Iehova Ena Witness Taudia Tanobada Hegegemadai—Thailand

“RUHAIA mauri namona idia abia taudia edia tano.” Unai be Thailand ladana ena anina. Unai tano ena lalo-manada, gaukara namonamo taudia 57,000,000 edia lalohadai tomadiho dekenai be idauidau. Ena be Buddhist tomadihona ia goada bada, to Kerisendom ena tomadiho danu be unai Asia tanona ena sautist kahana ai. Unai taudia iboudiai be Dirava ena Basileia ena sivarai namona idia kamonai be namo.​—Mataio 24:14.a

Heau Siri Taudia be Sivarai Namona Idia Kamonai

Thailand bona Myanmar idia hakapua ororodia lalodiai be kamepa idauidau, bona Karen amo idia heau siri taudia 10,000 bona ma haida dekenai Baibel ena hereva momokani idia harorolaia bada. Unai gabu dekenai idia noho Karen ruma besena ta be Iehova ena Witness taudia. Idia be heau siri taudia bogaragidiai sivarai namona idia harorolaia. Edia haroro be edena bamona idia hamatamaia?

Lagani haida gunanai, tauhau ta be Anglican Dubu ia rakatania bona Iehova ena Witness ta ai ia lao. Unai dubu ena haroro tauna ese ia doridia dainai, unai tauhau ena varavara taudia ese idia dagedage henia. To, ia haheauka, bona gabeai iena ruma bese taudia edia dagedage be sisina sisina ia ore. Anglican Dubu ena haroro taudia ese idia hevasehalaia noho ela bona lagani rua gunanai, unai neganai edia sihari kava karadia dainai edia dagi amo idia kokidia. Unai neganai, dubu ena mamoe naria tauna be lasi, bona Witness tauna ena ruma bese bona varavara ma haida idia hoa bona idia dara doko. Idia 11 be dubu idia rakatania bona Witness taudia idia noidia Baibel stadi abia totona.

Unai stadi ia namo ia lao, bona heau siri taudia ma haida idia vareai danu. Hereva momokani ia bada ia lao, bena heau siri taudia edia kamepa dekenai ia aru lao sinavaina lalonai Witness matamatadia 17 be bapatiso idia abia. Moale bada gauna be lagani 88 tubuna hahinena ta be idia ida bapatiso ia abia!

Vidio Dainai Ia Ura Kamonai

Heau siri taudia bogaragidiai kamonai taudia momo idia noho. Lagani 1993 ena Memorial hebouna ai idia mai taudia be 57. Unai lagani ai, May neganai, sekit naria tauna ia vadivadi, bona iena hereva ta idia mai kamonai taudia be 67. Bona Watchtower Society ena vidio Jehovah’s Witnesses​—The Organization Behind the Name idia itaia totona hebou taudia be 250.

Heau siri taudia edia kamepa lalonai Baptist pasto tauna ena adavana be Witness taudia edia Baibel pablik tok dekenai ia mai bona idia gwauraidia Baibel siridia ia toredia. Ena adavana ia hamaoroa edia dubu lalonai idia kamonai loulou haroro herevadia dekenai ia hesiku. Ena tau be unai hereva dekenai ia moale lasi, ia gwau bema Iehova ena Witness taudia edia hebou dekenai ia lao noho, dubu taudia ma haida danu do idia lao. Unai hahine be hebou dekenai ma ia lao neganai, ena adavana be mai ena kaia ida ia lulua bona hebou dekenai ia torea gaudia bona Baibel bukadia ia gabua. To herevana, vidio idia hahedinaraia neganai, unai hahine be ma ia hebou lou. Gabeai unai hahine be ia itaia gauna ia hadibaia ena adavana dekenai. Unai tau be ena lalohadai ia haidaua, bona ia gwau ia ura vidio ia itaia, bena ia gwau ena toretore gaudia bona Baibel bukadia ia gabua dainai ia sori.

Unai dala ai Thailand dekenai taunimanima be sivarai namona idia kamonai. Unai amo “ruhaia mauri namona idia abia taudia edia tano” dekenai lauma dalana ai idia ruhadia.​—Ioane 8:32.

[Footnotes]

[Box on page 24]

TANO RIPOTINA Hesiai Laganina 1993

HARORO TAUDIA EDIA NAMBA BADANA: 1,434

WITNESS TAUNA TAMONA INAI NAMBA AI: 40,299

MEMORIAL AI IDIA HEBOU TAUDIA: 3,342

PIONEER TAUDIA EDIA AVERES: 232

BAIBEL STADI EDIA AVERES: 1,489

BAPATISO ABIA MATAMATA TAUDIA: 92

KONGREGESEN EDIA MOMO: 39

BRENS OPESI: BANGKOK

[Pictures on page 25]

Basileia harorolaia taudia ese sivarai namona idia harorolaia goadagoada

Brens opesi ginigunana, 1947

Bangkok dekenai, brens opesi matamatana vairanai, Betele taudia idia gini, February 8, 1992 ai unai opesi idia gwauhamatalaia