Emu Lalokau Mase Taudia—Do Oi Itadia Lou, A?

IENA sinana ia mase neganai, John ena lagani be 9 sibona. Gabeai, ia laloatao dahaka ia vara mase taudia guria rumana dekenai: “Ia totona laulau ta lau torea, bona hereva ta lau torea, lau noia guba dekenai ai ia naria. Tamagu dekenai unai toretore lau henia, mase mauana dekenai ia atoa totona, bona ena be ia mase to lau laloa unai hereva ginigabena be lau dekena amo ia abia dainai lau moale.”​—How It Feels When a Parent Dies, Jill Krementz ese ia torea.

Ita daradara lasi, ita diba John be iena sinana ia lalokau henia bada. Iena kara namodia ia herevalaidia murinai, ia gwau: “Sedira lau ura lasi iena kerere haida lau lalodia tao, to iena kara kererena ta lau gwauraia diba lasi. Egu mauri ibounai lalonai lau itaia hairai hahinedia iboudiai amo, ia be hairai herea.”

John bamona, taunimanima momo be edia lalokau mase taudia idia lalodia tao neganai idia moale, bona idia gwau idia ura bada idia itadia lou. Edith ena lagani 26 natuna merona be kensa dainai ia mase. Edith ia gwau: “Lau ura lau laloa egu natuna merona be gabu ta dekenai ia noho, to lau diba lasi edeseniai ia noho. Do lau itaia lou, a? Lau diba lasi, to lau ura do lau itaia.”

Unai be vaia taunimanima edia kara ta, bona momokani, taunimanima ia Havaraia Tauna mai lalokauna be unai kara dekenai ia hebogahisi. Unai dainai ia gwauhamata, nega do ia mai bona taunimanima milion momo be edia mase lalokau taudia ida do idia noho hebou lou. Dirava ena Hereva lalonai, mase taudia edia toreisi lou negana do ia mai gwauhamatana be nega momo idia torea.​—Isaia 26:19; Daniel 12:​2, 13; Hosea 13:14; Ioane 5:​28, 29; Apokalupo 20:​12, 13.

Daidia be Guba Dekenai Do Idia Toreisi Lou?

Namona be ita laloa, John ena helaro be iena lalokau sinana be guba dekenai ia ia naria. Dubu ai idia lao taudia momo be unai helaro eiava lalohadai idia abia. Unai lalohadai idia hamomokania toho totona, dubu gunalaia taudia bona welfea gaukara taudia haida be Baibel ena siri idia hakereredia.

Haheitalai ta be inai, mase taudia idia taitailaia taudia durudia gaukarana ia diba momo hahinena, Dr. Elisabeth Kübler-Ross, be iena buka On Children and Death lalonai, ia gwau: “Ita mase ena anina be iseda tauanina ita negea, iseda dabua gunana ta ita kokia oho hegeregerena, eiava daiutu ta amo ita lao bona ma daiutu ta ai ita vareai. Kohelete 12:7 dekenai ita duahia, ia gwau: ‘Kahu ese tano ia lou henia, ena oromana gunana ia abia lou, bona lauma be ia henia Diravana momokanina dekenai ia lou lao.’ Iesu ia gwau: ‘Lau be do lau lao, gabu ta do lau karaia hegaegae umui emui.’ Bona korosi dekenai ia noho henao tauna dekenai ia gwau: ‘Momokani, hari dina oi lau hamaoroa, Oi be lau danu Paradaiso dekenai do ita noho.’ ”

Atai siridia edia anina be iseda lalokau mase taudia be hari idia mauri noho bona guba dekenai ita idia naria, a? Namona be unai siri ta ta ita lalodia namonamo; Kohelete 12:7 dekenai ita hamatamaia. Ita itaia diba, unai hereva ia torea aonega tauna ia ura lasi unai Baibel bukana lalonai ia torea vadaeni herevana ia hakoikoia: “Badina be mauri taudia idia diba do idia mase; to mase taudia be gau ta idia diba lasi, bona edia ahuna be lasi, badina be taunimanima ese idia lalodiaboio.” (Kohelete 9:5) Taunimanima iboudiai idia mase neganai dahaka ia vara ia herevalaia. Bema ita laloa Dirava ia noho lasi idia abia dae taudia bona kudou-auka taravatu utua taudia be idia mase neganai Dirava dekenai idia giroa, unai be lalohadai namonamo karana, a? Lasi. Herevana ita laloa ita be kara namo taudia eiava kara dika taudia, to ita gwau diba lasi ita ta ia mase neganai unai bamona ia vara. Ita ta lasi be guba lalonai Dirava ida ita noho, unai dainai edena bamona ita gwau diba ia dekenai do ita lou lao?

Unai dainai, “lauma be ia henia Diravana momokanina dekenai ia lou lao” Baibel toretore tauna ese ia torea neganai, iena hereva ena anina be dahaka? Unai Heberu herevana “lauma” ia hahanaia neganai, ia be taunimanima ta ta edia toana idauna ta gauna ia herevalaia lasi. To Kohelete 3:19 dekenai, Dirava ena lauma ese ia rohea dainai Baibel toretore tauna ia gwau taunimanima bona animal “iboudiai edia lauma be hegeregere.” Ia hedinarai iena hereva ena anina be unai “lauma” be taunimanima bona animal edia tauanidia lalodiai ia noho mauri siahuna. Unai lauma be maoromaoro Dirava ena amo ita abia lasi. Iseda tanobada tamana bona sinana be ita idia havaraia neganai ita dekenai idia henia. Ma danu, mase neganai unai lauma be guba dekenai ia loaloa lasi, Dirava dekenai ia giroa lao totona. Unai hereva, “lauma be ia henia Diravana momokanina dekenai ia lou lao,” be hereva anina gwauraia dalana ta, anina be mase tauna ia mauri lou dalana be Dirava sibona dekenai ia noho. Ia sibona ena lalohadai hegeregerena do ia abia hidi, daika do ia laloatao bona do ia hatorea isi lou. Inai oi itaia, Baibel ese unai ia hahedinaraia namonamo Salamo 104:​29, 30 dekenai.

Iehova Dirava ena ura be Keriso murinai idia raka abidadama taudia haida sibodia, edia namba be 144,000, be guba maurina dekenai do idia toreisi lou bona Dirava ena lauma natudia ai do idia noho. (Apokalupo 14:​1, 3) Unai taudia be Keriso ida guba gavamanina ta do idia karaia, bona tanobada dekenai taunimanima do idia hanamodia.

Unai diba idia abia matamaia taudia be Iesu ena abidadama aposetolo taudia, idia dekenai ia gwau: “Egu Tamana ena ruma dekenai noho gabudia be momo herea, bema inai be lasi be do lau hamaoroa umui dekenai. Badina lau be do lau lao, gabu ta do lau karaia hegaegae umui emui. Bema lau lao, emui gabu ta do lau karaia hegaegae neganai lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.” (Ioane 14:​2, 3) Unai aposetolo taudia bona ma Keristen ginigunadia taudia idia mase, bona gau ta idia diba lasi ela bona Iesu ia mai bona guba dekenai toreisi lou maurina ena davana ia henidia. Unai dainai ita duahia, ia gwau Keristen abidadama dainai ia mase tauna ginigunana, Stefano, be “ia mase ia mahuta bamona.”​—Kara 7:​60, NW; 1 Tesalonika 4:13.

Tanobada Maurina Dekenai Idia Toreisi Lou Taudia

To ia badinai ia mase kara dika tauna dekenai Iesu ena gwauhamata be edena bamona? Unai negana ai Iuda taudia momo bamona, unai tau ia laloa Dirava ese Mesia ta do ia siaia, bona ia ese basileia ta do ia haginia bona tanobada ai Iuda besena dekenai maino bona noho namona do ia haginia lou. (Hanua Pavapavadia Ginigunana 4:​20-25 be Luka 19:11; Luka 24:21 bona Kara 1:6 ida oi hahegeregerea.) Ma danu, unai kara dika tauna ia gwau Iesu be Dirava ese ia abia hidi Tauna, Pavapava ai ia lao totona ia abia dae. To, unai negana ai, Iesu be idia samania tauna ai ia mase gwauraia dainai, toana be unai do ia vara lasi. Unai dainai Iesu be unai kara dika tauna ia hagoadaia totona, Iena gwauhamata be inai hereva amo ia hamatamaia: “Hari dina oi lau hamaoroa momokani. Oi be lau danu Paradaiso dekenai do ita noho.”​—Luka 23:​42, 43, NW.

Gado idauidau Baibel momo dekenai, unai siri idia hahanaia neganai comma be “hari dina” vairanai idia torea dainai, Iesu ena hereva idia ura idia lalo-pararalaia taudia idia hahekwakwanaidia. Iesu be unai dina lalonai paradaiso ta ia lao lasi. To, ia be dina toi ia mase bona gau ta ia diba lasi ela bona Dirava ese ia hatorea isi lou. Iesu ia toreisi lou bona guba dekenai ia daekau murinai, iena Tamana ena idibana kahana ai ia naria ela bona nega ia ginidae taunimanima edia Pavapava lohiana ia hamatamaia totona. (Heberu 10:​12, 13) Nega sisina murinai, Iesu ese ena Basileia lohia dalana amo taunimanima do ia hanamodia bona tanobada ibounai be paradaiso ai do ia halaoa. (Luka 21:​10, 11, 25-31) Unai neganai, kara dika tauna dekenai ia henia gwauhamatana do ia hagugurua, badina tanobada maurina dekenai do ia hatorea isi lou. Bona Iesu be unai tau danu do ia noho, badina unai tau ena dabu gaudia iboudiai dekenai do Ia durua, ia ese do ia durua danu iena mauri lalonai Dirava ena kara maoromaoro taravatudia do ia badinadia totona.

Momo Do Idia Toreisi Lou

Unai helalo-kerehai kara dika tauna bamona, taunimanima momo be tanobada dekenai do idia toreisi lou. Unai be Dirava ena ura, taunimanima ia havaradia neganai. Tau bona hahine ginigunadia be paradaiso umana lalonai ia atodia, bona ia hamaorodia tanobada do idia biagua. Bema Dirava idia kamonai henia noho, idia buruka lasi bona idia mase lasi. Dirava ese ia gwauraia negana ai, tanobada ibounai be idia biagua vadaeni, bona Adam bona ena goevadae natudia ese tanobada ibounai be paradaiso gabuna ai idia halaoa vadaeni.​—Genese 1:28; 2:​8, 9.

To, Adam bona Eva idia ura idia kara dika dainai, sibodia dekenai bona gabeai edia natudia dekenai mase idia mailaia. (Genese 2:​16, 17; 3:​17-19) Unai dainai Baibel ia gwau: “Tau tamona [Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika.”​—Roma 5:12.

Tanobada taudia iboudiai amo tau tamona sibona ia vara neganai, kara dika ia abia lasi. Unai be Dirava ena Natuna goevadaena, Iesu Keriso; iena guba maurina be Iuda ena rami-hebou kekenina, Maria, ena bogana lalonai Ia atoa. Iesu ia kara dika lasi bona idia hamasea ena badina be lasi. Unai dainai, iena mase be mauri davana “tanobada ena dika kokia” totona. (Ioane 1:29; Mataio 20:28) Unai dainai Iesu ia gwau diba: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.”​—Ioane 11:25.

Unai dainai, oibe, oi bona emu lalokau mase taudia do umui noho hebou lou negana umui naria diba, to namona be oi abidadama Iesu be emu Mauri Davana Henia Tauna bona ia be Dirava ese Ia abia hidi Pavapavana dainai oi badinaia. Nega sisina murinai, Dirava ena Basileia ese tanobada amo dika ibounai do ia kokia. Iena lohia dalana idia dadaraia taudia iboudiai be do Ia hadikadia ore. To, Dirava ena Basileia henunai do idia noho taudia iboudiai be do idia roho mauri, bona inai tanobada be paradaiso ai idia halaoa totona gaukara bada do idia karaia.​—Salamo 37:​10, 11; Apokalupo 21:​3-5.

Bena toreisi lou ia matamaia negana be do ia ginidae. Do oi noho, mase taudia oi abidia dae totona, a? Do oi noho eiava lasi be hari oi karaia karana hegeregerena. Iehova ena Basileia be iena Natuna, Iesu Keriso, amo do ia lohia, bona hari unai lohia dalana idia badinaia taudia iboudiai be hahenamo bada do idia davaria.