Kara Hametaua Lasi Dalana Oi Habadaia

“Emui manau bona [hametaua lasi] kara taunimanima ibounai edia vairanai do umui hedinaraia. Lohiabada be kahirakahira ia ginidae.”​—FILIPI 4:5.

1. Hari inai negai, dahaka dainai kara hametaua lasi karana ita hahedinaraia be ia auka?

“KARA ia hametaua lasi tauna”​—England toretore tauna Sir Alan Patrick Herbert ia gwau unai bamona tauna ia noho lasi. Oibe, reana nega haida oi laloa inai hekwakwanai bada tanobadana dekenai taunimanima ta lasi be hametaua lasi dalana amo kara ia karaia diba. Baibel ese inai “nega dokonai” taunimanima be idia “dagedage,” “idia kara kava,” bona “idia hebogahisi lasi,” ia gwauraia guna​—anina be taunimanima be hametaua dalana amo kara idia karaia. (2 Timoteo 3:​1-5) To, Keristen momokani taudia be hametaua lasi karana idia laloa bada, idia diba unai be Dirava ena amo ia mai aonegana ena toana. (Iakobo 3:17) Ita diba, ena be kara hametaua tanobadana lalonai ita noho, to kara maoro ita karaia diba. Oibe, Filipi 4:5 ai, aposetolo Paulo be lauma helaga ena siahu amo ia torea sisiba herevana ita badinaia toho, ia gwau: “Emui manau bona [hametaua lasi] kara taunimanima ibounai edia vairanai do umui hedinaraia.”

2. Filipi 4:5 dekenai, aposetolo Paulo ena hereva be edena bamona ita ia durua bena ita diba ita be kara hametaua lasi taudia eiava?

² Paulo ena hereva ese ita idia durua bena do ita diba iseda kara be hametaua lasi dalana amo ita karaia eiava. Unai be siboda eda kara ita laloa karana lasi; to haida ese iseda kara edena bamona idia laloa, ita be edena bamona idia edia matana ai. Unai be gau badana. Phillips Baibel lalonai unai siri ia hahanaia inai bamona: “Namona be taunimanima do idia diba oi be kara hametaua lasi tauna.” Namona be ita ta ta ibounai sibona sibona dekenai ita gwau, ‘Lauegu kara be edena bamona idia laloa? Idia diba lau be kara hametaua lasi, ha-aukaia lasi, bona manau tauna ta, a? Eiava idia diba lauegu kara be ia auka, lau hebogahisi lasi, eiava lauegu ura sibona lau karaia?’

3. (a) Inai hereva “kara hametaua lasi,” be Greek hereva ta amo idia hahanaia. Unai Greek hereva ena anina be dahaka, bona dahaka dainai unai kara be namo herea? (b) Keristen tauna be edena bamona ena kara hametaua lasi karana ia habadaia diba?

³ Bema Iesu Keriso ena kara ita tohotohoa bada, iseda hametaua lasi karana do ia bada danu. (1 Korinto 11:1) Inai tanobada dekenai ia noho neganai, Iesu be dala goevadaena amo iena Tamana ena hametaua lasi karana ia hahedinaraia. (Ioane 14:9) Oibe, Paulo ena toretore lalonai ia ese “Keriso ena manau bona [hametaua lasi] kara” ia gwauraia neganai, manau hahanaia totona ia ese Greek hereva (e·pi·ei·kiʹas) ia torea, bona ena anina danu be “kara hametaua lasi” eiava, “ha-aukaia lasi.” (2 Korinto 10:​1) The Expositor’s Bible Commentary buka lalonai ia gwau, “T[aravatu] M[atamatana] lalonai unai be tau ta ena lalohadai bona kara toana korikori ia hahedinaraia namonamo herevana ta.” Ia gwauraia karana be namo herea momokani dainai, diba tahua tauna ta ese unai hereva ia hahanaia “hametaua lasi karana mai digarana.” Vadaeni, hari, ena Tamana hegeregerena, Iesu ese hametaua lasi karana ia hahedinaraia daladia toi ita lalodia. Unai amo reana ita diba edena bamona iseda hametaua lasi karana ita habadaia diba.​—1 Petero 2:21.

‘Dika Ia Gwauatao’

⁴ Ena Tamana hegeregerena, Iesu ese ia hahedinaraia ia be kara hametaua lasi tauna, badina ‘dika ia gwauatao’ loulou. (Salamo 86:5) Inai oi laloa, Iesu idia dogoatao bona idia hahemaoro henia hanuaboina dekenai, Iesu ena turana namona, Petero, be nega toi Iesu ia gorea. Guna Iesu ia gwau: “Taunimanima edia vairana dekenai lau do ia gwauraia hedinarai lasi tauna be lauegu Tamana, guba dekenai ia noho, ena vairana dekenai, ia do lau gwauraia hedinarai lasi.” (Mataio 10:33) Iesu be mai ena kara auka bona hebogahisi lasi karana amo ia gwau unai hereva be mai anina Petero dekenai, a? Lasi; Ia toreisi lou murinai, Iesu be Petero ia vadivadi henia, reana ia karaia badina unai helalo-kerehai, lalohisihisi aposetolo tauna ia hamoalea bona ia hagoadaia totona. (Luka 24:34; 1 Korinto 15:5) Daudau lasi murinai, Iesu ese Petero dekenai gaukara maduna badana ia henia. (Kara 2:​1-41) Unai neganai ia ese hametaua lasi karana mai digarana ia hahedinaraia momokani! Iehova ese Iesu ia abia hidi taunimanima iboudiai edia Hahemaoro Tauna ai ia lao totona, unai ita diba neganai ita moale, ani?​—Isaia 11:​1-4; Ioane 5:22.

5. (a) Mamoe bamona taudia ese elda taudia be edena bamona idia gwauraidia be namo? (b) Hahemaoro gaukara idia do karaia lasi neganai, elda taudia ese edena hereva do idia riviulaia be namo, bona badina be dahaka?

⁵ Kongregesen lalonai, elda taudia be hahemaoro gaukara idia karaia neganai, idia goada karaia Iesu ena hametaua lasi karana idia tohotohoa totona. Idia ura lasi mamoe taudia ese idia gari henidia bona dika davana henia taudia idia gwauraidia. To, idia ura Iesu ena kara idia tohotohoa, unai neganai mamoe bamona taudia do idia gari lasi badina idia diba idia be mai edia lalokau mamoe naria taudia. Hahemaoro gaukara idia karaia neganai, idia goada karaia hametaua lasi karana idia karaia totona, bona kara dika idia gwauatao totona. Unai gaukara idia do karaia lasi neganai, heduru hereva idia abia totona, elda taudia haida be July 1, 1992, Gima Kohorona amo “Iehova, Dala Maoronai ‘Tanobada Ibounai Ia Hahemaoro Henia Tauna’ ” bona “Elda Taudia e, Mai Maoromaoro Ida Hahemaoro Karaia” sivaraidia idia riviulaidia. Unai amo idia ese Iehova ena hahemaoro dalana idia laloatao: “Kerere ia noho neganai ia hahemaoro henia, to bema mai ena dala hebogahisi ia hahedinaraia.” Hahemaoro gaukara karaia neganai, bema dala ia noho hebogahisi idia hahedinaraia totona, unai be kerere lasi. (Mataio 12:7) Idia kara auka bona idia hebogahisi lasi be kerere. (Esekiel 34:4) Hahemaoro maoromaoro karaia totona, bema elda taudia be mai goada danu lalokau, bona hebogahisi dalana amo idia karaia, do idia hahemaoro kerere lasi.​—Mataio 23:23; Iakobo 2:13 itaia danu.

Idia Vara Gaudia Hegeregeredia Dala Idauidau amo Kara Idia Karaia Diba

⁶ Iehova hegeregerena, kara matamatana ta ia vara neganai, Iesu ese karaharaga ena karaia dalana ia haidaua eiava dala idauidau amo unai kara ia karaia diba. Nega ta ai, Idau Bese hahinena ta ena natuna kekeni dekenai demoni ia vareai dainai, hahine ese Iesu ia noia do ia hanamoa totona. Do ia durua lasi be dala toi amo ia hahedinaraia guna​—ginigunana, ia haere henia lasi; iharuana, ia gwau Dirava be Idau Bese Taudia dekenai Iesu ia siaia lasi, to Iuda taudia dekenai ia siaia; bona ihatoina, mai ena hebogahisi haheitalai herevana amo ia hahedinaraia do ia durua lasi. To unai hahine ia noinoi henia loulou, unai amo ena abidadama bada karana ia hahedinaraia. Unai kara idauna dainai, Iesu ia lalo-parara taravatu hegeregerena ia karaia be hegeregere lasi; namona be unai taravatu ia hanaia siahuna ia laloa bona dala idauna ta amo kara ta ia karaia.a Ena be nega toi Iesu ia gwau do ia durua lasi, to gabeai ia durua. Ia ese unai hahine ena natuna kekenina ia hanamoa!​—Mataio 15:​21-28.

7. Tama sina be edena dala amo hametaua lasi karana idia hahedinaraia diba, bona badina be dahaka?

⁷ Ia maoro neganai, taunimanima idia diba ita be dala ita ha-aukaia lasi to dala idauna ta amo kara ita karaia diba, a? Tamana bona sinana be nega momo unai bamona hametaua lasi karana idia hahedinaraia be gau badana. Natudia ta ta iboudiai idia idauidau dainai, tama sina ese natuna ta idia kara henia dalana be namo to reana ma natuna ta dekenai ia hegeregere lasi. Danu, natudia idia tubu noho lalonai, edia ura be idauidau danu. Natudia be ruma dekenai do idia ginidae horana do idia haidaua, a? Ruma bese durua totona, stadi be dala idauna ta amo do idia karaia be namo, a? Kerere maragina ia vara neganai, bema tamana eiava sinana idia badu haraga, gabeai idia ura idia manau bona edia kara idia hamaoromaoroa, a? Bema tamana bona sinana be dala idia ha-aukaia lasi to idia manau, edia natudia do idia habadudia kava lasi, bona natudia edia hetura karana Iehova dekenai do ia dika lasi.​—Efeso 6:4.

8. Teritori dekenai taunimanima durudia totona, kongregesen elda taudia be dahaka idia karaia diba kara idaudia amo taunimanima kara henidia dalana idia gunalaia totona?

⁸ Danu, kara matamatana ta ia vara neganai, elda taudia be dala idauidau amo kara idia karaia diba be namo, to Dirava ese ia gwauraidia taravatudia idia utudia lasi. Haroro gaukara umui gunalaia neganai, umui gima noho teritori lalonai taunimanima edia kara toana idia idau umui itaia totona, a? Teritori dekenai, reana taunimanima edia mauri dalana idia idau dainai, haroro gaukara be adorahi kahanai, dala dekenai, eiava telefon amo karaia dalana do umui habadaia. Unai dala idauidau ese ita idia durua iseda haroro gaukara do ita karaia namonamo totona. (Mataio 28:​19, 20; 1 Korinto 9:26) Danu, Paulo ese taunimanima idauidau ia haroro henidia totona, ia ese dala idauidau ia gaukaralaia. Ita be unai bamona ita karaia, a? Hegeregere, iseda haroro teritori dekenai, taunimanima ita durudia totona, edia tomadiho bona edia sene karadia ita diba sisina, a?​—1 Korinto 9:​19-23.

9. Hekwakwanai idia vara neganai, dahaka dainai ia maoro lasi bema elda tauna be hanaihanai ia ura guna ia karaia dalana ia badinaia noho?

⁹ Hari inai nega dokona lalonai idia vara hekwakwanai be idia momo idia lao, bona mamoe oreana ese ia davaria hekwakwanai haida be metau bona dika dainai, durudia totona mamoe naria taudia be dala idauidau amo idia kara henidia be gau badana. (2 Timoteo 3:1) Elda taudia e, inai be taravatu dekenai kara auka karaia negana lasi! Hekwakwanai idia vara neganai, bema elda tauna be guna ia gaukaralaia dalana be hari ia hegeregere lasi, eiava “hesiai tauna mai ena kamonai bona mai ena kara maoromaoro” oreana be unai hekwakwanai hanaia totona heduru hereva matamatadia idia halasia, namo lasi do ia ura dala gunana ia badinaia noho. (Mataio 24:45; Kohelete 7:​10; 1 Korinto 7:31 itaia danu.) Mai ena abidadama elda tauna ta be ia ura lalo-metau bada taihuna ia durua, bona unai taihu ia ura dikadika ta ese ia kamonai henia. To, elda tauna ia laloa taihu ena lalo-metau karana be gau badana lasi bona ia henia heduruna be hegeregere lasi, badina ia laloa unai be hekwakwanai maragina sibona. Gabeai, Watch Tower Society ese Baibel amo heduru sivarai idia halasia bona unai ese taihu ena hekwakwanai ia kikilaia. Unai elda tauna ese nega ia atoa unai taihu do ia hereva henia totona, bona unai sivarai matamatana ia badinaia bona taihu ena lalo-metau karana dainai ia hebogahisi henia. (Tesalonika Ginigunana 5:​14, 15 itaia.) Unai be hametaua lasi karana momokani!

10. (a) Elda bona elda edia orea taudia idia manada heheni karana be edena bamona idia hahedinaraia diba? (b) Bema elda taudia haida be kara hametaua taudia, elda edia orea taudia be dahaka do idia karaia be namo?

¹⁰ Danu, namona be elda taudia be sibodia edia ura sibona idia laloa lasi, to elda haida edia ura idia abia dae danu. Elda edia orea taudia idia hebou negadiai, unai hebou dekenai elda tamona sibona do ia hereva momo be namo lasi! (Luka 9:48) Unai hebou ia gunalaia tauna be sibona ena hereva ia biagua namonamo unai do ia karaia garina be gau badana. Dala ta idia abia hidi neganai, bema elda edia orea taudia amo elda tamona eiava rua ese idia abia hidi dalana idia ura henia lasi, do idia hereva momo lasi elda ma haida ese edia ura do idia abia hidi totona. Bema elda edia orea taudia idia abia hidi dalana be Baibel ena taravatu ia utua lasi, unai elda tamona eiava rua ese dala do idia ha-aukaia lasi, to do idia laloatao elda taudia be hametaua lasi karana idia karaia be gau badana. (1 Timoteo 3:​2, 3) To danu, namona be elda edia orea taudia idia laloatao, Paulo ese Korinto kongregesen ia sisiba henia badina dala idia hametaua ‘kavakava taudia edia hereva idia abia dae,’ unai taudia ese sibodia idia gwauraia idia be “apostolo taudia namo herea.” (2 Korinto 11:​5, 19, 20) Unai dainai, bema elda ta be lalona auka bona sibona ena ura karana amo ia hereva, namona be karaharaga ena bamodia, elda taudia ese do idia sisiba henia, to manau bona hebogahisi dalana amo do idia karaia.​—Galatia 6:1.

Siahu Oi Gaukaralaia Hametaua Lasi Dalanai

¹¹ Iesu be tanobada dekenai ia noho neganai, Dirava ese ia henia siahuna ia gaukaralaia dalana amo ia hahedinaraia ena kara be hametaua lasi dalanai ia karaia. Iena nega lalonai idia noho tomadiho gunalaia taudia amo ia idau herea! Inai oi laloa. Dirava ena taravatu ia gwau Sabati dinana dekenai gaukara ta do idia karaia lasi, au danu do idia gogodia lasi. (Esodo 20:10; Numera 15:​32-36) Tomadiho gunalaia taudia idia ura taunimanima ese taravatu idia badinaia dalana idia biagua. Sabati dekenai taunimanima be dahaka idia abia isi diba idia gwauraia hedinarai. Taravatu idia karaia, idia gwau: suke au ena huahua kakorodia rua edia metau ia hanaia gauna idia abia isi diba lasi. Danu, idia gwau tamaka mai ena ikoko idia karaia diba lasi, badina aedia idia abia isi neganai unai ikoko edia metau dainai unai ena anina be idia gaukara! Sabati dekenai Dirava ese taravatu ia henia, to taunimanima idia gwau, rabi taudia ese ma taravatu 39 idia gwauraia bona unai taravatu dekenai hereva maragidia momo idia atoa kau. To, Iesu ena kara be idau, ia ura lasi taunimanima biagudia totona ia hahemaraidia, bona idia guidia taravatu momo, bona idia badinaia diba lasi mauri taravatu aukadia, ia henidia lasi.​—Mataio 23:​2-4; Ioane 7:​47-49.

12. Dahaka dainai ita gwau diba Iesu ese Iehova ena kara maoromaoro taravatudia ia haidaudia lasi?

¹² Vadaeni, bema ita gwau, Iesu be Dirava ena kara maoromaoro taravatu ia lalodia bada lasi, unai be maoro, a? Lasi! Ia diba bema taunimanima be unai taravatu ese ia gwauraia dala maorodia idia badinaia momokani, unai taravatu be mai anina bada. Taunimanima biagudia totona, Farisea taudia be taravatu momo idia gwauraidia, to Iesu ia ura taunimanima edia kudouna ia hamarerea. Hegeregere, Dirava ena taravatu ta ia gwau ‘heudahanai karadia ita rakatania,’ bona ia diba unai taravatu ita haidaua diba lasi. (1 Korinto 6:18) Unai dainai, Iesu ese taunimanima ia sisiba henidia heudahanai do ia havaraia diba lalohadaidia idia koudia totona. (Mataio 5:28) Unai hadibaia gaukarana karaia totona, aonega bona lalo-parara ia gaukaralaia bada ena namo be taravatu ha-aukaia bona taravatu badinaia daladia momo gwauraia karana ena namo ia hanaia momokani.

13. (a) Dahaka dainai ia namo lasi elda taudia be taravatu idia ha-aukaia, bona idia haidaua diba lasi taravaudia bona oda idia karaidia? (b) Edena kara dekenai taunimanima edia lalona ena mamina hegeregerena idia karaia bona ita matauraidia be gau badana?

¹³ Hari inai negai, gaukara maduna idia abia tadikakadia idia ura taunimanima edia kudouna idia hamareredia. Unai dainai, idia ha-aukaia bona idia haidaua diba lasi taravatudia idia karaia lasi, eiava sibodia edia lalohadai bona sibodia idia gwauraia herevadia be taravatu ai do idia halaodia lasi. (Daniel 6:​7-16 itaia.) Nega ta ta dekenai, dabua bona tauanina toana dekenai, dala namona amo bona nega korikori dekenai sisiba ita idia henia be maoro, to bema elda ta ia hereva momo taunimanima be ia ena ura idia badinaia totona, eiava sibona ena lalohadai ia gwauraia momo, taunimanima be kara hametaua tauna do idia gwauraia. Oibe, kongregesen taudia iboudiai be taunimanima biagua toho karana idia dadaraia be gau badana.​—2 Korinto 1:24; Filipi 2:12 itaia danu.

14. Ia ura taunimanima ese dahaka idia karaia ia laloa neganai, Iesu be edena bamona ia hahedinaraia ia be kara hametaua lasi tauna?

¹⁴ Elda taudia be reana sibodia edia kara ta do idia tahua totona, idia gwau: ‘Lau ura taunimanima idia badinaia dalana lau gwauraia neganai, dala lau hametaua lasi, a?’ Iesu be unai bamona. Hanaihanai ia ese ena hahediba taudia ia hadibadia bema kara ta be mai edia kudouna ibounai ida idia karaia, edia hekwarahi ia laloa bada. Ogogami vabuna ese moni maragi ia henia dainai ia hanamoa. (Mareko 12:​42, 43) Maria be davana bada gauna ia henia, bona ena hahediba taudia be idia maumauraia neganai, Iesu ese idia ia gwau henidia, ia gwau: “Umui rakatania. . . . Ia diba gauna ia karaia.” (Mareko 14:​6, 8) Ena be ena hahediba taudia ese iena hereva idia badinaia namonamo lasi, to kara hametaua lasi karana ia karaia noho. Hegeregere, idia dogoatao hanuaboina dekenai, ia lalodia bada aposetolo taudia toiosi ia hamaorodia idia bamoa bona idia noga bona idia gima noho, to ena hereva idia badinaia lasi badina idia mahuta loulou. To, mai ena hebogahisi danu, ia gwau: “Lauma ia ura goada, to tauanina ia manokamanoka.”​—Mareko 14:​34-38.

15, 16. (a) Dahaka dainai elda taudia idia naria namonamo mamoe orea taudia be hereva amo idia doridia eiava idia dagedage henidia lasi totona? (b) Abidadama taihuna ta ia laloa haida be edia gaukara idia karaia namonamo lasi, to dahaka dainai ena lalohadai ia haidaua?

¹⁵ Momokani, ‘do idia raka goada’ totona Iesu ese ena hahediba taudia ia hagoadadia. (Luka 13:24) To nega ta lasi ia doridia unai idia karaia totona! Ia hasiahudia, haheitalai namona ia karaia, ia hakaudia, bona edia kudouna ia hamareredia toho. Iehova ena lauma siahuna dekenai ia abidadama, ia diba unai amo heduru do idia abia noho. Hari inai negai, namona be elda taudia be ia hegeregerena idia karaia, mamoe orea taudia idia hagoadadia mai edia lalona ibounai ida Iehova idia hesiai henia totona, namo lasi edia kerere dainai eiava hemarai mamina dainai idia doridia, bena idia laloa edia hesiai gaukara Iehova dekenai be ia hegeregere lasi, eiava idia laloa ia ura henidia lasi. Bema hereva auka amo idia doridia, hegeregere idia gwau “gaukara habadaia, gaukara habadaia, gaukara habadaia!” reana edia goada ibounai danu idia gaukara vadaeni taudia do idia lalohisihisi. Madi, bema elda ta ena kara dainai taunimanima idia gwau ia idia “hamoalea be ia auka”​—ia be kara hametaua tauna!​—1 Petero 2:18.

¹⁶ Ita ura lasi haida edia kara dainai ita lalohisihisi bema ita laloa edia gaukara be bada lasi! Taihu ta be ena gorere sinana naria totona, ia bona adavana be misinari gaukara idia rakatania murinai, ia toretore, ia gwau: “Hari inai negai, kongregesen lalonai ai gaukara pablisa taudia emai dala be ia auka. Guna ai be sekit bona distrik naria gaukara ai karaia, bona ai idia hametaua gaudia be momo lasi, to murinai lalo-hekwarahi gaudia ai davaria. Hegeregere, guna, inai bamona lau laloa, ‘Dahaka dainai unai taihu be hari hua ena henia gauna korikorina ia henia lasi? Iseda Basileia Gaukara pepana ia duahia lasi, a?’ Hari lau diba vadaeni. Haida be idia hekwarahi bada herea [haroro gaukara] dekenai idia lao totona, badina edia dala ia auka.” Namona be iseda tadikaka idia karaia diba gaukarana dainai ita hanamodia, idia karaia lasi karana dainai ita hahemaoro henidia be namo lasi!

17. Hametaua lasi karana dekenai, Iesu ena haheitalai namona be dahaka?

¹⁷ Iesu ese ena siahu be hametaua lasi karana amo ia gaukaralaia dalana ma ta ita laloa. Ena Tamana hegeregerena, Iesu ese ena dagi siahuna ibounai be sibona dekenai ia dogoatao lasi. Ia danu be gaukara haria tauna badana, bona iena hesiai oreana ia abia hidi tanobada dekenai “ena kohu ibounai” ia naria totona. (Mataio 24:​45-47) Bona haida edia lalohadai herevadia ia ura kamonai henidia. Nega momo ia idia kamonai henia taudia dekenai ia gwau: “Edena bamona oi laloa?” (Mataio 17:25; 18:12; 21:28; 22:42) Hari inai negai, Keriso murinai idia raka taudia iboudiai ese unai bamona idia karaia danu be namo. Ena be dagi siahuna idia abia, to namo lasi haida edia hereva idia ura lasi kamonai henia. Tama sina e, kamonai! Headava tatau e, kamonai! Elda taudia e, kamonai!

18. (a) Edena bamona do ita diba ita be kara hametaua lasi taudia eiava? (b) Namona be ita ta ta iboudiai ita goada karaia dahaka do ita karaia totona?

¹⁸ Oibe, ita ta ta iboudiai ita ura “taunimanima do idia diba ita be kara hametaua lasi taudia.” (Filipi 4:​5, Phillips) To edena dala amo do ita diba taunimanima be unai bamona ita idia laloa? Inai oi laloa, nega ta ai, Iesu ia ura diba taunimanima be edena bamona ia idia laloa, unai dainai ia idia bamoa taudia, mai edia abidadama taudia unai, ia henanadai henidia. (Mataio 16:13) Iena kara ita tohotohoa be namo, ani? Bema oi ura diba taunimanima idia laloa oi be kara hametaua lasi tauna, bona kara ha-aukaia lasi tauna eiava lasi, gari lasi dekenai oi do ia haere henia tauna ta oi henanadai henia diba. Iesu ese kara ia hametaua lasi, namona be ita ta ta iboudiai be dala idauidau amo iena kara tohotohoa karana ita habadaia! Unai be mai anina bada bema ita be mai iseda dagi taunimanima ita hakaudia totona; namona be hanaihanai Iehova bona Iesu edia kara ita tohotohoa, hanaihanai kara hametaua lasi karana amo ita gaukara, taunimanima edia dika ita gwauatao totona ita haraga, bona bema ia maoro neganai, idia dekenai ita hebogahisi, eiava dala ita ha-aukaia lasi karana ita karaia. Oibe, namona be ita ta ta iboudiai ita goada karaia ‘kara hametaua lasi’ taudia ai ita lao totona!​—Tito 3:2.

[Footnotes]

Edena Bamona Do Oi Haere?

◻ Keristen taudia idia ura kara idia hametaua lasi ena badina be dahaka?

◻ Iesu be dika ia gwauatao; elda taudia be edena dala amo idia tohotohoa diba?

◻ Dahaka dainai ita be Iesu bamona dala idauidau amo kara ita karaia diba be namo?

◻ Siahu ita gaukaralaia neganai edena bamona hametaua lasi karana ita hahedinaraia?

◻ Dahaka ita karaia diba bema ita ura diba ita be kara hametaua taudia eiava lasi?

4. Edena dala amo Iesu ese ia hahedinaraia ia ura ‘dika ia gwauatao’?

6. Demoni be ena natuna kekeni dekenai ia vareai Idau Bese hahinena ia kara henia neganai, Iesu ese hametaua lasi karana be edena bamona ia hahedinaraia?

11. Iesu ena nega lalonai, Iuda tomadiho gunalaia taudia ese edia siahu idia gaukaralaia dalana bona Iesu ese iena siahu ia gaukaralaia dalana edia idau be dahaka?

[Picture on page 15]

Iesu ese helalo-kerehai tauna Petero ena dika ia gwauatao haraga

[Picture on page 16]

Hahine ta ese abidadama bada karana ia hahedinaraia neganai, Iesu ia diba dala idauna ta amo kara ia karaia be namo

[Pictures on page 18]

Tama sina e, kamonai!

Headava Tatau e, kamonai!

Elda taudia e, kamonai!