromaoro lasi tanobada oreadia), bona idia be tanobada ena lasi dainai, tanobada ese idia do ia badu henidia. (Ioane 15:19; 17:​14-16) Danu, Baibel ma ia gwau Satana be inai tanobada ia biagua dainai tanobada tura henia karana ita dadaraia be gau badana.​—Iakobo 4:4.

9, 10. (a) Sihari kava urana ia havaraia gaudia haida be dahaka? (b) Tanobada ena moale karadia dekenai daika ena hahediba herevadia idia noho, bona edena dala amo ita diba?

⁹ Aposetolo Ioane ia sisiba, ia gwau: “Tanobada do umui ura henia lasi, bona tanobada ena gaudia danu do umui ura henia lasi.” Danu ia gwau: “Tanobada gaudia ibounai, tauanina ena ura dikadia, matabodaga ena ura dikadia, bona hekokoroku, inai gaudia be Tamana Dirava dekena amo idia mai lasi.” (1 Ioane 2:​15, 16) Inai oi laloa. Hari inai negai, tanobada dekenai sihari kava ena ura dikana ia havaraia gaudia be dahaka? (1 Tesalonika 4:​3-5) Inai tanobada ena miusik momo be edena bamona? California ena pulisi probation opesa hahine ta ia gwau: “Miusik ese oi ia hadibaia emu tama sina edia hereva do oi badinaia lasi totona, bona oiemu mauri lalonai oiemu ura hegeregerena do oi karaia totona.” Unai miusik amo idia hadibaia herevadia be edeseni amo idia mai, oi diba, a?

¹⁰ Inai oi laloatao, Satana be Eva dekenai hegeregere ia gwau: ‘Namo gaudia haida oi reaia. Namona be oiemu ura hegeregerena oi mauri. Dahaka be namo bona dahaka be dika oi sibona oi abia hidi. Dirava ena hereva oi kamonai henia be anina lasi.’ (Genese 3:​1-5) Unai bamona hereva be tanobada ena miusik momo lalodiai idia noho, ani? To lauma dikadia be miusik mo sibona amo taunimanima idia hadibaia lasi. Idia ese taunimanima hadibadia totona, bisinesi televisen program, muvini piksa, bona vidio idia gaukaralaidia. Edena bamona? Taunimanima hadibaia dalana be reidio, televisen, bona vidio amo, bona hereva bona kara amo idia hahedinaraia idia laloa Dirava ena taravatu kara maoromaoro dekenai be auka herea bona taunimanima edia moale idia koua. Sihari kava karadia idia hahedinaraia dalana amo taunimanima edia lalona idia veria idia ura henia totona.

11. Mauri ena kara dekenai, nega momo televisen amo dahaka idia hadibaia?

¹¹ Magasin ta ladana U.S. News & World Report ia gwau: “Lagani 1991 ai, [U.S.] ena TV kampani toi ese edia program ai sihari kava karadia 10,000 bona ma haida idia hahedinaraidia, taunimanima momo ese TV idia itaia horadia lalodiai. Tau mai adavana ida idia mahuta hebou karadia idia hahedinaraia bona headava lasi taudia idia mahuta hebou karadia danu, to headava lasi taudia edia kara idia hahedinaraia negadia be nega 14 amo headava taudia edia kara idia hahedinaraia negadia idia hanaia.” Lagani tamona lalonai taunimanima momo ese televisen idia itaia horadia lalodiai, nega 9,000 bona ma haida mahuta hebou karadia idia hahedinaraia, do oi gwau diba televisen ese dahaka hereva ia hadibaia, a? Barry S. Sapolsky, be ia heduru “Sex in Primetime Television: 1979 Versus 1989” ena ripoti ia torea totona, bona ia gwau: “Lagani momo ai memero kekeni ese lebulebu karadia eiava mahuta hebou karadia be TV ai bema idia itadia, unai lagani momo ai unai laulau momo herea ese do idia hadibadia mahuta hebou karana be moale karana​—bona ia dainai dika ta do ia vara lasi.” Daradara lasi gauna be inai: Tanobada ena moale karadia ese memero kekeni idia hadibaia taravatu idia noho lasi, sihari kava karadia be idia dika lasi, bona Dirava ia gwauraia dika mauri dalana idia badinaia neganai idia ese dika ta do idia davaria lasi.​—1 Korinto 6:18; Efeso 5:​3-5.

12. Dahaka dainai tanobada ena moale karadia edia siahu be bada memero kekeni dekenai?

¹² Tanobada ena miusik, muvini piksa, vidio, bona televisen be memero kekeni edia lalona veria totona idia karaia. Idia be lauma dikadia edia hereva idia halasia badabada! To unai be hoa gauna ita dekenai, a? Mani inai oi laloa. Bema tomadiho koikoi bona politik be Satana ena tanobada ena kahana ta​—bona ia hedinarai unai be momokani​—bema ita gwau tanobada ena moale karadia lalonai lauma dikadia edia siahu be lasi, unai be lalohadai kavakavana, ani? Umui memero kekeni e, umui gima noho, namo lasi “inai tanobada taudia edia kara bamona do umui karaia.”​—Roma 12:​2.

Sibomu Emu Kara Oi Tahua

¹³ Emu hereva amo sibona lasi, to danu emu kara amo oi hahedinaraia daika ena hahediba herevadia oi badinadia. (Roma 6:16) Unai dainai sibomu dekenai oi henanadai, ‘Egu lalohadai bona kara ese idia hahedinaraia tanobada ena moale kara bona ena hahediba herevadia ese egu noho dalana idia biagua, a? Lauma dikadia edia hahediba herevadia ese egu noho dalana idia biagua, a?’ Heduru oi abia unai henanadai do oi haerelaidia totona, namona be emu nega bona goada ena bada Baibel oi stadilaia, Keristen heboudia dekenai oi lao, bona ma haida dekenai Dirava ena Basileia oi kikilaia totona, bona emu nega bona goada ena bada TV raraia, miusik kamonai henia, spot gadara oi karaia, eiava unai bamona kara ma haida oi karaia totona, oi hahegeregeredia, ani? Oibe​—oiemu mauri oi haboioa diba dainai​—gau badana be sibomu emu kara oi tahua mai emu momokani ida.​—2 Korinto 13:5.

14. Dahaka ese iseda goada lauma dalanai ia hadikaia diba, bona dahaka ita laloa namonamo be namo?

¹⁴ Oi diba vadaeni, aniani ese oiemu tauanina do ia hagoadaia eiava do ia hadikaia. Unai hegeregerena, emu darana bona emu lalona dekenai oi atoa gaudia ese lauma dalanai oi idia hagoadaia eiava oi idia hadikaia. (1 Petero 2:​1, 2) Oi ura henia gaudia dekenai, ena be oi sibona oi koia diba, to iseda Hahemaoro Tauna, Iesu Keriso oi koia diba lasi. (Ioane 5:30) Sibomu dekenai inai henanadai oi henia, ‘Iesu be tanobada ai bema ia noho bona egu ruma lalonai bema ia raka vareai, lau kamonai henia miusik bema ia kamonai bona lau itaia gauna bema ia itaia, do lau hemarai, a?’ Namona be inai oi laloa namonamo, Iesu ese ita ia raraia bona iseda kara ia diba.​—Apokalupo 3:15.

Lauma Dikadia Edia Hahediba Herevadia Dadaraidia

¹⁵ Lauma dikadia ese memero kekeni idia doridia badabada idia edia hahediba herevadia do idia badinaia totona. Hegeregere unai lauma dikadia idia gwau harihari edia ura gaudia idia mamia diba​—mauri mai ena gadara bona mai ena moale unai. Ena be idaunegai tauna, Mose, be Farao ena ruma bese tauna badana ta, to Dirava ia hamoalea totona ia ese “kara dika ena moale” ia dadaraia. (Heberu 11:​24-27) Lauma dikadia be oi idia henia diba gaudia oi dadaraidia be ia auka sisina, unai dainai oi goada karaia kara maoromaoro oi karaia totona be gau badana. Unai be ia momokani, badina ita ibounai dekenai kara dika ia noho bona nega momo iseda lalona ena ura be kara dika ita karaia. (Genese 8:21; Roma 5:12) Ita be mai iseda kara dika, aposetolo Paulo danu be sibona ia hagoadaia ena tauanina ena ura dikadia ese idia biagua garina.​—1 Korinto 9:27; Roma 7:​21-23.

16. Mahuta hebou karana idia karaia totona memero kekeni idia doridia neganai, edena bamona unai kara idia dadaraia diba?

¹⁶ Ena be emu uru taudia ese emu lalona idia ania ‘kara dika karaia totona hutuma muridiai’ do oi raka totona, to Dirava ese oi ia durua diba edia siahu bona edia kara kerere dalana oi dadaraidia totona. (Esodo 23:2; 1 Korinto 10:13) To Dirava ena hakaua herevadia oi kamonai henia be gau badana, iena hereva be emu lalona dekenai idia diho momokani. (Salamo 119:​9, 11) Namona be oi lalo-parara bema memero bona kekeni ruaosi be sibodia idia noho neganai, mahuta hebou urana do ia vara diba bona reana Dirava ena taravatu do idia utua. Kekeni ta ia gwau: “Egu turana merona bona lau ai noho hebou neganai, egu tauanina ia ura kara ta ia karaia, to egu harana ese lau ia hadibaia kara ma ta lau karaia totona.” Unai dainai, namona be oi lalo-parara kara haida do oi karaia be namo lasi, bona oi lalo-parara emu lalona ese oi ia koia diba. (Ieremia 17:9) Umui ruaosi be sibona umui noho lasi. (Hereva Lada-isidia 18:1) Lalokau hahedinaraia karadia edia hetoana do oi atoa. Bona gau badana be inai, Iehova idia lalokau henia bona iena taravatu idia matauraia bada taudia sibona oi bamodia.​—Salamo 119:63; Hereva Lada-isidia 13:20; 1 Korinto 15:33.

17. Dahaka ese memero kekeni ia durudia bena goada idia abia lauma dikadia edia hahediba herevadia idia dadaraidia diba?

¹⁷ Lauma dalanai oi idia durua bona oi idia hagoadaia diba Keristen bukadia idia karaia oi stadilaidia totona. Hegeregere, Memero Kekeni Edia Henanadai​—Haere Maorodia bukana, bona Mauri Hanaihanai Paradaiso Lalonai bukana dekenai, karoa ta ladana “Ita Hekwarahi, Kara Maoromaoro Karaia Totona.” Unai buka idia hahedinaraia Baibel sisiba be emu darana bona emu lalona dekenai idia diho momokani be namo, bena oi do ia hagoadaia. Inai oi laloaboio diba lasi, lauma dikadia ese inai tanobada idia biagua, unai dainai kara maoromaoro oi karaia be ia auka. Unai dainai oi goada karaia be gau badana. (Luka 13:24) Lauma dalanai emu goada oi habadaia. Namo lasi hutuma muridiai idia raka manoka bona gari taudia edia kara oi tohotohoa.

Dirava Ena Hahediba Herevadia amo Sibona Oi Hanamoa

¹⁸ Inai oi laloatao danu, Iehova ena hahediba herevadia oi badinaia neganai gau namona ta do oi reaia lasi. Ia ese oi ia lalokau henia momokani, bona unai dainai ia ese “sibomu do oi hanamoa dalana be oi [ia] hadibaia.” (Isaia 48:17) Unai dainai Iehova ena hahediba herevadia oi badinadia, bena do oi hisihisi lasi badina emu lalona ena mamina do ia dika lasi, sibona do oi matauraia noho, oi rogorogo kava lasi, sihari kava karana goreredia oi abia lasi, eiava unai bamona dika haida do oi davaria lasi. Iehova ia moale badina iena hesiai taudia edia kara dainai ia ese Satana ena hepapahuahu herevana ia hakoikoia diba, Satana ia gwau taunimanima be hedibagani idia davaria neganai Dirava do idia abidadama henia noho lasi. (Iobu 1:​6-12) Emu abidadama karana amo bema Iehova ena lalona oi hamoalea, ia ese tanobada do ia hahemaoro henia neganai do oi roho mauri diba, to iena taravatu idia dadaraia taudia iboudiai do idia mase.​—Hereva Lada-isidia 27:11; 1 Korinto 6:​9, 10; 1 Ioane 2:17.

19. Iehova ena hahediba herevadia edia namo idia laloa bada taudia ita bamoa karana ena hahenamo be dahaka?

¹⁹ Iehova ena kara idia dekenai idia moalelaia taudia bema oi bamodia, idia dekenai ia vara gauna amo diba do oi abia. Hahine ta be guna drag ia ania bona ia sihari kava, bona ia gwau: “Bema Iehova lau kamonai henia lasi, hari lau mauri noho lasi. Do lau adavaia gwauraia tauna be AIDS dainai ia mase vadaeni. Egu turadia gunadia iboudiai be AIDS gorerena dainai idia mase vadaeni eiava idia be kahirakahira do idia mase. Nega momo lau itadia dala dekenai, bona dina dina iboudiai Iehova lau tanikiu henia, iena orea taudia ia hakaulaidia taravatudia dainai, bona do ita helaga noho diba bema unai taravatu ita badinadia. Egu mauri ibounai amo, hari lau moale, egu lalona ia maino, bona lau noho namo.” Momokani, Iehova ena hahediba herevadia badinaia karana amo hanaihanai hahenamo ita davaria!

Dala Maorona Abia Hidi

²⁰ Umui memero kekeni e, umui ai hagoadaia hereva be inai: Dala maorona umui abia hidi, Iehova umui hesiai henia dalana unai. Bena dala maorona umui abia hidi murinai unai dala umui badinaia noho. (Iosua 24:15) Oibe, dala rua amo dala tamona sibona umui abia hidi diba. Iesu ia gwau dala badana ia noho​—rakalaia be haraga, badina sibodia edia ura idia badinaia. To unai dala be mase dekenai ia lao. Dala ma ta be maragi. Rakalaia be ia auka, badina hari tanobada be sihari kava karadia amo ia honu, bona lauma dikadia idia biagua dainai. To unai dala dekenai idia raka taudia be gabeai Dirava ena tanobada matamata namona dekenai do idia vareai. (Mataio 7:​13, 14) Oi be edena dala dekenai do oi raka? Daika ena hahediba herevadia do oi badinaia?

20, 21. (a) Memero kekeni ese idia abia hidi diba daladia rua be dahaka? (b) Dirava ena hahediba herevadia ita badinaia neganai dahaka namo ela bona hanaihanai do ita abia?

²¹ Abia hidi dalana be Iehova ese oi ia henia. Oi ia doria lasi ia oi hesiai henia totona. Dirava ena peroveta tauna, Mose, ia gwau: ‘Umui vairanai mase bona mauri lau atoa,’ bena ia hagoadadia, ia gwau: “Mauri umui abia hidi.” Unai abia hidi dalana amo “Iehova, emui Dirava do umui lalokau henia, ena hereva umui hakala henia, bona umui badinaia.” (Deuteronomi 29:2; 30:​19, 20) Namona be aonega dalana umui abia hidi, Dirava ena hahediba herevadia umui badinadia bona Dirava ena tanobada matamata hairaina lalonai mauri hanaihanai do umui abia.

Emu Haere be Dahaka?

◻ Lauma dikadia be daidia, bona edia hahediba herevadia be dahaka?

◻ Hari inai negai, lauma dikadia be edena dala amo edia hahediba herevadia idia hadibaia?

◻ Lauma dikadia edia hahediba herevadia be edena dala amo ita dadaraidia diba?

◻ Iehova ena hahediba herevadia ita badinaia ena hahenamo be dahaka?

3. Lauma dikadia be daidia, edia ura be dahaka, bona edia ura be edena bamona idia hagugurua toho?

5. Lauma dikadia edia kara be edena bamona, bona Dirava ena taravatu be edena dala amo idia hadikaia toho diba?

6. Lauma dikadia be koikoi dalana amo edia hahediba herevadia idia hadibaia ita hoalaia lasi ena badina be dahaka?

13. Sibomu dekenai dahaka henanadai oi henia be namo?

15. Lauma dikadia edia hahediba herevadia idia dadaraidia totona dahaka dainai Keristen taudia idia hekwarahi noho be gau badana?

18. Dirava ena hahediba herevadia badinaia karana ena namo haida be dahaka?

[Picture on page 16]

Utu-utu ia do vara lasi neganai, gwau-edeede anerudia bona edia natudia be dagedage bona kara bodaga karadia idia habadaia

[Picture on page 18]

Bema Iesu ese oi ura henia miusik ia kamonai do oi hemarai, a?